Ke Aloha Aina, Volume VI, Number 14, 7 April 1900 — Page 5

This text was transcribed by:	Karen Mah-hing
This work is dedicated to:	Awaiaulu

KE ALOHA AINA

POAONO, APERILA 7, 1900

HOPUIA HE ELUA POWA

HE MAU HAOLE I HOAO E PAA I KEKAHI KAAPIO

Ka Hana Powa i Hanaia ma ke Alanui Hotele ma ka Po Poakahi Nei.

Ma ka hora 12:30 o keia wanaao Poakolu ua hopu ia iho la he elua mau haole no laua na inoa o T.J. Fox a me J.N. Galter, ma kahi hoolulu kaaahi e Kapena Bowers a lawe ia aku la no ka niele pono ia ana. Ma ka hoike a kekahi kalaiwa kaa Pukiki ua paa ia oia e elua mau haole a kau mai la i ka laua mau pu panapana me ke kanoha hooweliweli mai iaia e lawe ia lana no kekahi hale. Ua kuupau koke aku ke Pukiki i ka holo o kona lio, a ua laki nae oia i ka halawai ana me ka makai Kapena Bowers. Ua holo hou mai la laua no kahi a na haole i paa ai i ke kaa a hopu iho la i pa kolohe. I ka wa i huli ia aku ai ko laua mau kino ua loaa aku he pu panapana pakali ka laua e moe lohi ana iloko ka poli.

Ua manao wale ia na keia mau haole no i powa i kekahi kanaka kamaaina o keia kulanakauhale mawaho iho o kahi o Kauka Makalu ma ke alanui Hotele ma ka hora 9 o ka po Poakahi nei, a lilo aku la hoi he $120 mai kona poli aku.

Ma ka hoike a keia kanaka i powa ia iho la, e hele ana oia ma ka aoao makai o ke alanui Hotele mai ke alanui Papu mai, a i kona hoea ana ma ka puka pa hookomo kaa o Kauka Makalu, ua lele mai la he elua mau kino kanaka a uhau iho la iaia me kekahi mea colea i manaoia he eke one. I kona wa i waiho maule aku ai na oki ia ae la ke eke o kona lole wawae kahi e waiho ana o kana eke dala nona ka waiwaiio o $120, aole i lawe ia aku kana uwati gula, mamuli o ka manao ia ana ua makau na kolohe a holo aku la.

I ka wa i hoi hou mai ai kona noonoo ao kanaka ua hoi hou mai la oia no ke alanui Papu a hoike aku la i ka makai, aka, ma o ka maopopo ole nae iaia o na hiohiona o keia mau kolohe ua hiki pono ole i ka oihana makai ke hookolo aku mahope o ko laua meheu, aka, ua huna ia no nae keia hana powa mai ka hoike koke la ana ae i ke akea a hiki i ka wa i paa iho la keia mau haole.

He haole malihini nona ka inoa o Harry A. Bigelow, kai haawi ia aku la ka laikini loio no ka lawelawe ana ma na aha hookolokolo o keia paeaina.

HE HANA AIHUE MAKAU OLE

HE EHA MAU WAHI I KOMO IA E KE KOLOHE

Iloko o na Po Elua ua Komo ia he Eha mau Halekuai o ke Kulanakauhale Nei.

O ke komo aihue ia ana o kekahi mau halekuai nui iloko o elua po, he mea hou loa ia i ike mua ole ia maanei i ke au o na aupuni moi e noho mana ana. Ma ka ko Poakahi nei ua komo ia keena oihana o ka Hui o Waila Ma, a lilo aku la he $7.50 i ke kolohe i komo ai, aka, ua ma@oia no nae maluna iho oia o ke kaupoku i komo ai iloko, ma o ka pii ana ma kekahi kumulaau e ulu ana mahope o ka hale, a malaila i lele aku la no luna o kaupoku a iho loa aku la me ka maalahi no loko o ka hale.

Ma ka po Poalua mai i komo aihue ia ai ka halekuai o .W.W. Dimond & Co., a ma keia halekuai hoi i ike ia ai aole he holona ka aihue nana e holapu nei i na halekuai, aka he loea oia ma ia mau hana lapuwale. I ka hookolo ia ana o kahi a ke kolohe i komo ai na ike ia maluna pono iho no o ke kaupoku, a i kona komo ana iloko, ua iho loa aku oia no ke keena kuai, a wawahi aku la i ka ume waiho dala a lilo aku iaia he $30, mahope o kona huli ana ia loko o na pakaukau a pau ua hoi hou aku la no oia ma kahi no ana i komo ai.

Ua komo pu ia no ka halekuai o E.W. Jordan ma ia ano maluna o kaupoku iho, aka, mahope nae o ka huli ana o ke kolohe i ke dala, a i ka hoonele ia ana ua haalele iho la oia me ka lawe ole aku i kekahi mau waiwai o loke.

Ua komo ia aku ka halekuai o Wing Lung ma ka puka mahope, ma o ka wawahi ia ana me kekahi kila i manao ia mai ka halekuai mai o W.W. Dimond i la we ia aku ai, a loaa aku la i ke kolohe he $8.50 mai ia wahi aku.

Eia ke huli nei na makaikau i ka mea nana keia mau hana kolohe, a ua manaoia he haole no ka mea uana keia mau hana aihue makou ole.

E loaa no na papale nani a me na lole aaha nani ma ka halekuai o N.S. Sachs.

O Harada ka Iapana i lawe ia mai ai mai kahi hoomalu Helu 1 ua hoike ia ae la ua loaa oia i ka ma’i bubonika.

