Ke Aloha Aina, Volume VI, Number 10, 10 March 1900 — Page 5

KE ALOHA AINA

                     POAONO MARAKI 10, 1900.              5

 

pu aku no lakou i ka pepehi ia ma o ke ki ia ana me na poka pu

               IKEIA KA MA’I O KA IOLE.

  Ua loaa pu mai la na hoike mai Kahului, aia na rufa hoomalu malaila ke hoohana ia la me ka ikaika.  O ka halekuai o Kahului, a me ka hale noho o ka lunanui, ua panikuia ia, a o ka ohana hoi aia ke hoomalu ia la.  O ke kumu o keia hana ia ana pela, ma o ka loaa ana aku no ia he elua mau iole make ma kela La Pule aku nei iloko o ka halekuai.  Ua nana ia keia mau iole make e Kauka Garvin, a ma kana hoike he hookahi o ua mau iole la i ike ia me na anoano bubonika, a nolaila, ua manao ia he hana naauao ke pani ana i keia halekuai.

 

ALOHA NO IA MAKUAHINE HAWAII.

  He mea luuluu no makou ka lohe ana mai, ua haalele mai la i keia ola ana o Mrs. Pricilla Kauhane, ka wahine aloha a ko makou hoaloha Noa Kauhane, a kaikamahine kamakahi hoi a ko makou makamaka Mr. J.L. Kaulukou, mahope o kona kaa ma’i pokole ana, ma ko laua home mauka o Kalihi, i ke kakahiaka La Pule nei.

  He 23 ka nui o kona mau makahiki, ua mare oia ia Mr. Noa Kauhane he mau makahiki i hala ae nei, a mai ko laua puhaka i oili mai ai he eha mau hua ohana no ko laua kihapai, ana hoi i haalele iho la na kana kane e luhi hookahi.

  Ua hoihoi aku kona kino puanuanu ma ka home o David Kaapa, ma Kewalo, a mailaila i manele ia aku oia no ka ilina o Kawaiahao e hoomaha no ka wa mau loa.  Walohia wale.

  Ke komo pu aku nei KE ALOHA AINA ma ua kumakena pu ana me ke kane, na keiki a me ka ohana o ka mea i hala aku la.

 

KA  HALEKEAKA  ORPHEUM.

  Ua loaa mai la ia makou na hoike e malama ia ana he ekolu wale no po keaka o ka Hale Keaka Orpheum i kela a me keia pule a hiki i ka wa e hoea mai ai he puali keaka hou, no ka hoolilo ana i na la kaawale i wa no ka hui keaka e paani nei e hoomaamaa ai i ka lakou mau paani lealea loa.  O na po e paani ai ma keia hope aku oia na po Poalua, Poana a me Poaono.  Nolaila, mai poina e na makamaka i ke kipa ae malaila ia mau po, i ike i na hana lealea, he ole hoi ka lohe pepeiao.

 He nui na waiwai hou i loaa mai la ia L.B. Kerr.

 

 

KE NEE HOOMAU LA NO

AIA  O  BULA  KE  HOOKOKOKE  LA  I  LADYSMITH.

  Laweia he Kulana Ikaika o na Boa e na Koa Dublina Fusi lia – Na Lono Pili Kaua e ae.

  Ladana, Feb. 26.   Ua hoopuka ae la ka nupepa Times i keia mau lono mai Colenso mai no ka Poaono nei, e olelo ana:  O na Beretania i keia wa aia lakou ma kahi he elua mile mai na palena mai o Ladysmith, aka, o keia kahua nae e nee hou aku ai, e piha ana ia me na hakaka hahana ana.

  Ladana, Feb.27.  Ua hoopuka ae la ke nupepa Times he lono mai Pietermaritzberg no ka Poalima, Feb. 23.

  E hike ana, na hana hou ae la ka puali Dubelina Fusilia i kekahi hana e hanohano ai ko lakou inoa ma ka ae ana e mauna i ko lakou mau ola no ka lawe ana i kekahi kulana ikaika o na Boa, oia o Grobler Kloof, a na hooko ia, o keia puali he 850 koa kona ikaika i ka wa i hoomaka ai ke kaua, aka, i keia la o ka nui o kona mau kanaka i koe i hiki ke komo ma na paikau hookahakaha ana, aia no ia mawaena o 100 a i ole 200, he hoike maopopo hoi no ka hahana maoli no o na kahua kaua a keia puali Irekani i koma ai.

