Ke Aloha Aina, Volume VI, Number 43, 27 ʻOkakopa 1900 — Page 7

KE ALOHA AINA

 

KE ALOHA AINA, POAONO, OKATOBA 27, 1900.  7

 

OHOHIA NUI IA O BARAINA,

 

E KA MOKUAINA O KONA MAU ENEMI

 

Haawiia na Hookipa Ohaoha ia Ana Nona - Hoopiha ia Kana Haiolelo e na Kanaka.

 

            Kalivalana, Ohio, Oct 15. Ma ka hora 5:40 o keia ahiahi i hoea mai ai o Wiliama J. Baraina, (Peresidena o ka Aoao Demokalaka) a haawi ae la he elua haiolelo imua o kekahi mau anaina kanaka nui o keia kulanakauhale, he hookahi ma ka Central Armory, a o kekahi ma ka Hotele Hollenden. Ua apo ia aku kona hiki ana mai i keia kulanakauhale me ka leo kani o na oeoe, a ma kahi hoolulu kaaahi ua halawai oia me kekahi mau ahahui me na puali puhiohe me ka ukali ana iaia no ka Hotele Hollenden, kahi ona i paina ai. Ua hoomalamalamaia na alanui me na kukui me ka hoopiha pu ia e na kanaka.

            I keia la ua komo aku oia i ke kikowaena o ka aina o Peresidena Makinile a me Hanna. Ma ka haalele ana iho ia Akron i keia kakohiaka o kana wahi i kipa mua aku ai oia no o Canton, kahi noho o Peresidena Makinile a i ke awakea ae ua haiolelo aku la oia ma Niles, ke kulanakauhale o Makinile i hanau ia ai, ia po ua haiolelo ae oia ma Kalivalana kahi noho o Mr. Hanna. Aole he mau ulia i ikeia ma ke kipa ana aku ma Canton a me Niles. O kahi ano nui i malamaia ai o ka halawai ia la ma New Philadelphia, ua akoakoa ae kekahi anaina kanaka nui a ua malamaia ka haiolelo me ke ohohia nui ia. Ma Youngstown, he elua wahi i malama ia ai o ka haiolelo, he hookahi mawaho o ke kuea a o ka lua maloko o ka hale mele.

            O ke kumu o kona malama ana he haiolelo i ke kuea mamuli no ia o ka nui hewahewa o na kanaka i hiki aku e hoolohe i kana haiolelo kalaiaina. O kekahi kumu o keia anaina nui i hiki aku ai mamuli no ia o ka lakou makemake ana e ike i ka helehelena o keia moho a ka lahui, nolaila, o ka haiolelo ana aku e lohi ai lakou a pau he mea hiki ole ia ke hooko aku. Ua hoea mai na kanaka iloko o ke kulanakauhale mai Ohio a me Penesalevania mai ia la holookoa, a i ka hoea ana mai o Mr. Baraina i ka hora 4:20 o ka auina la, ua hookeke na alanui i na kanaka. O ka manoanoa o na kanaka ma na aoao a pau ma kahi no ia o 400 kapuai me ke aumeume pu o na kanaka i wahi e kokoke aku ai lakou a ike pono aaku i ka helehelena o keia haiolelo.

 

Nuhou Kuwaho.

 

NA MANAO HOOULU HAUNAELE.

 

            Hongkong, Oct. 12. O Sun Yat Sen, o ka aoao hoomaemae o na pake, e like me na lono i loaa mai Canton mai, ua pulelo ae la ka hae o ka aoao hoomaemae maloko o kekahi taona ano nui o Wei Chou, ma ka muliwai Hikina. O keia hana ua hooulu ae ia i na manao pihoihoi iloko o ka poai kaua ma Canton, oiai ua koho ia o ka manao o na poe hoomaemae i ka huki ana ika hae hoomaemae ma Wei Chou, he hoonoonoo ana aku ia Canton me na koa, a i hiki ai ia lakou ke lele kaua mai a lawe ae i ke kulanakauhale.

 

OEHUEHU KE KULANA MA WEIHAIWAI.

