Ke Aloha Aina, Volume VI, Number 22, 2 June 1900 — Page 7

KE ALOHA AINA

 

KE ALOHA AINA POAONO, IUNE 2, 1900.

HE MOOLELO WALOHIA

––– : no ka : –––

LEDE ELENORA

Ka Ui Nohea i Hookaawale ia mai ke Alo aku ona Makua.

––––: a i ole :––––

Ka Wahine Opio i Auamo i na Koikoi a Kona Makuakane i Hana ai.

MOKUNA VII.

ka po o ka ehaeha aohe mea nana e hoomaalili.

            A maanei i hopu aku ai ke pio i ka a i o kana aloha, a huki iho la iaia ilalo no ka kukuli pu ana ma kona aoao, ia wa no i kunou aku ai kona poo i ke kahunapule e noi aku ana iaia e haawi mai i na hoomaikai ana.

            E like me ka makemake o ke kanaka paahao, pela no ke kahuna pule i haawi koke mai ai i na leo kahoahoa i na mana lani, no ka hoomama ana ae i na manao kaumaha o na poe e akoakoa nei maloko o ua keena la.

            He mau minute mahope iho, aia hoi, ua lohe ia aku la kekahi leo kikeke ma ka puka, e hoike mai ana, ua kokoke mai ka manawa no na poe maloko e kooko-o ae ai i ka pili a loko.

            Ia wa i hele aku ai ke kahunapule a halawai aku la me ka luna kiai a no kekahi mau minute ko laua ku ana, ua hoi mai la oia a pane iho la i ke kanaka opio me ka leo malie.

            Ano e kuu Wile, ua hoea mai ka manawa no oukou e hookaawale ai, o ko oukou kaawale koke ana ae, he hana ia e hoomama ae ana i ka haawina luuluu e pahola nei maluna o oukou.

            Kunou aku la oia i ke kahunapule a me na waimaka e haloiloi ana, ku ae la oia a puana aku la me ka leo kaumaha i kana Nele.

            E kuu aloha, ano, na hoea mai la kaua i ka hopena o keia launa aloha ana, e haawi mai i ke aloha hope a huli hoi aku no ka home, a i ike aku i na lei a kaua e muki hope iho no’u.

            A maanei i apo aku ai ua kanaka opio nei i ka a-i o kana aloha me ka honi hoomau ana aku.

            Puili koke ae la ua wahine opio nei, a uwe iho la me ka ehaeha nui e hiki ole ai i ka peni a ka mea kakau ke hoakaka aku.

            Na ke Akua e hoopomaikai mai oe, e kuu Nele!  Na Akua iloko o ka lani e hoopomaikai mai, a e kokua mai hoi ia oe e kuu wahine.

            A ma kela wahi i hoopili hou mai ai ua Wile nei i kana wahine i kona umauma me ka haawi hou ana iho i na muki ma ka lehelehe o kaua Nele aloha.

            A no ka nui hewahewa o ko Nele aloha no kana kane e pauma aha ia loko, ua uwe kapalili ae la oia me ka hoolohe ole mai i ka leo o kana Wile e kaukau hope iho ana, a no ka nui o kona mau ehaeha, ua hehee aku la oia a waiho ana iluna o ka papahele, a maanei i hapai ae ai ua Wile nei a hoomoe aku la i kana Nele iloko o na lima o ke kahunapule.

            E ka makua ua oi loa aku ka pono o kona ike ole ana ae i na sekona hope o ko maua kaawale ana, e lawe aku iaia no waho o keia keena @ piha me ka ehaeha.

            I keia wa i hoohelelei hou iho ai ke kanaka opio i kona mau kulu waimaka no kana aloha a me kona kino e naka haalulu ana i apo iho ai i ka a-i o Nele a honi hoomau iho la, a i kona hooki ana ae, ua huli ae la ke kahunapule a puka aku ia iwaho me na kapuai malie me ka wahine opio hoi e hii ana mamua o kona alo, aka, aole nae oia i ike @e, oiai, no oia e waiho maule ana.

