Ke Aloha Aina, Volume VI, Number 5, 3 February 1900 — Page 4
| This text was transcribed by: | Mahealani Chang |
| This work is dedicated to: | Edward Keliikauwila Paaluhi & Hannah Keahi Iaea |
KE ALOHA AINA, POAONO FEBERUARI 3, 1900
Ke - Aloha - Aina
Hookumuia no ka
Pomaikai o ka Lehulehu, a he Nu
pepa no ka Lahui Hawaii.
-
EDWARD L. LIKE.
Lunahooponopono.
P. KANOA,
Luna Hoopuka a Hope Lunahoopono
pono
EMMA A. NAWAHI
Puuku o KE ALOHA AINA.
-
HONOLULU. FEB. 3, 1900.
-
He maikai no ke ola o Kalani Aimoku e alo mai la i ke anu o Wasinetona, pela na lono i loaa mai la.
-
AOHE no he mau mea ano nui e pili ana no Hawaii i loaa mai la ma ka mokuahi Kina, ua manaoia nae iloko o keia mahina o Feberuari e lawe hou ia mai ai e noonoo keia kumuhana maloko o na Hale Kaukanawai o Amerika Huipuia.
-
HE hana keia e hookaakaa maoli aku ana i na Senate a me na Lunamakaainana e noho pouliuli ana me ka manao kuuihewa ana ua pololei ka lakou nei ma ae mau hoike hakuepa i holo aku ai ilaila e wahahee ai, aka, ke koke mai la nae ka wa e hoomalamalamaia ai ko lakou noho pouli ana i ke kulana o Hawaii nei.
-
MA na lono i loaa mai la mai Wasinetona mai, aia o R. W. Wilikoki a me E. Caypless ke liuliu la he mekini hooleleaka no ka haawi ana he mau hoikeike kii nui i ke ano o ka hookahuli ia ana o ke aupuni Hawaii a me ke kokua pu ana mai o na koa Amerika, a lakou nui ma ae hoi i hoole loa ai aole o Amerika i komo pu ma ia hana karaima.
-
I KA nana ana maloko o na nupepa o ko na aina mamao mau Poo Aupuni, mai ka mea e noho ana maluna o ka nohoalii a hiki loa aku i na luna aupuni haahaa, ua ala mai la lakou me ka manao lokahi no ke komo ana aku e komo ana aku e kokua i na poe i hoopilikia ia e ka mai ahulau, ka pauahi, ke kai mimiki, ka luaipele, ka makani ino a me na pilikia e ae, e hoopilikia ana i ke ola o ka lehulehu.
-
UA komo aku lakou me ko lakou mau kino ponoi, e hele ana me ka naau o ke aloha io, aole mamuli o ka hookonokono ia i wahi e hookaulana ia ai ko lakou mau inoa ma kela a me keia wahi a wahi a puni ke ao nei, a oia hana, he punawai hiki ole ia ke hoopio ia, oiai o a e huahuai mau ana i na wa a paa, a pela hoi a puni na @.
PELA anei ka Mana Hooko o ke aupuni Hawaii i hana ai, i ka wa o ka hoomaka mua ana mai o ka mai fiva eleele e laha nei iloko o ka aina nei, a me ka pauahi o ka Poaono, Ianuari 20. Ua hana anei oia i na mea e mahalo ia ai oia e na lahui i komo kino maoli iloko o ka pilikia a ia enemi weliweli i hookau mai ai maluna o ka poe uhane hala ole, hookahi wale no o lakou hala, o ke poha ana ae o keia mai weliweli, e kapapa mai nei ma kahi o ka poe a lakou i hoino ai ( ina nae hoi he oiaio keia mau hana e pahola ia nei maluna o kakou, a koe no lakou nei e noho hookananeo iwaena,) me ko lakou mau naau kumakaia hoa kanaka.
-
I KA hoomaopopo ana i ka hana a ka Mana Hooko, (no kona ike no paha aohe ona wahi poopoo i koe iloko o ke kuleana hooponopono aupuni, ke kumu o ka nanamaka maoli ana,) oia hoi o Peresidena Dole a me kona mau Luna Aupuni a pau, aole loa makou i ike, a i lohe hoi, ua komo kino aku oia iloko o na wahi o ka pilikia a haawi hoi i kekahi mau ohana hune i kana mau hoopakele ana i ko lakou mau ola mailoko ae o na alelo ana ole o ke ahi, oiai oia e hapapa ana me ka ikaika ma na palena i makemake ia ko lakou hooneoneo loa ia ana.
