Ke Aloha Aina, Volume VI, Number 37, 15 September 1900 — Page 7

KE ALOHA AINA

KE HAAO KAILI PUUWAI

NO KA

UI MINEWA

A ME NA

Kaikuanane Eiwa

I Hooliloia i mau Manu Nene Ahiu

a i ole na Keiki i Hoehaeha ia

 

Kakauia no KE ALOHA AINA.

            He mea oiaio, mamuli o ka loihi o ko lakou kaawale ana, ua hiki ole ia lakou ke hoomaopopo iho o ko lakou kaikuahine no keia, a oiai no nae lakou e kilohi ana no i ka nani o na helehelena o ka wahine a me kana lei, ua hoohikilele ia iho la ko lakou hoahanau muli loa i ka ike ana iho, ua kulike loa ka helehelena o ka wahine oio e waiho ae nei me ko lakou, aole hoi he wahi e paewa ae, a me ka leo pihoihoi i puana ae ai oia.

            E o'u mau kaikuaana, ke halialia mai nei iloko o kuu puuwai ma ko'u hakilo pono ana iho i keia mau helehelena, me he mea la, e i mai ana no aole keia wahine a me kana kamaiki, he mea okoa aku, aka, o ko kakou kaikuahine aloha no ia i kaawale aku malalo o na hana lokoino ana a ko kakou makuahine kolea, mamua o ko kakou kipaku ia ana mai ke kaupoku hale a kakou i noho ai a kupa.

            E nana iho i kona helehelena, wahi a ko lakou pokii i hooho hou ae ai, ua kulike loa ia me ko kakou helehelena, a aohe hoi he wahi kaawale ae.  Nolaila, ma o keia hiona a'u e ike nei, he manao io ko'u o Minewa no keia ko kakou kaikuahine hookahi wale iho no i oili mai i keia ao malamalama.

            A i ka hooki ana iho o k leo o ua wahi opio nei, oia no ka wa i lohe ia aku ai ka leo ikuwa o kona mau kaikuaaana i ka hooho ana ae.

            Ae, o Minewa no keia ko kakou kaikuahine, e hoonani ia o Alahe, no ka malama ana i kona ola a hiki i ka wa i loaa aku ai ia kakou.  Nolaila, e haawi ia na pulma ikaika anaiaia a me kana lei aloha a hiki i ka wa e loa ai ia laua ka maha.

            Ma keia wahi i haawi aku ai ua mau opio nei i na pulama ikaika ana i ke ola o ko lakou kaikuahine, a e hoao ana hoi ma na ano a pau e hoihoi ia mai ai kona noonoo ao kanaka.

            A he oiaio, he mau hora ko lakou hoopumehana ana i ke kino o ko lakou kaikuahine, ua hoomaka ae la oia e onioni a owaka ae la hoi kona mau lihilihi me ka nana ana ae me na maka pahaohao no keia poe opio e nana iho nei iaia, a ninau ae la me ka pihoihoi.

            E keia mau opio helehelena ui a'u e ike ei, o ka papaku anei keia o ka moana?  he mau kino kanaka no anei kekahi e ola nei malalo nei?

            Na keia mau huaolelo i puai ae Ia mai na lehelehe mai o Minewa i hoopiha aku i ka puuwai pakahi o kona mau kaikunane me ka hauoli nui, i ka hoomaopopo ana iho o ka lakou mau hooikaika ana e loaa ke ola i na mea poino, ua halawai mai ia me ka hopena pomaikai, a me ka hoohakalia ole iho ua loheia aku la ka leo o ko lakou mua loa i ka hoopuka ana ae me na waimaka e haloiloi ana ma kona mau papalina.

            Ae, e ka wahine opio, aole oe ma ka apaku o ka moana, aka, aia oe maluna o kekahi mokupuni malihini, malalo o ka pulama ana a kekahi mau hoaloha oiaio, nolaila, e hoomaha a hiki i ka loaa ana ia oe o ka oluolu pono, alaila, hoike pau aku makou i na mea e pili ana nou a me kau lei aloha e moe i'u nei ma kou aoao.

            Ae, e kuu mau hoaloha malihini e hookuu mai ia maua e hoomaha i ko maua maluhilihi o ke alahele weliweli i alo mai ai, a e hoonani ia na lani no ka loaa ana ia maua o na hoopakele ia ana iloko o na sekona a maua i mahui mua ole aie ike hou ana i na inea o keia ao luhi.