            I ka nalo ana aku o ka helehelena o kana wahine, ua huli ae la oia a hoi hou aku la no kahi a kona makuahine e uwe ana a kukuli iho la mamua o ke alo o kona mama a puana aku la me ka leo ehaeha.

            E kuu mama aloha, e haawi mai i kau mau hoomaikai ana maluna o kau keiki nei a haalele mai ia @ e noho mehameha no ka hele kohana ana aku no ko’u lua kupapau.

            E kuu keiki, he manao amei kou e haalele ana au ia oe ?  O, aohe aole e Wile, ma kou aoao au i na wa a pau a hiki i kuu ike ana ake aole he pana i koe iloko o kou puuwai ole paha ka wa e haalele iho ai ia oe.

            E kuu makuahine aloha mai ka mailio mai ia’u e like me ia, aka, e haalele iho ia’u i ole ai oe e hookau maha ia no na haawina manaonao e kau mai ana maluna o’u.

            O e kuu keiki ua manao anei oe i ko lakou wa e pepehi ai ia oe a make, he mana e ae kekahi ma ka honua nei nana e hookaawale ia’u mai oe mai ?  Aole, aole loa.  E noho ana au me oe i kou manawa e ola ai, a e make pu hoi me oe i kou wa e make ai.  A he haawi ana aku ia i maha no na poe e ola ana ma hope nei ina au e hala mua ana.

            I ka ike ana ana o Wile, aole e hiki kana mau olelo ke hooloheia mai e kona makuahine i uluhia me na manao opulepule no ke aloha iaia, ua noho hamau iho la oia me ke kali malie ana no ka huli hoi ana mai o ke kahunapule.

            I keia mau sekona aia, ua Nora nei ke aaki la kona mau kui me ka piha inaina me ka hiki ole i kana keiki ke hoomalielie aku, me ka haule makawalu pu mai hoi o koaa mau kulu waimaka.  Iloko o keia manawa i komo mai ai ke kahuna pule iloko o ke keena a ke kanaka opio e kali nei nona, a i ko Wile ike ana aku iaia, ua ninau aku la oia me ka leo pihoihoi.

            E kuu makua e hoike mai ihea oe i haalele aku la i kuu wahine ?

            Mai kaumaha nona e kuu keiki, aia oia ke moe la maloko o ka rumi, hookipa o ka luna paahao, malalo o ka malama maikai ana a kana kaikamahine.  Aia ke hoi hou mai ia kona mau noonoo maikai, a hewa wale no no Nle e pohala ae ai, nolaila, mai hopohopo, a na’u no hoi e hoihoi aku iaia a hiki i ka home.

            Mahalo ia oe a nui e ka makua a na na lani e hoopomaikai, a e uku panai mai no kou mau hooluhi wale ia ana.  Ano, ua hiki anei ia oe ke hookaawale aku i kuu makuahine mai keia wahi aku.

            E like me ka makemake o ke kanaka opio, pela ke kahunapule i hele aku ai a haawi aku ia i na leo hoomalimali ia Nora no haalele ana iho i ke keena, aka, aole no nae oia i hoolohe mai.

 

Nuhou Kuloko.

            E alawa ae i ka hoolaha hou e puka aku nei.

            He kuai hoemi nui ka Isoshima e malama mai nei i keia mau la.

            O ka Pekina ke kapalulu mua mai ana mai Kapalakiko mai ma ka Poalua ae nei.

            Eia ke paani mai nei ka hui keaka hou i hoea mai la maloko o ka Orpheum i keia mau po.

            Eia ka hooloheia nei ka hihia o Downing, ka haole i hou ai i ka pahi ia Poai, ma uka o Puunui.

            E hoopau loa ia ana ka hoohana ia ana o na poo leta Hawaii ma keia mua aku, a o na poo leta o Amerika Huipuia ke pani mai ana ma kona wahi.

            Ma ka po Poaono nei, ua haawi makaha ia aku o Ernest Hogan, ke alakai o ka Puali Keaka Paele me kekahi uwati gula e ka hui keaka Orpheum.

            He 18 ka nui o na hihia ona i ku aku imua o Lunakanawai Wilikoki ma ke kakahiaka Poakahi nei, a ua pau wale mai no lakou a pau i ka hoopai ia.