-
HE hana hai-na maopopo loa maoli no keia, me ka hiki ole ia lakou ke olelo ae, he aloha lakou i keia aina a me kona mau ea oluolu, he aloha lakou i keia lahui oluolu a piha i ke aloha oiaio mailoko lilo mai o ko lakou mau puuwai. Oia mau ano olelo, ke puka ae i keia mau la, he aloha hookamani ia, he mau kokua hoopalaimaka o ka huna huna i na hana ino, na mea a hoomalielie ia mai nei iloko o keia mau la, oiai, o na makana a na Luna Aupuni i ka la o ka pauahi, oia na a u koi o ka halekuai o Kakela ma, E. O. Holo ma, a me kekahi mau halekuai e ae, i mea hoomalu ika, i mea ho-a aku i na poe pilikia i hoomalu ia ma ke ano kakauha o ka lima ikaika, e ka Papa Ola a me ke poo o ka Mana Hooko.
-
AOHE a makou kamailio ana no na mea e ae, aka, e hoomanao ae ana makou no Kalani Kalakaua, iloko o ka pauahi o ka 1886, o Aperila 18, ua ikemaka makou Iaia iloko o ke okooko o ke ahi, me kana koilipi, kona papale pale ahi o ka oihana kinaiahi, a e huki pu ana hoi i ka iliwai no ka hoopio ana i na wahi a ke ahi e a ana, a he hoike hoi ko makou ikemaka iaia, e pinana ana iluna o kaupoku o na hale, mahope aku o ka Hale Haawi Laau o ka Papa Ola ia wa, ma ke alanui Maunakea, ma ka aoao ma Ewa, a o Kikihale kahiko hoi ia wa e u pu ana me ke kaumaha no kona lahui i loohia me ka poino.
-
AKA, ua hale ka wa o ke aloha i mili lima ia, i hiipoi ia, a i makee maoli ia no, a i keia wa, he wa keia no ka uhiuhi lau mamane, kahi wai o Kapapala, o na kokua e hoea ae nei i keia wa, aole ia no ka manao aloha maoli, aka, he hoopalaina ana, he huna ana, a he hoomaikai ana hoi no na kuko hewa a lakou i manao ai, o ko kakou alahele keia e nalowale ai no ke ku ana i lahui no ke keakea ana i ka lakou mau hana hoohui a hoolilo aupuni ia Amerika. Aka, aole loa nae ia
-
THE HUB
HALEKUAI NANI O KE TAONA.
-
Ua loaa mai la ia makou mai ka hikina na lole huluhulu eleele i hana noeauia o na paikini hou. O ka waiwai io he $18.00; aka, mamuli o na La Nui, e loaa no ma
Ka Hub, ua hoemiia 10.50.
-
He 150 Paa Lole Hui hulu Bolu a me Eleele o ka loaa ana mai la @o ia mai ka hikina, he nani ko lakou mau nanaina, a ua hanaia me ke akahele e pili pono ai i na mea a pau. O ka waiwaiio he $15, aka no na La Nui e loaa no ma
Ka Hub, ua hoemiia 8.50.
-
E hoomanaoia o ka makou waiwai o na Lole Aahu, Kamalii a me Opio, a pela pu hoi me na Papale, Papale Kapu, me na Lako Aahu e ae he hou loa.
E kipa mai a e ike ou iho mamua o kou kuai ana, a e hookoeia no kekahi o kau mau dala. E hamama aku ana ko makou halekuai i na po a pau a hiki i ke Karisimaka.
J. S. SPITZER
ALANUI @ KOKOKE I KE ALANUI PAPU.
HE WEHE NUI OI KELAKELA
MA KAHI O
L. B. KERR.
ALANUI MOIWAHINE.
-
KUAI HOEMI NUI!!
-
MAU WAIWAI PAIKINI HOU
-
Lole Aahu Hou Maikai Loa
HE EMI KE KUMUKUAI
Papale Paikini Hou o na Lede
HE EMI KE KUMUKUAI
Mikilima o ke ano Hou Loa
HE MAKEPONO LOA
He Nui na Paku Lihilihi Hou
HE EMI KE KUMUKUAI
Mamalu Nunui me Liilii
HE EMI KE KUMUKUAI
Na Lipine a me Lihilihi Hou
he emi ke kumukuai.
Pua a me na Hulu ano Hou
he emi ke kumukuai
Na Lole Piliili o na Wahine
he emi ke kumukuai
Na Uhi Pakaukau
me Tawele Lima
he emi ke kumukuai
-
L. B. KERR.
Honolulu, Alanui Moiwahine