Ke Aloha Aina, Volume VI, Number 44, 3 November 1900 — Page 3

KE ALOHA AINA

 

KE ALOHA AINA, POAONO, NOVEMABA 3, 1900.  3

 

KIKE OLELO PILI KALAIAINA.

 

            Ua ulu ae he wahi kike olelo mawaena o makou ponoi a me kekahi hoaloha e pili ana no kekahi mau ninau hooulu manao kalaiaina o keia mau la, eia nae, iloko no o ke ano makamaka o ke kamakamailio ana. He mea oiaio loa maoli no, ua lilo io no ia kikekike olelo ana i mea e hooulu mai ai i ko makou noonoo ana, a o ka makou no hoi ia e hoike aku nei malalo iho i ke ano nui o na mea i oleloia, elike me neia iho:

            Ua hoaiai ae oe ma kau pepa ua kokua o Wilikoki i ka hookahuli ana i ke Aupuni Moi, Pehea oia i kokua ai?

            Me neia iho, oia hoi, mamuli o kona hoopuka ana i na olelo hailiili pilikino no ke Alii ka Moi (wahine) ma kekahi mau haiolelo ana ona imua o ka lehulehu a iloko no hoi kahi o ka Hale Ahaolelo. O kana i hana ai ia wa, he kokua ana ia nona i ka hoea awiwi mai o ka hookahulihia. Ina he oiaio kona aloha alii a me kona aloha aina, aole loa oia e hooko ia ano hana hoohaahaa i kona haku, ka mea nana oia a me kana wahine haole i hookipa. O ka mea maopopo loa, ua kuha aku oia i ka lima nana i pahola mua aku i ka lima akau o ke ohaoha a loaa ai kona malumalu iloko o kona wa o ka nele. Ua lilo ia mau olelo hailiili a hoino pilikino ana i mea e hilinaiia ai a lilo hoi ke Alii i mea hoowahawaha loa ia.

            Aole anei hoi ou hilinai ua kokuaia oia ma ia hana?

            Ae, pela no; ua kokua ikaika loa ia oia e kekahi mau haaloha ona o ka holo balota like ana, a o ia ano like no iloko o ka Ahaolelo. Ina aole i loaa kona kokua ia, ina no paha hoi ua pio wale kona manao, e like me ia ana i huli ma ka aoao hoohuiaina.

            Kahaha, ua komo no ka oia ma ka aoao hoohuiaina, a i ka wa hea ia?

            He mea oiaio loa ia. Mahope koke iho no o ke kahulihia, ua komo ma ke ano he lala iloko o ka Ahahui Hoohui Aina a oia kekahi o na hope peresidena o ke kohoia ana. No ko ka lahui hoolohe ole aku iaia a no kona uku dala ole ia mai hoi kahi e ua poe hoohuiaina la, ua waiho aku oia a huli hou he aloha aina, ina la ua haawi koke aku oia iaia iho, oia hoi, i kona kino a me kona noonoo, ina he ike kalaiaina io oia, ma ke kokua aku i ke Alii a me ka lahui i hoopilikia ia.

            Ina oia e kohoia ana i elele no ka lahui e hele ai imua o ka Ahaolelo Nui  ma Wasinetona, pehea, ua hilinai no anei oe e hana io aku ana oia i ko ka lahui pono?

            Aohe o'u wahi hilinai iki e hana aku ana oia i kau wahi pono iki no ka lahui ke koho ia oia. O kona ake nui loa, o kona pono iho, he mea olelo mau no hoi ia nana, oia hoi, o ke dala. E nele loa ana kona noonoo a hoomaopopo mai no ka lahui.

            Pehea iho la hoi oia e noonoo a hoomaopopo ole mai ai?

            No ka mea hoi, elike no me ka'u i hoaiai mua aku nei, ua hilinai oia oia nona iho. O ia pono ona iho, oia no kona hooikaika aku i ka pono o kana wahine e koi nei i na Aina Leiailii. He pono ia i oi loa aku nona iho mamua ae o ko ka lahui. Ke ko io kana wahine, o ko laua pono no ia.

