Ke Aloha Aina, Volume VII, Number 2, 12 Ianuali 1901 — Page 6

KE ALOHA AINA

POAONO, IANUARI 12, 1901.

 

Nuhou Kuwaho.

MAU LIMAHANA PORTO RICO HOU NO HAWAII NEI.

            San Juan, Porto Rico, Dec. 27

Ua haalele iho la ia Ponce ma ka la inehinei no Nu Olina ka mokuahi Arkadia, a maluna ona he 400 poe Porto Rico e holo mua no Hawaii, he 56 pa keneta o lakou he mau wahine me na kamalii.

 

HELE MA MAORI I KE KAUA.

            Welinetona, Dec. 26.  O ka puali eono o na koa Nu Kilani, no lakou ka nui he 200, he hapa o lakou he poe Maori, e haalele iho ana lakou ia nei maloko o ekolu pule no Aferika Hema.

            Ladana, Dec. 27.  O ka olelo hooholo no ka hoohui pu ana i na Maori maloko o na puali Nu Kilani, eia ke nana nui ia nei, no ka mea, ma ka hoomaka ana o ke kaua ua ae aku ke aupuni aole e hoohana ia na poe ili eleele.

 

NA BERITANIA ME NA BOA.

            L dana, Dec 28, hora 3 a.m.  O na lono hope i loaa mai Aferika Hema mai e hoike ana ia ua hiki ia Haku Kitchener ke paa aku i na Boa, aka, aole nae i holopono ma ke kipaku ana ia lakou mai Cape Colony aku, oiai, kekahi mau puali lehulehu o na kipi e lele kaua mai ana ma na wahi like ole.

            Ua ae aku la ke Keena Kaua i ka manao hoomaemae i ka oihana kaua ma ke koi ana aku ia Mekia Kenerala Sir Henry Colville, e hoomalu ana i ka puali helewawae me Gibaraleta a i keia wa hoi eia ke hoomalu nei i ka mahele Eiwa o ka puali koa kaua aina ma Aferika Hema.  Ua hoole aku o Kenerala Colville i kona haalele ana aku i kona kulana a aia oia ke holo mai la no Enelani.

            Ua olelo ia ae, ua ae aku la ka Moiwahine Victoria no ka hoopuka ana i kea hoohanohano o ka Naita no ka makana ana aku i na alii koa i komo i ke kaua ma Aferika Hema.  O keia kea, me he mea la, e kapaia aku ana ka Hoku o Aferika.

 

NO KA LAUNA KUKAI ANA.

            Parisa Dec. 31.  He nui na poe akeakamai e hilinai nei no ka launa kukai ana aku o keia honua me ka hoku Mars.  Ua hoike ae o Flammarion no ka mea e pili ana i ka hoku Mars, ma ka ponei ua ikeia aku kekahi mau mea i ka oiliili ana mai ma akau o ka Icarium Sea no kanahiku minute.  Aole o Flammarion i manaoio he mau hoailona keia i hoouna ia mai e ka hoku ulaula, aka, he manaolana e hoea mai ana no he la e malama ia ai he mau launa kukai hoailona.

            Wahi a Flammarion, he manaoio ko'u he lahui kanaka no maloko o ka Hoku Mars.  Ina he manao ko lakou e haawi hoailona aku i na honua mawaho aku ia Mars no ia, e noho ia ana o kekahi lahui i oi aku ka naauao mamua o kakou.

            O Schmoll, kekahi o na kanaka akeakamai, eia oia ke hoolala nei no ka hoa ana i mau ahi nui ma Bordeaux, Marseilles, Strasburg, Paris, Amsterdam, Copenhagen a me Stockholm, ma ke ano haawi hoailona aku.

 

NA KINO MAKE O NA KOA AMERIKA.