 

            Ladana, Oct. 13. Ua loaa mai keia lono i ka nupepa Times mai Hongkong mai no ka la inehinei e olelo ana:

            O ke kulana ma Wehaiwai aia ke pii mahuahua mau la kona kulana pihoihoi, iloko o eono apana aina aia ko lakou kulanakauhale ke paa ia la maloko o ka lima o na kipi. Ina e heoa ae ana he haunaele ma Canton o kona hoopio ia ana ke paakiki loa.

           

KE HALAWAI MAU LA NO.

 

            Cape Town, Oct. 16. Ua komo hou aku la na Beritania iloko o Bloemhorf, e kokoke ana i Kimberley ma ka la 14 o Okatoba me ke kue ole ia, a lawe pio ae la he kanalima Boa.

            Ladana, Oct. 16. O keia malalo iho na hoike i loaa mai nei mai ia Haku Robata mai no ka la 15 o Okatoba e olelo ana:

            Ua haalele aku la o French ia Marchododorp no Heidleberg no ka hookaawale ana aku i na enemi he wahi keia i hele mua ole ia e na koa Beritania.

            O Mahon, e alakai ana i ka pualikaua lio, ua kipaku oia ma ka la 15 i na Boa mahope nae o kekahi poino koikoi he ekolu alii i make a me ewalu kanaka i make a he ekolu alii a me iwakalua kumamalima kanaka i hoehaia.

            Ua lawe ae la o French ia Carolina i keia la a ua hopu ia he mau kaa lako ai.

            Ladana, Oct 17. He hoike kai  loaa mai la i keia la mai ia Haku Robata mai no ka la 16 o Okatoba e hai mai ana no kekahi mau kaua liilii i malama ia, a o ka mea ano nui i ike ia oia ka haawi pio ana mai o Unis Botha, hoahanau no Kenerala Botha i hopu pio mua ia, ma Wolkarua@, Okatoba 13.

 

HE ELIMA MILIONA ILOKO O HOOKAHI LA.

 

            Nu Ioka, Oct 16. Me ka manao ole a me ka ano mua ole ua loaa iho la ia John D. Rockfeller, ke alii o ka aila honua, he $5,678,000 ma ka la inehinei mai kona mau mahele mai he 334,000 iloko o ka Hui Aila Standard. Ua hoea aku kona loaa makahiki mai kona mau waiwai a pau i ka $75,000,000, o ka loaa makahiki o ka Za o Rusia he $12,000,000, Emepera o Garemania he $3,852,770, oiai, na Moi o Sepania, Italia a me ka Moiwahine Vitoria ua loaa ia lakou he $6,000,000.

           

HOOPAKELE IA NA PIO AMELIKA.

 

            Wasinetona, Oct. 16. Ua loaa mai he telegarapa ianei mai a Kenerala Mac Arthuy mai i keia la e hoike mai ana i ka nui o na poino i loaa i ka puali o Kapena Shields ma ka mokupuni o Marinduque. Ua hopu pio ia o Kapena Shields e na Pilipine a ua hoopakele ia e ka puali o Kenerala Hare. O keia ke kapena me kanalima-kumamakahi kanaka i hopu pio ia mamua aku nei.

            Manila, Oct. 14. He mahele koa o iwakalua kanaka o ka regimana 24, oiai, lakou e hooponopono ana i ka uwea telegarapa ma ka la 10 o Okatoba, ma kahi kokoke i San Jose, ua lele kaua ia mai lakou e 200 Pilipine ua hiki hou ole ia lakou ke ku aku a ua auhee aku la, he ehiku Amerika i hoea mai i San Jose, o ka hapanui o lakou me he mea la ua hopu pio ia.

            Ua lele kaua pu aku na Pilipine maluna o kekahi mahele hoomakakiu o ka regimana 43, ma Talklobau. He ekolu mau Amerika i make i ka wa mua i kipapa mai ai lakou a he elua i mahuka mai na enemi aku.

 

HOOPOINO IA NA BERITANIA.

