Ke Aloha Aina, Volume VII, Number 1, 5 January 1901 — Page 1

KE ALOHA AINA

BUKE VII.     HONOLULU,            POAONO, IANUARI 5, 1901          HELU 1

 

LETA MAI KA ELELE R. W. WILIKOKI MAI

Ma keia kakahiaka Poaha i loaa hou mai ai ia makou keia leta ponoi a ka Elele Wilikoki i kakau ae nei i ka Senatoa David Kalauokalani, a ma kona lokomaikai ua haawi mai ia oia i keia leta no ka hoopuka ana maloko o KE ALOHA AINA.  Ua hoea mai keia leta maluna o ka mokuahi Zealandia i ku mai ma ka au@@@ Poakolu nei mai Kapalakiko, o ka ka Elele Wilikoki leta elua no hoi keia i loaa mai la.  No ka pomaikai o ka Aoao Kuokoa Home Rula a me ka lahui Hawaii ke hoopuka aku nei makou me ka awiwi nui.

Wasinetona, Dec. 21, 1900.

Hon. David Kalauokalani,

Aloha nui oe: --

Ua loaa mai nei ia'u kau.  E mahalo aku wau i kou akahele i na hana pupule a ka poe ake oihana.  E akahele no kakou i ka pono i loaa i na Hawaii.  Aka, ina he lili wale no, aole ia he kumu e pau ai.  E ku malie iho oukou me ke ano o ke kanaka makua a ke kaulike, alaila auanei e loaa ana i na Hawaii ka hookele a na o Hawaii.  E hookuu aku i na haole me na wahi Hawaii hoopili wale na lakou e hana keia mau kue wale, a na kakou auanei ke eo.  Pela no me na hookohu a Dole, mamua o ko oukou hoole ana i ka hookohu, e imi mua oukou a loaa he hewa io ko ia mea, no ka mea, o ko kakou kahua ikaika maanei oia no ko kakou ake i aupuni maikai, aole no ka puni oihana wale.

O Gear ekelauhala me Moreno aeahaukae na pupule e walaau nei ma ko kue ia'u, aka, aohe poe hoolohe ia laua, a oki loa aku i na hoa o ka ahaolelo.  Aole loa e ae ana na hoa o ka ahaolelo e nana i ka poe e hoouna ia mai nei elike me Haywood maanei.

Owau ka Elele, a ma o'u wale no e ike ia mai ai no Hawaii.  Ua lilo ia Hawaii ka hanohano kiekie ma ka loaa ana he Elele noho iloko o ka ahaolelo.  Ke hoomau nei na nupepa i ke kamailio no'u, a ke koi ia mai nei ko'u kii a puni ka aina.  O na olelo hoino na Moreno ma ia me Sereno Bihopa elemakule kapulu.

Ua nui ko'u punahele i na hoa a paa o ka ahaolelo.  Ua ike no oe, o ka aoao Repubalika ka aoao manao keia kau, ke ike mai nei no lakou ia kakou ma o'u nei.  O na hana a na enemi ua lilo i pala.

Inehinei ko makou hele ana aku e ike i ka Peresidena, a ua lulu lima me Keoua ma na alii hanau o ka a@ea, ma Washinetona nei.  E hoomaha ana ka ahaolelo a hoea i ka la 3 o Ianuari.  E imi aku ana au i hale no makou.

E kii aku no olua i ke kumu nui o Sana Lui e kokua i ka hoike ana no na keiki kupono i makaukau i ka ike e komo ai i West Point.  Ina no he 10 inoa i puka pono, e waiho mai na'u no e wae. No ke kula kaua moana, ua haawi mua au i kuu ae i ke keiki a ke kapena o ka mokukaua Iroquois.  He kumu no ko'u ae ana.  Aka, i keia kau ae e loaa hou ai ia'u he kuleana wae hou, alaila, i Hawaii ko ia kau.  Me ke akahele no kaua i imi ai a loaa ka pono koho balota o na Hawaii, pela no kaua e akahele ai a loaa hou he pono oi loa aku i na Hawaii.  Aole o @@ huhu hikiwawe me ka manao alunu a Lapuku.

Ko'u aloha ia oukou a pau, ke aloha pu aku nei na alii opio Keoua a me Kapu.

