Ke Aloha Aina, Volume VI, Number 8, 24 February 1900 — Page 1

KE ALOHA AINA

Hilo Bay, Hawaii

Ua Mau Ke Ea O Ka Aina I Ka Pono

Hookumuia i Mei 20 1895.

Buke VI       HONOLULU, POAONO, FEBERUARI 24, 1900.    Helu 8

 

KA NUPEPA KEALOHA AINA

E hoopuka mau ia aku ana mai ka Poakahi a ka Polima o na pule a pau o kela a me keia mahina.

 

Ka Uku Pepa, he 20 keneta o ka pule.  No ke kope hookahi he 5 keneta.

 

E loaa no ka pepa maike Keena aku o KE ALOHA AINA, a mai ka lima aku o na Luna Lawe Pepa.

 

E pai ia no na Olelo Hoolaha, na Kanikau a me na Mele Inoa, me ke Dala kuike.  Aole nupepa me ka owili pakahi e hoouna ia ka ole e hookaa mua ia ka uku pepa. 

 

E hoouna pololei mai i na Nuhou Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.

 

Aole loa e hoopuka ia a hoolaha i kekahi manao ma na kolamu o keia Pepa, malalo o kekahi inoa kapakapa ke ole e hoike mai i ka Lunahooponopono i kona inoa ponoi.

 

Ka Nupepa Puka Pule

KE ALOHA AINA

Hookahi makahiki....$2.00

Eono mahina....$1.00

Ekolu mahina... .50

Hookahi mahina... .20

 

EDWARD L LIKE.

Lunahooponopono a Hope Puuku

JOSEPH K. LIKE.

Luna Hoohana.

HOGAN E KALUNA

Luna Hoopuka.

EMMA A. NAWAHI

Puuku o

KE ALOHA AINA

O na kauoha Nupepa me na hookaa Dala, e hoona pololei mai i ka Puuku ma Honolulu.

 

HE KOKUA ALOHA.

Mrs. E. A. Nawahi,  Aloha oe.

Aia ma ka Malulani he puolo lole o 240 i-a Kalakoa oi aku a emi paha, a eia pu ma keia he kikoo ma ka Banako o Bihopa Ma. he $52.75 ma kou inoa.  He ma kaua keia ua na Hawaii o Lihue, Kauai nei, i kokua mai ai no kela poe pilikia ma Honolulu.  E oluolu oe e lawe aku i keia wahi nakana no ko lakou mau hoa lahui a waiho aku ilo o ka waihora o ko oukou Hui Kokua no na poe pui kia.  E oluolu e hoike ae i keia mau kokua ma kau Nupepa Ke Aloha Aina:

Me ka mahalo, Mrs. H. K. Kahele, Mrs. S. K. Kaeo.  Na Komite.

 

Ua loaa pono mai keia mau wai wai, a ua hookoia elike me ke kauoha.  Ke haawi nei KE ALOHA AINA i ka mahalo a nui i na poe puuwai aloha hoa lahui o Lihue, Kauai, na lakou keia mau kokua maluna ae, a pela pu hoi i ko lakou mau komite elua, a me na poe no o na wahi e ae i kokua pu mai.

NUHOU KUWAHO.

AIA KE PAA LA I KONA KULANA.

Ladana, Feb.9.  O na lono o keia kakahiaka i loaa mai nei, e hoike ana ia aia no Kenerala Bula ke paa la i kona kulana ma ka akau o ka muliwai Tugela, kahi ana i lawe haaheo ae ai i ka lanakila ma ka Poakahi, a e paa  nei hoi mai na lele kaua ana mai a na Boa ma ka Poalua.

 

Ma ka Poakolu ua ike ia aku ka alihikaua Beritania e paa ana no me ka ikaika i kahi i lilo iaia me ka hoao ole aku e nee imua.  O kona mau pukuniahi koikoi ua lawe ia mai ia no luna.  Ma o keia ulolohi hou i hiki ole ke pale ae, ua hookuu aku ia he wa no kekahi puali ikaika o na Boa e hoakoakoa ai mamua ona.

