Ke Aloha Aina, Volume VI, Number 23, 9 June 1900 — Untitled [ARTICLE]

O ka Poakahi ae nei ka la i hookuu akea mai ai o Kalani Ai moku e ike mai i kona lahui aloha, nolaila, e na makaainana makee alii, eia ka la i hookuu akea ia no kakou a pau e hele ai e ike Iaia. E ku a maloeloe a hele aku me kahi makana a ke aloha. Ma ka hora 11 o ke kakahiaka. EIA na haole hoouiaina ke kau nei ka weli no oukou e ka lahui Hawaii, no ka mea, ua maopopo ia lakou, he nawaliwali loa ka lakou mau aoao kalaiaina e kakoo nei i keia wa. Na na Hawaii e rula ia Hawaii nei, ina e hoomau ana ka lahui i ke kupaa ana ma ka aoao a lakou e ku nei a hiki i ka la koho balota. E uumi ka hanu, a e waiho hoi i na manao hoino pilikino, no ka mea, o ke alahele wale no ia e loaa ai ia kakou ka lanakila. Ua manao wale ia e kahea ia ana he Ahaolelo Kuikawa e Peresidena Dole, a e noho hoi ia Ahaolelo he hookahi mahina mahope iho o kona paa ana i ke kulana Kiaaina. Nolaila, ina e kahea io mai ana o Dole i Ahaolelo Kuikawa, e malama ia ana ke koho balota ma ka la 14 o Iulai, a e noho koke ana no hoi keia Ahaolelo ma ia hope iho.