Ke Aloha Aina, Volume VI, Number 20, 19 Mei 1900 — Page 3
| This text was transcribed by: | Kainani Hartnett |
| This work is dedicated to: | Janae Del Castillo |
KE ALOHA AINA
POAONO. MEI 19, 1900.
AIA KE NEE LA NO PRETORIA
--------
O KENERALA ROBATA A ME
KONA MAU PUALIKOA.
---------
Kupilikii ke Kulana o na Boa---
Ke Koho ia ala Iloko o Elua
Mahina e Hiki ai Lakou Ilaila.
-------
Ma ka hoea ana mai la a ka mokuahi Copt@c i loaa mai ai na lono a hiki i ka la 11 o Mei, a no ka poinaikai o ko makou poe heluhelu ke unuhi awiwi aku nei makou penei:
Ladana, Mei 11, hora 4:45 a.m. O na hoa o ka Hale o na Makaainana, ua pili dala akea ae lakou ma ke ahiahi nei, oia hoi, e hoea aku ana o Robata ma Pretoria maloko o elua mahina. Mai ka 15,000 a ka 20,000 ka heluna Boa i koho wale ia, aia malalo o ke alakai ana a Kenerala B@tha, a na olelo ia ae aia pu me lakou he 42 pukuniahi. Aia o Haku Robata ke opa pu la i keia pualikoa nui o na Boa me 35,000 kanaka a me 140 pukuniahi, a he 20,000 mau kanaka hou aku i hiki ke kokua koke mai iloko o ka wa pokole.
O Peresidena Steyn o ka Mokuaina Kuokoa o Alani me 10,000 kanaka, na hoike ia mai aia lakou ma ka hikina aku o Tuaba N@u ma ka la inehinei (Poaha) a ua hoomaopopo ia he hoouka kaua nui ke hoea mai ana. O na koa nee @na o Kenerala Rundle a me Kenerala B@abant ua ki ia mai lakou.
Aia no he mau puali o na Boa ke paa la i na mauna e hookokoke ana i Springfield. Ua puhiia aku e na koa kiu Nu Kilani ka hale o kekahi kanaka mahiai nona ka inoa o Greyling, mahope o ka loaa ana aku he mau lako kaua ma kona home.
Ma kekahi ahamele i haawi ia ae no ka pomaikai o na poe i hoopoino ia ma ke pahu ana o ka hale hana pauda ma Begbie, ma ka halekeaka Gaiety, @a Pretoria, ma ke ahiahi Poaono nei, ua pa@i koke ia ae na puka, a o na kane a pau maloko o ke anaina na kauoha ia aku la no ke komo ana iloko o ka oihana koa.
HAKAKA MA KE ZAND.
Riestpruit, Poaha, Mei 10. Ua kue mai na Boa i ka nee mua ana aku o na Beritania, e paa ana ma kekahi kulana ma ka akau o ka muliwai Zand, e moe ana hoi mai ka puali mai o Kenerala Hamilton ma ka hikina a ka puali o Kenerala Hutton ma ke komohana. Ua hoomaka ia na ki pukuniahi. Ua nee aku ka regimana Sussex he kualapa me ka elau o ka lakou pu, a lawe pio ae la, a na lele kani pu aku ka East Lane @ a lawe ae la i kekahi kualapa okoa aku. Aole he maopopo loa o ka poino o na Beritania. He iwakalua mau Boa i hopu pio ia. A ua hoomau ia aku la ka nee mua ana.
KA HOIKE A HAKU ROBATA.
Ladana, Mei 10. Ua telegarapa mai o Haku Robata i ke Keena Kana mai ke kaa telegarapa mai no ka la 10 o Mei, penei: Eia makou ke au nei i ka muliwai Zand. Ua pau aku ka enemi i ke auhee. Aia lakou ke paa la i kekahi wahi nona ka loihi he iwakalua mile. O ko makou kulana na oi loa aku. Mamuli o ke akea loa a me ke kau liilii o na pualikoa, aole e hiki ke loaa koke na hoike poino o ko makou mau aoao, aka, he manaolana no nae ko'u aole he mahuahua loa. O na puali kaua lio a me na puali pukaa lio, aia lakou ke uhai la i na Boa ma na alahele like ole ekolu.
