Ke Aloha Aina, Volume VI, Number 47, 24 Nowemapa 1900 — Page 6

6                                  KE ALOHA AINA, POAONO, NOVEMABA 24, 1900

 

Nuhou Kuwaho.

 

POINO NA MOKUKAUA BERITANIA.

  Hongkong, Nov. 10. Ua hoea mai kekahi makani ino @@@@@@ i keia taona ma ke ahiahi nei, a ua hoomau ia a hiki i ke kakahiaka. He mokukaua Beritania holo muliwai kai piholo, aka, ua hoike ia mai ua palekana kona mau luina. He nui na poino o na ola i ikeia iwaena o na moku liilii o na Pake, aka, ua hiki ole nae ke hoike piha i ko lakou heluna.

  Iloko o keia wa a ka makani ino e pahola nei, ua kupilikii loa ke kulana o na mokukaua Tweed a me Firebrand, me ka mokukaua kiai kahakai Weaver, ua puhi ia aku lakou e ka makani me ka hiki ole i ko lakou mau heleuma ke paa. Ua haawi aku lakou i na hoailona pilikia a ua holo aku ka moku topido Otter e haawi i na kokua ana ia lakou me ka manao hopo ole no ka ino. Ua hoopakele aku ka Otter i na luina o ka mokukaua poino Beritania Sandpiper, a pela me na luina o kekahi mau moku o ae.

  O na pualikoa ma Coolican o e hoolulu ana malalo o na hale lole, ua komo lakou iloko o na kulana kupilikii. Ua pau ko lakou mau hale lole i ka hiolo i ka makani, a o na kanaka a me na holoholona ua alo hoomanawanui aku lakou i ka inaina o ka makani me ka loaa ole he wahi no lakou e hoolulu ai.  O luna o na kaupoku o na hale ua puhi ia aku ia e ka makani, aka, ua laki nae aole he ola i poino. He nui na hale noho i hoohanee ia, a ua make he umikumamalua poe.

 

HOOLE O BARAIANA I KE KULANA LUNAHOOPONOPONO

 

  Denver, Nov. 10. Ua hoole aku la o William J. Baraiana i ke kulana lunahooponopono no kekahi nupepa puka ahiahi o Denver no ka uku o $10,000 o ka makahiki. Ma kana pane i telegarapa mai ai mai Lincoln, Neborasaka mai i keia la, ua olelo ae oia: E noho ana au maanei no keia mua aku e like me na la i hala ae nei, e kakoo ana me ko’u alelo a me ka peni i na kahua hana a’u i ike ai he pono, a i no kumuhana hoi a’u i manaoio ai he naauao.

 

KA WAHINE A BARONA VON KETTLER

 

  Kikako, Nov. 13. He lono kuikawa kai loaa mai nei i ke Tribune mai Detroit mai, e olelo ana:

  O Barona Wahine Von Kettler ka mea nana ke kane i pepehi ia ai e na Pak@ ma Pekina, eia ke pii malie nei kona oluolu ma ka home o kona makuakane, Henry B. Ledyard, ka peresidena o ka Hui Alahao Kuwaena o Mikikana. I kona wa i hoea mai ai he elima p@l@ i hala ae nei, ua hoopihoihoi ia ka manao o ka ohana no koaa kulana nawaliwali.

  Ua olelo ae na hoaloha o ka ohana i ka wa i loaa ai iaia ka maha e au hou aku ana oia i ke kai no ka home o kana kane, Barona Von Kettler, a e hookipa ia aku ana aku ana hoi oia e ka Emepera Uilama, i noi pu mai mai iaia e holo aku.

  Nu Ioka, Nov. 13. E like me na lono kuikawa i loaa mai Berlin mai i na nupepa Journals a me Avaiataisa, na haawi aku la ka Emepera o Geremania i kona mau manao aloha no Barona Von Kettler, i powa ia ma Pekina, ma ke kono ana mai i ka wahine Amerika a kona luna aupuni no Geremania, aole wale no ka hoike ana i kona mau manao hoomaikai no na hana a kana kane, aka, no kona mau manao wiwo ole i hoike ai i ka wa e hoopuni kaua ia ana na keena kanikela.

