Ke Aloha Aina, Volume VI, Number 23, 9 June 1900 — KA LEO ALII IMUA O NA ELELE A KA LAHUI [ARTICLE]

KA LEO ALII IMUA O NA ELELE A KA LAHUI

Mahope iho o ka hoomaha ana o ka halawai a ka Aha Elele o na Ahahui Aloha Aina a me Kalai aina, ma ka hora 11:30 o ke awakea Poakolu nei, ua hele aku la na Elele a pau e ike i ke Alii ka Moiwahine Liliuokalani ma Wakinekona Hale. I ka akoakoa ana aku o na Elele, na Kalauokalani i hoolauna aku i na Elele i ke Alii, a wahi a ka leo Alii i panai mai ai. "Aloha oukou: Aole au i manao eia no oukou ka lahui ke hoomanao mai nei Ia'u, oiai, he umi makahiki i hala ae nei e ku ana Au he Makuahine no oukou ka lahui, a i keia manawa, ua noho mana mai la o Amerika Huipuia maluna O'u a me oukou Kuu lahui, he mea ehaeha no Ia'u na haawina i ili iho maluna o kakou, aka, he mea hiki ole ke pale ae, ua hoohamama ia mai Ko'u manao, mamuli o na haawina a Amerika i hana mai nei no ka lahui Hawaii, a oia pono Ka'u e a'o aku nei e nana mai no ka lahui i na alakai ana a na alakai o ka lahui, oia o Mr. Kaulia a me Mr. Kalauokalani, ua ili maluna o laua ke koikoi no ka nana ana i ka pono o ka lahui elike me ke Kanawai Amerika i haawi mai nei, a o ka loaa ana i ka lahui na pono a me na pomaikai no na hanauna aku a kakou o keia mua aku, o ka loaa ana no ia Ia'u oia pono hookahi. Aole o kakou kuhi'na aku i koe, koe wale ae la no keia pono akea i haawi ia mai e Amelika ia oukou ka lahui, e hopu a paa, a na oukou e hooponopono no kakou no keia mua aku. Me keia mau wahi hualelo [huaolelo] pokole e hookuu mai Ia'u, me ka haawi pu aku i Ko'u aloha i ka lahui, aloha oukou." Na J. K. Kaulia i pane ma ka aoao o ka Aha Elele, wahi ana: E kalani: Ma ka aoaoa o na Elele a me Kou lahui, ke lawe nei makou me ka manao laahia loa i ka leo Alii a omau iho maluna o ko makou umauma a me Kou lahui, a e lilo hoi ia mau huaolelo Alii i pae mai nei i mea e alakai ia ai Kou lahui no na pono a me na pomaikai ma keia mua aku, a me ka pono o na hanauna o Kou lahui e hoea mai ana. E pau ana ka waiwai o na pooleta Hawaii ma ka la14 o keia mahina, a o na poe a pau he poo Hawaii ka lakou, e hoihoi ae i ka hale leta, a e pani ia mai no he poo Amerika ma ko lakou makalua, nolaila, e hoomaopopo no mea apau i keia o lawe ole ia auanei na leta e ka oihana leta.