Ua wehe ae la o Susmago he Iapana akamai i ke paikii i kona hale paikii mawaho o Koula ma ma keia Poaono iho.

MAKE NO I KA BUBONIKA

HE KAIKAMAHINE HAOLE.

CATHERINE SULLIVAN

Ua Laweia Aku ka Ohana no ka Hoomalu Ana ma ka Pa Hoomalu o Kalihi

Eia ke hoomaopopo nei kekahi poe o ke kulanakauhale i ke kupanaha o na hana a ka ma’i bubonika e ikeia nei, oia hoi, ua hoomaha kona oili ana ae i kekahi mau la e ae o ka pule, aka ma ka Poaono a me ka La Pule wale no, a he mea oiaio, ma ka po Poaono nei, ua make aku la he kaikamahine haole nona ka inoa o Catherine Sullivan, e noho nei ma ka alanui Liliha a me ka alanui Kula, nona hoi na ma kahiki he 13.

Ua hoomaopopo ia na helehelena o ka ma’i bubonika maluna ona ma ka hora 6 o ke ahiahi Poaono nei, a ma ka hora 9 oia po no i make loa ai oia.

Ua lawe ia aku kona kino no kahi kaha kanaka ma Kakaako, a malaila i nana pono ia ai kona kumu i male ai e Kauka Hoff mau a ikeia iho la na anoano weli o ka fiva eleele. Nolaila, ua lawe koke ia aku oia no ke puhi ahi ana ma Kakakaauiana. O ka ohana hoi ua lawe ia aku lakou no ka hoomalu ana ma ka pa hoomalu o Kalihi, ua manao ia e puhi ia ana ka hale o Catherine i walho ma’i ai i ke ahi.

Ma ka make ana ae la o kelea kaikamahine haole, ua hoea aku la ka huina o na ma’i a pau i ke 71, a he 61 o loko o keia huina i make, 9 i ola loa, a he 1 e waiho nei maloko o ka haukipili, ma ka pule i pau iho la ma ka Poaono nei, Mar. 31, 1900, he 3 make bubonika i ikeia he elua haole a me hookahi Iapana.

He nui na ma’i i nana ia ma ka Poaono nei, a o ka mea e kiai makaala loa ia nei iwaena o lakou ne kaikamahine Hawaii, nona ka inoa o Sarah Laa e waiho nei ma ke alanui Halema’i Pupule. Ua hoea aku o Davis ma ka La Pule no ka nana ana i kona ma’i, a ua hoike ae oia aole i maopopo loa i ka ma’i o keia kaikamahine, aka ua ike nae oia ua pehu kekahi wahi o ke kino o ka mea ma’i.

Ua hoopai ia ae o C.C. Bitting, he loie @ me Toma he makai Iapana no ka hoeha i kekahi haole ona he $95 pakahi.

E hoopau ia ana ka noho hou ia ana o ka pa hoomalu o Kalihi ma keia mua iho, a makai o Kakaak@ e hoomalu ia ai na poe hoomalu o keia mua aku.

HE HIOHIONA MANAONOA

LOAA AKU KE KINO MAKE O KEKAHI HAOLE

Ma o ke Kipu Ana Iaia Iho no Kekahi Mau La Loihi Maloko o Kona Rumi

Ua loaa aku la ma ke kakahiaka Poaina nei maloko o kekahi hale hoolimalima e ku nei ma ke alanui Papu, ke kino make o kekahi haole malihini nona ka inoa o Frank Peroutka. Ua loihi loa na la o kona waiho ana malaila mamua o kona loaa ana aku, a ua eleele hoi kona helehelena a me ka puka pu mai o na ea ino.

Ma ka hoomaopopo pono ia ana o kona kumu i make ai, aole ia mai ka lima aku o kekahi kanaka okoa, aka mai kona lima ponoi ae no ia, no ka mea, mamua o kona lawe ana i kona ola, ua halii iho oia he tawele malalo e kona poo, a na kekahi pu panapana e waiho ana ma kona aoao i ki ia hookahi poka i hoike moakaka mai nana i hooko aku i ka makemake o keia haole.

Ua hoea ae ka Hope Ilamuku malaila, E @ ia aku la ke kino make no kahi kaha kanaka, Ua hoea mai oia i anei ma ka mokuahi Mariposa @ mahina o Ianuari, ua olelo ae he haole i holo pu mai me ia ma ia moku hookahi no, he haole kuonoono keia a ua lawe pu mai oia me ia he $8,150, he wahine a me ka kaikamahine @ oia nei ma ka mokuaina o Minesote.

I kona mau la mua o ka hiki ana mai i anei na noho oia ma ke Kaleponi Hotele, a mailaila mai a ka hale hoolimalima”The Villa” e ku nei ma ka aoao ma Waikiki o ka halekeaka Orpheum, mauka iho o ka halepule pake.

PIOO MAUKA O KE KULA KAIULANI

Ua lohe mai makou ua hoopihoihoi ia ae ua makua mea keiki na lakou na keiki e hele nei i ke kula Kaiulani, i ka wa i lohe ia ae ai he ma’i hoohuoi ko Sarah Lea kekahi haumana oia kula, ua kii mai lakou i ka lakou mau keiki a i ke kokoke ana i ke awakea, ua kokoke e pau loa na keiki i ka hoi, a ua kokoke loa e hoonele ia ka halekula me na haumana ole, aka ua hoopau ia ae nae na pioo ana i ka mea ma’i, aole kona he bubonika, aka, he ma’i taifuda fiva.

He ekolu mau wahine Farani i hoopai ia he $2 pakahi no ka walaau po. Pii io mai nei ka ke kulana o keia poe wahine.