Ke Aloha Aina, Volume VI, Number 44, 3 November 1900 — Page 2

KE ALOHA AINA

 

 

KE ALOHA AINA. POAONO NOVEMABA 3, 1900.

 

HONOLULU…… NOV. 3, 1900

 

LAMALAMA KA NUKU O NUUANU

 

I KA HUAKAI A KE KEIKIALII KAWANANAKOA.

 

He Puali Nui o Kona mau Hoaloha i Imi aku Iaia i ka Pali a Ukali mai Iaia no ke Taona.

 

            No ka hoike ana aku o na Demokarata i ko lakou mau manao ohohia no ka lakou Elele, ke Keikialii Kawananakoa, ua imi okoa aku he puulunui o kona mau hoaloha Demokarata iaia a hiki i ka nuku o Nuuanu ma ka po Poakolu nei.

            Ua hoakoakoa ae keia puulu kanaka nui mawaho iho o ka hale keaka Ofiuma maluna o na lio a me na kaa, a ma ka hora 6:30 p.m. i haalele iho ai lakou i ke kulanakauhale nei a motio pololei aku la no uka o ka pali.

            Aole he mau kuia i ike ia ma ke alahele a hiki wale i ka hoea ana o ka huakai i ka nuku ma ka hora 8 ponoi oia po, a mailuna aku o laila i hoolele ia ai na ahi kao e hoohanohano aku ana i ka huakai a ke Keikialii e huli hoi mai ana mai na pali hauliuli mai kahi ana i hoike aku ai i ko laila mau kupa, aohe mau aoao e ae e hoi hou mai ai ke kuokoa, aka, o ka aoao Demokarata wale no.

            He hapalua hora o ke kali ana o ka huakai malaila ua ike ia aku la ke kaa o ke Keikialii Kawananakoa a me kona mau hoahele e pii mai ana mai lalo mai, a mamua o ka hoea loa ana aku o ka huakai alii i ka nuku ua halawai iho la lakou me na keiki himeni Kawaihau e haawi aku ana he mau leo mele ohaoha no lakou.

A i ka hiki pono ana aku o ka huakai iluna o ka pali oia no ka wa i puia koke ae ai ka lewa me na leo huro o kona mau hoaloha e akoakoa ana malaila, me ka hoomalamalama pu ia e na ahi kao, a ua like ka nuku me he lua pele la ia mau sekona. Mahope o ka hoomaha iki ana malaila ua nee mai la ka huakai no ke kulanakauhale nei malalo o ka ukali ana a kona mau hoaloha, a e hoomalamalama ia ana hoi kona alahele e na haneri kukui i lawe pu ia aku.

            Ma ka hora 9:30 o ua po la ua kipa ae la ka huakai ma ka hale pule o Maemae no ka haawi ana aku o ke Keikialii he mau olelo pokole malaila. Mamua o ka hiki ana aku o ka huakai malaila, ua piha a hookeke ka hale pule i na kanaka e ake ana e lohe i ka leo alii.

            Ua malama ia na hana malalo o ka hoomalu ana a Kale Keopu. Ua hoolauna ia mai o Ailuene Boki, a mahope o kekahi mau olelo pokole, ua noho iho la oia a hoolauna ia mai la ke Keikialii Kawananakoa.

            Wahi a ke Keikialii Kawananakoa: I o'u mau kaikuahine, kaikuaana, a me o'u mau pokii, aloha oukou. He mea hauoli no'u ka launa pu ana me oukou i keia po no ka hoike ana aku i ka aoao e hoihoi hou ia mai ko kakou pono kuokoa aole ia he aoao okoa aku, aka, o ka Aoao Demokarata no ia ka me a'u e kakoo nei, a he manaolana hoi ko'u e hoea mai ana no ka la e hoohuli hou ia ai ke alo o ko kakou aina. Nolaila, e kakoo kakou me ka lokahi ma keia aoao, no ka Aoao Kuokoa Home Rula, aole ona mea nana e kokua mai ana ma o, a pela i lilo ai ia aoao i mea waiwai ole.

