Ke Aloha Aina, Volume VI, Number 45, 10 Nowemapa 1900 — Page 4

KE ALOHA AINA

 

4  KE ALOHA AINA, POAONO, NOVEMABA 10, 1900.

 

Ke Aloha Aina

Hookumuia no ka

Pomaikaii o ka Lehulehu, a he Nupepa no ka Lahui Hawaii.

 

EDWARD L. LIKE,

Lunahooponopono.

HOGAN E. KALUNA,

Luna Hoopuka.

ALEX NAWAHI,

Luna Hoohana.

EMMA A. NAWAHI

Puuku o KE ALOHA AINA.

 

PUKA PULE.

E hoopuka ia aana ma na kakahiaka Poaono a pau.

 

AUHAU PEPA

 

No ka Makahiki..........            $2.00

No ka Eono Mahina .........      1.00

No ke Kope Hookahi .........    .05

 

KEENA HANA

            Ma alanui Moi, Leleo, kokoke ia ka hale hoolulu kaaahi.

 

HONOLULU......NOV. 10, 1900

 

HE HOOMAIKAI NUI

 

            Ke haawi aku nei ke Keikialii Kawananakoa, ka elele a ka aoao Demokalaka, na Senatoa a me na Lunamakaainana a pau o ia aoao i ko lakou mau hoomaikai palena ole i na mea a pau i kakoo aku ia lakou  me ka puuwai lokahi ma ka la koho balota, Nov. 6, 1900, no ka lanakila oia aoao. He manaolana ko lakou e hoea hou mai ana no he manwaa no lakou e ku hou ai a paio hou no ka pono o kona lahui e hoopilikia ia nei e na Repubalika.

 

HAO KA REPUBALIKA I KONA MANA.

 

            Mamua o ka hoea ana mai o ka la koho balota ua lohe ia aku ka leo hooweliweli o na haku hana o na poola ma kai o na uwapo e kalahea ana me ka leo nui, ina e haule ka Repubalika e hoopau ia ana ka hana ana o na Hawaii maluna o na uwapo. A he mea oiaio, ua hooko ia ia mau olelo o ka lokoino, no ka mea, ma ka Poakolu nei, ka la mahope iho o ke koho balota ana, ua hoopauia mai kekahi mau keiki poola i ka hana ana maluna o na uwapo. O kekahi mau keiki o ka hui mokuahi o Waila ua hoopau pu ia mai, aka, ua hamama nae ka puuwai o na luna Demokalaka e hana nei ma ka uwapo o Poka i ke apo ana aku ia lakou. Ka poe i hoonele ia mai i kahi papaa berena e ola ai ka wahine a me na keiki, a o kekahi poe no o lakou i hoopau ia mai he poe no i koho i ka Repubalika. E ka lahui ua hele mai na Repubalika imua o oukou me ka mali leo ana, aka, i kona wa nae i ike ae nei ua ikaika kona aoao, ua kuha mai la oia i kekahi poe i kakoo aku la iaia, aka, e hoea mai no nae he la e noho alii ai ka lahui Hawaii maluna o kona mau enemi.

 

UA EMI HOU MAI.

 

            I ka wa i pau pono ai na balota koho elele i ka helu ia ua ike ia ua emi hou mai ka heluna balota o Samuel Parker, a ua pii hou ae hoi  ka heluna balota o Robert Wilcox ma ka mokupuni o Oahu nei no na kau elua.

            No ke kau pokole 56:

Parker................          2193

Wilcox................         1974

Kawananakoa.....        786

            O ka oi aku o na balota o Parker ia Wilcox he 219 no ia kau.

            No ke kau piha 57:

Parker..................        2188

WIlcox.................       1983

Kawananakoa.......      795

            O ka oi aku o na balota o Parker ia Wilikoki no keia kau 205.

 

AOLE IA HE MEA ANO NUI.

