Ke Aloha Aina, Volume VII, Number 2, 12 Ianuali 1901 — Page 3

KE ALOHA AINA

HOIKE A KE KAKAUOLELO D. KALAUOKALANI OPIO

Wasinetona, Dec 24, 1900

Hon. D. Kalanokalani,

Kuu makua aloha;

Merry Christmas kakou a pau loa.

     Ma ka Poalima nei, Dec. 21, ua hoomaha iho la ka Ahaolelo a e noho hou ana ma ka la 3 o Ianuari 1901.  Ua poina paha wau i ka hai aku ia oe ma keia leta aku nei, a ina aole a ola keia; ma ka Poaha o keia pule iho nei, hora 11:30 ua hele aku makou mai ka hotele Normandie aku, nei no ka Hale Keokeo e ike i ka Peresidena Makinile.

     He keu keia a ka Peresidena maikai a oluolu no hoi, he ohaoha ka hookipa ana a he oluolu na olelo.  Mamuli o kona ano keonimana kiekie, ua hoopiha loa ia makou i ka hauoli.  Ua hauoli loa i ka hui ana me Wilikoki ma kona kulana elele mai Hawaii mai; ua hauoli no ke kulana kaokoa i kukulu ia ai e na Hawaii; na haueli hoi no’u no ko’u kulana kakauolelo e noomaikai ana hoi i ke kulana o na Hawaii hanauna hou imua o na maka o ka ahaolelo nei o Amerika.

     He nui kana mau olelo a me kana mau ninau e pili ana no Hawaii a no ka Moiwahine.  Aia a hui hou kakou alaila hoike aku wau i ka mea oiaio a pau, a pela pu me ka elele, he mau nuhou maikai loa nae no Hawaii e hauoli ai.  Manao wau, no’u iho, ua loaa ia Hawaii he hoaloha maikai loa iloko o keia Peresidena Wahi ana i olelo mai ai.  “E hiki mai ana paha ka manawa ma keia hope aku no kakou a pau e hoomaopopo lea loa ai kahi i kahi no ka pono oikelakeia o ko kakou aina.”  Pau ia holo makou i ka hale pai kii a pai ia ko makou mau kii like ole me ka uku ole, oiai ua kono ia mai e ka hale pai kii e hele aku mamuli o ke kaulana o kela inoa he elele mai Hawaii mai, ke teritori mua loa o Amerika nei i ku kaawale aku mai na pale ponoi o Amerika nei.