            I ka pau ana o kana, ua ku mai la kekahi keiki kamaaina o na Waieha oia o Thomas Clark, a nana i haawi mai i kekahi mau huaolelo e hoomalamalama ia ai ke anaina i akoakoa ae i ke kulana o ka Aoao Demokarata, ka aoao hoi i hooikaika e hoihoi hou ia mai ko kakou pono kuokoa i kaili ia.

            I ka pau ana o ka Thomas Clark haiolelo i ku mai ai ke Keikialii a noi mai la i ke anaina e hookuu ia aku lakou, a i ka ae lokahi ana mai o na makaainana ua puka mai la oia me kona mau hoa a kau ae la maluna o na kaa me ka haalele ana aku i kekahi mau alakai Demokarata e hoopau aku i na hana oia po.

            I ka hiki ana o ka huakai ma ka ilina o Mauna Ala, kahi a na alii hanau o ka aina e moe ana i ka moe kapu o Niolopua, ua ku iho ka huakai, a mele aku la i ka mele lahui "Hawaii Ponoii" iloko o ke anoano eehia. A mahope o ka pau ana o keia mele i hoomau loa aku ai ka huakai alii no Pualeilani, ka home o ke Alii Kawananakoa me kona mau hoa a pau e hoomalamalama ia ana e kukui kini. He hiehie a he nani maoli no ka huakai i kona wa i maalo ae ai ma kekahi mau alanui o ke kulanakauhale, a ua hoolaukanakaia no hoi na alanui a pau a ka huakai i huli hoi mai ai me na kanaka no ka makaikai ana i keia kai huakai.

            A ma ka hora 11 o ka po i hoomaha aku ai na kamahele i ka home olu ke Alii nei, ma Pualilani. Malaila pu no hoi ka Moiwahine Liliuokalani i aloha nui ia kahi i kali mai ai no ka hookipa ana aku i kana keiki. Iloko oia wa i panee pu ia mai ai he papaaina i luluu i na ono like ole a maluna o laila i hoopiha iho ai na mea a pau i ka lua o ka inaina, a o na alii pu ma ia papaaina e ai pu ana me ko laua mau makaainana malalo o ka hoonanea ana a ka hui himeni Kawaihau.

 

HE AHA FEA NUI ME KA LUAU.

 

            E wehe ia ana kekahi Aha Fea Nui me ka Luau i ike mua ole ia maloko o ke kulanakauhale "Ua lehua" o Hilo ma ka la 22 o Dekemaba e hiki mai ana; o na pomaikai a pau e loaa ana no ka uku ana ia i na @lo o ka ogana hou o Haili. Ke holomua nei na hoolala ana no ka holopono oia hana ano nui e noho poo ia ana e ke kahu Rev. S.L. Desha malalo o na hooponopono a alakai ana a keia mau lede, Mrs. Aima Nawahi, Mrs. Kuaihelani Campbell a me Mrs. Akana Rikikini o Hilo. Ma ke ano o na mea i hoomaopopo ia, ua ike ia o kekahi keia o na fea i ohohia nui ia e na mea a pau o Hilo, me ke komo pu ana mai o ko laila poe wahine haole e haawi i ko lakou mau manao maikai no ke kokua ana i keia hana ke hiki mai ia manawa, a pela kekahi poe o na wahi e ae o ka mokupuni o Hawaii a hala loa mai i Honolulu nei; eia ka hapanui ke liuliu a hoomakaukau mai nei i na mea hanalima no ke kokua ana no ka pono o ka luakini o ke Akua.

            Nolaila, ke nonoi ia aku nei ka lokomaikai o na makamaka me na hoaloha a pau i noho ia e ka uhane aloha iloko o lakou no ka hana a ka Haku, e haawi iho i na kokua ana no keia hana, aole ma ke ano e auhau maoli aku ana, aka, e haawi no kela a me keia elike me ka mea hiki, a e hoouna pololei mai me ka inoa o na Komike Nui o keia hana no lakou na inoa i hoike ia ae la maluna.