 

            Ladana, Oct. 11. O keia malalo iho na hoike i loaa mai mai a Haku Robata mai:

            Pretoria, Oct. 11. He kaaahi e lawe ana he kaa me na koa eniginia o ka puali o Paget ma Kaapmuiden, ma ka la inehinei, ua lele kaua malu ia mai e na Boa. Ua hoounaia aku o Kapena Stewart me kanaha kanaka no ke kokua ana ia lakou. O Stewart a me hookahi koa i make, Kapena Page, Lutanela Stubbs a me elima koa eniginia i hoeha ia, o Lutanele Sewell a me umi koa ua hopu pio ia.

            O na koa o De Lisle a me na Panaiaau, mahope o ekolu la o k hakaka ana, ua kipaku aku lakou ia De Wet no ka akau o Vaale, e kokoke ana i Venterskroon.

 

HE HAKAKA NUI.

 

            Hazelton, Pa. Oct 10. He makai kuikawa kai make, a he hookahi mea okoa i hoehaia ma ke poo, a he umi mau kanaka uniona ole i hoehaia ma kahi eli nanaha ma Oneida C@ o Bros, ma ka hakaka i malamaia mawaena o na makai a me na poe olaha@ o 500.

 

OEHUEHU HOU KE KULANA MA KINA.

 

            Hongkong, Oct. 10. O ka Ahahui Fraid o na Pake, aia lakou ke hoolala la no ka hooulu ana ae i kekahi kaua ma Kina Hema, me ka manao no ka hookahuli ana i ka Moi Manchu, a e hoihoi ae hoi i ka moi maoli o na pake. O keia mau hoolala ana ua manaoia e hooko ia ana ma keia mahina ae, a no ia kumu ua haawi hou aku la o Sir Henry ke Kiaaina Beritania, he kauoha pupuahulu e hoounaia mai i 10,000 koa hou mai Inia mai.

            Ua olelo ae na Fraid, he manaolana ko lakou e ku kaawale ana na mana nui me ka ae aku i ka aoao hoomaemae e hooko aku i ka lakou hana, no ka mea, o ka anai ana aku i na alakai Manchu pela wale no e loaa ai ka lanakila.

 

OIA MAU NO NA PILIPINE.

 

            Manila, Oct. 11. O na kapakai komohana o ka mokupuni o Leyte aia ia iloko o ke kulana pihoihoi, aia na Pilipine ke pakaha la ke lele kaua la, a hoi hou mai la no na taona, oiai na Amerika e huli hele ana ia lakou maloko o na mauna. O na alii malalo o Kenerala Mjice ke haawi pio la, o kona mau kanaka hoi i hoao e mahuka aku no Samar maluna o na waapa ua hopu pio ia.

            Ma ka ninau ia ana o na poe i hopuia, ua hoike mai lakou, ma ka la 5 iho nei, ua malamaia he hakaka mawaena o 30 koa Amerika ame 40 Pilipine ma ka apana o Camarine, he elua Amerika i make, a he elua i make a me ekolu i hoehaia o na Amerika.

            He 20 koa o ka regimana 32 i komo aku ma kekahi hakaka i malamaia ma ka apana o Buta, ua make he 1 Amerika a me 4 i hoeha ia.

 

            He mau la pokole wale no koe a hoea mai ka la koho balota ka la hoi e loaa ai ia oe ka lanakila e na Hawaii i na e puka ka aoao Demokalaka.

            Ua huli mai la kekahi mau lala o ka Ahahui Kalaiaina a kakoo i ka aoao Demokalaka mahope o ko lakou ike ana he aoao hauhili loa ka Wilikoki ma e hooikaika nei, a ua hele hoi ma na alakai i hiki ke hilinaiia. Pololei ka manao o keia mau keonimana.

            He kipi ka Aoao Kuokoa Home Rula i ke Alii Kawananakoa e ikeia nei i keia mau la a he nui no hoi na huaolelo hailiili i hoopuka ia nona. O ke aloha alii anei ia o Wilikoki o ka hoino aku i ka mea a ko kakou Moiwahine i aloha nei ia i kauoha ai e hele imua e hakoko no ka pono kuokoa o kona lahui i paili ia aku.