Ke Aloha Aina, Volume VII, Number 5, 2 Pepeluali 1901 — Page 1

KE ALOHA AINA

HOOKUMUIA I MEI 20, 1895

BUKE VII.   HONOLULU, POAONO, FEBERUARI 2, 1901    HELU 5

 

PIO KA IPUKUKUI O VITORIA

Ke Keikialii o Wale ka Moi o Beritania Nui ame Irelani, a Empera no Inia.

 

            Ladana, Ian. 22. O ka Moiwahine Victoria, na make iho la ia ma ka hora 6:30 ponoi o keia ahiahi ma ka Osborne House. I ka wa e kokoke loa aku ana ke ola e kaawale mai kona kino aku na haawi ia ae la ke kauoha no ke pani ia ana o na ipuka e komo aku ai i ka Halealii Osborne me ka hookapu ia ana, aole he mea e puka aku a i ole e komo mai koe wale no me ka palapala hookuu.

            Ua hoea mai keia nuhou i Ladana ma ka hora 7 ma ke ano telegarapa i ka Meia 1 kakauinoa ia e ka Moi hou, e hoike mai ana ua hoea mai kona wa e lawe ae ai @ kona nohoalii, papei:

            Hale Osborne, Iau. 22, hora 6:45 p.m. O kuu mukuahine aloha ua hala aku oia, e hoopuni ia ana e kana mau keiki a me na moopuna.

            Albert Edward

            I ka wa i loaa mai ai o keia nuhou i ka Mela ua hoike aku la oia i ke akea ma ke kani-ke ana o ka hele nui o ka luakini St. Paul, i haawi makana ia aku i ka luakini e ka Moi Uilama II, a e hookani ia ana hoi ia i ka wa wale no e make ai o kahi moi. Ua hoomau ia ke kani-ke ana o keia hele i kela a me keia minute no elua hora, a ua lohe ia kona leo  walohia no kekahi mau mile.

            I ka wa koke no ia lohe ia ai o ka hele kupapau e kona mau makaainana na pani ae lakou i ko lakou mau keena oihana, ua hoomaha hoi na hale keaka, a komo aku la ke  kulanakauhale iloko ona kumakena ana. Mamua ae o ka hoea ana aku i na hora aumoe ua ua uhi ia ae la na hale aupuni me na kahakahana elele. He hapalua hora mahope iho na hoouna ia aku la keia lono kauma i na rula a pau o ka honua nei.

            I na hora kakahiaka oia la ua haawi mai la oia i kona aloha hope loa no kona ohana, a i ka hiki ole ana iaia ke kamailio, ua hiki no ke ike ia ma kona mau nanaina ua hoomaopopo ae no oia i kana keiki hiapo, ka Emepera o Geremania a me kona ohana e akoakoa ana.

            Ladana, Ian. 24.  I ka pohala hou ana ae o ka Moiwahine mamua koke iho o kona make ana ua kahea mai la oia i ke Keikialii o Wale a me ka Emepera o Geremania e hele aku ma ka aoao o kona moe ua noi aku la oia, ina he aloha ko laua laia e hookaawale aku i ke kawa a e malama i ka maluhia.

            Aua kukuli iho ke Keikialii a me ke Kaisa a hoohiki aku la e hoao no laua elike me ka maua i loaa ia laua e hoomau aku i ka maluhia me ka ae ole hoi ia Enelani a me Germania e kaua, a e hooikaika pu aku hoi i na lahui e, e hooko mai ia hana hookahi.

            Ua hanau ia ka Moiwahine ma ka halealii Keningston, mai ka puhaka mai o ke Duke a me ke Duke Wahine o Kent, ma ka la 24 o Mei, 1819. M ka piha ana o kona mau makahiki i ka 18, ua lawe ae la oia i ka nohoalii o Beritania Nui.

            I ka la 10 o Feberuari 1840 ua mare iho la ka Moiwahine Vitoria me Albert. A mailoko mai o ko laua puhaka i oili mai ai he mau pualii he lehulehu wale e ola nei. O ka nui o kana mau keiki, na moopuna, na moopuna kualua na hiki aku no ia i ike kanawalu a he kanahiku, hoi o lakou e ola nei ma ua aupuni like ole o Europa.

