Ke Aloha Aina, Volume VI, Number 52, 29 Kekemapa 1900 — Page 1
| This text was transcribed by: | Patty Mancini |
| This work is dedicated to: | In Loving Memory of My Father |
KE ALOHA AINA
KE ALOHA AINA.
Picture - Hilo Bay, Hawaii
UA MAU KE EA O KA AINA I KA PONO.
HOOKUMUIA I MEA 20, 1895
BUKE VI. HONOLULU, POAONO, DEKEMABA 29, 1900. HELU 52
KOMO LANAKILA KA
ELELE R. W. WILIKOKI
AOHE MAU KUE I HANA IA
AKU NONA.
A ua Lawe ae i ka Hoohiki ma
ke ano Elele Iloko o ka Hale
o na Lunamakaainana.
Maluna mai la o ka moku lawe koa Thomas i ku mai la i keia kakahiaka Poakolu mai Kapalakiko mai, i loaa mai ai keia hoike telegarapa i na nupepa namu o Kapalakiko mai Wasinetona mai, a oia ka makou e unuhi aku nei no ka pomaikai o na poe heluhelu o KE ALOHA AINA a me ka lahui Hawaii, penei:
Wasinetona, Dec. 16. O Elele Wilikoki o Hawaii, i koho ia mai nei e na mokupuni no loko o ka Hale ua hoea mai oia i Wasinetona nei ma ka la inehinei, a ua hoohiki ia ma ke ano he Elele no ka Hale. Aole o Mr. Wilikoki he malihini maanei, ua hoea mua mai no oia maanei i ka wa e hooponopono ia ana o ka Bila Kanawai Hawaii.
Wasinetona, Dec. 15. O Robata W. Wilikoki, ka Elele mai Hawaii mai, ua hoohiki ia oia mahope iho o ke apono ia ana o na hana o ka la maloko o ka Hale i keia la. Ua alakai ia mai o Wilikoki iloko o ke keena mehameha o ka Hale e Perea, ka Elele mai Nu Mekiko mai. Mahope o ka pau ana o kona hoohiki ia ana, ua hele mai la he lehulehu o na hoa a haawi mai la i ko lakou aloha no Mr. Wilikoki.
Eia ke hoikeike ia nei ma ka hale keaka Ofiuma he mau manu hana keaka.
Ma na hoike i loaa mai nei ia makou mai Hilo mai, ua hoouna aku la o Senatoa Kale Aki he $50 no ke kokua ana i ka aha fea i malama ia ae ma Hi@ Mahalo no i na @ kokua a keia keonimana:
MAIKAI KE KULANA O KA
ELELE R. W. WILIKOKI
KOMO NA HANA
LOKOINO I KA
AHAOLEOLO.
Aole he Poe Nana e Kakoo Mi ana--
Ili ka Inaina o na Repubalika
Amerika i na Repubalika
Hawaii.
No ka pomaikai o ka aoao Kuokoa Home Rula a me ka lahui Hawaii holookoa, ke unuhi aku nei makou i keia mau mea ano nui e pili ana no ka ike ia mai o ka Elele Wilikoki, penei:
Wasinetona, D. C., Dec 9 O ka palapala kue no ka noho ana o Robata W. Wilikoki ma ke ano he elele mai ke teritori mai, i kakau inoa ia e A. B. Loebenstein a me A. N. Kepoikai, ua loaa mai la ia i ka Ahaolelo, a aia maloko o ka lima o ke komoite pili koho balota. A me he mea la he nuku loaa na mea e hanaia nona, no ka mea, ua manaoia aole he mau hana e hapai ia ana no ka haule ana o ka Repubalika i ka wa i ike ia aku ai aole he lokahi iwaena o na Repubalika o ke kulanakauhale o Honolulu.
O kekahi o na hoaloha oiaio o Hawaii, he kanaka i kipa aku i ua mau paemoku la, i paio maluna o ka papahele a maloko o ke komite no ka pono o ke teritori ma ke alahele e holomua ai ke aupuni, ua hoike ae oia i ka mea oiaio ua hoopalaleha na Repubalika ma ka lakou hana, a he manaoio kona aole no he wa e loka hi ai lakou ma ke kaoo ana i na hana hooponopono aupuni, a nolaila, he uuku loa na mea e noonoo ia ana no na noi kue i waiho ia mai la e keia poe.
