Ke Aloha Aina, Volume VI, Number 9, 3 March 1900 — Page 2

KE ALOHA AINA

 

Hookumuia no ka Pomaikai o ka Lehulehu, a he Nu pepa no ka Lahui Hawaii.

 

EDWARD L. LIKE.

Lunahooponopono

 

JOSEPH K. LIKE

Luna Hoohina

 

HOGAN E. KALUNA,

Luna Hoopuka

 

EMMA A. NAWAHI

Puuku o KE ALOHA AINA.

 

HONOLULU..... MAR. 3, 1900

            He maikai no ke ola o Kalani Aimoku e noho mai la ma Wasinetona, a pela me kona mau hoa noho.

            Ke hoomaopopo nei makou, e loaa io ana no i na Hawaii ka mana koho Senate me ke ana waiwai ole, aka, e kali aku no nae kakou i ka hana a ka Ahaolelo o Amerika Huipuia.

 

            Ma na hoike i loaa mai la mai Wasinetona, ua hoomaopopo loa ia e hooholo koke ia mai ana ke ano kulana aupuni o hawaii nei, ma na la hope o keia mahina o feberuari nei, a i ole ma na la mua paha o Maraki.

 

            O ke kumu o keia manao hooholo pupuahulu ana mai i ke kulana aupuni no hawaii nei, i hiki ai iaia ke kahea koke i Ahaolelo kuloko, a noonoo aku i na hana kupono e hoopakele ia ai ka poe i hoopilikia ia e ke ahi a me ka ma’i bubonika.

           

            Ua kakoo ikaika o Peresidena Makinile i keia kumuhana a ua waiho aku i kona manao maloko o ka Ahaolelo e noonoo koke ia keia hana, oiai, aole he mana i koe o ke kumu kanawai o hawaii nei e kahea ai i Ahaolelo, mahope iho o ko kakou hoohui ia ana i ka la 12 o Augate 1898.  Nolaila o ka hana awiwi ia ana o ka ninau o Hawaii nei, oia wale no ke alahele a Makinile i manao ai ua hiki ke hoopakele ia ua poe i hoonele ia.

 

            Ma ko makou hakilo ana aku i ua helehelena o ka poe kakoo aupuni Repubalika, aohe mau nanaina hauoli maluna o lakou no keia hana hoololiloli a ka Ahaolelo o Amerika Huipuia i ka Bila Kanawai a lakou i makemake ai e ka loa no i na Hawaii i ka nele loa, aole nae pela ko ke Akua manao, aka, ke hooponopono mai la no kona mau lima aloha ma ka unuhi ana aku i na wahi ino o ke kanawai hoopilikia lahui Hawaii.  Aka nae, o ka oi loa aku no o ka nani ana e hana mai ai no kakou, o ka hoihoi ae no elike me ka mau, mamua aku o Ianuari 17, 1893.

            He nui na hoololiloli e hanaia ana o ka bila a Senatoa Collum i manao ai no hawaii nei, pela nahoike i loaa mai nei.

            He kupanaha maoli no na hana a ka Papa Ola e ikeia nei i keia mau la, oiai, he malani loa ka umii ana a na kanawai o ka Papa Ola maluna o ka lahui ili keokeo mamua o na lahui e ae.  E hoomanaoia o na Pake, Iapana ame hawaii i loohia i ka ma’i a i maopopo hoi kahi o ka mai i hoea mai ai, e awiwi koke ana ka Papa Ola e kauoha e puhiia ka hale a me kona home noho a me na wahi e pili kokoke mai ana.  Aka no na haole nae he kakaikahi loa na wahi a ke aupuni i puhi ai i ke ahi, a o kekahi mau wahi hoi, ua puhi kukaepele wale ia no, a hookuu akea ia ae la i ka lehulehu.

 

            I waena o na wahi a ka bobonika i hookawowo ae ai a i ikeia ua kupu maoli no keia anoano weliweli, oia na halekaa Pantheon me ka Hotele; ua hoao ka Papa Ola e lumilumi wale i keia wahi hope me ka manao o ke puhi ana i ke kukaepele, ua lawa ia no ka hoopakele ana i keia mau wahi pelapela, a aia no hoi keia wahi mana maka o ka hotele hawaii a maka ihu o ka Hale Mana Hooko o ke aupuni, a imua pono o ka lehulehu e maalo mau ana ma ia wahi.  Aka, ma o ka nui ana o na make a me ka nui pu o ke kue ana o ka lehuhehu ma na hoike manao i kakauinoa ia e kahi poe ma na nupepa; akahi no a ae ka Papa Ola e hooneoneo ia e ka mana o ke ahi.  E hoomaopopo ia, he eha make bubonika a me hookahi ma’i bubonika o ka halekaa Pantheon i ikeia mamua o kona puhi ia ana.  O ka hale kaa Hotel hoi he ekolu make bubonika, i ka apa wale mai nei no ka Papa Ola a akahi no a ae e puhi i ke ahi.  Ua lohe wale mai makou, o ke kumu pui’kai’ka paha hoi o ke puhi ia ana o keia halekaa hope i ke ahi he mau @@@@@ paha kekahi o lakou no keia hui, kupanaha, kapakahi mau ka la ma Waianae.