            A me keia mau huaolelo i pili hou iho ai na lihilihi o na Minewa nei a haule hou aku la e hooipo me Niolopua, me ka nalohia ana aku o na manao kaumaha e lalawe la maloko o kona puuwai no na haawina ehaeha i hekau iho maluna ona me kana opuu.

            Aole na opio i hookuu aku i ko lakou mau lihilihi e hoomaha, aka, aia lakou ke kiai la ma ka aoao o ko lakou kaikuahine aloha me na waimaka hauoli i awili pu ia me ke kaumaha no ko lakou hui aloha hou ana me ko lakou kaikuahine.

            A hala ae la na hora o ke aumore a hoomaka mai la na hora o ke ao, aia no ua Minewa nei ke waiho oni ole la, a ia wa i komo mai ai na manao hopohopo iloko o lakou aole paha oia e ala koke mai ana a kaawale aku ko lakou kino kanaka, a lilo hou lakou i mau kino mau i ka wa a na kukuna malamalama e pahola mai ai.

            Ua malama koke ia he aha kuka mawaena o lakou , no ka hoala ana i ko lakoku kaikuahine no ka ike a launa pu ana me lakou, mamua o ka loli ana o ko lakou kino kanaka i mau kino manu, aka, ua kue nae ka hapanui o na opio i keia manaoi hooulu ia e ka hapa uuku, a waiho aku ia o Minewa nona no oia e ala mai.

 

            Ma ka Poalima nei, Sept. 14 i piha ai na makahiki he eha o ka hookuu ana mai o Mr. Joseph Nawahi i keia ola ana ma na kapakai o Kapalakiko, ka mea nana i hookumu i kela wahaolelo no ka pomaikai o na poe aloha aina oiaio.  Ua hala aku oia, aka, o kana mau hooikaika ana nae no ka pono o kona aina, kona Moiwahine a me kona lahui, he oia mau no ka makamaka iloko o ka puuwai o kona mau ola makaainana.  Aloha no

 

KA LA HEIHEI WAAPA NUI MA HONOLULU NEI.

            Ma ka hora 9:30 o keia kakahiaka Poaono, Sept 15, e malama ai na lealea heihei o kela a me keia ano maloko o ke awa o Honolulu nei, a penei ka hoonohonoho ana o na heihei a me na inoa i komo ma ia mau heihei.

            1. Heihei Waapa Eono Hoe, mawaena o ka Matala a me ka Healani.  Pahu holo mai kahi aku o na lunakanawai a ka Boe Bele a ho! mai.

            2. Heihei waapa huelo buti elima hoe, mawaena o Honolulu, Pailata ame John Currie.  Pahu holo, mai kahi aku o na lunakanawai a hiki i ka boe apiki a hoi mai.

            3. Hukihuki kaula waapa elua noe 75 ia, o na waapa i komo Dewey, Main, Alameda, Ivanhoe, Minnie a me Honolulu.

            4. Heihei waapa eono hoe, mawaena o ka Matala a me Healani, e hoomaka ana mai kahi aku o na lunakanawai o ka boe peahi a hoi mai.

            5. Heihei moku Kiakahi papa ekahi, mawaena o ka Ewa, Helene a me Bonnie Dundee, e hoomaka ana mai kahi aku o ka lunakanawai no waho o Waikiki ma kekahi hoe mawaho aku o ka hele o J.B. Kakela, mailaila holo no Puuloa a hoi mai.

            6. Heihei Moku Kiakahi papa elua, mawaena o Hawaii, Dewey a me Marion.  Pahu holo elike ae la me maluna

            7.  Heihei Moku Kiakahi papa ekolu, mawaena o Opitsah, Myrtle, Kaiko ame Vike, e hoomaka ana mai kahi aku o na lunakanawai no waho o waikiki ma kekahi boe mawaho aku o ka hale o J.B. Kakela, mailaila aku no kekahi boe mawaho o Kahakaaulana a hoi mai.

            8. Heihei Moku Kiakahi papaeha.  Pahu holo elike ae la me ka heihei moku kiakahi o ka papa ekolu.

            9. Heihei Waapa Iapana, mawaena o ka Naniwa, Takachiho, Masada, Mutsumoto a me Yamata, e hoomaka ana mai kahi aku o na lunakanawai o ka boe peahi a hoi mai.

