Ke Aloha Aina, Volume VII, Number 7, 16 Pepeluali 1901 — Page 6

KE ALOHA AINA

POAONO, FEBERUARI 16, 1901.

 

(Mai ka aoao 5 mai)

-------------------

I ka wa a ka Albert e hooko mo ana no ke awa kumoku, ua haawi mai la na papu kaua mauka o ka aina i na kipu aloha, i ukali ia mai e na leo kanike o na bele mai na puoa mai o na luakini like ole o ke kulanakauhale.  O ka moku lawe hae kaulana o Nelekona, Victory, ua haawi pu mai la oia i na kipu aloha me kona mau pu kahiko, a o ka bana maluna ona ua poha mai la kona leo kanikau walohia no kona moiwahine aloha.

O na moku topido e ukali ana ua hoi aku la lakou no ko lakou uwapo, a o ka Albert hoi ua moku iho la oia mawaho mai o ka pa kapili moku Clarence.  Ua hookau ia mai la he hookahi haneri koa marina maluna ona no ke kiai ana ia Vitoria.  Ua hoomalamalamaia kahi a ka moiwahine e waiho ana me na kukui uwila a mawaena o na aliimoku e ku kiai ana nona o Adimarala Seymour, ke ahikanana o ke kahua kaua o Kina, a me Kapena Lambton kekahi kaeaea o ke kahua kana o Aferika Hema.

Ua ku pu iho na moku o ka Moi, Emepera a me ka ohana alii, a hoohala iho la na mea a pau ia po maluna o ka ili o ke kai.  O na waapa mokuahi i hoopihaia me na koa ua kiai ae lakou i na moku alii ia po.

O ka puulu kanaka nui hewahewa i hiki aku i Portsmouth, ua manao ia ua hiki aku no ia i ka 100,000.  O na taona a pau e ku ana ma ia mau kapakai ua hoopiha me na kanaka, a o na kaaahi hoi ua hiki ole ia ke hoomalu mai i na puulu kanaka nui hewahewa e aumeume ana no ka loaa ana ia lakou he mau wahi maloko o na kaaahi no ka lawe ana aku i Ladana, a ua hui aku a hui mai na luna aupuni kiekie me na makaainana haahaa loa.

 

KAMOE KE ALAHELE NO LADANA MA

LUNA O KA LIO AHI.

 

Portsmouth, Feb. 2.  Mamua o ka hora 9 o keia kakahiaka ua hoolele ia mai la ke kino make o ka moiwahine mai ka moku alii Albert mai no luna o kekahi kaa kuikawa a nana i lawe aku i kahi o ke kaaahi alii’e kali mai ana, a ioko o ka leo kumakena o na pu mai na papu mai i haalele iho ai ke kaa alii me ka hiwahiwa a ka lahui e moe oni ole ana maluna ona, he ehiku minute i koe a kani ae ka hora 9.

He anaina pule kai malama ia maluna o ka Albert mamua o ka hooleleia ana mai o ka pahu kupapau, a ua akoakoa hou ae ka ohana alii malaila.  Ua lawe hou ae na kanaka o na moku kaua i ko lakou mau kulana maluna o na i-a a me na oneki no ka haawi ana mai i na hoohanohano hope i ka moiwahine a lakou i haaheo nui ai, a owaka koke mai la na olapa ahi mai ka waha mai o ko lakou mau pukuniahi me ka hoopaiakuli ana ae i ke lewa me ko lakou mau leo nakolokolo i ka wa o ka pahu e hapaiia ana mai ka moku aku no luna o ke kaa.  Ua uhiia ka uwapo me na kahakahana kauikau me kekahi anaina kanaka nui, a iloko o ka ua a me ka makani e pa ana, aole lakou i haalele aku i ko lakou kulana a hiki i ka haalele ana mai la o ke kaa ma ka hora 8:53 no Ladana.

 

HOEA KE KINO O KA MOIWAHINE VI-

TORIA I LADANA.