 

O ke awawa a Kenerala Bula i manao io ia malaila o Kenerala Bula i hoolaila ai no ka nee mua ana aku no Ladysmith, e alai ia ana oia ma kekahi aoao e Vaai Kratz, a ma kekahi aoao hoi e Doora Kloof.  O ka pau a i ole nae na Boa a me na pu ma kahi o ke kualapa mua, aia oia i na pualikoa Beretania, aka, he nui hope, a ua hiki ke pulumi i ke awawa me ke pale aku i ka nee ana mai o na Beretania.  Ua hoomaopopo ia aia na hana nui maluna o na pukuniahi ma ka onou ana aku ia alahele, a nolaila, aole e hiki iaia ke hoomau aku i ka hakaka ana a hiki iho la ma ka  la inehinei, ina hoi ua hana io aku oia  i keia hana.

 

Aole he mau hoike i loaa mai i Ladana no na Haku Roberts a me (Kitina) Kitchener e nee la.

 

LONO NO AGUINAIDO.

Kikako, Feb. 9.  He lono telegarapa kai loaa mai nei i ke Karonikala mai Wasinetona mai, e olelo ana:

 

He manaoio ko ke Keena Kaua ua mahuka aku o Aguinaldo mai ka mokupuni Luzon aku.  Aole no hoi e hoohikilele ia na luna aupuni ke lohe ae aia oia ma Ladana a i ole ma Parisa.

 

KE KAHUA HOU O NA MOREMONA.

Cheyenne, Wyo. Feb. 8.  O na hoomakaukau ana i kekahi hana hookumu panalaau nui ma ke Komohana i hana mua ole ia, ua holopono ia maanei, a he hapa o ka apana Big Horn, ma Wyoming Akau e noho ia aku ana e nba Moramona.  No kekahi mau makahiki lehulehu, he hapanui o na kanaka Moramona ma Uta i hoomaopopo aole e hiki ia lakou ke ku aku i na hoino ia mai e na poe e, me ke komo mai o na maanao iloko o lakou no ka hele ana aku i ka aina hou, kahi hoi o lakou e kukulu ai i mau home.  Nolaila, ua hana ia he mau aelike hou me na luna aupuni o Wyoming no ka haawi ana mai he 200,000 eka aina ma Big Horn.

 

He mau haneri o na ohana Moramona e hoolilo la i ko lakou mau waiwai me ka opeope pu ana hoi i ko lakou mau lako pilikino, a i ka wa e hoea mai ai o ke kupulau, oia no ko lakou wa e hele aku ai maluna o na mauna a me na aina malaelae no Ziona hou.  Ua olelo ae na alakai Moramona maluna aku o 30,000 e haalele aku ana i ka panalaau ma keia makahiki mua.

 

KA MA’I BUBONIKA MA MANILA.

Vitoria, B. C., Feb. 8.  Elike me na lono i lawe ia mai e ka mokuahi Emepera o Kina, aia ka ma’i ahulau ke pahola la me ka ikaika ma Manila.  O na telegarapa i loaa aku i ke Daily Mail, no ka la 17 o Ianuari, e hoike ana he 12 mau ma’i i loaa aku ma ke alanui ia la.  O keia puka ana ae ia ua hoopihoihoi aku ia i na mea a pau.  O ka nupepa Manila Times, na olelo ae oia he nui ke pihoihoi i ike ia no kekahi mau ma’i i manao ia he bubonika ko laua.  He mau puke laua i hoea mai Honkong mai.  Ua hookaawale ia aku na mea ma’i a me ka hale i oili ae ai ka ma’i.

 

Aia no ka ma’i ke pahola la ma Hongkorg.  No ka makahiki 1899 he 1,486 ma’i malaila me 1,428 make.

 

NUI KA WI MA INIA.

Bomabe, Feb. 7.  Eia ka wi ke pahola nei me ka weliweli.  O ka nui o na poe e haawi ia nei na kokua he eha miliona, a ke hookokoke aku nei ia i ka heluna poino o kela makahiki wi aku nei.