            Malia he pono io no ia no kana wahine a no laua like no. Pehea ka hoi, aole anei hoi o kana wahine kekahi alii hanau o ka aina nei?

            Ae, e ewe alii io no kana wahine i lilo i mea lapuwale loa e hiki ole ai ia kakou ke hilinai aku. Ua alii oia ma o kona makuakane la, ko ke Aliiwahine Keakaaniau kaikunane, eia nae hoi, ma ka aoao o kahi makuahine, ke kumu nui o ko kakou mau alii e ike ia ai, he haahaa loa. Ma keia wahi, ua makehewa ko kaua kamailio nui ae.

            Ke makemake loa nei au e maopopo lea mai a oe mai, ina paha ua hilinai oe ua a'o a kauoha io ia mai oia e hoala i Aoao Kuokoa Home Rula?

            Aole loa o'u wahi mea a hilinai iki. Nana wale iho no hoi ia, no kona ike ina e puni ka lahui mahope ona, he mea ia nona e lilo ai i alakai nana kakou e kalewa a pakaukau aku i mea e loaa mai ai o ke dala iaia a pono kona noho ana a kana wahine hooikaika kino nei. O ko'u hilinai ua olelo ia mai oia e ku kaokoa na oiwi no lakou iho ma na hana kuloko, a pela no hoi au e manaoio nei, aka, no na hana mawaho aku, aole o kakou kuleana, a e pono hoi ke komo ae iloko o kekahi o na poai alakai kalaiaiana nui elua o Amerika.

            Alaila, ua manao oe aohe o ka kakou kuleana ma na hana o waho aku. Ina pela, mahea kakou?

            O ko'u manao io no ia, aohe o kakou wahi lihi kuleana i ko waho; aka, i ko loko nei wale no o ka aina nei. Oiai hoi, aia kakou ke kikoo aku nei i kahi hana o waho, ua hilinai au aia ko kakou pono ma ka poai Demokarata, aole loa hoi me na Repubalika, ka aoao i keehi a hehihehiku mai ia kakou oiwi.

            Ua oleloia he kue a hoowahawaha loa na Demokarate i na paele?

            He kue a hoowahawaha pono loa no. Aole e hiki ia kakou ke hoohalike ia kakou iho me ia poe. Wahi a ka oleloia, ina i noho kakou iwaena o lakou, alaila, e ike ana no kakou, he poe haahaa loa, piha kapulu, ekaeka, hoohaumia i na kaikamahine liilii a me na wahine haole, he mau loina hoi i ku ole ia kakou oiwi.

            Mai no kakou a manao aku no lakou, aka, e nana mai no ia kakou iho. Eia ia aoao ke kakoo ikaika nei i ke Keikialii Kawananakoa i alakai a pehea hoi e hiki ai ke oleloia he hoino ili-hauliuli lakou. He mea pono nou ke kapae loa aku ia noonoo ana a kakoo like mau kaua ma ia aoao hookahi, ka aoao e hoike nei i ke aloha a makee alii. Ina kaua e hana ole ana pela, alaila, ua kiola kaua i ko kakou aloha alii i ka ilio. Minamina wale ke ike ia pela io kaua e hana ai.

            Wahi o kau i hoaiai mua mai nei, aole o Wilikoki e hana i ko ka lehulehu pono, aka, i kona ponoi iho. Ke manao nei au ma ia hana au he kumu okoa ae kekahi. Ina he kumu okoa io ae kekahi, alaila, ua manao anei oe ua kipe ia oia?

