Ke Aloha Aina, Volume VI, Number 23, 9 Iune 1900 — HOEA O LILIU I KA HOME [ARTICLE]

HOEA O LILIU I KA HOME

Ma ka hoea ana mai la a ka mokuahi Pekina mai Kapalakiko mai, ma ke aumoe o ka po Poakahi nei, ua hii pu mai la oia i ka milimili a ka lahui, ka Moiwahine Liliuokalani me Kona mau hoahele a me ka elele hoi a ka lahui R.W. Wilikoki. A oiai, aole oia ka lakou moku i hoike mai ai, aka, ma ka Auseteralia lakou e hoi mai ai, nolaila, ua noho hemahema na makaainana ma ka haawi ana aku i na hookipa pumehan ai ka wa o Kona mau kauai Alii i hehi mai ai i ka uwapo ma ia po. Ua hoohikilele ia na poe a pau ma ka uwapo ma ia po i ka wa i loheia mai ai aia o Kalani Aimoku maluna ona. He nui na poe i hilinai ole i keia lohe a hiki i ko lakou ike maka ana aku i ka iho mai o Kalani mailuna mai o ka moku. Ua hoea ae ke Keikialii Kawananakoa malaila, a hoihoi aku la i kona makuahine alii no kona home. Ua ukali pu mai ka elele a ka lahui R.W. Wilikoki me ka huakai alii, mahope o kona kaawale ana aku nei no kekahi mau mahina loihi ma Wasinetona, a pela me J. Heleluhe, Miss Heleluhe a me ke kauka o ke Alii Kauka English. He maikai a mohaha ke ola o ke Alii i Kona wa i hanu hou mai ai i na ea oluolu o Kona one hanau. He wahi omaimai iki no Kona i nono mai nei ma Wasinetona, aka, ua loaa no nae Iaia ka maha. He nui a lehulehu na hoaloha i kipa aku la e ike Iaia, mahope o ke kaawale ana no kekahi mau la loihi. E hoike aku ana no makou i ka la Ana e hookuu akea ai i Kona mau makaainana e kipa aku ai e ike Iaia. E ola o Kalani Aimoku i ke Akua. Ua moku a kaawale ka peahi lima o kekahi Iapana ma o ke pahu ia ana o ke kiana pauda malalo o Waialua, ma ka Poaono nei.