  Ma ka hoike a Winston Churchill i hoouna mai ai i ka nupepa Morning Post, mai ke kahua hoolulu mai o Fiere, no ka La Pule iho nei, e olelo ana:

  O na manao aia na Boa ke hoomama ae la i ke paniku ana ia Ladysmith, he mau olelo kuhihewa ia.  O ka nee mua ana ua ukali ia mai ia me na kue paakiki ana a me ka nui o na ola i poino.  O ka moopuna a Peresidena Kruger oia kekahi i waena o na Boa i make.

  Ua hoomau mai o Churchill i ka hoike ana no ke kaua koikoi o ka Poalima nei, oia hoi, ka hookokoke ana aku o ka puali Inniskilling ma kahi he 500 i-a mai ka piko mai o kekahi mauna e paa ia ana e na Boa, a ia wa i holo aku ai lakou e halawai me ka enemi imua o na poka e haule makawalu mai ana.

  Mahope o na hoao mau ana e halawai aku he alo a he alo me na enemi, ua ike iho la lakou aole e hiki ia lakou ke hoomau ma o ke koikoi o na ola poino i loaa ia lakou.  Aka, aole nae lakou i ae e kuemi aku ihope, nolaila, na moe iho la lakou ma ka aoao o ua puu la.  Ia wa i pii aku ai ka puali Connaughts a me ka puali Dubelina Fusilia no ke kokua ana ia lakou, aka, ua poeleele iho la nae mamua o ka hiki ana e lele kaua hou aku.

  Nu Ioka, Feb. 26.    Ua loaa mai nei he lono telegarapa i ka nupepa La, mai Ladana mai, no ka la 27, e olelo ana:  Aia no o Bula ke hoomau la i ka nee ana me ka halawai mau ana me na kue ikaika ana mai.  I keia a me keia la e panee malie ana oia.  O ke kulana o ka La Pule nei, ua hoakaka ia mai ia e kekahi mea kakau o ka nupepa Morning Post.

  O Colenso ko makou kahua hoolulu kaaahi.  O ko makou kulana nee mua ua hooweliweli ia mai ia e na kulana weliweli o Pieters, e moe ana mai na puu wai ole o Doorn Kop a Grobler’s Kloof a hoea i ka muliwai.  O ka nee ana ua halawai mai ia me na kue ikaika a me ka nui o na ola i poino, aka, o ka manaolana o na poe a pau he maikai, aole o ka nui o na ola i poino ua kuihe aku ia i ka manao o na koa.  Ua hoopaa iho lakou ma ko lakou puuwai no ka hoopakele ana ia Ladysmith.

AIA  NA BOA  KE  HOAKOAKOA  LA  MA  KAHI  KOKOKE  I  KE  KAPITALA.

  Lakana, Feb. 27, hora 4:20 a.m.     Aia no poe Boa ke hoakoakoa nei i ko lakou pualikoa ma kahi kokoke i Bloemfontein, no ke kue ana aku i ke komo kaua ana mai o ka Haku Robata.  O keia hoike ua hoea mai mai Pretoria mai, ma ke ala hele ae o Lourenzo Marques.  O na alihikaua me ko lakou mau puali ua olelo ia ae, aia lakou ke nee pupuahulu mai la mai na wahi a pau o na repubalika elua.  Aole he heluna i hoomaopopo ia no ko lakou nui, aka, o ka unuhi ana mai o na Boa mai na wahi he lehulehu wale i halawai me na Beretania, koe nae ka apana e hookokoke ana i Ladysmith, ua manao ia ua hoea ko lakou heluna i ke 30,00 kanaka.  Ua koho ia o ka nui o na Boa maluna o ke kahua kaua aia no ia mawaena o 60,000 a me 70,000.  O ka hoakoakoa ana o keia puali kaua nui ua haawi ia aku ia he wa e Kenerala Cronie, ma o ka paa ana i na puali o Haku Robata no umi la, mamua o kona lawepio ia ana.  A nolaila, ua manao ia e halawai hou ana na Beretania me kekahi hoouka weliweli loa mamua o ko lakou komo ana aku iloko o Bloemfontein ke kapitala o ka Mokuaina Kuokoa o Alani.