            Ke paipai ia aku nei hoi na mea a pau i haawi e mai i ko lakou ae no ka haawi ana mai i ka lakou mau makana kokua mai na mea hanalima a me na mea ai o na ano a pau i kupono no na papaaina luau, e hoouna mai me ko lakou mau inoa, a pela me na poe i manao e haawi ma na kokua dala ana. E oluolu e hoouna e aku mamua ae o ka manawa mai keia wa aku; e loaa no i na Komite ke hoouna pololei ma Hilo, a e loaa hoi o Kuaihelani Campbell ma Honolulu nei a hiki i ka la 18 o Dekemaba a ke Kinau e haalele iho ai ia nei no Hilo. Me he mea ala o kekahi la ulumahiehie ana keia iloko o na wahi kulanakauhale Moiwahine la o na Ailana Anuenue, he la hoi na kolaila mau kini e hoike ae ai i ko lakou lokahi me ke ohohia ma na hana maikai, aole wale hoi ma na hana lealea pili ina mea ano ole. Aka, o na hana maikai e like me keia he mau mea ia e hapai mau ana i ko Hilo kulana holomua ma na ano a pau, a he mea hoi e haaheo pu ai no ka mokupuni holookoa o Hawaii ke holopono keia hana i manaoia. O ka makou upu ana ia, aole no e nele ka holopono ke hiki mai ua wa ala.

 

            O KA Aoao Demokarata he aoao ia no ka poe limahana.

            O KE Demokarata o ka oi ia ma ka hoopono me ke kaulike.

            E KOHO i ke Keikialii a me na moho Demokarata i ola hou o Hawaii

            E LAWE mai i KE ALOHA AINA i ike i ka aoao kalaiaina kupono a ka lahui e kakoo ai.

            KE paipai ia aku nei na poe aie a pau i ka Nupepa KE ALOHA AINA o keia hapa hope e hoomanao mai.

            O KA Aoao Demokarata he aoao ia i kupono no ka poe ilihune o ka lahui, a e nana ia ana ko lakou pono e ia aoao.

            KE puka mai o Baraiana ka Peresidena Demokarata o Amerika i keia kau, a puka pu me ka Aoao Demokarata ma Hawaii nei, alaila, he au hulihia nui ana keia o na hooponopono aupuni ma ko ka lahui aoao.

            KE hopohopo a ke naka nei na kuli o ka Aoao Repubalika o huli oukou e ka lahui e kakoo i ka Aoao Demokarata kekahi aoao mana loa iloko o ka Ahaolelo.

 

HALA HOU NO MAUI.

 

            Ma ka hora 6 o ke ahiahi Poaha nei i haalele iho ai ke Keikialii Kawanananakoa i ke awa lai o Kou a au hou aku la i na ale hanupanupa o Pailolo no ka mokupuni kaulana o Maui o Kama, me ke kipa pu ae i ke kahua ma'i lepera no ka hoike hope ana aku i na kupa malaila i ke kahua hana o ka aoao Demokalaka.

            Maluna aku o na tausani ka nui o na kanaka i hiki ae malaila, a mamua ae o ka haalele ana iho o ka Waialeale i ka uwapo no ka hii ana aku i ke Keikialii Kawananakoa ma kana huakai au moana, ua haawi ia mai la e kekahi mau moho Demokalaka he haiolelo no ka pomaikai o na poe i hiki aku malaila, oia hoi, o K.K. Lilikalani, Sima, J.E. Bush, Thomas Clark a me ke Keikialii Kawananakoa. Ua nui ke ohohia ma o ka lakou mau haiolelo o na mea a pau. Ua ukali pu aku ka hui himeni kawaihau i ka huakai a ke Keikialii.

 

E KAKOO ANA.

 

            Ua hoomaopopo ia mamuli o ka hiki ole ia Robata Waialeale ke koho balota kekahi moho lunamakaainana, a ka aoao Repubalika, ua hooholo iho la lakou e kakoo ia Rev. S.K. Kaili, kekahi o na moho lunamakaainana a ka aoao Demokalaka no ka mokupuni o Kauai.