           

            Ma ka Mauna Loa o ka Poalua nei i huli hoi mai ai ko makou hoaloha C. B. Maile mai kana huakai pokole aku ne no na Kona, a o ka mua loa hoi keia o kona ike ana i ke kai malino a Ehu.

            Eia kekahi mau iaia o ka bana a ka lahui ke hoomaamaa mai nei no ka haawi ana aku i ka lakou hoohanohano ana ia Kalani Aimoku i ka e hehi hou mai ai kona mau kapuai alii i kona one hanau nei.

 

NA LAKO GULA HOU LOA.

            I hoea mai he maluna o na mokuahi mai Kapalakiko mai.

            Ma ko’a Halekuai malaila @ hana ia ai na @ine, Komo, Kupea Lima Uw@, a pela aku.

H. O. Biart.

Alanui Papu, Helu 4041.

 

 

Allen me Robinson

He mau mea kuai

Papa, Na Lako Kukulu Hale, Pena, ame Aila a pela pu no hoi me ka Nuuanu.

            Keena Hana ma Alanui Moiwahine.

 

 

KAUKA L. F. ALVAREZ

            KEENA ME KAHI NOHO HELU 16, ALANUI EMMA.

Na hora hana :                      8 a ka 10 a.m.,

                                    3 a ka 5 p.m.,

                                    7 a ka 8 p.m.

Na La Pule :               8 a ka 10 a.m.,

                                    7 a ka 8 p.m.

            Telephona 644.

 

Ka Halekuai Nui

––:O:––

ON HING Co.

Alanui Nuuanu koke i ka Hale Ina Rama Emepaea.

            Ua wehe ae nei makou he hale kuai lole o na ano a pau.  A @ loaa no kau mea i makemake ai maloko ona.  E kipa mai a e wae nou iho, na Lole Aahu, na Kamaa, Kaki@i, Papale, a pela aku.  He emi loa hoi na kumu kuai.

 

UA LOAA MAI, HE HELUNA

.... o na ....

            Pena a me na Aila Pena,

                        Na Hulu Pena,

                                    Na Kapuahi Aila,

                                                Na Kapuahi Fisher,

                        (ua hoemiia ke kumukuai)

                                                            Na Palau na ano apau,

            Na Lako Mahiai,

                        Ho, Oo, Kopala, Kipikua,

                                    Na Bakeke o na like ole

                                                Na Ipuhao, Ipu Ti,

                                                            Na Lako Aniani,

            E loaa mai ana he mau waiwai hou maluna o ka mokuahi Auseteralia.  Nolaila, e kipa mai, a e wae no oukou iho, he ami loa ka makou mau kumukuai.

 

Hawaiian Hardware Co., Ld

(HUI LAKO HAO HAWAII.  I KAUPALENAIA)

Alanui Papu, ma o ka Banako o Spreckels.                                                    tf

 

KA HALEKUAI ME AI

––:O:––

LEWIS & Co.

            E loaa no na Kamano Paukai.  Momona ma ke kuai liilii a makakuai pahu.  Na Palena o na ano a pau a me na Lako mea-ai o kela ame keia Ano.  E hele mai e hoao no kakou ho.  Telepona 240.

            Alanui Papu, Helu 1@@

 

OLELO HOLAHA.

            Owau o ka mea nona ka inoa malalo iho nei, ke papa loa aku nei au i na mea a pau mai hoaie mai oukou i kuu wahine mare ia Mrs. Kaulia Koa, no ka mea na haalele mai oia i ko mana wahi moe.  Ua kii aku au iaia, a ua hoolo loa mai oia.  Nolaila, ina hoolohe ole oukou maluna iho no o oukou ko oukou noho.

            Owau no me ka oiaio,

Koa Kawika.

Honokohau, Maui, Mei 3, 1900

 

Kauka I. Katsuki.

            Keena hana a me kahi noho, alanui Vinia, mawaena o ke alanui Nuuanu a me Muliwai.

            E Na Hora Hana:  9 a ka 11 a.m., 7 a ka 8 p.m.