Ke Aloha Aina, Volume VI, Number 30, 28 July 1900 — MOOKUAUHAU O JOSEPH HEWAHEWA KAIMIHAKULANI HELELUHE. MAI KONA MAU KUPUNA MAI, A ME KANA MAU HANA. [ARTICLE]

MOOKUAUHAU O JOSEPH HEWAHEWA KAIMIHAKULANI LANI HELELUHE

MAI KONA MAU KUPUNA MAI, A ME KANA MAU HANA.

O Keakealani he kane. O Ka lehuna ka wahine. Hanau o Keawemainui, k. O Keawemainui ke kane. O Kaleikumaielanikawahine. Hanau o Kuhailiilii, w. O Kuhailiilii ka wahine. O Alapai ke kane. Hanau o Ke aweopala, k. O Alapai Moi keia o Hawaii. Ka mea nana i opa pu kekahi mau Alii Aimoku. Make o Alapai ma Kikiakoi, Kawaihae, M. H. 1753, lilo o Keaweopala kana keiki i alii maluna o na okana o Kona, Kohala, Hamakua, Hilo, M.H. 1753. O Keaweopala ke kane, o Namoe ka wahine, hanau o Kanekoa k. O Kanekoa ke kane, o Molao ka wahine, hanau o Kanoa w, Kanepipi w, Kapela k. O Kanoa ka wahine; o Hele luhe ke kane, hanau o Keoki w, Kaioewa w, Joseph Hewahewa Kaimihakulani Heleluhe k, Kanoa w, me Ana w. Ua hoonaauao ia o Joseph Hewahewa Kaimihakulani Hele luhe, ma na kula apana o Puna, kona aina hanau, a ua hoonaauao ia i ke Kula Hanai o Hilo Hemo mailaila mai noho, i Kau, he mau hana lima. Holo i Honolulu, noho me ka Moi Kalakaua, a pau nae o Kalakaua, mahope mai, noho me ka Moiwahine Liliuokalani, ma ke ano he Puuku, a ma ia kulana oia i noho ai a hiki i ka holo aa i Amerika i ka M.H. 1896. Ma ia huakai i Amerika, ua kau hou iho maluna ona he kakauolelo no ka Moiwahine Liliuokalani. Ua loaa iaia keia kulana mamuli o kona hoopono, a me ka pololei o kana mau hana.

Holo hou i Amerika i ka M.H. 1899 huli hoi i ka aina, Iune 4, M.H. 1900, kuu mai la kona luhi a me na inea o ka noho ana o keia ao, Iulai 8, 1900. Ua haalele iho oia mahope nei, i kona Haku Alii, ka wahine, ka makuahine, he mau kaikuahine, me na keiki, a me na hoaloha. He kanaka oluolu, he puuwai hamama, he mea nui iaia ka leo o kona haku. He aloha aina oiaio, he elele na ka lahui Hawaii i Amerika. Ua hanau ia oia ma Kapoho, Puna Hawaii Iune 2 M. H. 1855. Ua piha iaia na makahiki he 45 a me 16 la.