 

            He nui na poe Repubalika i pahenehene mai i ka aoao Demokarata no la loaa ole ana he lanakila iaia. Aka, o ka pane i haawi ia aku ia poe, o ka aoao Demokarata he hoahanau oia no ka aoao Kuokoa Home Rula, a ina ua haule oia, ua makemake oia e koha hoahanau e ahai ae i ka lanakila mai ka poholima mai o na Repubalika, no ka mea, ua hoike mua ka elele alii o ka aoao Demokarata o ka aoao Demokarata a me ka aoao Kuokoa Home Rula he hookahi no laua.

            Aole he nalulu o ke poo o ka aoao Demokarata no kona haule ana, aka, ua waiho aku i kona mau manaolana no ka lanakila maluna o ka Elele R. W. Wilikoki. Eia na Repubalika ke naka haalulu mai nei na ku.i. a ke holo maeele ae la hoi ke anu i na kumu pepepiao i ka piha hopohopo no ka lawe haaheo ae o ka Elele a ke Kuokoa Home Rula i ka hanohano o ke kahua kaua. O ka KE ALOHA AINA e kanaenae ae nei e puka ka elele a ka lahui ka Hon. R. W. Wilikoki, a e haule pahu hoi ka elele a ka poe pakaha alua.

 

AKAKA KE ANO O KA REPUBALIKA.

 

             Ua loaa mai la ia makou he mau hoike mai kekahi mea i hilinai ia, ua kipaku ia aku he wahine mai ke komo hou ana iloko o ka pa o kekahi Senatoa Repubalika a ka lahui Hawaii i koho ai me ka manao maikai oia o Kale Aki. O ke kumu ka no ka ike ana o keia Kale Aki i ke kane a keia wahine e kau ana i ka lipine Demokalaka. Ma keia wahi e ike ia ai he kanaka hoomauhala keia Senatoa Repubalika.

            Makai o ka uwapo ua kipaku ia kekahi mau kanaka poola mai ka hana hou ana malaila, oiai, ua hoohuoi wale ia aole lakou i kakoo i ka aoao Repubalika.

 

KA HUAKAI A KE KEIKIALII KAWANANAKOA.

 

            Ua hookipaia ke Keikialii Kawananakoa a me kona mau ukali E. K. Lilikalani, Thomas Clark D. Haiola a me kekahi mau haole ma ka wehi o Laie e ke keiki lalawai L. B. Nainoa a me kana lede puuwai hamama iloko o ka ulumahiehie, ua ai a lawa i ka lokomaikai o na kamaaina.

            Ua malama ia ka halawai ma ke ahiahi Poakahi malalo o ka hoomalu ana a D. Kekuku, a i puleia e Nainoa. Ua haiolelo ke Keikialii no ka pono o ka aoao Demokalaka a me kona holo elele no Wasinetona, he nui aku na man o hoolana me ke ohohia hui ia, ke hele la a hookeke na kane a me na wahine no ke ake e lohe i ka leo o ke Keikialii.

            Ua kokua mai o E. K. Lilikalani i ka haiolelo a ke Keikialii a mahope iho o D. Haiola, Thomas Clark a me kekahi haole, ua nui no ka hauoli o ko laila mau kanaka, a ua hooholo lakou o ke Keikialii David Kawanakoa ka lakou Elele me ka lokahi.

            Ua hiki pu ae o Sam Paka i ka halawai a ke Keikialii ia po, ua hoolauna aku ke Keikialii iaia me ka mawana nona e haiolelo ai. Ua ku mai la ua keiki lalawai nei o ka uhiwai o Mana me na manao hoolana oia keia: He halawai keia na ke Demokalaka he mea pono ke koho oukou i ke Keikialii i elele. Ua haawiia i ekolu huro ana no ke Keikialii a hookuu ia ka halawai oia po me ka maluhia.