  Ua olelo ia ae aole wale ka Emepera e hookau aku ana i ke kea hoohanohano o Louis@. O ka Emepera Moiwahine hoi ka mea nona ia kea, aka,e haawi pu aku ana oia i uku hoomau nona me ka haawi hou aku i inoa hanohano nona oia ke Kauna. 

  Ua manaoia e haawi ia aku ana ka inoa hanohano Lede nona i kona wa e lilo ai i ukali no ka Emepera Wahine. Ua manaoio ia @ lilo ana oia i mea nui iwaena o ke aloalii, ke aupuni, na anaina a i ka lahui kanaka.

 

HE MOKU HEIHEI HOU.

 

  Glasgo@, Nov. 8. O ka aelike no ke kapili ana i moku heihei hou ma ka inoa o Shamrock II, ua haawi ia aku la ia D W Henderson, ka mea nana i kapili he ekolu moku Valkyries. E paa ana ka Shamrock ma ka la 31 o Maraki, a o ka hoao mua ia ana o kona holo e malama ia ana ma Clyde ma ka la 15 o Aperila. Me he mea la o keia Shamrock hou a me ka Shamrock mua e hoouna like ia aku ana laua no Amerika Huipuia no ka hoao ana i kona mau wai.

 

KOPENA O KA HOIKEIKE NUI.

 

  Parisa, Nov. 12. O ke poha ana mai o ka leo o ka pukuniahi mai ke towera Eiffel mai i keia po, ua kukala mai la ia, o ka koikike nui o ka 1900, ua hoea mai la ia i kona hopena. Ua hoea mai ua po hope la iloko o na hoohiwahiwa ia ana me na kukui a me na lealea e ae. Aole he nui o na makaikai i hiki mai, a ua hoonohoia aku lakou i ka hale e na kulu pakana huihui.

 

NA KOI IA KINA.

 

  Ladana, Nov. 8. Ma ke telegarapa ana mai nei a Kauka Morrison i ka nupepa Times mai Pekina mai, ma ka La Pule nei, e olelo ana:

  Mamuli o ke kaomi ikaika ana a na manao e lawe kokeia mai ka hopena o na kuka ana, ua ae aku ia na i@@a aupuni o i keia mau manao, no ka hookomo ana maloko o kekahi palapala i hui ia, a i ka wa a ko lakou mau aupuni e apono mai ai, e waiho ia aku no ia ia Kina ma ke ano o ke kahua ia o ka lakou mau koi.

  E kukulu o Kina i kia hoomanao no ka Baron von Kettier ma kahi ona i pepehi ia ai a make me ka hoouna pu aku i kekahi keikialii i Geremania no ka lawe ana i ka Kina palapala mihi. E kau o Kina i ka hoopai make maluna o 11 keikialii a me na luna aupuni i hai ia na inoa, a e hakilo mau hoi i kahi i ulu ae ai o ka haunaele no elima makahiki. Ma keia mua aku o na luna aupuni a pau e hiki ole ana ke papa aku i na huanaele maloko o ko lakou mau palena, e hoopau ia lakou me ka hookau ia aku o ka hoopai.

  E uku ia na poho o na moku aina, na hui a me ka mea hookahi. O ka Taung Li Yamen e hoopau ia. O na kuka hooponopono a hana ia me ka Emepera e like me na aupuni naauao.

  O na papu ma Taku a me na papu ma na kapakai o Chi li e hooneoneo ia, a o ka hookomo ia ana o na pu a me na lako kaua e hookapu ia. 

  E malamaia i mau koa kiai ku mau no na keena kanikela, a i mau koa kiai no ke kukai ana mawaena o Pekina a me ke kai.

  O na kuahaua aupuni e hoopio ana i ka Boxer e kau ia ia ma ka emepaea holookoa no elua makahiki.

  O keia koi poho ua hoohui pu ia na pake i hoopoino maloko o ka hoohana ana a na lahui e, aka, aole nae no na pake Karistiano. O keia mau poho a pau a Kina a uku mai ai ma kahi no ia o ka $600,000,000.

