Ke Aloha Aina, Volume VI, Number 23, 9 June 1900 — KA LA IKE ALII NUI Poakahi, lune 11, 1900, Hora 11 Kakahiaka. [ARTICLE]
KA LA IKE ALII NUI
Poakahi, Iune 11, 1900, Hora 11 Kakahiaka.
Hawaii ponoi nana i kou Alii, Na pua kou muli na pokii. E ala, e ku, e holo e ike i ka Lani Alii a Hawaii, ka hope loa keia nou e Hawaii e ike ai i ka la 11 o Iune, ka la hoi i hoolaa ia no Kamehameha ka Na'i Aupuni, a komo aku kakou i ka aahu hou a Amerika i haawi mai nei, pau ka la 11 o Iune, ka la hoomanao nou e ka lahui. Nolaila, ke kono ia aku nei ka lahui, kane, wahine, keiki, e hele ae e ike i ka Lani Alii a Hawaii, ka Moiwahine Liliuokalani, ma Wakinekona Hale, ke hiki aku i ka Poakahi, Iune 11, 1900, hora 11 o ke kakahiaka, hele ka ai, ka ia, ka mea e loaa ana no kou la hope loa o ka hoomana Aloha Alii, o ka mea i nele hele mai, e hoike ae ka lahui i kona aloha Alii oiaio. Ma ke Kauoha, JAS K. KAULIA, Peresidena Nui o ka Lahui Aloha Aina