            Poalua ua haalele aku la ke Keikialii ia Laie a nee aku la no Makao kahi noho o Kauka A. B. Carter a me kana wahine, ua hookipa ia aku lakou me na manao ohaoha. Ma ia ahiahi ua malama ia na hana ahiolelo e ke Keikialii a me kona mau hoaloha, a ua hiaai nui ia ka lakou mau haiolelo e na poe ma ia wahi. Malaila pu ae he hui himeni no ka hoolealea ana i ke Keikialii.

            Poakolu haalele ia Makao hele aku la ka huakai alii a hoea i Kahana, nona kela olelo hooheno. Ka makani wili ahiu. Ku ke kaa o ke Keikialii malaila a hele aku la e hui me na makaainana, a ua malama ia he halawai e ke Keikialii i kokuaia e Thomas Clark a me kekahi haole, a ua nui no ke ohohia o na kanaka.

            Haalele ia Kahana no Heeia, a ua hookipa ia e E. K. Bull, ka Luna Nui o Heeia, ua ai a lawa i ka lokomaikai oia keonimana.

            Ua malama hou ia he halawai ma ka Hale Hookolokolo o Kaneohe malalo o ka noho hoomalu a Mr. Pahia, Opio, e ke Keikialii Kawananakoa i kokua ia e kona maau hoa iloko o ke ohohia nuiia.

            O keia ka pahu hopu o ka huakai a ke Keikialii a huli hoi mai la no ka ulu wehiwehi o ke taona, a kokoke i ka pali o Nuuanu alawa ae ka hana lele ana na ahikao e hoomalamalama ana i ka nuku o Nuuanu no ka hoohanohano a me na hoohiwahiwa ana a ka Aoao Demokalaka no ke Keikialii.

            I ka hiki ana o ka huakai i ka nuku ua hele a piha i na Hawaii me na haole maluna o na lio a me na kaa, me he mea la ma ko'u ike aku he mau haneri ka nui me na kukui i hele ia a malamalama i ke ahi a ka wahine i kau a mea o ke ohohia nui ia.

            Ua huli hoi mai ka huakai a ke Keikialii a hiki i ka halepule o Maemae ua piha olaila, ua kipa hou aku ke Keikialii e ike i kona mau makaainana, a ua haiolelo hou malaila, a huli hoi aku la no kona home ma Waikiki me ka huakai i hele a malamalama i ke ahi a ka wahine. Pau aku la ka ikena a kou mea kakau.

O wau no me ka oiaio,

D. HAIOLA.

 

HE MEA KUPAIANAHA NO.

 

            Ma ka makou hakilo pono ana ma ka la koho balota nei, ua ike aku la makou i kekahi mau kahu ponoi no o ke Alii Kawananakoa e lei ana i ka lipine melemele o ke kumakaia, a hoomaopopo iho la makou aole ka  i make ke Alii ia waho aku, aka, i ke a@ iho no.

            He nui a lehulehu na k@ o na Alii nei i hoohuli mai i ko lakou kua Iaia, ka mea hoi i haawi aku i na pulama ana ia lakou, a koho aku la ia Sam Paka a me R. W. Wilikoki, a oia ka makou e hoomaopopo ae nei, o ka mea i haawi i na kokua aloha ana ia lakou me kahi e hoomoe ai o ko lakou mau poo, oia no ka ka poe nana Oia e hoowahawaha mai ana.

            Ua hoike ia mai la makou ma kekahi wahi a na kahu o ke Alii e noho nei, Ana i manawalea wale aku ai ia lakou e noho malaila a hiki i ka make ana, ua malama ae la lakou he hauoli nui no ka puka ana o Sam Paka, e inu ana hoi na kiaha no ke ola o ua elele la me ka noonoo ole iho o ka lepo a lakou e noho la aole ia no Sam Paka.

            He mea kupaianaha no, o na kanaka no e ai nei i ka loaa a ua Alii o lakou no kona mau enemi, a o na poe mawaho loa o lakou kai makee aku Iaia a haawi aku la i na hooikaika piha no Kona lanakila.

 

            He nui ka pihoihoi o na poe Repubalika o lilo ka lanakila i ka moho a ka lahui R. W. Wilikoki.

.