Ke Aloha Aina, Volume VI, Number 12, 24 March 1900 — AHUWALE NA IWI O HUA I KA LA. [ARTICLE]

AHUWALE NA IWI O HUA I KA LA.

Ua hoikeia mai e kekahi mea hiki ke hilinaiia, ka moolelo o loaa ana aku o kekahi puolo hoomanamana maloko o ke kahawai mauka o Kalihi, a eia na mea i hoikeia mai: "Ma kekahi la o ka pule i hala aku la, ua pii aku nei kekahi poe kamaaina oia wahi i ka lawaia oopu me ka opae i kahawai iuka pono aku oia wahi, oia ke kahawai ma keia aoao e hele nei a hookui me ka manawai e kahe la ma kela aoao o Kalihi. I ka wa o keia poe i pani ai i ka manawai a pio, hoomaka aku nei kekahi wahine o lakou e nao aku malalo o kekahi pohaku nui e ku ana iwaena o ua kahawai nei, ua pa aku ia kekahi mea i ko ianei lima, a i ka hoohuliia ana ae o ua pohaku nei, aia hoi he puolo nui ke waiho ana malalo pono ae o ua pohaku la, ia wa wehe iho nei lakou e nana heaha la na mea oloko o keia puolo, ikeia iho la he elua puaa liilii ua kalua ia a mo-a a me elua lei lehua he awa me ka i'a a heaha aku la." Heaha iho la ka manao o keia mau mea i hana ia ai e keia mamo i koe o ke au ia Waawaaikinaaupo, he mea kala paha i na pilikia a i ole he mea hoopoino aku paha i kahi hoakanaka. Koe aku hoi ia. Ke noho mai la paha ua mea nei nana keia ukana me ka manao ua holopono na mea apau, eia ka, ua kolekole ka noa, ua ahuwale na iwi o Hua i ka la. Ea, ahea no hoi kakou hoao kanaka ae, a haalele akn i neia mau hana hua ole o ka po. Aole ka make a me ke ola i keia mau mea, aka, aia ke ola nui ia Iehova, ka mea n ana i hana ka lani a me ka honua, i ke ao nei ame kona mea i piha ai.