            Kapalakiko, Ian. 1.  Ua hoea mai la ka moku lawekoa Grant me eha haneri kino make a me ma'i mai na paemoku Pilipine.  He ekolu mau koa ma'i i make ma ke alahele moana, a he 31 la holo ona mai Manila mai.  Maloko o keia poe make he 99 i make i ka ma'i samola poki, a e hookau ia ana maluna o lakou na kiai makaala loa ia ana.  Ua hoihoi pu mai ke Grant he 79 mau koa i hookuu ia, kanaha lawehala, 121 ohua a me 12 koa pupule.

 

HALII PAA KA UHIWAI MA LADANA.

            Ladana, Ian. 1.  O kekahi o na uhiwai manoanoa loa i ike ole ia no kekahi mau makahiki lehulehu ua halii paa iho ia maluna o ka apana o Ladana holookoa, nana i hookomo aku i na hana kalepa o na ano like ole iloko o ke kulana kupilikii.  O na poe e hele ana maluna o na alanui me ka paakiki lakou i hoea aku ai i ka pahu hopu o ka lakou huakai.  He nui na wahi o ka aina i halana ia e ka wai.  O ka wai ma Bath ua hiki aku ia i ka 14 kapuai, a akahi no hoi a ikeia na kaupoku o na hale.  Na na waapa i hoopakele ae i na poe e noho ana malaila mai ka wai mai.  He eha mau make piholo i hoike ia mai.

 

KE KAHUNA HELE AHI.

            Ina aole he mau kuia e ikeia ana e haawi ana o Papa Ita, ke kahuna hele ahi Tahiti i kana hoikeike kamahao maloko o ke kahua waiho wale o Kinataona, maluna o kekahi o na apana aina o ka waiwai o Bihopa.

            O ka loihi o ka imu ahi i manao ia ma kahi no ia o 40 kapuai a o ka laula hoi he 15 kapuai, a maluna o laila e hele ai oia maluna o na pohaku enaena me ka poino ole o kekahi wahi lihi o kona kino.  He laau hau ka wahie o keia imu e hoa ia ai.   He mea kupaianaha no keia mana i loaa i keia kanaka Tahiti, a he mea pono hoi no kakou e hele nui ae e ike ku maka, a he waiwai ole ka lohe pepeiao.

 

POINO HOU NA BERITANIA

LAWEPIO IA E NA BOA HE ELUA HANERI KOA.

 

Pioo ke Kulana ma Ladana a me Aferika Hema no ka Ulu Hou ana mai la e ka Haunaele.

 

            Ladana, Dec. 31.  Ua loaa mai i ke keena kana keia hoike mai a Haku Kitchener mai:

            Pretoria, Dec. 30, hora 7 p.m.  Ua hoike mai nei o Kenerala Littleton o ko kakou wahi kiai ma Halevatia, ua lawepio ia e na Boa.  Ma kahi he 50 o kakou i make a hoehala a me 200 i lawepio ia.

            Ua hoike mai la o Konela Kitchener aia oia ke uhai la mahope o na Boa me kakahi puali uuku, ua lawe hou ia ae la o Halevatia e Reeves, me ka hoopuipui ia ana mai e na koa mai Belfast mai.

            Ladana, Dec. 31, hora 5 a.m.  O Halevatia, ma kahi he 120 mile ma ka hikina aku o Pretoria, ua lawepio ia ae la e na Boa.  O ka poino o na Beritania he 50 i make a hoehala a me 200 i lawepio ia.

            Zeerust, 120 mile ma ke komohana o Pretoria, ua hoopuni ia e na Boa.

            Ua komo kaua ia aku la o Natal.  Ua hopu ia he mau koa kiai, a aia hoi o Kimberley ke hoopuni kaua hou ia la e na Boa.

            Me ka nana ole ia ae o ka Kitchener mau hoao ana no ke kue aku i na enemi mai ke komo ana mai i ke Cape, ua komo mai la kekahi mau puali kaua me ka hooulu ae i ka haunaele.

            O ke kulana ma Aferika Hema a me Ladana he pihoihoi loa.  O ke kumu i nawaliwali loa ai na Beritania mamuli no ia o ka nui o na wahi i mahelehele ia ai lakou no ke kiai ana, a ke hopohopo ia la ko lakou kulana ma o ke ala hou ana mai la o na Boa.

