Ke Aloha Aina, Volume VI, Number 34, 25 August 1900 — Page 4

KE ALOHA AINA

Ke Aloha Aina

Hookumuia no ka

Pomaikai o ka Lehulehu,a he Nu

pepa na ka Lahui Hawaii.

 

EDWARD L. LIKE

Lunahooponopono

HOGAN E. KALUNA,

Luna Hoopuka

ALEX NAWAHI,

Luna Hoohana.

 

EMMA NAWAHI

Puuku o KE ALOHA AINA

 

HONOLULU…AUG. 25, 1900

 

E HOOKO IA AKU ANA KE KANAWAI.

            Mamuli o ka nui o na hoopii i waho ia aku imua o ka oihana makai no ka nui o na kaikamahine opio a me na keikikane malalo o ka 15 makahiki, e auwana hele ana ma na alanui o ke kulanakauhale nei ma na po Poaono me na makua ole e malama ana ia lakou.  Ua hooholo iho la o Makai Nui Baraunu he mea pono ka hoomau hou ana aku i ke kanawai e papa ana i na opio mai ka hele wale ana malun o na alanui mawaena o na hora 9 o ka po a me ka hora 4 o ka wanaao koe wale no ka mea hele pu ana me na makua a i ole me kekahi mea i oo na makahiki.

            O ke kumu i hoala hou ia mai ai o keia kanawai, mamuli no ia o na kaikamahine opiopio i ikeia e haikau ana iloko o ke aluka o na kanaka ona e hoopuka ana i na olelo pelapela e ku ana mawaho o na hale inu rama a me na hale aina e kamilio ana me na poe malihini a lakou i kamaaina ole ai, a ma kekahi manawa e hoolohe ana i na poe ona e hoopuka ana i na olelo lepo.

            Ua olelo ia ae he hapanui o keia mau opio he mau makua kaulei ko lakou, a e noho an keia mau kaikamahine a hoi pu me ko lakou mu makua.  He mea pono i na makua kau lei, ma keia hope aku e pulama i ka lakou mau kaikamahine, a mai hookuu aku hoi ia lakou e holo hele ma na alanui, no kamea, e nanahu mai ana no ke kanawai i na makua e hookuu wale ana i ka lakou mau keiki e hele ma na alanui i na hora o ke aumore.

 

AE IA KE NOI A KO HILO.

            Ma ke kuka ana a Kiaaina Dole a me Konela Sopa i ka Poakolu nei no ke kukulu ana i pualikoa ma Hilo elike me ke noi a ko laila poe he mau mahina i hala ae nei e hookomo ia ana lakou no ka regimana Ekahi ma ke ano, ka puali I.

            E holo aku ana o Mekia Pratt ma keia mua iho no ka ohi ana i na kanaka o keia puali hou.  Wela ka hao ia Hilo.

 

KA HUAKAI KAAPUNI A NA ELELE I KA MOKUPUNI O HAWAII

            Poalima, Aug. 10, 1900.  Haalele ia Niulii no Kapaau, ma ke ahiahi malama ia ka halawai ma kahi o ka Hope Makai Nui C.H. Pula mawaena o ka 200 a me 250 poe i akoakoa mai, o na ano nui i ike ia ma ia halawai, ua hoi hou mai na hipa auwana o ka Isaraela oia ka poe i hoolilo ia lakou iho ma ka Aoao Kalaiaaina Repubalika iloko o na leo e hooho mai ana, "Pololei ko oukou Aoao Kuokoa Home Rula, aole pela na ao a alakai ana a na poe aalakai o ka Aoao Repubalika maanei."  Nolaila, e haalele ana makou ia aoao, a he Kuokoa Home Rula kakou" iloko o na leo hulo a hookuu ia na hana.