LAWE PIO IA O WINBURG A ME SMALDEEL.
Smaldeel, Mei 7. O ka nee ana i lawepio ia ae la o Winburg a me Smaldeel, he hana ia i lawelawe ia ma kekahi nee nui ana, e hoomaka ana mai a Kenerala Hunter mai ma ke komohana a hiki ia Kenerala Rundle ma ka hikina. O na hoonee kaua naauao ana a Kenerala Robata na waiho aku ia he elima koa Beritania i ka Boa hookahi ma na wahi a pau. Iloko o na kulana huikau o na mahele koa, na haawi koke ia aku la na kauoha no ka hoakea ana, a halawai @ la na Boa me na kanaka o Haku Robata iloko o ke kulana po@
O ka mea ano nui i ike ia ua hiki i na Beritania ke kali. O ko lakou kulana ikaika o mua aia ia iloko o ka palek@a, a o ko lakou mau koa nee @ e maki aku ana lakou a hoauhee aku i na Boa.
KE EMIHOPE LA NA BOA.
Ladana, Mei 8, hora 4:20a.m. O na Boa ma na wahi a pau, aia lakou ke emihope la imua o na Beritania, koe ke kahua kaua o Natal a me Mafeking, no loko aku o ko lakou mau kulana pale. Ua hoomaopopo ia aole o lakou manao hakaka a hiki i ka hoea ana i na puu o Kroonstadt.
He manao ko Robata no ka nee hou ana i kanaha a i ole kan@a mile, alaila, kali no kekahi manawa, i hiki ai ke lawa ia mai na lako a me ka hooponopono hou ana hoi i ke alahao. Aole he mau hoike i lohe ia mai no Kenerala French me kona mau koa ka@alio he 10,000, aka, ua manao ia no nae aole oia i noho wale, aka, me he mea la, aia oia ke ne@ la no Kroonstadt a i ole lele kaua la ma ka apana o
Ladybrand. He 15,000 koa Beritania e lele kaua la ma ke komohana o ka Mokuaina Kuokoa. Ua hiki ole i na Boa ke ku hou aku i na Beritania ma Warrenton, aia lakou ke nee hope la, aole he mau hooweliweli ana, koe wale no mawaena o Warrenton a me Mafeking.
NA HOIKE MAI REITSPRUIT MAI.
Ladana, Mei 11. He hoike kai loaa mai la no ka la 10 o Mei, e hoakaka mai ana i ke ano o ke kaua a me ka holopono ana. E olelo ana, o na kiu o Kenerala Hamilton ma na la elua mamua iho, ua maopopo ia lakou ke kulana a me ka ikaika o na Boa. Ma ka po Poakolu ua au aku la ka regimana Cheshire i ka muliwai a pae ma kekahi aoao, a eli iho la he mau auwaha no ka paa ana i ko lakou alahele no na regimana e ukali mai ana.
I ka wanaao o kekahi la ae na nee aku la ka puali holookoa ma na wahi elua a i ole ekolu. Ua halawai koke aku la ka puali e pee ana me na Boa a hoauhee aku la ia lakou me ka hoomakaukau ana no kekahi nee mua.
Ua hoomaka koke mai la ka aoao akau o ka Boa e nahaha, ua ikaika no nae na kue ana ia Kenerala Tucker a me Hamilton ma ka hema. He eono ka nui o na pukuniahi a na Boa, a ua hoohana mai lakou me ka hoomaha ole, aka, ua hoomau aku no nae na koa Beritania i ka nee ana aku imua, no kahi kokoke loa i na pukuniahi, a hoomaka mai la lakou e ki alapine.
