Ke Aloha Aina, Volume VI, Number 39, 29 September 1900 — Page 7

KE ALOHA AINA POAONO, SEPATEMABA 29, 1900

 

HE KAAO KAILI PUUWAI

NO KA

UI MINEWA

A ME NA

Kaikunane Eiwa

Hoolilioia i mau Manu Nene Ahiu a i ole na Keiki i Hoehaehaia

Kakauia no KE ALOHA AINA.

            A oiai no ua Minewa nei e noho mehameha ana iloko o ka pouli, e alo hoomanawa nui ana hoi i na kikiao makani huihui e pa kolonahe ana me ka maopopo ole o kahi e loaa ai iaia a me kana lei he mau hoopumehana ia ana, aia hoi, ua ike aku la oia i kekahi malamalama ahi i ka puoho ana ae ma ka lae kahakai ana i ike aku ai i ka a@ manu i ka haole ana iho i na minute mamua o ka halii ana mai ka pouli, me kona lohe pu aku hoi i na leo hauwalaau e poha mai ana ma kahi o ka malamalama ahi i oili ae ai.

            He leo anei kela a'u e lohe aku nei no na akua lapu o ka po, a i ole, no na ale kupikipikio anei o ka moana? Ma keia wahi aia na puka pepeiao o ka wahine opio ke hoolono ia me ka hiaai nui no keia mau leo hauwalaau e poha mai nei mailoko mai o ka pouli.

            Aka, ia Minewa no nae e hoolohe nei i keia mau leo, ua hoohikilele ia ae la ia ka hoomaopopo ana iho eia ua malamalama nei ke nee mai nei imua o kona alo, a o na leo hauwalaau hauoli eia ia ke hookokoke mau mai nei i kona mau puka pepeiao.

            A ma keia wahi i hoopau ae ai oia i kona mau manao kanalua, me ka hoomaopopo iho, aole keia he mau akua lapu o ka po, aka, he mau mea kino kanaka no ia elike me ia.

            No kekahi mau minute poke wale no keia kali ana ona, aia hoi, ua hookokoke loa mai la ka malamalama, a ike aku la oia he mau opio ka mea nana ua mau lama ahi la, no lakou na helehelena i like loa me kana i ike ai i ka po mamua iho.

            A he oiaio, iloko o na sekona pokole, ua hoea mai ia ua mau opio nei no kahi a Minewa e noho nei me ke pahaohao, a o kekahi poe o lakou e paa ana he mau hinai i piha me na mea ai.

            Mamua o ke alo o ka wahine opio i kukuli iho ai lakou me na helehelena i piha me ke kaumaha me ka panee ana mai i na hinai mea ai, a pane mai la kekahi o lakou.

            E ka wahine malihini e lalau iho i na mea ai e waiho la iloko o ka hinai, a hoopiha i ou houpo lewalewa, mai hopohopo, no ka mea, nau keia mau mea ai a makou i we mai nei.

            Me na manao hauoli e lalawe ana iloko o Minewa i lalau aku ai oia i na mea ai i panee ia mai e na opio, a lohe pu ia aku la hoi kona leo i ka pane ana aku.

            E kuu mau hoaloha o keia mokupuni malihini, he mea oiaio, ua aie nui au i ko oukou lokomaikai, a'u hoi e hiki ole ai ke hookaa me na waiwai a pau i kali hoomanawanui iho nei i keia la holookoa no ka haawi ana aku ia oukou i ko'u mau hoomaikai palena ole ka oukou mau hana lokomaikai i manawalea mai ai maluna o'u.

            Mai noonoo ia mea e ka wahine opio, aka, o ke aloha ko makou makemake aole o ka mohai, he nui ko makou iini e noho pu me oe i ke ao aka, he mea hiki ole hae ia makou ke hana aku. Nolaila, mai noonoo he aie kou ia makou. O ka makou e iini nui nei e lohe, e hoike mai oe owai kou inoa?