            10. Heiehi au, 100 i-a, mawaena o Hott Tidds a me  Albert Harris.

HOOMAHA PAINA AWAKEA.

            11. Heihei waapa eono hoe, mawaena o ka Metala a me Healani, pahu hopu elike me ka heihei elua e malamaia ana oia mau hui waapa.

            12. Heihei Waa Eono Hoe, mawaena o ka Alabama, Waikiki, Wela ka Hao, Pualeilani, Kakaako a me Sam, pahu holo mai kahi aku o na lunakanawai o ka uwapo hoomalu hoi mai.

            13. Hukihuki Waapa Mokuahi 75 pu, maluna o ke kahua heihei no e komo ai.

            14. Heihei waapa elua hoe, Malu, May Flower, Alamed, Ready, La Paloma, China, Lawe Nihi, Nippon Maru a me Ston In, pahu holo elimke me ka heihei waa.

            15. Heihei luu, mawaena o Kuaiwa a me Moke.

            16. Heihei waapa mokuahi, mawaena o McChesney, William Olsen Eclipse a me Waialua, pahu holo elike me ka heihei 9.

            17. Heihei Waa Paa, mawaena o Waikiki, Alabama, Wela ka Hao, Pualeilani, Nonoa, Teominatun, Takatoa, Alahukimoku, Kealoha, Helahi a me Sarah, pahu holo, elika me ka heihei 16.

            Heihei Au Hapa Mile, Kuaiwa

            19. Heihei Waapa Eha Hoe, moku kalepa mawaena o Honolulu.  Piladelpia, Dunreggans, Turk & Lewis a me McNear, pahu holo a hiki i ka boe apiki elike me ka heihei 2.

 

NA PILI DALA NO NA MOHO

            Eia ke hawawa ia nei ua hoea mai la maluna o ka mokuahi Kina he haole no ka aoao Demokarata me kekahi puu dala mahuahua o $10,000 no ka pili ana mahope o ka moho peresidena a ia aoao no keia koho peresidena e hookoke mai nei o Amerika Huipuia.  Eia na Repubalika ke huli nei i keia haole no ka pili ana.  Ua manao ia o ke kumu ikaika loa o keia haole ma ka pili ana, ma o kona ika aa o ia i ke kulana wikani o kana moho WJ Bryan.  He nui na pili e han aia nei e na haole no ka peresidena nana ka lanakila o keia kau koho hou aku.

 

            E lawe nui i KE ALOHA AINA i ke mau i na mea hou.

 

MA KE KAUOHA.

 

HOOLAHA HOOPAA INOA.

 

            E noho ana na Papa Hoopaa Inoa no ka Mokupuni o Oahu nei e like me keia malalo iho:

Poakahi, Sept. 17--Puuloa, 7:30 a.m. a ka 9 a.m. Hale Hoolulu Kaaahi o Aiea 10 a.m. a ka 1 p.m. Hale Hookolokolo Manana 4 p.m. a ka 9 p.j.

Poalua, Sept 18--Hale Wiliko Waipahu, 8 a.m. a ka 12 awakea. Hale Wiliko Ewa 1 p.m. Hale Hookolokolo Waianae 5 p.m. a ka 9 p.m.

Poakolu, Sept 19--Hale Hoolulu Kaaahi Makua, 10:30 a.m. Hale Hookolokolo Waialua, 1 p.m. a ka 9 p.m.

Poaha, Sept. 20-- Hale Wiliko Kahuku 2 p.m. a ka 4 p.m. Laie Hall, 7 p.m. a ka 10 p.m.

Poalima, Sept 21-- Hale Hookolokolo Hauula, 10 a.m. a ka 1 p.m. Hale Hookolokolo, Kualoa, 6 p.m. a ka 9 p.m.

Poaono, Sept 22-- Hale Hookolokolo Waikane, 9 a.m. a ka 12 awakea

Poakahi, Sept 24-- Hale Hookolokolo Kaneohe, 10 a.m. a ka 1 p.m. waimanalo 3:30 p.m. a ka 4 p.m.

Poalua, Sept 25 a hiki i Okatoba 9--Maloko o Honolulu 10 a.m. a ka 1 p.m.; 5 a ka 8 p.m.

LORRIN ANDREWS.

Lunahoomalu

D.L. NAONE

M.A. GONSALVES

Papa Hoopaa Inoa o Oahu