     Pau ia mau mea, i ka Poaono nei, aole nui loa na hana o keia la.  La Pule iho la ua hele wau me Wilikoki e ike i ke Kuhina Pake, Wu, ua hookipa ia mai me ka ohohia.  He hoaloha kahiko no keia no Wilikoki, a he makamaka maikai loa, ma ka anina la, hele makou no Chevy Chase, kahi hoikeike holoholona o Wasinetona nei.  I keia la a’u e kakau nei, he nui loa ka mana hana aka, ke hana nei me ka hauoli o ka manao, oiai, he maikai na mea i panai ia mai mai kinohi a hiki i keia manawa.  He nui loa na poe kakau nupepa e hale mau mai nei e kipa a hiki no i kela la iho nei, a pela pu me na lunamaka iauana.  He punahele maoli no wa@ i keia poe; a na nui loa ko’u makahehi ia a na poe a pau o ka ahaolelo, ia’u e hele ai ma na keena like ole e kipa ai a e kakau ai na nui loa ko’u nienieleia e na poe koikoi.  Ua pale ae ua i ka hilahila, oiai, he mea waiwai ole ia, a na lawe i ke kulana keonimana maoli, e hui launa ana a e kamailio ana hoi me ka h@ pohopo ole iho.  He mea kamahao loa ia lakou, wahi no a lakou e olelo mai ai ko’u maaloalo imua o lakou, oiai he haole wale no a pau a owau wale no kahi mea ku kaawale loa he okoa ka ili, a oia kekahi kumu o ko’u makemake loa ia.  Maanei o Mr. David wale no ko’u inoa e kapa ia nei, a i kekahi manawa ua kapa ia wau o ke “Kakanolelo a ka Elele mai ko lakou (Amerika) panalaau hou mai (Hawaii).  O keia poe Demokalaka o nei, ua nui ko lakou akaaka no ko Sam. Paka haule ana; a o ka poe Repubalika pela pu no hoi no ko Kawananakoa haule ana.  E hai aku ana ne ka elele i kekahi mau olelo a’o ia oukou ma kana leta ia oe i keia ia.  Ke ike maka nei au i ko Wilikoki ano.  Ua ola maoli no kakou iaia.  He kaoaka hana, e hele ana e hui launa aha me kela a me keia; e hoakaka ana, e pane ana i ke ao a me ka poi  Hora 1 o ka po hoi i ka hotele nei.  He nui maoli no na hoaloha.  Mei hoolohe i na olelo hoonuinui a kela a me keia.  Eia o Gear ianei, ua hookomo iho nei i kana palapala kue ia Wilikoki no ka mana ole o ke koho balota.  Aka, mai maka’u aohe ona hoaloha ikaika.  Ua hoole o Henderson, Lunahoomalu, eia nae imua o ke Komite 1 kana hoopil.  Ua pane mai kekahi lala o na komite nei ia Wilikoki, i mai, aole lakou hoihoi e hoopau manawa no kekahi mea waiwai ole.  Heaha ke kohu o keia ano hana kamalii.  Hana a haule, eha ke poo alaila hele mai ianei e hoohalahala ai.

     O ka uku mile o Wilikoki oia hoi he $2100 a oi, oia kai loaa, ua lawa ia a hoi wale aku no makou iloko o Maraki, 1901 oiai aole ahaolelo mai Maraki 4, 1901 a hiki iloko o Dec. 2, 1901.  He maikai loa ko makou noho ana, aole kuekue a he lokahi loa no hoi ma na ano a pau.  He nui ko’u mahalo ia Wilikoki i kona ho, ikeike mau ia’u imua o na mea a pau.  He maikai no ko makou ola aino a pau a he ola maoli ho o Kealoha ianei a makou e noho nei.  E aloha ia mama, ka ohana a me na poe a pau.  E kau leta hou aku no wau.

Kau keiki,

D KALAUOKALANI JR.

 

HOOPIHA IA NA WAHI I HOOHAKAHAKA IA.

     Ma ka halawai ana a ka Papa Ola ma kela pule aku nei, ua koko ia iho ia keia mau inoa no ke hoopiha ana i na keena o ka Papa Ola i hoohakahaka ia ma ka olelo hoohooholo i lawe ia mai ai e Kauka Raymond, Peresidena, mamua aku nei e hoopau ana i na hanai ahuhu mua a ua Papa la e noho ai loaa ana no ke aupuni a e ohi ana hoi i na aku kiekie me ka uuku o ka hana, oia hoi o Kauka Howard o ke keena haawi laau, Kauka Myers kauka kuikawa a me na kauka holoholona Monserrat a me Kauka Shaw a me Kauka Jobe.

     O na mau inoa la i lawe ae la i keia mau kulana i hoohakahaka ia no ke Keena Haawi Laau, Kauka Myers, no ke kokua ana mawaho Kauka Sinclair.  O keia mau kauka e loaa ana ia lana he uku mahina o $100 pakahi.  A o  Kauka Monsarrat na koho ia aku la oia i kauka nana holoholona.  A o keia ae la na poe e lawelawe nei i keia mau keena i keia mau la, a ua ike maolilia no hoi ka emi o na hoolilo o na Papa Ola i keia wa mamua o ka wa i hala.

 

NO KE KINAI ANA I KA MARE LEHULEHU.