 

KA BILA HAWAII

            Ua loaa mai he lono telegarapa hope loa mamua koke iho o ka haalele ana aku o ka Alameda ia Kapalakiko mai Wasinetona, e hoike mai ana ua kokoke e pau ka noonoo ia ana o ka bila e pili ana no Hawaii nei maloko o ke Senate.  Aia ka Hale o na Lunamakaainana ke noonoo la i ka bila o Porto Rico, a mahope koke iho oia e hapai la mai ai ka bila o Hawaii nei.  Ala ke makemake ia la e hooponopono koke ia na mea e pili ana no Hawaii nei.

 

KA BILA KANAWAI HAWAII I HOOPONOPONOIA

 

He Kupa Hawaii ke Noho Kiaaina Ana

 

Ua Like a Like na Pono e Loaa Ana i na Poe Kakoo Aupuni repubalika me ka Poe Kakoo Aupuni Alii

 

            Ma ka mokuahi Rio Janeiro o ka po Poaono i loaa mai ai ia makou he hoike malalo iho nei no ka ninau o Hawaii mai ka nupepa Kahea mai o Kapalakiko, o ka la 12, a ua lawe mai makou i keia mau mea ano nui malalo iho nei no ka pomaikai o ko makou mau makamaka heluhelu.

            Wasinetona, Feb. 11.  O Lunamakaainana W.S. Knox, o Masekuseta, ka Lunahoomalu o ke Komite maluna o na teritori, ua paa pono kana hoike maluna o ka bila no ke kukulu ana i kulana aupuni Teritori no Hawaii, a e waiho ia aku ana imua o ka Hale ma ka la apopo.

            O keia hoike he palapala hoike nui ia e hookomo pu ana i na ninau a pau no keia bila, a i hooholo lokahi ia e ke komite mahope o na hoolohe a me na noii akahele ana he nui wale.

            O ke aupuni i manao ia no na Paemoku hawaii he kulana Teritori i like me na aupuni teritori hou o Amerika Huipuia, e koho ia ke Kiaaina a me ke Kakauolelo e ka Peresidena, o ke Kuhina Waiwai, Loio Kuhina, Komisina o na Aina Aupuni, Komisina mahiai a me Ululaau, Luna Nui o na Hana Hou, luna Nui o na Hana Hoonaauao, Luna Hooia, Hope Luna Hooia, Ana Aina a me Ilamuku, na ke Kiaaina e koho ia lakou.

            E hoolako ia i Ahaolelo, ma loko o laila e huipu ana ke Senate me ka Hale o na Lunamakaainana.  E loaa no i ke teritori he Elele maloko o ka Ahaolelo o Amerika Huipuia.

            O na poe i lilo he makaainana no ka Repubalika hawaii, i ka la 12 o Augate, 1898, e hoomaopopo ia ma ka pauku 17 o ke kumukanawai o Hawaii.

            Pauku 17.  O na poe a pau i hanau a i ole i hookupa ma na paemoku Hawaii, a e noho ana malalo o ka mana o na kanawai o ka repubalika, o lakou na makaainana.

            Ua komo pu ma keia me na kupu a pau i noho malalo o ke Aupuni Moi, a i lilo hoi lakou a pau he mau kupa no ka Repubalika.

            O ka manao o ka bila, oia ka hoopau loa i na hana kupono ole i hanaia malalo o ka repubalika no ke kau pale ana aku i ka loaa ana o ka pono koho i ka lehulehu wale o na kamaaina o ka aina, oia hoi, na Hawaii kakoo Aupuni moi.  E noho ana ka Ahaolelo i kela a me keia elua makahiki.  E papalua ia iho ka nui o na Lunamakaainana no ka hooi ana aku i ko lakou kulana ikeia.  E olelo ana ka hoike o ka hoololi no ka hoopau ana i ke ana waiwai no na poe koho i na Senatoa, ua hookoia, mamuli o ka nui loa o ka poe kue i keia wahi o ka bila, mai na komite a me na Lunamakaainana.  Ua ike ia, o keia manao, e ko ana ia ma keia mua iho no Hawaii, a ua ikeia ke kupono o keia mea, a ua manaolana ia o keia hoololi aole ia e hoopilikia ana i ke kulana ano nui o ke senate o hawaii, ai ole he mau hana paha e ahewa ia ai ka Ahaolelo.