            Poaono, Aug. 11. Hoea ana ka elele, wahi ana, "Ua hoouna ia mai nei au he elele mai na poe boho balota mai o Halaula e hoike aku ia oukou, na elele e alakai lahui, ua makemake ia oukou e hiki ae ma ka hale halawai ma Halaulua i keia ahiahi hora 7 p.m. Ua pane aku na elele.  "E hoi oe a hoike aku, ua oluolu i na elele ka hooko ana aku i ka leo noi o ka lahui."  Ma ke ahiahi ana iho, ua haalele aku na eele ia Kapaau a hoi hope hou aku la no Halaula.

            Ma Puehuehu ua halawai iho na elele me kekahi o na komite, mai waena mai o na keiki o ka aina pua a hoike mai la, ua makemake ia na elele e kipa aku ma ka hale hui o na pake, no ka haawi ana aku i kekahi mau hoakaka e pili ana i ko kakou noho aupuni ana.

            Ua kipa na elele elike me ke kono, o ka nui o na pake e akoakoa ana, he 75.

            Ua hoakaka ano nui aku na elele i ka lakou no na mea e pili ana i ke kulana aupuni o keia wa, a me keia mua aku, a ua nui ko lakou hauoli ma ka hookuu ana oia halawai, ua neeloa mai na elele no Halaula, i ke kaalo ana ae o ke kaa e lawe ana i na elele mawaho o ka haleaina loihi o na pake, aia maloko e akoakoa ana na pake he 150, ua hoouna ia mai la he komite, e hoike mai ana i na elele, ua makemake na anaina pake la e komo aku na elele e hoike aku i na hoakaka ana i na mea e pili ana i ka auhau kino, a me kekahi mau hoakaka e ae.

            O ka hora 5:30 p.m. keia, ua hooko na elele ia leo noi a la mau hoa lahui o kakou, mamua iho o ke kani ana o ka hora 7 p.m. ua hookuu ia la analua, a nee mai la na elele no ka hale halawai o Halaula, ua akoakoa ae na kane a me na wahine, a me na keiki, ua piha a hu ka hale, a maanei i hoomanao ae ai kou kiu i kela mau olelo kaulana o ua aina nei, "Le-i Kohala i ka nuku na kanaka" ua hapai ia na hana a na elele, nana aku i na alakai ana mai i na kahea o ka Aoao Kuokoa Home Rula, he kohu Hekili ka nakolokolo, no ka pono o ka lahui no keia mua aku a ia manawa i kono ia mai ai ke anaina i na he poe aloha aina kekahi a lele aku nei ma ka Aoao Repubalika, ano ka manawa, e wehe ke kuka Repubalika, a e aahu iho i ke kuka Kuokoa Home Rula, (hooho ke anaina) "pololei." ia wa ua ku mai o Hoopii, wahi ana.  "He Aoao Repubalika ka'u i koho ai i aoao kalaiaina no'u mamuli o na ao a alakai ana a na poo o ia aoao ma Kohala nei, a i keia po ke hoike aku nei au, ke wehe nei au a haalele ia kuka a he Kuokoa Home Rula ko'u mai keia wa aku (Huloia.) Oiai e noho ana no ia halawai hoea ana ke kii mai Halawa mai i na elele no ke kiki aku malaila, ua makaukau na makaainana, hookuu ia ka halawai, a nee na elele no Halawa, he mau haneri na poe i akoakoa ae haiolelo hou na elele malaila a huli hou na Repubalika o kekahi o n Repubalika i hemo hou ke kuka oia o Mr. S.M. Kaniho oia kekahi i ku mai a haiolelo, "Wahi ana, owau kekahi e wehe ana i ko'u kuka Repubalika, i hoike no ko'u lilo ana i Aoao Kuokoa Home Rula, ke wehe nei au i ko'u kuka wehe io ae la oia a hoolei mai la i kona kuka iwaena o ke anaina e hoolohe aku nei.

(Huro ia no ekolu manawa.)

No kahi wa aku.

 

LA NUI O NA LIMAHANA.