     Piladelapia, Dec. 18.  He halawai makaainana o na wahine no ko kue ana aku i ka mare lehulehu o na Moramona kai malama ia maanei i ka ponei, o na haiolelo nui ola po, oia o Kauka S.J. Elliott, he kiakona no ka hoomana Episcopal, a me Rev. W.R. Campbell he miaionari i waena o na Moramona.  O kei halawai oia kekahi o na kumuhana e ma lama ia nei a puni ka aina malalo o na lawelawe ana a ka Ahahui Lahui o na Wahine no ka makee ana i na hana pono a me karistiano.  O Miss Helen Gould oia ka hope Peresidena o keia ahahui.

     O Kauka Elliott, maloko o kana haiolelo ana, ua olelo ae oia:---

     O ka mare lehulehu eia ia ke pahola nei me na Moramona.  Aole wale no ma Uta, aka, ke ike ia nei ma Idaho, Nu Mekiko, Arizona, Waionina, Nevada a me Colorado.  Ina he eha mau mokuaina hou e komo pu aku ana ia hana hookahi me keia mau mokuaina ae ia he eiwa i loaa he mana ikaika i na Moramona, he paakiki loa ka hana ana i kanawai no ke kue ana ia lakou.

     Ua apono ia aku he olelo hooholo e noi ikaika aku ana i ka Ahaolelo e lawelawe koke ia he hana no ka hookapu ana i keia hana mare lehulehu, a e hoopai ia hoi ka mea hana hewa me ka lawe ia aku o kona mau pono kuokoa mai iaia aku.

 

HE LEO UWE KUPAIANAHA.

     Ladana, Dec. 27.  O na kanaka manaoio i na mea pili uhane lapu eia lakou ke hai nei i na wahana like ole no kekahi mau haawina kaumaha e hiki mai ana, no ka mea, ua manaolo ia ua hoi hou mai la ka uhane o Mary, Moiwahine o Sekotia, no ka hoike ana i ka lehulehu.

     O kekahi o na alii e ku kiai ana i ke keena makai maloko o ke Towera o Ladana, ma ke ahiahi Karisimaka nei ua lohe ae la oia i kekahi leo uwe loihi iluna lilo o ke towera.  Ua ku iho la oia e hoolohe a lohe hou aku la no i keia leo.  Ua lohe pu aku ia ola i ka halulu o na kapuai wawae, a o ka ekolu o na manawa ana i lohe ai i keia leo uwe maluna no ia o ka muliwai a me ke kulanakauhale.  Ua hele aku la oia e huli i kahi o keia leo uwe, aka, aole nae he mea i loaa.

     Ma na moolelo i hoike nulia o ka uhane o ka Moiwahine Mele, ua hoike mau mai oia maluna o ke Towera o Ladana.  O Mele, ka Moiwahine o Sekotia, ua hoopaahao ia oia e ka Moiwahine Elikapeka ma ke keenaa o na makai a ua alakai ia oia malaila aku no ka puoa o ka towera a malaila hoi oia i pepehi ia ai.  Ua olelo ia ae mamua o ka make ana o na moi a me na moiwahine a pau o Enelani e hoike mua ana kona uhane, a ua ike ia keia mahope iho o kona wa i make ai.

     Ina he oiaio keia mau hoike alaila o ka Moiwahine Victoria wale no ka moiwahine o Enelani e manalo ai keia leo uwe.  Kupanaha no na hana a ke Akua.

 

     Ua loaa mai ia makou he hoike no ka haalele ana mai la o Mrs. Keliilihune Keomakani i keia ola ana ma kona home ma Hilo.  He makuahine kamaaina oia no ka Ua Kanilehua o Hilo.  Aloha no.

     Ua hookapu lao ia na hua manu lepo pake e hoouna ia mai nei mai Kina mai, mamuli o ka manao ia ana e lawe pu mai ana lakou i na anoano ma’i ahulau.  Nolaila, na haawi aku ka Papa Ola i ke kauoha no ka hoopoino ia ana o na hua lepo a pau ma keia hope aku.