            Na keia ninau i hoopihoihoi ae i ka wahine opio, a me ka leo kaumaha pane mai la oia.

            O Minewa ko'u inoa a ko'u mau makua i kapa iho ai maluna o'u, aka, ua haalele mai nae ko'u makuahine i ko'u mau la opio wale no.

            Minewa, wahi a na opio i hooho like ae ai, he inoa kela i like loa me ko makou kaikuahine i nalowale ai mahope aku o ka halealii o ko makou makuakane.

            He mau kaikunane ko'u, i hoomau aku ai ka nohea, no lakou ka heluna he eiwa, aka, mai ka wa nae a'u i kaawale mai ai mai ka home mai o ko'u mau makua malalo o ka manao lokoino o ko'u makuahine kolea, e noho ana no lakou ma ko makou home, a he mea kanalua ole hoi no'u ka hoike ana aku ia oukou aia no lakou ke makou home aloha. O ko lakou mau helehelena nae he like loa me ko oukou.

            Ma keia wahi i hoopiha loa ia ae ai ka puuwai o kekahi mau opio me na manao pihoihoi, a lohe ia aku la kekahi o lakou i ka hooho ana ae.

            E Minewa o oe no ko makou kaikuahine, no ka mea, o na hiona o kou helehelena, ua like no ia me na hiohiona o ko makou kaikuahine i nalowale mai a makou aku he mau makahiki i hala.

            Aole wale no o oe ka mea i ike i na hoehaeha ia ana e ko kakou makuahine kolea, aka, o makou nei kekahi i halawai pu me ia mau hana lokoino ana, a pela makou e hiki ole ai ke noho pu me oe i ke ao, aka, e lilo ana makou he mau kino manu i ke ao me ke kaawale aku o na noonoo kanaka.

 

            Ua hala aku la ka moku lawekoa Thomas no ke kai o Manila.

            Eia o Painapa ma ke malama nei he kuikawa o kekahi mau waiwai o ka lakou halekuai.

            Ua koonee ia aku la ka hale pailata maluna o kekahi kao mai @ iho nei no mak@

 

WAIHO IA IMUA O KA AHA KAAPUNI.

           

            Mahope ino o ka hoolohe ana o Lunakanawai Wilikoki i ka hihia hou pahi o Kaeha maluna o kana wahine, ua waiho loa aku la oia na ka Aha Kaapuni e noonoo mai. Aole i hoole mai o Kaeha i ka hewa i hookau ia aku maluna ona. O na hoike ma ka manao ana ka Lunakanawai ua lawa ia no ka lawe ia ana aku imua o keia aha kiekie.

 

NUI NO KE AKAMAI.

            Iloko no o ka hookapu ikaika ana o ka Papa Ola i na poe haiolelo o na aoao kalaiaina a pau aole e kipa aku i ke kahoa ma'i lepera no ka hoikeike ana aku i ko lakou mau aoao kalaiaina, aka, mamuli no nae o ke ano noonoo akamai o ka Aoao Demokarata, ua hoea aku la he mau haiolelo oia poai no ke kahua ma'i lepera o Kalaupapa maluna o ka mokuahi Lehua. Oiai ka mokuahi Lehua e hoolele ukana ana malaila, ua holo aku la o Keoni Wise a me Keoni Likikini maluna o kekahi waapa mokuahi, a ma kahi he mau kapuai ke kaawale mai ka uwapo mai, ua haiolelo aku la laua imua o na kanaka e akoakoa ana, aka, iloko o ia wa no, ua pahola aku ia ka lohe no ko laua hiki ana aku i ke awa o Kalaupapa, a iloko o ka manawa pokole loa ua hoopiha ia mai la ka uapo me na poe ma'i. Ua hoakaka aku lana i ke kumuhana a ka Aoao Demokarata, a ua apo ia mai laua me ke ohohia. Pela na lono i loaa mai.