O na regimana East Lancashire a me Sussex, ma ka hora 11 ua hoea aku la laua no mua loa o ke kahua kaua. Ua haawi koke ia aku na kauoha ia laua, a iloko o ka wa pokole loa, na lilo ae la he elua mau kualapa. I keia wa o ka laina e nee nei, aia laua ma kahi he 1200 i-a mai na auwaha mai o na Boa, ua pau kona Boa manaoiana no ka lanakila, aka, na hoomau mai no nae lakou i ke ki ana. Ma keia wa i haawi ia aku ai ke kauoha no ka holo ana aku e halawai he alo a he alo, a ia wa no i hooko hou aku aku ai na regimana Lancashire a me ka Sussex, aka, aole e hiki i na Boa ke ku mai, a pau aku la lakou i ka holo.
--------
KE KULANA MA MANILA.
--------
Manila, Mei 10, hora 6:10 p.a. Ua loaa mai la ua lohe i na mana hooko Amerika maanei, aia he mau hoala hau@ele ana e ulu @ maloko o ke kulanakauhale @ i ka wa a ua komisina hou o @ mai ai. Ua hoomaka kukeia ka @ la ana a he 100 kanaka i hopu ia. Ma ka hookolo @ i ka meheu o ka
ohumu kipi, ua loaa aku la he mau pu raifela i hana ia mawaho o ke taona.
LOHE HOU IA O AGUINALDO.
Manila, Mei 7. Ua loaa mai la na telegarapa mai a Kenerala Young mai, e hoike mai ana na hui pu hou aku la o Aguinaldo me Kenerala Timo, ma ka akau, a ua hoakoakoa hou ae la hoi laua he pualikoa nui ma na mauna. Ua makemake o Kenerala Young e halawai me lakou, mamua o ka hoea ana mai o ka ua, a ua noi mai la hoi i mau kokua.
O ka manao o keia lono, e hoike mai ana ia i ko Kenerala Young manaoio, aia o Aguinaldo a me Tino ke hoomakaukau la no kekahi hoouka kaua nui. He puali o ka regimana 47 kai halawai aku me na enemi mawaena o Leg spi a me Riago, ma ka la 13 o Aperila. He elua Amerika i make a elima i hoehaia, maloko o laila he elua alii. He koikoi loa na poino o na Pilipine.
--------
UA APONOIA E KE SENATE
--------
Ma na lono makamaka hou i lawe ia mai la e ka mokuahi Kopatika, ua lawe pu mai oia i keia hoike malalo iho nei.
Wasinetona, Mei 9. Ua apono mai la ke Senate i keia mau koho ana malalo iho nei, penei:
S. B. Dole, i kiaaina no Hawaii; Henry E. Cooper, i kakauolelo no Hawaii, J. M. Oa@ i luna leta no Honolulu.
---------
E keaka ana no ka Orpheum i keia po.
Ua huli hoi mai la o Hakawela ma ke Kopatika mai Wasinetona mai.
Aia o Alapaki Kauka iloko o ke kulana nawaliwali loa, pela ka hoike a kana keiki.
He ekolu haneri mau aahu ma kalike i lawe ia aku no na haumana o ke kula keikikane Kamehameha i humuhumu ia iho nei e kekahi mau tela pake.
E hoohui ia ana ma ka berita laahia o ka mare o Miss Miriam Hale, kaikuahine o ka Rev. S. L. Desha, a me Henry James, ke keiki a James Auld ma ke ahiahi Poakolu ae nei. E malama ia ana he auaina ike no laua ma ke Kula Kaikamahine Kamehameha.
Ua loaa mai la he hoike i ka Ilamuku mai Kapalakiko mai, no ka hakilo ana i kekahi haole apuka i manao ia ua hoea mai i anei, he $250 uku makana i haawi ia i ka mea e loaa ai o keia haole. O C. J. King ka inoa o keia haole, a ke kakauolelo no ka hui Pacific Vinegar & Pickle W@ kai hoi ana i laweia @.