  O na luna aupuni no lakou na koi a na aupuni mana nui e hookau ia ka hoopai o ka make maluna o lakou, oia no na Keikialii Chung, Tuan, Li Tsai Tein, na keikialii o ka papa ekolu Kang, Schiao, Shechuao a me Tang Fu Hsiang, Duke Lan, Ying Teen a me Yu Hsien. O keia ae la na kanaka mana nui maloko o ke aupuni Kina nana i hoonawaliwali aku i ka mana o ka Emepera Wahine a me ka Emepera.

 

POINO HOU NO NA BOA.

 

  Bothawille, Nov. 8. Ua malamaia he mau hakaka ikaika ana mawaena o na Boa a me na Beritania mai ka la 6 mai, o ka hopena oia hakaka ana, ua hoopio ia aku na Boa me ka make ana he 23, hoehaia 30, me ka hopu pio ia ana he 100, a na lawe pio ia mai mai a lakou mai he ehiku mau pukuniahi. O ka poino o na Beritania he ekolu alii a me @ha i make.

 

LILO I KA WAI A PAKELE KE OLA.

 

  Ma na lono i loaa mai nei mai Wailuku mai, ma ka hu ana o ke kahawai o Iao ma kela pule ino aku nei, ua lilo aku la he hale i ka wai no kekahi Iapana, a maloko ona he wahi bebe Iapana e @@E ana. Iloko o ke kulana pihoihoi ua haalele iho la na makua o na bebe la iaia maloko o ka hale o holo aku la no kahi e pakele ai ko laua ola. Ua lawe ia aku ua hale nei e ka waikahe ikaika no kekahi wahi mamao, a mamuli o ka ulia laki ua ili aku la ka hale iluna o kekahi puu laau me ka poino ole.

 

HOOLAA LUAKINI BUDA.

 

  Ma keia La Pule e hiki mai ana e malama ia ana e na Iapana o ka hoomana Buda he hoolaa luakini ma ko lakou luakini i kukulu ia iho nei ma Fort Lane, ma ka hora 10 o ke kakahiaka. 

  E malama ia ana he kai huakai e na hoahanau a me na poe manaoio o ua ekalesia la, na kane, wahine a me na opio, mai ka Hotele Iapana mai e ku nei ma ka aoao makai o ke Kanikela Beritania ma Kapalama. E nee mai ana lakou ma ke alanui Moi, Beritania, Muliwai, Vaina a hoea ka luakini. E alakai ia ana keia huakai e Rev. H. Matsumoto, a o na poe a pau e komo ana maloko o na huakai la e kahiko ia ana lakou iloko o ka aahu eleele. Aole e malama ia ana keia kai huakai ina e ua ana ia la.

 

  He elua mau Iapana e moe ana maluna o ko laua waapa ma Waimea, Kauai, i lawe ia aku no waho o ka moana i ka wa o ka ino i pahola mai ai ma ka Poaha. Ua manao ia ua make laua, no ka mea, aole he mea i lohe ia mai no laua a hiki i ka wa a ka mokuahi i haalele aku ai ia awa no Honolulu nei.

 

THE HUB

E HELUHELU IHO I KEIA.

 

  Mamuli o ka makemake ana e loaa ona mau kowa kaawale no na waiwai o na la nui e komo mai nei. E hoomaka aku ana makou e hoolilo i na waiwai a pau ma ke kumukuai e hoopahaohao aku ana ia oe iloko o keia mau la aku he umikumamalima.

  E hoomanao ma keia kuai ana o ka makou mau waiwai a pau o na kane a me na kamalii he nui a ka launa ole ma keia mokupuni, e hoolilo ia aku ana lakou ma ke kumukuai haahaa loa.

  O ka makou mau aahu nani o na kane i loaa ole kona lua, ma keia e hoolilo ia aku ana ma ke kumukuai i ike mua olela ka haahaa.

  Ke hooiaio nei makou he waiwai keia i pili pono i ke kino a o oluolu ana i na mea a pau, a ina i kulike ole me ka makemake e hoihoi hou ia aku no na dala.

 

  E alawa ae i ko makou puka aniani i kou wa e maulo @e ai mawaho o ko makou halekuai.

 

THE HUB CLOTHING.

 

Honolulu, Alanui Hotele kokoke i ke Alanui Papu. Pahu Leta 651