 

He pii mahuahua mau ana kai upuia no keia mau mahina eha hou aku.  No Bomabe wale no he 800,000 ka nui o na poe hune he oi loa ae i ko ka 450,000 o ka 1897.  O ka nui o na make i ka wi eia ia ke ike mau ia nei ma Rajpantana.

 

POWA IA KE KEIKIALII HENERI

Vanekona, Feb. 7.  O ke Keikialii Heneri o Perosia, ka Hope Adimarala o na aumokukaua o Geremania ma ha wai o Kiua, a i hele makaikai aku ma Siama a me na aupuni o Asia Hema, elike me na lono i loaa mai nei i keia la ma ka mokuahi Emepera o Kina.  Ma ka la 6 iho nei ua paa ia oia me ka hao pu ia e kekahi mau kanaka powa i lako me na mea kaua, a me ke kupilikii hoi i hemo mai ai.

 

Mamua koke iho o ke Karisimaka, ua kipa aku ke keikialii e ike i ka Moi o Siama ma Bangkok.  Mahope o ka hoohala ana he mau la hauoli ma ke kapita, ua hooholo iho la oia no ka hele makaikai ana ia loko o ka aina, me kekahi mau ukali kakaikahi.  Hele aku la lakou maluna o na kaa baikikala ma kahi he 100 mile ke kaawale mai kona moku mai ma ke kapitala, ua paa ia iho la oia e kekahi mau kanaka powa, i hoolako pono ia me na mea make, me ke koi aku e haawi ia aku na mea a pau o lakou.  Ca laki nae ke Keikialii aole lakou i hoomaopopo mai iaia, ina ua paa ia oia no kekahi uku makana kiekie.  He ekolu mau kaa baikikala i koe mai i ua malini, a nolaila, ua kau ae la ua keikiahi nei maluna o ke kaa o kekahi o kena ukali, a huli hoi mai la iloko o ekolu la me kona mau ukali e hele wawae ana ma  kona aoao.  Ua lilo aku i na powa he $1,000 ma ke dala kuike ame kekahi mau kaa baikikala.  Ua hoouna koke aku ka Moi o Siama he puali no ka lawe ana mai i na poo o keia mau powa na lakou keia mau hana lapuwale.

 

I ka Poakahi nei i wehe hou ia ae ai ka Aha Kaapuni, a hoopanee ia aku la no ka ekolu o ka manawa, no hookahi hou aku pule.

 

 

MA KE KAUOHA

HOOLAHA KEENA HAAWI LAAU.

HONOLULU FEB. 14, 1900.

 O ke Keena Haawi Laau o ke Aupuni ua hookahua ia oia ma ka Halegula o Pohukaina o kahi e komo mai ai ma ke a nui Puowaina a me alanui Likelike, ua hamama ia i ka lehulehu mai ka hora 8:30 a.m. a ka hora 10 a.m., a mai ka hora 1 p.m. a ka hora 2 p.m. o na la a pau, koe na La Pule me na la kulaia.  CHAS. WILCOX, Kakauolelo o ka Papa Ola.  36-3t.

 

KEENA O KA PAPA OLA.

HONOLULU, FEB. 7, 1900.

Pauku 98 o ka Rula Malama Ola o na Papa Ola ma keia ke hoololua nei, a nolaila, o ka pauku i oleloia a heluhelu ia penei:

 

Pauku 28.  Aole opala, lepo hale lio, lepo ino, a i ole na mea i kiola na o ka holoholona a i ole o na mea ulu o na ano a pau e hio ana i mea palahe e hooha uaia no ka uhi, a i ole no ka hoopiha ana i kekahi apana pa hale a i ole apana aina e ae.  C. B. WOOD.  Peresidena o ka Papa Ola.  31-1w.

 

RULA O KA PAPA OLA.

KEENA O KA PAPA OIA, HONOLULU.

FEBERUARI 9, 1900.

O ke komohewa ana maloko o na pa hale i kukala ia e ka Papa Ola na laha ia e ka ma’i ahulau, a i ole i puhiia malako o ke kauoha a ka Papa na hookapu loa ia.  G. B. Wood.  Peresidena o ka Papa Ola.  S1-1w.