Ke Aloha Aina, Volume VI, Number 47, 24 Nowemapa 1900 — Page 4

KE ALOHA AINA

KE ALOHA AINA, POAONO, NOVEMABA 24, 1900.

 

Ke Aloha Aina

 

Hookumu no ka Pomaikai o ka Lehulehu, a he Nupepa na ka Lahui Hawaii.

Edward L. Like. Luhahooponopono. Hogan E. Kaluna, Luna Hoopuka, Alex Nawahi, Luna Hoohana. Emma A. Nawahi Puuku o Ke Aloha Aina.

Puka Pule

E hoopuka ia ana ma na kakahiaka Poaono a pau.

No ka Makahiki $2.00

No ka Eono Mahina    1.00

No ke Kope Hookahi .05

@@@@@@ Hana.

Ma alanui Moi, Leleo, kokoke i ka hale hoolulu kaaahi.

Honolulu Nov. 24, 1900

 

INA he hololua KE ALOHA AINA ma ke kakoo ana i kekahi aoao aloha aina no, oia ke Demokalaka, pehea hoi Ka Loea Kalaiaina e haawi ana i kona mau kakoo ikaika ana mamua iho o ka la koho no ka aoao Repubalika? Ua oi aku anei ka ino o KE ALOHA AINA, a hemolele Ka Loea Kalaiaina. Nolaila, e ka makamaka e, uoki mai hoaleale i ka wai ua lana malie.

 

AOHE kanaka lawe nupepa o KE ALOHA AINA nei ma ka inoa W. S. Kahope, a Ka Loea Kalaiaina i hoopuka mai nei i kona mau manao kue, he epa a hoopunipuni loa keia, aka ke ole makou e kuhihewa, aole ia he kanaka lawe no KE ALOHA AINA, aka o W. K. K—— no ia o ke keena o Ka Loea Kalaiaina, ka mea i hoopuka mua i kekahi olelo hailiili kohu ole no ko makou makuahine puuku ma kekahi mau helu o Ka Loea Kalaiaina i hala aku nei.

 

NA keia koho balota nui i malamaia mai nei ma Amerika Huipuia i hookaakaa ae i na maka o kekahi mau Kuokoa Home Rula e noho hupo nei, a ike iho la o ka aoao Demokalaka a me ka Repubalika na aoao kalaiaina nui maloko o ka Hale Ahaolelo o Amerika Huipuia, a he uuko loa hoi ka heluna o na aoao kalaiaina e ae.

 

KE KUMU O BARAIANA I HAULE AI.

 

Ma ka makou kilo e hoomaopopo ana i ke kumu nui i haule ai o Baraiana ma keia kau koho koho balota ana, oia no ka pau pono ole ana o na hana a Peresidena Makinile e hana nei i ka hookoia.

No ka mea, ua maopopo i ka lahui Amerika he mea kupono ole i kekahi kanaka hou ke hookomo ia aku ma ia kulana me ka pau ole o ka hana a ke kanaka mua i ka hana, a no ka makemake o ka lahui Amerika Huipuia e ike aku e hana ana o Makinile i kana mau hana a hiki i ka pau pono ana, oia ke kumu nui i koho hou ia ai oia. Oiai, aia no o Pilipine ka hakaka mai la no kona kuokoa, he hana hoi i lawelaweia i ka au noho Peresidena o Makinile, ke kaua ma Kina, a me kekahi mau hana e ae, a i ka wa e pau ai o keia mau hana i ka hookoia oia auanei ka wa e rula mai ai o Baraiana maluna o ka lahui Amerika.

No keia kumu wale no i puka ai o Makinile, aole no kona ohohia maoli ia e ka lahui Amerika.

 

WAIHO O SAM. PAKA I NA HANA KALAIAINA

 

Ua hoopuka ae la ka nupepa Avalataisa ua olelo ae o Sam. Paka, aole oia e holo moho hou ana no kekahi ano, a ua lawa oia. Aole no kona hoeha ia ana o kona manao no kona haule ana, ua nalohia aku ia haawina. Aka, ua hoomaopopo iho oia ua oi aku ka pono o ka noho ana i kona home me ka $20,000 mamua o ka holo ana aku i Wasinetona no elua makahiki a hoolilo aku.

