Ke Aloha Aina, Volume VI, Number 36, 8 Kepakemapa 1900 — HE OLELO AO AKEA. I MEA E LOAA AI KA MANA KOHO BALOTA. [ARTICLE]

HE OLELO AO AKEA.

I MEA E LOAA AI KA MANA KOHO BALOTA.

He mea pono i kela a me keia kane i emi ole iho i na makahiki he 21, e noho ana iloko o ka Panalaau o Hawaii, e hele ae imua o ka Papa Nana hoopaa inoa o na poe kupono i ke koho balota, e hoopaa ai i kona inoa, a ma ia hana ana e loaa ai ia oe ka mana koho balota, ke hiki mai i ka malama o Novemaba, 1900. Mai kali a hoopanee wale me ka hoolohe ana i na olelo palaualelo, e ao hewa mai ana ia oe, oiai, o kou hoopaa ana i kou inoa ma kou kakau ana maluna o kekahi palapala e waiho ia mai ana imua ou, e na luna o ka Papa Nana, aole ia he mea nou a me kou ohana a lahui paha e kauo ia ai iloko o na popilikia, aka, he laau lapaau ia e hoola a hoomaha ia e ai kou inea a me kou lahui, o ka noho hoomanawanui ana iloko o na ehaeha i hookau ia iho maluna ou a me kou lahui e ka poe nana oe i kanu ola, iloko o ehiku makahiki i hala ae nei. I mea e hoonaauao aku ai i ka poe kanalua a kuihe o na manao ololi, e wehewehe iki aku ana au i ke ano o ka hana e pili ana i kou kakau inoa ana penei: Ka ninau mua e hoolei ia mai ana e ka Luna Nana nau e pane aku, penei: 1. Owai kou inoa? Pane. Kaimanahila. 2. Ehia ou makahiki? Pane. He 30. 3. Mahea kou wahi i hanau ai? Pane. Ma Hawaii nei. 4. Noho paa oe ma Hawaii nei a hiki i keia wa? Pane. Ae. 5. Ike oe i ke kakau a helu-

helu Hawaii? Pane. Ae. 6. Ma ka Apana Koho a Mahele Koho hea kou wahi e noho nei? Pane. Ma ka Apana Koho 5, Mahele Koho 8. Na ka Luna Nana ia oe, "E kakau i kou inoa malalo o keia pepa," oia ka pepa kahi o na ninau a me kau mau pane i kakau ia ai.

Mahope oia manawa kauoha ia mai la oe e ka Luna Nana, e kau kou lima akau iluna, a hoohiki ia mai la penei: "Ke hoohiki nei oe imua o ke Akua Mana Loa, o na pane a pau au i pane iho nei ua oiaio a pololei loa, pela ke Akua e kokua mai ai ia oe." Pane. Ae.

O ka loaa iho la no ia o ka mana koho balota ia oe. Auhea na mea e hooweliweli mai ai ia oe no kou hoopaa ana i kou inoa, a auhea hoi na mea nana e kaili aku kou noonoo aloha aina mai ia oe aku? Aole! Aole loa!! Aka, ina e hoopalaleha kakou ka lahui i keia pono i hoomokaki ia mai imua o kakou e Amerika Huipuia, alaila, maluna iho o ko kakou mau hokua na hoino ia e na hanauna hou e hoea mai ana, no ko kakou hoopalaleha ana i ka hana pono i ka wa maikai. A o keia iho la no na kumu nana i koi mai ia makou na alakai lahui e kukulu ae i aoao Kalai Aupuni Kuokoa, Home Rula, me ka manao e lokahi pu ana kakou ma ke komo pu ana e koho balota, a malaila ko kakou lanakila. Nolaila, ku ae a hele e hoopaa i kou inoa. O ka mea pepeiao lohe la e hoolohe ia. JAS. K. KAULIA, Peresidena Nui o ke Aloha Aina a Alakai Lahui.