ROBERT W. WILIKOKI

P. S. Ko Porto Rico elele, aohe ona noho @@@@@ ahaolelo, oiai, he komisina kona kulana, ua like me ko'u @@@@@@@@ kela makahiki aku nei.  Ua eo hou no ia Hawaii.  Oia @@ kumu o ko'u ake nui loa ia a puni ka aina nui o Amerika @@@@@@@

 

HOIKE A KE KAKAUOLELO

D. KALAUOKALANI OPIO

La Normandie, Dec. 17, 1900.

Hon. D. Kalauokalani

Ko'u makuakane,

Aloha oe a nui: --

Eia makou a pau i Wakinekona nei i keia manawa.  Ma ke ahiahi Poakahi la 10, i haalele ai makou ia Kapalakiko no Wakinekona nei ka pahu hopu.  Ma ke alahele o ka hema, "Sunset Ronte" makou i holo mai ai.  Ku ma Wakinekona hora 10 o ke kakahiaka Poaono nei, la 15.  Motio ke alahele no ka hotele Normandie, hiki hora 10:30.  Hooponopono na wahi ukana, komo kahi lole pelu na kuli a hoonani aku la i ka Makua a naue aku la maua me ka elele hoomanawanui no Wakinekona ka manaolana.  Me ka moeuhane mua ole ia, aia hoi, ua hoopili koke mai la ka Haku i kana mau kokua ana ia maua.  Oia hoi, ua loaa koke mai la no o Wilikoki ia Barea, elele mai ke Teritori mai o Nu Mekiko, he hoaloha kahiko no hoi no Wilikoki, hele aku la makou a komo i ke kapitala.  Pii makou iluna o ke Gallery, kahi makaikai a noho malaila, alaila, iho mai o Wilikoki me kona hoa elele ilalo, komo e ike ia David B. Henderson o Iowa.  Lunahoomalu o ka hale lulu lima me ka alakai o ka hale.  Hoike mai la i ka palapala hoopii a A. B. Loebenstein a me N. Kepoikai me ka akaaka ana iho.  He 5 minute i koe kani ka hora 12 o ka Poaono, la 15.  Ninau koke mai la ua lunahoomalu nei: -- "Auhea ko palapala?"  Pane aku ka elele, "Eia."  "Ua hiki, wahi hou no ana."

Pau ia mau olelo hoolauna makamaka, komo koke aku la ka lunahoomalu iloko o ka hale oiai o ka manawa noho ia o ka hale, o ka hora 12.  Ia manawa heluhelu mai la ke kakauolelo i na minute o ka la i hala.  Pau ia, ua kauoha koke mai la ua lunahoomalu nei i ke kakauolelo e heluhelu koke ia ka palapala elele o Wilikoki.  Ua heluhelu ia elike me ke kauoha.

Pau ia, aia hoi, ku ae la ka lunahoomalu a hoohiki mai la ia Wilikoki.  Ia minute no ua lilo ae la o Wilikoki he luna aupuni oiaio maoli no Amerika, aole mea nana e hoole.  Ua ike maka wau i na mea a pau i hana ia, ua hoohiki pu ia wau imua o ka Aha.

Ua nui ke kahaha e na lunamakaainana a pau i ko lakou ike koke ana ia Wilikoki iwaena o lakou me ka moeuhane mua ole ia hoi e hiki koke ana o Wilikoki i ka ahaolelo.  Ua lohe ia no nae ko makou ku ana ma Kapalakiko ma ka la 9 o Dekemaba iho nei.

Ua hele mai na Repubalika a me Demokarata pu e lulu lima pu me Wilikoki mahope koke iho oia manawa, me ka akaaka a me na olelo mahalo pu iaia a me ko kakou aoao Kuokoa.  Ua ike maka wau ia keia mau mea, a nolaila, e kuu makua e hauoli, no ka mea, ua loaa ia'u ia haawina hookahi.  Mahope iho oia manawa, ua hoolauna ia aku la wau me na lunamakaainana a me ka lakou mau kakauolelo.  Ua lilo ae la maua a he mau hoaloha maikai loa no na Demokarata a me Repubalika o Amerika nei.  Ua oi aku ke ohohia ia o maua a me na mea a pau e pili ana ia Hawaii mamua o na Teritori a pau o Amerika.  No ka elele, ua nui kona mau hoaloha, ua pomaikai kakou.  E hilinai mai i ka olelo a kau keiki, oiai, ua ike no oe i ko'u ano, @@@ @@@@@ kekahi mea alaila, mau hoola a hilinai hoi.  No'u nei, mea k@@

E @@@@@@