O kekahi kumu, ua ma‘i kona naau no kona keehi ia ana e kona mau kanaka ponoi. Wahi ana, ma Hawaii he puali kanaka nui ko‘u ma ko‘u wahi, a o lakou a pau ua koho kue mai lakou apau ia‘u. O ke Keikialii Kawananakoa he 300 ona mau ohua a ua koho kue aku lakou a pau iaia. Aole anei ia he mea e hoehaeha aku ana ia oe?

Ua kamailio aku au i ko‘u mau kanaka e koho e like me ka lakou i manao ai he pono no kekahi mau kanaka okoa aku, a e koho no hoi ia‘u, aka, ua hele aku la lakou a koho no Wilikoki. Ina he mea kekahi i makemake ia‘u e holo hou no ia kulana a e ae ana au, e haawi mai i na peku mahanahana maluna o‘u.

 

HE OIA MAU NO MAKOU.

 

Eia no makou ke hoolawa mau aku nei i ko makou poe heluhelu me na ono like ole o ko‘u ai ka puu, a mamuli oia kumu he oia mau no kona kulana ohohia ia, aole hoi e like me Ka Lahui Hawaii a me Ka Loea Kalaiaina ke emi mai nei ko laua kulana lawe ia malalo o ke tausani, e hoike mai ana, he nupepa laua i nele me na manao ohohia e ka lahui Hawaii.

No makou iho e ku ana makou ma ka aoao o ka lahui, a nana aku i na hana a ka elele a ke Aoao Kuokoa Home Rula, kona mau senate a me na lunamakaainana, a pela me na aoao kalaiaina e ae. A o ka mea e hoao ana e hana i na hana kolohe i mea e pilikia ai ka lahui Hawaii maloko o ke kau ahaolelo, e hoike aku ana no makou imua o ka lehulehu me ka hookamani ole, a o na poe hoi e hana ana i ka hana pono no keia lahui e hoopilikia ia nei en na Repubalika oia auanei ka makou e haawi aku ai i na mahalo me ke kakoo pu aku.

Nolaila, e ka lahui e lawe nui i KE ALOHA AINA i ike i na mea oiaio e hanaia ana e ke kau ahaolelo ma Amerika Huipuia me ka elele a ka lahui maloko ona a me ke kau ahaolelo hoi e malamaia ana maanei.

 

AOLE HE HOOHUIAINA.

 

O aoao Demokalaka, aole ia he aoao hoohuiaina, aka, he aoao aloha aina no ia e like me ka aoao Kuokoa Home Rula, e ake ana hoi e loaa he mau hooponopono aupuni maikai maluna o ka lahui ilihune i kaili ia aku ko lakou pono kuokoa e ka Repubalika. Ua hoopuka ae kekahi mau nupepa Hawaii o ke kulanakauhale i ke kakoo o KE ALOHA AINA i ka aoao Demokalaka mamua, a ke huli hou nei ihope i ke Kuokoa Home Rula. O ka aoao Demokalaka oia no ka KE ALOHA AINA e kakoo nei, a e kakooo mau aku ai, aka, ma kona ike ana aku o ka aoao Kuokoa Home Rula, he aoao aloha aina no ia a i ko makou ike ana aku ua lanakila oia, pela makou KE ALOHA AINA i kakoo aku ai iaia, ina o ua aoao Kuokoa Home Rula la he hoohuiaina elike me ka Repubalika, aole loa ka makou makapeni e haawi aku i kekahi kakoo ana nona.

