Ke Aloha Aina, Volume VI, Number 28, 14 Iulai 1900 — Page 2
| This text was transcribed by: | Noelani Arista |
| This work is dedicated to: | Na Noelani Arista |
KE ALOHA AINA
2 KE ALOHA AINA, POANO. IULAI 14, 1900.
Hookumuia no ka
Pomaikai o ka Lehulehu, a he Nu
pepa no ka Lahui Hawaii.
----
EDWARD L. LIKE.
Lunahooponopono.
HOGAN E. KALUNA,
Luna Hoopuka
ALEX NAWAHI,
Luna Hoohana.
EMMA A. NAWAHI
puuku o KE ALOHA AINA
----
HONOLULU . . . IULAI 14, `900.
----
KA PAPA NANA KOHO BALOTA.
----
He elima ka nui o na papa nana koho balota a Kiaaina Dole i koho mai la no na Paemoku o Hawaii nei. He elua no Hawaii, hookahi no Maui, Molokai a me Lanai, a he hookahi no Oahu nei, a he hookahi hoi, no Kauai a me Niihau. O na hookohu o na papa nana o na Mokupuni mawaho aku nei, ua hala aku la ia maluna o na mokuahi holo pili aina o ka Poalua nei, aka, aole nae i hoike ia ae i ke akea a hiki i ka Poaha nei.
O keia malalo iho nei na inoa o ka poe e noho ana maloko o na papa koho balota, a puni na Mokupuni o Hawaii nei, penei:
Oahu---Lorrin Andrew, Lunahoomalu; D.L. Naone a me M. A. Gonsalves.
Hawaii. Apana o Kau, Kona a me Kohala.---Geo P. Tulloch, Lunahoomalu; J. K. Nahale a me Samuel Kauhane.
Maui, Molokai a me Lanai--- F. W. Hardy, Lunahoomalu; R. C. Searle a me S. Keliinoi.
Kauai a me Niihau --- W. G. Smith, Lunahoomalu; J. B. Hanaike a me Chas. A. Rice.
E hoomaka ana na hana o keia papa ma ka la 31 o Augate, a e noho ana i kela a me keia la a hiki i ka la 10 o Okatoba. E hoolohe ana lakou i na noi koho balota a na poe a pau e hoea kino ponoi aku ana imua o lakou. He eono hora a lakou e hana ai i kela a me keia la.
----
KE NOI A KA MOIWAHINE LILIUOKALANI
----
Ua waiho ia aku la imua o ka Aha Kaapuni ma ka Poaha nei, he palapala noi mai ka Moiwahine Liliuokalani aku e noi aku ana, o ka palapala hooilina i hana ia aku maluna Ona e Auhea Kekauolohi e hoopaa ia aku ia maloko o ka buke aupuni. Maloloko o ua palapala noi la e olelo ana: "Ma ka la 28 o Dekemaba, 1894, ua hana ia he palapala e Auhea Kekauolohi e hoolilo aku ana i kona kuleana a pau iloko o ka waiwai o Akahi a me kekahi mau waiwai e ae i ka Moiwahine Liliuokalani. O na hoike i ka wa i hana ia ai o keia palapala oia o Kale Kulika a me Sam Nowlein.
Ua makemake ka Moiwahine e hoopaa ia keia palapala iloko o ka buke aupuni, oiai, ua make o Auhea me ka hooiaio oleia, ua noi aku Oia no ka hoolohe ia ana o keia koi. O J. O. Carter ka loio o ka Moiwahine.
----
HE KOI POHO KOIKOI.
----
Imua o ka Aha Kaapuni ma ke kakahiaka Poakolu nei i waiho aku ai o Mrs. Abigail K. Kailieha, he hoopii koi poho ia Loweli Kupau no kona hoopuka ana iaia he anaana. O ka huina dala a Mrs. Kailieha i waiho mai ai imua o ka Aha he $5,000. Ua olelo ae keia wahine ua laibila aku o Kupau iaia ma ka hoopuka ana i keia mau huaolelo: "Ae, ua anaana oe ia'u a mai make au i ka haule ana i ka lio." O keia mau olelo ae la wahi a ka mea hoopii, ua hoopuka ia ia imua o kekahi mau kanaka nona na inoa o Opunui a me Kaala, ua hoeha ia keia wahine no keia mau huaolelo i hoopuka ia e Kupau, a pela oia i lawe mai ai i keia hoopii koi poho e hoolohe ia e keia Aha. O F. J. De Bolt ka loio o ka mea hoopii. He mau a'o ana no keia i ka poe i ulu ae na manao ino mai hoopuka i na olelo a oi aku mawaho o ka mea kupono.
----
HOEHA IA I KA WA E MOE ANA.
----
Ua hopu ia he wahine nona ka inoa o Palekai, ma ke ahiahi Poaha nei, mamuli o ka hoohuoi ia ana ua ike no oia i ka mea nana i hoeha i kana kane, oiai keia kanaka e moe ana maloko o ka hale ma ke ahiahi i olelo ia ae la ua pepehi hoomainoino ia iho la oia e kekahi mea i maopopo ole kona ano. Ua nui na wahi i hoeha ia o kona poo, aole he maopopo o keia kanaka i kona mea nana oia i hoeha, aka, ma kana mau olelo hoike nae i hopu ia ai kana wahine no ka mele pono ia ana. Ua lawe loa ia aku ka mea i hoopoino ia no ka haukipila a malaila i haawi ia ai na lapaau ana i ka mea i hoopoino ia.
----
HE 16,000 I HOOLELO IA AKU LA NO TAKU.
----
Taku, Iune 30. O ka nui o na koa i hoolele ia aku la ma Taku i keia wa, aia ia ma kahi o 16,000. Maloko oia huina he 3,200 Beritania, 1,300 Geremania, 4,000 Rusia, 3,600 Iapana, a ke koena iho, he Amerika, Farani, Italia, a me Auseturia.