 

  Ladana, Feb. 2.  Ma ka hora 11 ua ike ia aku la ke kaaahi alii e holo mai ana no kahi hoolulu Victoria.  Ua wehe ae la na mea a pau i ka papale a iloko o ka manawa pokole mahope iho ua hoea mai la ua kaaahi nei me ke kino make a ka moiwahine no kahi hoolulu.  O ke kaaahi hoi e lawe ana i ka Moi a me ka Moiwahine, Emepera Wiliama a me ka ohana alii e ae e ukali kokoke mai ana no ia mahope o ka kaa o ka moiwahine.

Ladana, Feb. 2.  O ka Moi a me ka Moiwahine, Emepera Wiliama a me na Keikialii a me na alii e ae mahope koke iho o ko lakou hoea ana aku ma kahi hoolulu kaaahi ua lawe ia aku la lakou no kahi a ka moi o Potugala, Helene a me Belegiuma a me kekahi poe kiekie e ae e akoakoa ana.

Ladana, Feb. 2. Aole he hiohiona nani i ike mua maanei, e like me keia la i hoolewa ia ai o ka moiwahine i aloha nui ia, ua lawe ia ae oia ma na alanui o ke kapitala, a mahope oia ua kamoe hou aku la kona alahele no ke kakela papu kahikoWindsor, ka home o na alii kahiko o Enelani kahi ona o moe aku ai i ka moe kapu o Niolopua.

Aole maloko o ka moolelo o Pelekane i hoopiha ia ka hoolewa o kekahi moi me na poe kiekie o ka honua nei e like la me ko ka Moiwahine Vitoria.  Ua nui hewahewa na poo kalaunu i akoakoa mai ma kona hoolewa mamua o kona la iubile.

O ka nui o na koa aina a me moana i komo aku i kona huakai hoolewa ua hiki aku no ia i ka 35,000.

Ua hoomaka ka hakui ana o ka leo o na pukuniahi i kokua ia mai e ka leo kanike o na bele o na luakini, he hapa i hala ae o ka hora 11 e hoike mai ana i ke anaina kanaka nui i hiki ole ke heluia e hookeke ana i na alanui pohopoho o Ladana, i noho kiai ma ia wahi mai ka po okoa mai, eia ae ka moiwahine Vitoria ke hele mai nei ma na alanui o kona kapitala.

He mau hora loihi ka hakoko ana o na kanaka no ke ake e ike lihi aku i ka holowaa o ka moiwahine, na moi a me na poe e ae e hahai ana iaia.  He mea oiaio, na hoopomaikai ia mai lakou me ka ike ana i kekahi huakai loihi o na koa me haneri o na alii e ukali ana me lakou, me ka leo kanikau o na bana e kani hoomaha ole ana.

He la ua a puanuanu keia i ike ia ma Ladana, a na na ao panopa no e hoopoluluhi ana ma na paia lewal i hooi loa iho i ka pouliuli o ke kulanakauhale.  Ua wehe ae na mea a pau i ko lakou papale i ka wa i ku iho ai ke kaaahi ma ka aoao o ke kaa kupapau, a lele mai la ka Moi Edewada, Moiwahine Alexandra, Emepera Wiliama a me kekahi poe e ae.  Ua hele aku la lakou no kahi o ke kaa o ka moiwahine e waiho ana.  Ua nana aku ka Moi Edewada me ka piha luuluu i ka wa i panee ia mai ai ka pahu o ke kino puanuanu o kona makuahine alii mai ke kaaahi mai ke kaaahi mai no luna o ke kaa pukuniahi, a ia wa i uhi ia iho ai ka pahu me na hoailona alii o ke kalaunu o Beritania Nui.

O ke kaa pukuniahi e hii ana i ka pahu o ka moiwahine, he wahi kaa pu uuku ia.  E huki ia ana e ewalu lio Hanoveria, na lio nana i huki i ka moiwahine i kona la iubile.  O na ili huki ua hana ia me ke gula, na kahulio ua kahiko ia iloko o na aahu ulaula me na gula e hulali ana maluna o ko lakou aahu ua like loa no ia me ka la iubile nui o Pelekane, aka, o kahi loli nae ma kahi o ke kaa aniani i hana ia me ke gula he wahi kaa pu ano ole ka ua mau lio nei e huki ana me ko lakou nani nui.