            Ae, pela io no ko'u manao. E hoomanaoia he kanaka oia i maa ole i ka walaau a hoike wale ae no i na mea i hana ia ma kahi malu. Mamuli mai hoi oia ano ona, ua hilinai ia pela no oia i nei wa, oia hoi, ua kipe ia oia ma o kana wahine la. Ua hoomaopopo lea ia keia mamuli o ka ike mau ia o kana wahine i ka poalo ma kekahi mau keena oihana. O ke ano nui o keia kipe ia, e hooikaika oia e alakai i na kanaka Hawaii e hana i kekahi mea no lakou e hoowahawaha ia ai e na Amerika, oia hoi, ma ka pahu balota i nei kau koho ino a hoea mai. Ke ike e nei no kakou, ua wae ae lakou i na moho a lakou, he poe ike ole ia wale no ka hapanui a he poe inoa maikai ole kekahi, e hoike mai ana e pau aku ana no lakou i ke kipe ia, no ka mea hoi, aohe i ike nui ia mamua. Ua haalele ia na poe opio lehulehu i kupono loa e hele e hana no ka lehulehu, he poe hoi kahi o lakou i eha no ka lahui. Nolaila hoi, mamuli o keia wae ia ana o keia poe kupono ole a ke koho ia hoi lakou, he hoike ana mai no ia i ko kakou nele loa ma ka noonoo maikai no ko kakou pono iho, ole loa aku hoi i ko hai.

            A heaha iho la hoi ka pili o ko Wilikoki ekemu ole no hoi i kona kipeia, ina ua kipe io ia oia?

            Eia, mamuli oia ano ona, ua hilinai loa ia aole oia e huai wale ana i kekahi mea huna i hana a i hooholo like ia. Ua hilinai ia aole loa oia e hahai wale ana i ua poe la, a o na poe la, no ka Aoao Repubalika no ia, no ke ake no hoi e hoohaiki ia ko kakou pono koho. Aka hoi, ina kakou e koho ana i na poe kupono, e haule pahu ana ia manao o keia poe ewe mikanele e kipe nei paha hoi iaia ma o kana wahine e like me ia i hanaia ia iloko o 1895 a mamua aku, oia hoi, ua uku ia kana wahine e Ilamuku Hikikoki no ke kumakaia i ko ka lahui aoao ma o na mea ana e lohe ai mai ia Wilikoki aku.

            Ea, ua awaawa no ka hoi. Ke hilinai nei au i kau mau hoakaka, a ke hoike aku nei au ia oe e lilo no ko'u koho ana no ka balota Demokarata mai ke poo ka hiu, no ka mea, ke hoomaopopo nei au aia no he poe aloha aina oiaio iwaena o lakou i kupaa mai mua mai a i hiki ole loa hoi ke kuai a ke kipe ia ae, he poe kahi iwaena o lakou i hoopaahao a i hoopilikia ia no ka lahui, o kahi hewa wale no, o ke aloha ana i ka aina kulaiwi nei o kakou, he poe hoi kahi i hoonele a i hoohoka ia me na pono a pomaikai o keia noho ana. O keia poe ka'u e ike nei i ke aloha aina oiaio, i nele loa hoi iwaena o na hoa Kuokoa Home Rula o kaua, he poe nele a ake loaa ka nui o lakou. Nolaila hoi, e like me ko'u koho ana no'u iho pela no au e uwalo aku nei i ka lahui e laulima like mai.

            Ua hooki keia mau hoa kike olelo i ka laua kamakamailio ana me na hoakaka ano nui mamua ae. A ma ko makou aoao hoi, ke waihoia aku nei no na ka lahui e koho mai.

 

HOAO E LAWE I KE OLA O KANA WAHINE.

 

            Ma na lono i loaa mai nei mai Wailuku mai, ma kela Poalua aku nei, iloko o ka hoalu ana o ka auaipa maluna o na poe o loko o kekahi hale, ua ala mai la he pepehi hoomainoino. Ua ike aku he kanaka e noho ana maloko o ua hale nui nona ka inoa o Kaula i kana wahine e hooipo ana me kekahi mea okoa aku, ua ala koke mai la kona manao lili a holo aku la e kii he koi a hele mai ia e uhau maluna o ke poo o kana wahine no ekolu manawa. Ua holo koke mai kona makuahunowai e hoopau i keia hakaka, aka, ua loaa pu aku la iaia he poino mai ka hauna koi aku a Kaula. Ua lawe ia aku na mea i hoeha ia i ka haukaipila Mililani, a o ka limakoko aia oia ke hoopaa ia la no ke kali ana i ka hoolohe ia aku o kona hihia.