Ke Aloha Aina, Volume VI, Number 22, 2 Iune 1900 — HEAHA KA AOAO KALAIAI-NA A KA LAHUI E KAKOO AI? [ARTICLE]

HEAHA KA AOAO KALAIAINA A KA LAHUI E KAKOO AI?

Ma ko makou okilo ana aku i ke kulana kalaiaina i hoala ia ae iloko o ko lakou anaina i keia mau la e nee nei, ua loaa ia makou he mau paepae kupono e kau iho ai ka makou hoonaauao ana aku i ka lahui, a i hoomaopopo ia hoi ma o ka ulu ana ae he mau aoao kalaiaina i kukulu ia a e ku nei i keia wa. Ua hoala ia ae he mau aoao kalaiaina i kapa ia he "Repubalika" a me ke "Demokarata," he hoopili ana keia no na kulana hooponopono kalaiaina ma Amereika, nolaila, ma ka makou noii ana aku, ma na kukulu kahi i hoohanau ia mai ai keia mau aoao kalaiaina ae la, ua loaa aku la ka makuakane a me ka makuahine o ua mau bebe nei, oia no o Kakina ma, Kauka Makalu ma, he Repubalika, a ma kahi olelo ana he Demokarata no lakou, hookahi no kino he elua nae aka. O ka Repubalika a me ke Demokarata ma Hawaii nei, oia no na poe na lakou i pakaha i ka aina o ka lahui Hawaii a me ka Moiwahine o Hawaii, o keia no ka aoao i kapa mau ia iloko o na makahiki i hala ae nei, he aihue aina, aka, mamuli o ka maalea a ma ke akamai o na hana poholalo, ua mahele ia ae nei ke kino o ka Moo i elua pauku, i Repubalika, a i Demokarata, no ka ma-

nao ana paha, e lele aku ana ka lahui Aloha Aina i Demokarata, ma o ka olelo hooholo hoihoi aupuni a Kalivalana i kukala mai ai, nolaila, i mahele ia ae nei ua kino moo nei i elua pauku, i na e ku iho ka lahui a ninau iho, owai ke alakai o ka aoao Repubalika ma Hawaii nei? Hookahi no pane e loaa ana, oia no ka poai o ka poe hoohui aina, ka makuahine o ka hoohui aina o Kakina ma no ia, ke alakai o ka aoao Repubalika i kukulu ia ae nei. A owai hoi ke alakai o ka aoao Demokarata? oia pane hookahi no. O Kauka Makalu ke kupunakane a me ka makuakane o ka hoohui aina, oia no Kauka Makalu, Kakina ma, ke alakai o ka aoao Demokarata, nolaila, e nana pono mai ka lahui i ke kulana kahi e keehi nei i keia mau aoao kalaiaina. Ko makou manao iho, he upena kuu ke ano o keia mau aoao kalaiaina i kukulu ia ae nei, i mea e hoohei ai i ka lahui, o Kakina ma kekahi poha-ku o ka upena, a o Kauka Makalu ma kekahi poha-ku o ka upena, a o ke koena iho o ka poe haawi aina, o lakou no na kapeku e hoopahu mai nei ma kula me na pohaku e hailuku mai nei i ka lahui e komo pu aku me lakou. O ka makou e ao aku nei, e ku iho no ka lahui no lakou iho a e lawe ae no i aoao kalaiaina kaokoa mai kekahi ae o keia mau aoao, oi loa aku no ke kuokoa ana o ka lahui nona iho, a e kukulu ae no i aoao no ka lahui e mau ai ka lokahi mai kinohi, a mai puni wale aku i na olelo hoonuinui e poino ai ka lahui, a ma keia mau aoao ae la ka makou e olelo ae la. Ku hele pela oe Satana.