            Mahope o na hooikaika ana a kekahi mau haoli mikanika o ke kulanakauhale nei no ka hoolilo ana i ka la 30 o Sepatemaba ae nei i la kulaia aupuni, ua hele maoli aku lakou imua o Kiaaina Dole e noi ai e hoopaa ia na hale aupuni ia la.  E ka naa ana a Dole i ke kumukanawai o Amerika Huipuia ua ike iho la oia he la kulaia keia i hookomo ia maloko o kona kumukanawai a nolaila, aohe ana mau kumu e kue mai ai, ka, o ka ae wale mai no i keia noi.

            Nolaila, o ka la 3 ae nei o Sepatemaba e hiki mai ana he la nui ia no na limahana, a e hoomaha na mea a pau a puni keia mau paemoku.  eia na komite i koho ia no na hana o keia la ke liuliu  mai nei no ka hoolilo ana aku i la oi loa aku o ka lealea a hoomaka ana mai na hora o ke kakahiaka a hoea wale aku i na hora o ke aumoe.

            E malama ia ana he kai huakai o na limahana malalo o ke alakai ana a ka bana, he mau lealea heihei mawaho o Kapiolani Paka, ina e ae ia mai ana ia wahi e ka Hui Heihei Lio, a he aha hulahula nui hoi ko ia po.

 

HE PEPEHIKANAKA MA KEAAU.

            Ma na hoike i loaa mai maluna o ka mokuahi Kinau mai Hilo mai; ua mlama ia he pepehiakanaka ma Keaau, Puna e kekahi Iapana maluna o kana wahine, ma ka po Poaha Augate 9, 1900.

            No kekahi manawa i hala ae nei ua koi aku keia Iapana i kana wahine no ka hoi ana mai i Maui e noho ai, aka, ua hoole mai nae oia.  Na keia mea i hookomo aku i na mana hoohuoi iloko ona no ka hana a kana wahime me ke koi ikaika aku i kana wahine e ae ia mai keia noi ana, aka, ua hoonuu mai no ka wahine i ka hoole ana.

            Ma ka po Poaha ua waiho hou aku la oia i keia koi hope loa i ka wahine, a i ka hooko ole ia ana o kona makemake, ua unuhi ae la oia he pahi a hou aku la ma ka pua-i o kana wahine no kekahi manawa lehulehu.  I ka pau ana o kana hana hoomainoino, a i kona hoomaopopo an aole he hiohiona ola i koe maluna o kana wahine ua haalele iho la oia iaia, me ka hele ana aku i ka hale kuai o Frank Sakamaki a hoike aku la i kona karaima eleele i lawelawe ai, ua kuhikuhi koke mai ka mea ona halekuai he mea pono iaia ka haawi pio ana aku iloko o ka lima o ke aupuni.  Ua apono oia i keia manao a hoike ia mai la ka lohe i ka oihana makai o Hilo ma ke telepona.

            I ka wa i hoea aku ai na makai ua ae mai la keia Iapana i kona hewa ma ka hoike pu mai he manaoio kona ua make kana wahine.  Ua hele koke aku na makai no kahi o ka wahine e waiho ana iloko o kekahi lokowai koko.  Ua ike ia aole oia i make loa, a ua haawi koke ia na lapaau ana.  Ua lawe ia mai ka limakoko no ka halepaahao o Hilo, a o ka wahine hoi no ka haukipila, aka, ma ka po Poaono mai, ua make iho la ka wahine.

            He limahana keia Iapana no ka mahiko o Olaa, a o ka hana a kela wahine maloko o na hale kokoke malaila. He lili ke kumu o ka lawe aa o keia kane i ke ola o kana wahine.

 

            Eia makou ke hoopuka aku nei i ka mana o Mr. John Wise kekahi o na elele Demokarata i holo aku nei i Kansas City, a na oukou no e ka lahui Hawaii Aloha  Aina e kuana  no oukou iho i na mea ano nai o ke kalani o ka Aoao Demokarata.