Ke Aloha Aina, Volume VI, Number 3, 20 Ianuali 1900 — E HOOMAU I KE KUPAA NO KE ALOHA I KA AINA. [ARTICLE]

E HOOMAU I KE KUPAA NO KE ALOHA I KA AINA.

O kela mau olelo ae la maluna oia na huaolelo kauoha hope loa a ka Peresidena o ke Aloha Aina o ko Hawaii Paeaina, ka mea kaulana, a o ke kanaka Hawaii hookahi hoi i oi aku kona aloha ia e kona lahui, ka Hon. Joseph Nawahi, ka mea i ku ma ka hoeuli o ka moku aupuni o Hawaii, i ulupa ia e na hoalauna i lawe i

na haawina o ke kuko a me na hana karaima lokoino, a ua paio oia no ka pono o kona moi, ka lahui, ke aupuni a me ka aina, me ke kupaa, luli ole, naue ole, a hiki wale i na minute hope loa o kona hanu ana i ke ea honua, a moe aku la i ka moe kau a hooilo ma ka aina malihini a iaia e aneane ana e haalele mai i kana aloha, kona hoapili hoi o ka wahine, oia kana i puana mai ai i kela mau huaolelo o ka walohia me ka pane ana mai: "Aloha aku i kuu Moiwahine a me ka lahui a'u i aloha ai, hai aku oe no'u, e hoomau i ke kupaa no ke aloha i ka aina." Ae! Aloha no ia leo kaumaha. E kuu lahui aloha mai Hawaii a Niihau, ua hala, a ua nalo ko kakoa alakai kaulana, aka, o kana wahi kauoha uuku, a ku no hoi i ka walohia, eia no ia me kakou, ke kani mau nei no ia iloko o ko kakou puuwai me ka poina ole, a malia paha, ua pio a ua poina i kekahi poe o kakou ia leo kauoha o ko kakou alakai i aloha nui ia. Ina pela, eia ka'u e kauleo haahaa aku nei ia kakou a pau loa, "e ala mai, e ala ae, e ala like, e hapai like, a e eu like mai, a e hana aku i ka hana nui hookahi e pono ai kakou, oiai, ua pau aku la ka makahiki 1899, ka makahiki hoi i hookumu ia ai kekahi hana mainoino a manaonao loa maoli no hoi, ka mea i ike ole ia ma keia aina a ka maluhia i haiamu ai, no ka hapa keneturia a oi, ka hana hoi i kohu ke hana ia ma na aina pegana. A o kekahi no hoi, e ala mai kakou ano, no ka mea, ua piha ae la ka helu hiku, oia hoi, ua piha aku la na makahiki ehiku o ko kakou noho hoomanawanui ana malalo o na ino he nui, a na hoalauna o kakou i hana mai ai me ka lokoino loa. Eia ka manawa e hapai like ai kakou i ka hana haipule mai Hawaii a Kauai a me Niihau, E hana like kakou i keia hana me ka oiaio a me ka manaoio, Ua makaukau ke Akua ma Kona aoao mai. A penei Kana olelo ma ia mea. 1. O na mea a pau a oukou e nonoi ai ma ka pule me ka manaoio, e loaa no ia ia oukou. Mat. 21:22. 2. A o ka mea a oukou e nonoi ai ma Ko'u inoa, oia Ka'u e hana mai. Ioan. 14:13. Aole i pau. E hoomaha ana ka holo ana o ka mokuahi Mauna Loa, Kaluadine a me Kinau no keia mau hana kue a ko Hilo poe. Ua loaa aku i ka lokowai ma kahi kokoke i ka hale o Mr. @ Hobron, he bebe make e lana ana iluna o ka iliwai iloko o kekahi eke mauu.