No ka aoao Demokalaka a me ka aoao Kuokoa Home Rula, aole laua i noho ma ke kulana hooponopono aupuni, nolaila e hiki i ka lahui ke hoopuka i na olelo ahewa no keia mau kalaiaina elua, aka, no ke Kuokoa Home Rula nae he mau la pokole wale no koe a ikeia aku kana hana. Ma ka aoao Demokalaka ua ike na aoao kalaiaina a pau he mau moho maikai kana i wae ai me ke akahele, aole hoi i ohi hapuku aku, a o ke kahua hana a ia aoao kalaiaina e ku ana oia no ka hoopakele ana i keia lahui mailoko mai o ka hoopilikia ana a ka aoao Repubalika. Nolaila, mahea kahi i kulike ai ka aoao Demokalaka me ka aoao Repubalika he kokua hoohuiaina?

Ina o ke komo pu ana mai o kekahi poe hoohuiaina kakaikahi maloko o ka poai o na Demokalaka, oia ke kumu i kukala leo nui mai ai ka aoao Kuokoa Home Rula he hoohuiaina ka aoao Demokalaka. Ke ku aku nei makou a hoike aku me ka oiaio, aia no iloko o ka pohai o ka aoao Kuokoa Home Rule, he mau kakoo ikaika i ka hoohuiaina o na la i hala aku la.

No laila, e na Kuokoa Home Rula e noho kakou iloko o ke apo o ke aloha, he manaolana mau ko makou e hoea mai ana no auanei he la e ku aku ana ka aoao Demokalaka e haawi i kona mau kokua ikaika ana no ka pono o keia lahui i hoopilikia ia.

Ua puka ae nei ka hapanui o na moho o na hale elua ma ka aoao o ke Kuokoa Home Rula, aole loa a makou kue aku ana ia lakou, aka, o ka makou e upu nei e ike aku e hana mai ana lakou i ka pono nui no ka lahui Hawaii.

 

LANAKILA NO O R. W. WILIKOKI.

 

Ua hoike mua aku makou ma kela pule aku nei, eia o A. B. Loebenstein i Honolulu nei me kekahi palapala hoopii no ke kue ana ia Kauka N. Russell kekahi moho Senatoa a ka aoao Kuokoa Home Rula i koho mai nei ma Hawaii, aka, i kona ike ana ua hoonele ia oia me na pomaikai o kana huakai, ua hoohuli hou ae la oia i kana mau kue ana no ka elele a ka lahui R. W. Wilikoki e hoao ana hoi e kulai iaia mai ke kulana ana e paa nei.

Maloko o ka palapala hoopii a ua Loebenstein nei e kue ana ia aole he mana o ke Teritori e kauoha ai e koho ia i elele no elua ahaolelo i hoike ia, a oia koho ana aole loa ia i pololei a ku hoi i ke kanawai. Ua lawe ia aku keia hoopii imua o ka Loio Kuhina ma kela pule aku nei, a ua hoole mai ia mana hooko o ke aupuni me ka olelo ana e waiho na ka Ahaolelo e hooponopono i kona mau hoa, aka, mamuli no nae o ka manao lili no o keia haole ua lawe mai la oia i keia hihia imua o Lunakanawai Humphreys me kona mau Loio oia o Davis a me @@@@ a e like no nae kona hoonele ia ana mai e ka Loio Kuhina, pela no ka Lunakanawai Humphreys i hoohoka pu mai ai. Ua manao ia aole o Loebenstein e h@@@@@ hou aka ana i ke alualu @@@ i @@ aku o R. W. Wilikoki, a@ @@@@@@, a he puahiohio ka loaa @@@ @@@. A nolaila, ua hiki ole iaia ke kue aku ia Kiaaina Dole i ka hoopuka ana i ke komisina o ka elele i puka ae lano Wasinetona.

He Senatoa Repubalika keia haole no ka mokupuni Hawaii i haule ma keia holo baloto ana mai nei. Ahuwale no k@ @@@ o ka Repubalika he lili, ka makemake o lakou wale no ka lawelawe i na hana hooponopono aupuni.

 

E lawe nei i KE ALOHA AINA i ike mau i na mea hou o keai mau la e nee nei.