Ke Aloha Aina, Volume VI, Number 37, 15 September 1900 — MAHEA KAKOU. [ARTICLE]

MAHEA KAKOU.

(Kakau ia e J. H. Wise) Ka ninau nui imua o na kanaka i keia mau la, oia no keia ninau. Mahea kakou? He ninau nui keia a he pono i na kanaka Hawaii e koho no lakou iho mamau o ka la koho balota. Aia ma ka aoao o ka poe Repu[ba]lika ka hapanui o na poe hoohui aina, ka poe i nana ole i na pono ou e ke kanaka Hawaii i na makahiki ehiku i hala ae, aia no hoi maloko o ko lakou mau lima ke alakai ana i ke aupuni i keia mau la, a ke ike aku nei no kakou i na hana kaulike ole o na makahiki ehiku i hala ae. Heaha ka pomaikai e loaa mai ana ia kakou e na hoa kanaka, ina kakou e kokua aku ana i keia poe i lawa ole me ka aihue ana i ka aina, aka, ke hana mai nei no i na hana kaulike ole, a me ka hoao ana mai e a'o ia kakou e hahai aku mahope o lakou. Aole anei o na hana maikai ke kumu e laka aku ai, a e ike ia aku ai ko lakou mau manao maikai. Heaha ka na Demokarata e hana nei? Ke ku nei na Demokarata a hai aku me ka oiaio, o na hana kaulike ka lakou makemake. E nana ana lakou i ka pono o na kanaka Hawaii. E kue ana hoi i na hana lima nui a na haole hoohui aina i huli aku ma ka Aoao Repubalika. Aole anei o ko kakou mau enemi ino loa keia poe hoohui aina? Aole anei na lakou i hoonele mai ia kakou i ko kakou mau pono kuokoa? E loaa anei he mea maikai mai keia poe mai? Aole anei na lakou e alakai mai nei ka Aoao Repubalika? Alaila, e na hoa kanaka oia anei ka aoao e pomaikai ai kakou. [?] Ke manao nei ka mea kakau, aole loa e loaa ana ka pomaikai mai ia lakou mai, no ka mea o ka mea nui iloko o lakou, o ka manao hoaikola ia oe e ke kanaka Hawaii.

Nolaila, ua hamama ka Aoao Demokarata ia oukou e na kanaka Hawaii, e komo pu mai a e hakaka aku i ko kakou mau enemi.