Ke Aloha Aina, Volume VI, Number 40, 6 October 1900 — MAI PAHAOHAO. [ARTICLE]

MAI PAHAOHAO.

Aole makou e ahewa ana i ka aoao Kuokoa, aka, e kalai aku no makou i ka mea oiaio, i ike pono ia mai ai ka aoao kalaiaina kupono a kakou na Hawaii e kuilima ai i loaa ai ka lanakila, i hehi pono ai na keehina wawae o ke kama o ka aina i kona aina hanau. E Hawaii na wai oe i opeope a kapae ae mai kou kuleana, na Demokarata anei? aole. Na Kalivalana anei? aole. Heaha ka oiaio, na Repubalika ma, ma o Peresidena Harisona, Kuhine Kiwini ame Kapena Wiltse o ka Bosetona a na Repubalika mai o Hawaii nei. Alaila, aia oe i hea e hehi nei e Hawaii? E maliu ana anei oe ia Repubalika, mali leo nei ia oe, me na maunu ekaeka i mea e lou ia ai ko kakou mau wahi me he i'a la? aole. E manaolana kakou aole. E aoao Kuokoa owai kou hoa ma Wasinetona ma o ka Italia ka moho e hoolohe ia mai ai kau mau koi a me na hoopii e hoomau ia na pono e loaa mai ana a me na mea i manao ia o keia mu aku, ina ai oe i ke Kuokoa kahi i kukahi a ku oleholohe ai. He kuhihewa kela manao. E hilinai ana anei oukou he mana ko Marino e noha la ma Wasinetona e hui aku ai a loaa he mau pono nou e Hawaii ponoi? aole. Ma na ano a pau, o ka aoao Demokarata ke mea i kakoo ia oe e Hawaii. I ka wa o Kalivalana i makemake ai e hoihoi i ka Moiwahine ma ka noho moi, ua hoole o Adimarala Skerrett, no ka mea, he Repubalika oia, aka, hoouna aku la ka Peresidena ia Adimarala Irwin, he Demokarata e hooko i kela hana, aole na Kalivalana i hoonele kakou, na kakou iho no, mamuli o na kumu he lehulehu wale.