E alakai ia ana ka huakai e ekolu tausani koa aina a me moana i wae ia mai loko mai o na oihana kaua like ole kaualio, pukaa, helewawae, pualu, koa lahui a me na koa panalaau.  E nee ana me ka malie me ka bana ole.  Ua huna ia ko lakou mau kahiko nani e ua kuka loihi helena.  O na hae e hele pu ana me lakou ua uhi ia me ke kanikau.  He hapa lua hora ka nee ana o na koa helewawae iloko o na kolamu pa ha mamua o ko lakou hala ana aku ma kela aoao o ka huakai alii.  A ia wa i hoea mai ai o Alihikaua Kiekie Ela Robata me kona mau ukali, a mahope aku he bana nui o eha puali puhi ohe i hui ia i hiki ko lakou heluna i ka ekolu haneri e hoohanohano ana i ka moiwahine.  Mahope aku o lakou na luna aupuni malalo o ke alakai ana a ke Duke o Norfolk i kahiko ia iloko o ko lakou mau @ahu pili aupuni.

O ka manaoio o na makaainana a pau e hii ia ana ko lakou moiwahine e kekahi kaa kupapau alii, aka, pa hookahahaia pae ko lakou mau naau i ka ike ana aku e kau ana ko lakou moiwahine maluna o ke kaa o ke koa haahaa, a na na aahu nani o na koa a me na puna aupuni e ukali pu ana me na moi i hoike mai, aole keia he mea haahaa, aka, o ka Moiwahine o ia Beritania Nui.

O na lio e huki ana i ke kaa pu ua kokoke lakou e nalowale iloko o na kahiko nani i hookau ia aku maluna o lakou.  O na hapai pahu o ka moiwahine he mau aliikoa o ke kulana haahaa o kona puali kiai kino a me ka puali kaua lio o kona aloalii.

Mahope koke iho o ka pahu e kau ana he ekolu mau hololio i loko o ko lakou mau aahu nani me na hulu keokeo e pulelo ana maluna o ko lakou mau papale.  O keia mau hololio oia no ka Moi, Emepera, ka Duke o Connaught ke kaikaina ponoi o ka moi.  Aole i aui ae ka maka o ka Moi ma o a maanei e makaikai hoi i na koa iloko o ka laina loihi, a i ole i kona mau makaainana ma kapa alanui, aka, aia kona mau onohi ike ke haule mau la maluna o ka mea nona ka hanohano nui ana i papahi ae la.  Mahope aku o lakou ka Moi i Potugala a me ka Moi o Helene maluna o na lio.

He anoano a eehia ka huakai a ka moiwahine e kuoe malie ana no kahi hoolulu kaaahi Paddington.

 

KAU HOU I KE KAAAHI NO WINDSOR.

Hora 1:15 p.m.  Ua hoea aku la ka huakai alii i Paddington.

Hora 1:30.  O ke kaaahi me ka pahu kupapau ua haalele iho la ia no Windsor, a ua like no hoi na hiohiona i ike ia malaila me kahi hoolulu Victoria.

O ka Moi Edewada a me ka Emepera Wiliama ua lawe ae la laua i ke kaa mahope iho a hoomaka hou aku la ka huakai no Windsor.

Hora 2:25 p.m.  Ua hoea aku la ke kaa me ka pahu o ka moiwahine i Windsor ma ka hora 2:30 p.m.

 

HOEA KE KINO PUAHUAHU I WINDSOR

 

Windsor, Feb. 2  He puulu kanaka i hiki ole ke hoomaopopo ia ko lakou heluna kai akoakoa aku ma kahi kokoke i ka hale hoolulu kaaahi no ka halawai ana me ka pahu o ka moiwahine.

Ma ka hora 2:30 p.m., ua ne-i nakolokolo ae la ka honua i na pukuniahi o ka batari i hoonoho ia ma Castle Hill no ka haawi ana mai i ka hoailona i ka lehulehu ua hiki mai la ke kaa kupapau.

 

----------------------

(E nana me ka Aoao 7.)