 

KE PII MAU NEI KA IKAIKA KAUA MOANA.

            Ladana, Dec. 29.  Oiai, no o Beritania eia ke hipuu ia nei kona mau lima a me na wawae ma Aferika Hema, eia no kona oihana kana ke hoopuipui mau nei i kona ikaika.  No kekahi mau mahina eia na mokukaua me na kanaka ke ku makaukau nei no ka wa e puka mai ai o ke kauoha.  A i keia manawa no eia maloko o na pa kapili Beritania aole i emi malalo iho o 11 mokukaua hakaka, 19 mokukaua holomama a me 14 mokukaua liilii no lakau na tons i hiki aku i ka 400,000 e kapili ia nei.

 

HE HOALOHALOHA NA KE KULA SABATI O WAIANAE A ME MAKUA I HUI IA, IA MRS. ANE L. NAONE

                        Me ka Walohia:

            O makou o ke Kula Sabati i hui ia o ka Apana o Waianae, Mokupuni o Oahu, ma o ko makou komite la i koho poho ia, ke hoike aku nei imua o kou puuwai i hoehaeha ia me ke kaumaha luuluu, i ko makou aloha ku @o no kau alii kane i pauaho mai la i keia ola ana.

            Oiai, he kahu Kula Sabati nui oia no ka apana o na Kona nei, a he kanaka no hoi i hilinai nui ia e kona mau Kula Sabati a me kona mau hoaloha, a waiho mai la oia i ka hana ana i lawelawe ai me ka maemae, a he mea hiki ke hoomanao ia iloko o ko makou mau puuwai pakahi no kana hana hope loa no ko makou Kula Sabati, oia no kona hiki kino ana mai i ka hoike o keia mau Kula Sabati i malamaia ma ka la 16 o Dekemaba, 1900, a ma ia la i hoike ia, ua pane mai oia i kana olelo hope loa, e lilo ana na ke Kula Sabati o Waianae e alakai mua i na hana hoike kula no keia makahiki ae, A. D. 1901, i ka mahina o Maraki, a mahope aku na Kula Sabati e ae o kona apana, oia leo aloha ana i waiho mai ai, ua lilo ia i mea na makou e hoomanao ai me ka manaolana e hui hou ana makou iloko o ke keneturia iwakalua, eia nae ua kikoo e ia mai la oia e kona Haku aloha i kahu Kula Sabati no kela Kula Sabati lani maluna, nolaila, mamuli o ka oluolu ana o ka Mea Mana Loa ka lawe ana aku i ka hanu ola hope loa o kau kane i aloha nui ia, a ua ili iho maluna ou ka haawe o ke kaumaha luuluu, ke kumakena ana, ka paumako me ka walohia nui me ke kanikau ana i kau mea aloha, nolaila, ke hooholo nei makou.

            1.  E HOOHOLOIA:  Ke komo pu aku nei makou me oe e auamo pu i na ehaeha i kau iho maluna ou, a e kanikau pu me oe i na la o kou noho kanikau ana.

            2.  E HOOHOLOIA:  Ke nonoi ae nei makou leo pule e hoomama mai ko kakou Haku aloha i na luuluu a me na kaumaha i kau iho maluna ou a me makou pu kekahi.

            3.  E HOOHOLOIA:  E hoouna ia i hookahi kope o keia i ka wahine kane make, a i hookahi i ka nupepa KE ALOHA AINA, a hookahi i ka nupepa Kuokoa, o ke kumu o ka Palapala Hoalohaloha me ke Kula Sabati ia.

            O makou iho no me ka walohia,

            Rev. S. P. Kaaia, S. Mapu, D. M. Namea, S. K. Pule, D. Keauhulihia, J. Kekahuna, S. K. Hui, J. M. Halemano, I. N. Halualani.

                                                            Na Komite.

 

He maikai no ke ola kino o @alana Aimoku.