 

NO KE KOHO ANA I ELUA MAU ELELE

            Ma ka noho ana o ka Aha Hooko o ke aupuni ma ka Poalima nei, ua waiho mai la o Kiaaina Dole, he hoike imua o lakou, ma kona nana ana i ka manao o ke kanawai, ua ike oia he elua elele e koho ia ma ka la 6 o Novemaba 1900, he hookahi no ka hoopiha ana i ke kau pokole o ko Ahaolelo kanalima – kumamaono o Amerika Huipuia e pau ana i Dekemaba, a o ka elua no ke kau Ahaolelo kanalima-kumahiku e hoomaka ana ma ka la 4 o Maraki. Ua hiki no i ke kanaka hookahi ke holo no keia mau noho elua.

KA MOKU LAWEKOA THOMAS

            Ua hoea mai la ma ka po Poalua nei ka moku lawekoa Thomas mai Kapalakiki mai, ma kona alahele no Manila me 1,380 a oi aku koa maluna ona, noloko o na regimana Elima a me Ekolu a me kekahi mau @. Aia maluna ona na hina o keia mau regimana elua,  a ina aole he mau kula e haawi ana laua he anaina puhiohe hui ma ka Hotels Hawaii i keia po.

 

Nuhou Kuloko.

            E alawa ae i ka hoolaha a J.O Carter e puka aku nei.

            He 41 pake i hopu ia no ka piliwaiwai ma Leleo ae nei, ma ka po Poaha nei.

            Maloko o ekolu pule e pau pono ai na hemahema o ka hale ai hau o Hart & Co., e nei ma kahi kokoke i ka Y.M.C.A.

            Mamuli o ka poino ana o kekahi paipu mahu o ka Aureteralia ma keia holo ana mai nei kona kumu i ulolohi iki ai.

            Ua make maluna o ka mokuahi Aureteralia he haole nona ka inoa o Behm ma o kona inu nui ana i ka rama, a ua kanu ia oia ma ka moana.

            Eia ke noho hou nei ka Papa Nana ma kona wahi i noho mua iho nei no ka hoopaa ana i ka inoa o na poe i koe e makemake ana e loaa ka mana koho ia lakou.

            He $10,000 a ka Hui o Hakafila ma, i uku aku la i ka moku kolo Fealess no ka hoopakele ana i ka mokupea Eutnerpe i ili ai ma na kuaau o Kahului ma kela mau la aku nei. Pokeokeo no.

            Mamuli o ka hoi ole mai o ke Kakauolelo Rev. O. P. Emerson mai Hawaii mai, ua hoopanee ia ka Ahahui Euanelio o ka mokupuni o Oahu, ma ka Poakolu elua o Okatoba, oia ka la 10.

            Ua noho ae ka halawai a na poe kalepa no ka noonoo ana i ka hoouna ana i mau kokua na poe i hoopilikia ia ma Galveston, Texas, ma o ka makani ino nui i pahola ai malaila i ka la 9 iho nei.

            Ua olelo ae o Lunakanawai Wilikoki, aohe kanaka i noho loihi maloko o ka oihana aupuni i like me ia, he 33 ka nui o na makahiki ana i noho ai ma na oihana aupuni like ole, aole hoi i loaa iaia he ekolu mahina hoomaha.

            O J. F. Brown, ke Komisina o na Aina Aupuni, ka limahana kahiko loa maloko o na keena aupuni, na piha pono he kanakolu makahiki o ka noho paaua ana maloko o ia mau keena. He ana aina kana oihana i lawelawe mua ai.

            O kekahi hana imi baleta a ka Aoao Repubalika e manao nei o hooko aku oia ka haawi ana i ka paina Inoa @ ma ka Poaono Novemaba @, a ma ka po Poakahi, Novemaba 5, e malama ia ana he kai huakai nui ma na alanui ma na kakui. Ua hooholoia keia mau hooiala ana e ke komike ka@ mahope iho oia m@ ai na hana haiolelo. Nui no ka maalea.