PIOO KE  KULANA  MA  BLOEMFONTEIN.

  Ladana, Feb. 27.    Ua loaa mai la he hoike i ka nupepa Daily News mai Lorenzo Marquez, e olelo ana he 5,000 Boa i haalele aku la ia Ladysmith no ka Mokuaina Kuokoa, ala na poe ke hoakoakoa la ma kahi he 80 mile mawaho mai o Bloemfontein, a o ke kahua poo aupuni o ka Mokuaina Kuokoa o Alani na nee aku la ia no Winburg a o na kokua o ai ua wahi mai a pau aia ia ko komo mai la i Bloemfontein.  O Peresidena Steya o ka Mokuaina Kuokoa o Alani, wahi a ka hoike, ua telegarpa aku oia ia Peresidena Kruger o Transvaal, e hoike aku ana, aia o Haku Robata ma kahi he mau mile pokole wale no mai Bloemfontein aku, a koi aku la i na kane a pau, me ka nana ole i ko lakou lahui e ohi koke ia.  Ua olelo ia ae he kokua o Peresidena Steya i ka maluhia.

 

KE  HAOHAO  IA  LA  O AGUINALDO.

   Nu Ioka, , Feb. 22.   He lono kuikawa kai loaa mai la mai Hongkong mai i ka nupepa Evening World, e olelo ana:

  Ua loaa aku la i ke Kanikela Wildmana o Amerika Huipuia he mau hoike, ua hala aku la he ekolu mau lala o ka poai Pilipine no Iapana no ka hui ana me Aguinaldo, oia o Luzon, Ponce a me Agoncillo.  Ua haawi mai keia i na hooiaio no ka moolelo ua mahuka aku o Aguinaldo mai ka mokupuni Luzon aku no Formosa i ka wa a ka pualikoa o Kenerala Lawton e imi ana iai, ma ka aoao akau o ka mokupuni.

 

HOOPOINO  IA  NA  PAKE  E  NA  BERITANIA.

   Rangoon, British Barmah, Feb. 22     He luna aupuni nona ka inoa o Hertz, he hoa hoi no ke Komisina Palena Aina, oiai, oia e kauhele ana me kona mau kanaka ma ka palena o Burmah a me Kina, ua halawai lakou me elua puali hoohaunaele nui hewahewa o na pake ma Mirkawg, a mahope o kekahi hakaka hahana ana, ua hoauhee ia aku la na pake me ka haalele iho i ko lakou alakai a me kanahiku kanaka ua make.

 

HAHANA  KE  KAUA  MAWAENA  O  NA  MEKIKO  ME  NA  ILIKINI.

  Potau, Sonora, Mekiko, Feb. 25.      Ua hoouka hou ia ae la he kaua weliweli mawaena o na koa kumau Mekiko a me na Ilikini Yaqui.  Ua hoomau ia keia kaua ma ka Poalima holookoa.  O ka nui o na poino o na Mekiko he 300 i make a hoeha ia.  Mawaena o na make o Geronimo Ascarate kekahi o El Paso, Texas:

  O ka puali Yaqui no lakou ka huina o 4000 kanaka, ua iho mai la lakou mai ko lakou kulana ikaika mai na ka mauna me ka manao ana e lele kaua ia Guayamas.  Ua hoike ia aku keia manao kaua ia Kenerala Torres e Geronimo Ascarate, no kanaka lawelawe no ka aupuni Mekiko ma Casa Granad@a  kahi hoi aole i mamao loa mai ke aupuni mai o na Yaqui ma Babape.

  I ka lohe ana o Kenerala Torres ua hoakoakoa ae la oia i kona mau puali nona ka huina a 8000 kanaka ma Potam, a mahele iho la iloko o na puali elua.  He hookahi mahele i hoouna ia aku ma ka muliwai me ka mokukaua Democrata.  O ka mahele elua ua nee aku la ia no ka hikina akau no ka lele kaua aoao ana mai i ka enemi.

  He 13 mile mai ka muliwai Potam mai, ua halawai iho la ka mahele e alakai ia ana e Kenerala

 

E nana ma ka aoao 7