            O ka manao no ke Kiaaina o ke Teritori o Hawaii, i makaainana no oia o ke teritori, ua hookomo ia iloko o ka bila pela, no keia kumu, ua loa aku hoi kona kamaaina a me ka ike nui ana i na mea i makemakeia o ke teritori ana e noho hoomalu ana mamua o na poe i maopopo pono ole i ke kulana o ka aina.

            O ka hoololi e pili ana i ka mana o ka Ahaolelo o hawaii i ka hoopii luna nui aua e hoopau i ka lunakanawai Kiekie a me me na Lunakanawai o ka Aha kiekie, ua hana ia keia mamuli o ka hoololi ia ana ae o ka mana hookohu ia lakou mai ke Kiaaina aku a i ka Peresidena.  Nolaila, ua manao ia he hana naauao ole ia ka hookaawale ana aku ia mau mea mai ia mau wahi aku.  O ka mana wale no nana e hoopau ola ka Peresidena.

            Ua a ia ae ka ukana nanahu o ka mokupea East African a na na moku kolo Iroquois a me Eleu i hoopio i ke ahi.

            Aia ka ninau o Hawaii ke noonooia la e ka Senate, pela ka lohe a ka Alameda i lawe mai la.

            Ua hoolewa ia aku ke kino lehu o Weir Robertson no ka ilina o maemae ma ka La Pule iho nei mai ka Luakini Kaukeano hou aku.

            Ua loaa mai ma ka Auseteralia he kikoo dala nona ka huina he $400.00 no ka waihona o ka Hui Kokua Manawalea Hawaii mai ka Peresidena mai oia Hui e noho mai la i Kapalakikoo Mrs. S.C. Allen (Kulamanu) no ke kokua ana i ka poe pilikia.

            Ua loaa mai nei na lono maluna o ka mokuahi Alameda, he nui ke ohohiaia o na keiki Hawaii e haawi ahamele la maloko o na halekeaka o Kapalakiko, o ke mele i makahehi nuiia e ko laila poe oia no ke mele a ka Moiwahine Liliuokalani i haku ai i kapaia, “Aloha Oe.”  O ka poe keia i koe aku o na hawaii i holo aku ai i ka Hoikeike o Omaha.

 

OLELO HOOLAHA

            E ike auanei na kanaka a pau loa o wau o Mr. S.W.K. Kaainoni e noho ana ma Manoa, honolulu, Oahu.  Ke papa pu ia aku nei na mea a pau aole e hookipa a malama wale mai i kuu wahine mare ia mary K. Kaainoni me kuu ae ole.  A o ka poe a pau e hoolohe ole ana ike e hoopii ia no lakou ma ke kanawai.

            A ma keia ke papa pu ia aku nei na ano kanaka apau, aole e hoale mai i kuu wahine mare ia mary K. Kaainoni ma kuu inoa; o ai, ua haalele kumu ole mai oia ia’u mai ka la 3 aku o Feberuari i hala o ka M.H. 1900.  E hoolohe i keia o poho auanei.

Owau no me ka oiaio,

S.W. K. Kaainoni.

Manoa, Honolulu, Oahu, Feb 20 1900.

 

UA LOAA MAI, HE HELUNA O NA

Pena a me na Aila Pena,

Na Hulu Pena,

Na Kapuahi Aila,

Na Kapuahi Fisher,

(ua hoemiia ke kumukuai)

Na Palau na ano apau,

Na Lako Mahiai,

Ho, Oo, Kopala, Kipikua,

Na bakeke o na like ole

Na Ipuhao, Ipu Ti,

Na Lako Aniani,

            E loaa mai ana he mau waiwai hou maluna o ka mokuahi Auseteralia.  Nolaila e kipa mai a e wae no oukou iho, he emi loa ka makou mau kumukuai.

HAWAIIAN HARDWARE CO. LD.

(Hui Lako Hao Hawaii I kaupalenaia)

Alanui Papu, ma o ka Banako o Spreokela.

 

OLELO HOOLAHA

            Owau o ka mea nona ka inoa malalo iho nei ke kauoha nei ia Henry Kaumai e kii koke mai i kana mau lako kamana e waiho nei makoko o kuu lima iloko o na la he 15 mai keia la e puka aku nei o ka hoomaha me ka uku mai no ko’u luhi o ka malama a me ka lilo o ka hoomaemaeia ana, nona na poho a pau $7.00.  E hoihoi pu mai hoi oia i na lala he $10.00 ana i lawe ai.  Nolaila, ina aole oia e kii mai ana i ua lako kamana nei, oia hoi, he @ Pahiolo, 1 Rula Kuea, 1 koikahi, 1 Iliwai, 1 Wili Puaa me elua kui, me ka uku ole mai i kou mau koho a pau nona ka waiwalio o $17.00 iloko o keia mau la i hoike ia ae la maluna e lilo no ua mau waiwai la o Henry kaumai i hoakaka ia ae nei ia’u.

W.H. kailimai

Kakaako, Honolulu. Ian. 23, 1900.