Ke Aloha Aina, Volume VI, Number 40, 6 ʻOkakopa 1900 — HOOLIMA KA MANA KOHO. [ARTICLE]

HOOLEIA KA MANA KOHO.

O na luina e noho nei maluna o na mokuahi holo pili aina, ua hoole loa ia aku la ka loaa ana ia lakou o ka mana koho balota no keia kau koho balota e hiki mai ana, o keia ae la ka olelo hooholo a ka Aha Keikie i haawi mai ai. O keia mau luina i hooneleia aku la, oia no na poe aole o lakou home paa mauka nei o ka aina, a o lakou ka ke kanawai i hoole loaa ai aole e loaa ia lakou ka mana koho balota. Ua lawe ia mai keia ninau imua o ka Aha Kiekie e Joseph Irving. O Joseph Irving he luina oia no luna o Iwalani, e holo ana mawaena o keia awa a me na mokupuni mawaho aku nei. E noho ana oia maluna o keia moku, a o kona uapo e pili mau nei aia no ia ma ka uapo o ka Hui Mokuahi o Poka ma. Ua noi aku o Irving e hoopaa ia kona inoa e ka Papa Nana, aka, mamuli nae o ka loaa ole he wahi kona e noho nei mauka nei o ka aina, ua hhole ia aku la oia, a ma o kona nele ana ua nele pu me na luina Hawaii e noho nei maluna o na mokuahi holo pili aina. ___________ Ia oe e Hawaii o Keawe, Maui o Kama, Molokai Nui a Hina, Oahu o Kakuhihewa a me Kauai o Mano. I hookahi puuwai, i hookahi manao, a i hookai ke aloha. E paa a paa, no ka la 6 o Nowemaba e hiki mai ana. E koho i ke Keikialii Kawananakoa i Elele na kakou i Wasinetona.