PALEKANA NA KANAKA O KA OREGONA.
----
Sanahai, Iune 30. O na poe a pau maluna o ka mokukaua Oregona, i ili ai ma ka Pinnacle Rock maloko o ke kai kuono o Paehili, ua hoopakele ia. Aia he mau kaupa ana e loaa ana no ka palekana i ka moku poino. Ua olelo ae kekahi mau luna aupuni, aia he pii nui ana o ke kai malaila no umi kapuai, a nolaila, ua hiki oia ke hemo me ka nui ole o ka hana.
----
ELUA MAU PAA MARE.
----
Ma ka Poaha la 14 o Iune makahiki 1900, ua on a ia ae ma ka makeremonio maemae o ka mare o PUnahaunui Momoa, me Miss Julia Keaonui kekahi paa mare, a me Kilikoma Momoa a me Miss Eukenia Samuela, ma ka luakini o Sana Petero Puuiki, Hana, e ka makua Rev. Makimino, o keia la i mare ia ai keia mau paa mare, he la hoano ia no ke kino, a ma ka pau ana o ka mare ana, ua kai ka huakai mai ka luakini mai a hiki ma ka home noho o John Kamanuwai ma Kihamaniania, Hana, a ua haawi ae na makua o na paa mare he paina luau nui maloko o kekahi lanai nui i hoomakaukauia, a ua hooulu wehiwehi ia ka lanai me na wehi o ke kuahiwi, a i ka makaukau ana o na mea ai, ua ku mai o P. Momoa a haawi mai la he mau olelo paipai hoolana manao i na paa mare, a me ka lehulehu, a nana no i hoomaikai i ke Akua ma ka pule, pau ia ua ai na paa mare a me ka lehulehu ua ai a lawa i ka lokomaikai o na paa mare, a o ua loaa mai na haawina mai a ke aloha no na paa mare he $176 00 no ke aloha mai keia, a ua malama ia ka maluhia o keia paina luau a hiki i ka pau ana o na hana o ka la.
Me ka oiaio,
J. K. Keaonui.
Kapohue, Hana, Iune 22, 1900.
----
HOOPAA IA NO KA PUPULE.
----
Ua lawe ia aku e hoopaa mauka o ka hale pupule o Pirri, ka haole i ikaika i hoikeike ai maloko o ka Orpheum mamua aku nei no ka ma'i pupule, ua loaa aku oia ma ka Ema Kuea ma keia pule aku nei me kekahi pu panapana a me kekahi kukui ihoiho e huli ana i kona enemi. Ma ka hoopaa ia ana ma ka hale pupule ua hoopaa ia kona mau lima me kekahi kaula ili, aka, mamuli no nae o kona piha ikaika ua moku ae la ke kaula, ua kupee ia kona mau lima i ka hao a ua manao ia e haki pu ana no ia.
HE HOU PAHI.
----
Makai o Kakaako. Ma ka hora 9:30 o ka po Poakolu nei ua malama ia ae la kekahi hana hou pahi maluna o kekahi wahine nona ka inoa o Mary Burg a me kekahi kanaka nona ka inoa o Koeha. Ma ka hoike a kekahi haole luina nona ka inoa o W. Martin. Ua ulu ae he haunaele ma ia wahi a na kii aku he ekolu mau kanaka a pepehi iho la i keia wahine, aka, i ka ike ana nae o Koeha i keia mau hana lapuwale a keia poe e lawelawe ana i keia wahine, ua holo mai oia me ka manao e hoopakele i ka mea e hoeha ia ana, a ia wa no i hou ia mai ai oia i ka pahi e kekahi kanaka. Ua holo koke mai o Martin e hoike i ka halewai a ua hoea aku na makai malaila a lawe mai la ia na mea i hoeha ia i ka halewai. Ua hoeha ia o Kohea ma ma ka uha, a o Mary Burg hoi ua moku oia ma ka waha. Ua mahuka aku ka mea mea nana i hana i keia hana lapawale mamua o ka hiki ana aku o na makai.
----
HE NOI ALOHA.
----
E ike ia kana hoa kanaka, o kipa hewa ke aloha i ka ilio.
He ilio oia a he kanaka hoi keia, aia hoi a hoea aku kekahi mea imua o kou alo e ka io o kuu io a me ka iwi o kuu iwi ea, e oluolu oe e nana iho i na olelo o loko penei:
I ka hoahanau oiaio iloko o ka Haku Iesu Karisto.
Aloha oe; --
Ina he wahi keena kahi o kou puuwai no ko keia aloha pumehana, he oiaio no, aole loa oe a hoonele ana i ka haawi ana mai i kau kokua aloha i ka mea e haawi aku ana i keia pepa komike ia oe no ka pomaikai o ka luakini o ka Hoomana Karistiano Naauao e kukulu ia aku ana ma Makapala, Kohala, Hawaii, "Kauwila o ka Malamalama."
Na Komite, S. K. Kamakaia,
James Makekau,
Mrs. Lizzie Tamara Puuku,
Mrs. Sarah Kaipo Akamu.
----
Ua hiki ia H.G. Biari ke hana i na hana a pau e pili ana i ka oihana hana gula a ina he mau pine poino kou, e lawa ae iaia e hana ai.
Eia ke hoolahaia mai na poe o ka Aoao Demokarata no ke koho ole ia ana o kekahi poe oia aoao iloko o ka papa nana i koho balota a ua manao lakou he mau he mau hana kapakahi keia, na ka Aoao Repubalika i hana iho la O S C Searl wale no ka inoa i manao ia he Demokarata ole. Kapakahi io no na hana.