O Lunakanawai Hitt o Ilinoi kekah o na kanaka mana nui, nona ka manao aloha a makee i na paemoku i hiki ke hoohewahewa ole ia, ua hoomaopopo ia aole he manao ikaika o kona puuwaii ka hapai ana mai i keia kumuhana kue, oiai, na kanaka i hoopomaikaiia aole lakou i hoakoakoa ae me ka manao lokahi a hana aku no ka pono o ka aina. AOLE OIA E KUE ANA IA WILIKOKI, ua manaoio ia aole he mau hana hupo e hoikeike ia ana e ka elele i kona wa e hiki mai ai maanei. Ua hoike ae o Mr. Hitt i kona mau manao ahewa no na kanaka i hapala ae i ka balota Repubalika, a ma ia ano na kakoo aku i ke koho ia ana o ka moho o ka aoao Kuokoa, aka, ua oello no nae oia aole he mau hana nui e lawelaweia ana eia no na kanawai Hawaii, koe wale no na mea e hoea aku ana imua o ke alo o kona komite, mamuli o kona manao ana aole he hana nui e lawelawe ia ana, oiai hoi, na paemoku ua loaa he kanaka e hana ana no lakou malokoo ka Hale. Wela hou no ka hao ia Wilikoki.
Ma keia e ike ai kakou ua haule hou no na hana lokoino a na Repubalika i hoao aku nei e lawe loa i ka lakou hoopii kue ana imua o ka hale kau kanawai o Amerika Huipuia. A oia ka makou e puana ae nei, e lilo ana paha auanei ka mana o ke sala a na Repubalika i mea ole i ka mana o ka leo pule a na Hawaii ilihune e pii nei i na paepae kapu o ka Mea Mana Loa. E pule hooki ole, a e loaa no ia kakou ka lanakila.
He kanaka elemakule kai loaa aku ua make maluna o kona wahi moe mauka o Niolopa, ma ke kakahiaka Poakolu nei. Ma ka hoike a Kauka Pratt, he kanaka ma'i kahiko oia, nolaila, aole i kahea ia he aha koronero nona.
POINO HOU NA BERITANIA
LAWEPIO IA HE 18 MAU ALII
ME 555 KANAKA.
Ikaika ke Kaua e Lawelawe ia la.
Nui no ka Poino o na Boa
ma Kekahi Mau Hoouka Kana.
Maluna o ka mokuahi lawekoa Logan i loaa mai ai keia mau hoike, a no ka pomaikai o ko makou mau makamaka heluhelu ke hoepuka aku nei makou me ka awiwi hui, penei:
HE LONO POINO.
Ladana, Dec. 14. Ua hoopuka ia ae la e ka nupepa Daily Express he lono no ka poino hou ana o na Beritania i na Boa, Elike me ka hoike i loaa mai, ua lele kaua aku na BOa i ke kahua hoolulu o Kenerala Clements, ma ka apana o Barberton me ka lawe pio ana ae i ke kahua hoolulu, a ua nui na alii Beritania i make a me ka hopu pioia ana o ua pualikoa Beritania a maloko oia heluna he eha puali Northumberland Fusileers.
Aole he hilinai ia o keia hoike ma na wahi a pau o ke kulanakauhale nei.
UA HOOIAIO IA MAI.
Landsna, Dec. 15. Ua hoike mai ia o Haku Kitchener he 18 aliikoa a me 555 kanaka i nalowale mai ka pualikoa holookoa aku o Kenerala Clements. Maloko oia heluna he eha puali o ka Northumberland Fusiteers. Ua manaoio ia ua hopu ia lakou e na Boa he elime alii a me eiwa kanaka i make, a he lehulehu wale i hoeha ia.
Aia o Knox ke kipaku la ia Dewet i ka akau no ThabauchuLadybrand, ka laina e paa ia la e ko makuo mau pualikoa. O ka nui o na kanaka o Dewet ma kahi no ia o 3,000, a ua hoao ikaika lakou e kaawale mai na koa Beritania mai i keia la holookoa, me ke kokua ia ana mai e kekahi
(E nana ma ka aoao @)