 

KUAHAUA IA I MOI

            Ladana, Ian. 24.  O Edewada VII, ua kukala ia ae la oia i Moi no Beritania Nui a i Emepera hoi no Inia ma ka Halealii St. James Palace ma ka hora 9 o keia kakahiaka, a ua heluhelu ia mai ke kuahana e William Henry Weldon.

           

            MA KA LA 2 O FEBERUARI E HOOLEWA IA AI.

            Cowes, Ian. 24. Ua hooholo ia o ka hoolewa o ka Moiwahine Vitoria e malama ia ma ke kakela Windsor ma ka la 2 o Feberuari. O ke kino o ka Moiwahine e lawe ia aku oia mai ka Hale Osborne aku ma ka la 1 o Feberuari. Ua olelo ia ae ua makemake ka Moiwahine e lawelawe ia kona hoolewa ma ke ano oihana kaua. He lehulehu wale na luna aupuni i hoea mai la mai Osborne mai me na hoailona alii. Ua haawi ia ae la he kipu aloha i keia awakea no ka hanohano o ka Moi Edward VII.

           

            HE KONO MAHINA E KANIKAU AI.

            Ladana, Ian. 24. Ua hoopuka ae la ka nupepa Gazette he hoolaha e kauoha ana i ke aupuni e komo iloko o ke kanikau a hiki ika la 24 o Iulai, a e kanikau hapa hoi mai ia wa aku a hiki i ka la 24 o Ianuari, 1902. Ua haawi ae la o Haku Robata i ke kauoha i ka oihana kaua e komo iloko o ke kanikau a hiki i ka la 5 o Maraki. Eia ke malamaia nei na pule hoalohaloha no ka Moiwahine maloko o ka luakini St. Paul i ke kakahiaka a me ke ahiahi o kela a me keia la a hiki i kona kanu ia ana. Ma ke ahiahi o nehinei i malama ia ai keia hana, ma kahi o 5000 kanaka i akoakoa aku.

 

            NO KE KAPITALA.

            Ladana, Ian. 23. O ka Moi a Emepera, ua haalele iho oia la Osborne i keia kakahiaka a komo aku la iloko o ke kapitale i keia awakea a holo loa aku ia no Marlborough House. Ua uhipaa ia kona alahele mai ke alanui St. James a hiki i kahi hoolulu Vitoria me na kanaka iloko o na aahu eleele mamua iho o ka halealii Bakinehama. Ua hoonoho pili ia na kiai ma ke alahele o ka Moi. No kekahi mau hora ke kali malie ana o na makaainana no ka haawi ana aku i ko lakou aloha no ko lakou Moi.

            Ua hoea mai oia me eono makai kau lio me na kahakaha kanikau e paa ana ma ko lakou mau lima. Ua aahu ia ka Moi iloko o ke kahiko kanikau me ka wehe ae i kona papale no ke kunou ana aku i kona mau makaainana. He nanaina maluhiluhi a kaumaha ke ike ia ana maluna o ka Moi, aka, he maikai no kona ola kino. Ua ukali ia mai oia e ka Duke o Ioka, a me ke Duke o Connaught a me kekahi poe a ae:

 

            UKU HALIHALI LETA.

            Wasinetona, Ian. 18. I keia la ua haawi aku la ka Luna Leta Nui i ka aelike o ka halihali ia ana o na eke leta mawaena o Honolulu a me na wahi like ole o na paemoku o Hawaii he hookahi manawa i ka pule no ka laweana me ka hoihoi ana mai ma na alahele penei:

            Mai Honolulu a Hana, 144 mile, i ka hui mokuahi o Waila, $3,000; mai Honolulu a Kaunakakai, 106 mile, ia hui mokuahi no $1500; mai Honolulu a Honuapo, 225 mile i ka hui mokuahi o Poka m@, $4500; mai Honolulu a Nawiliwili 98 Mile ia hui mokuahi no $1500; mai Honolulu a Eleele 110 mile ia hui mokuahi no $1500; mai Honolulu a hiki i Waimea 117 mile, ia hui mokuahi no $1500; mai Honolulu a hiki i Hilo 228 mile, $5,400 i ka hui mokuahi o Waila, Nui no keia puu dala e lilo nei i na mokuahi.

 

            Ua hoea mai ia ma ka Poakolu nei ka Sonoma, kekahi o na mokuahi hou o ka laina mokuahi Okeanika, he like i a uo kona nanaina me ka Sierra i hoea mua mai i nei, a ua hoomau aku la oia i kana huakai no na Puualaau o ka Hema.