Ke Aloha Aina, Volume VI, Number 3, 20 Ianuali 1900 — Page 4
| This text was transcribed by: | L. A. Marchildon |
| This work is dedicated to: | Any Canadians calling Hawaii home...I'm so envious ! |
KE ALOHA AINA
4 KE ALOHA AINA, POAONO, IANUARI 20, 1900
Ke – Aloha – Aina
Hookumuia no ka
Pomaikai o ka Lehulehu, a he Nu pepa na ka Lahui Hawaii.
EDARD L. LIKE.
Lunahooponopono.
Luna Hoopaka a Hope Lunahooponopono
EMMA A. NAWAHI
Puuku o KE ALOHA AINA.
HONOLULU IAN. 20, 1900.
ILOKO o keia @ e hele nei, oiai hoi keia ma'i bubonika e laha ana maloko nei o ke kulanakauhale, na hoomaopopo la, e na ope e nana aku nei i ke kulana hooponopono o ke aupuni, me he mea la, a o ka oiaio maoli no paha ia, ua oi aku ka mana a me ka ikaika o na olelo a ka Papa Ola ma o na Kauka la, mamua o na mea e ae.
I NA manao na Kauka, na ku pono ia kanaka no ka hookomo ana iloko o ke kapuahi o Uwahi Eleele, (Kahakaaulana,) me kona ma'i mau paha, aka, ina olelo lakou e puni i ke ahi, aole loa e hiki i kekahi mea ke keakea aku i ko lakou mana, oiai lakou e hana ana elike me ko lakou makemake.
O KE kulana mana o na Luna Aupuni i ka wa kahiko, oiai, ke Aupuni Alii e ku ana, ua ku kaawale mai ka hoohuikau wale ia ana me ka mana o ka poe naua e malama ana i ka oihana o ka lehulehu, aole loa hoi e hiki ia lakou ke lele kamoko aku maluna o ke poo o ka Mana Hooko, oia hoi ka Moi, ka mea i oi ae kona kuleana hoohana mamua o na mea a pau.
PEHEA i keia la, ua mana anei ia Peresidena Dole, a me kona mau Kuhina ke wawahi aku i ka maua o Kauka Wahie, ka Peresidena o ka Papa Ola a me na lala o ka Papa Ola, oia hoi na Kauka kona mau hoa kuka o keia mau la, ka poe hoi a kakou e ikemaka nei me ka hoohewahewa ole, ua oi loa aku ko lakou kiekie a me ke oolea mamua o na mea e ae; ina olelo lakou e make ia mea, aole loa he kokua nona e hoopakele ia ai, oiai, eia ka mana hooponopono o ke aupuni a pau iloko o ko lakou mau lima.
HE mea ku i ka mahalo ia, ua hana a ka Luna Makai Nui o ka mokupuni o Hawaii, ina he oiaio na lono nona, kona ae ole ana e hooko i ka makemake o keia Papa Ola lalau a imi hoi e hooi aku i ka poino iloko o ka lahui, ma ka hoouna ana aku i na limahana Iapana a me na ukana i puhi ku kaepele ia, mamuli o ke kauoha a keia poe, e ae ia mai lakou e hoopae aku iuka o ka aina, i ka wa a ke Kinau a me na mokuahi holo piliaina e ae e ku ai no kekahi mau awa o na mokupuni la o Keawe, a e manao ia hoi na ukana a ua Papa Ola nei i apono ai, he mau ukana ma'i ole ia, a e hoopae ia aku lakou no uka o ka aina.
EIA kakou iloko o ka noho ana uluaoa i keia mau la, mamuli o ke komo ana mai o kekahi ma'i weliweli e luku hou aku i kekahi mau ola o ko kakou mau hoa kanaka, me he waikahe la e hookahe ia ana maluna o ka aina, aka, no kakou iho, ua nana aku no kakou i ko kakou hoino ia me ka malie, aole hoi he mau manao pihoihoi, koe wale no, he mau manao ehaeha o ke kaumaha, no ko kakou mau hoa kaumaha, no ko kakou mau hoa kanaka, e hoopaahao ia nei ma na wahi hoomalu ia, me he poe pio la.
KE nana nei kakou i ka pono oia poe me ka ehaeha o ko kakou mau naau, a no ia kumu, ua ala ae nei na makuahine Hawaii puuwai hamama o ka Ahahui Kokua Manawalea o na wahine, ka poe na lakou i alo mua na poka o ke kahua kaua o ka Ma'i Kolera, ka ma'i hoi nana i lawe aku i kekahi mau heluna kanaka lehulehu no ka opu o ka honua, a o ka wa mua loa hoi i ike ia ai keia poe palupalu ma ko lakou mau kulana, aka, he oolea a he wiwo ole ma ka hana.
UA nonoi aku lakou i ka oluolu o ke aupuni e ae mai e kokua i ka lakou mau hana ku i ke aloha no ka io a me ke koko o ko lakou aina aloha, ma o ke Kuhi na Kalaiaina la, no ke kokua ana mai ia lakou no ke kukulu ana i mau hale no na Hawaii Ponoi e paa nei ma na wahi i hoomalu ia, elike me Kakaako a me Puuhale a ua @e ia mai ia noi.
UA nonoi hou aku no lakou i ka oluolu o na Keikialii i kekahi mau apana aina kaawale o ka Moiwahine Kapiolani e waiho nei makai o Puuhale, a elike no me ko lakou ano, he Makalei ma ka lakou mau hana, pela no i loaa mai ai ia lakou ka pane, o ka aina ia kukulu aku na hale, aohe mea nana e hoopahua i ka oukou mau hana maikai.
HE oiaio, i alii no ke alii i ka nui o ke kanaka, he mea ole ka inoa alii, ina aohe ona malama i ke kanaka, pela hoi kakou e haawi ai i ka mahalo ia Kalaniana ole, no kona ae ana mai e hooko i ke noi a kona mau hoa oiwi haahaa o ka aina hookahi, no ke kukulu ana i home no ka poe a ke aupuni i hoilikole ai, e noho nei maloko o na wahi hoomalu, me ke kulana maopopo ole, e loaa ana ia lakou he noho ana oluolu, i ko lakou wa e puka mai ai mai ka noho hoomalu ana.
O NA manawalea o ke aloha i makana ia mai i na makuahine Hawaii o ka Ahahui Manawalea o ka poe ilihune a pilikia, he hoike akaka maoli no ia no ka hilinai piha ia o ka lakou mau lawelawe hana ana no ka pono o ka lehulehu, a ke nonoi mau ae nei ka makou mau leo kalokalo, imua aku, no ka pono o ko kakou mau hoa kanaka o ka pupuu hookahi, a o ka oukou mau hana makee hou kanaka, he momi makamae ia no ko oukou mau inoa ma keia hope aku.
THE HUB
HALEKUAI NANI O KE TAONA.
Ua loaa mai la ia makou mai ka hikina na lole huluhulu eleele i hana noeauia o na paikini hou. O ka waiwai io he $18.00; aka, mamuli o na La Nui, e loaa no ma
Ka Hub, ua hoemiia 10.50.
He 150 Paa Lole Hui hulu Bolu a me Eleele o ka loaa ana mai la no ia mai ka hikina, he naui ko lakou mau nanaina, a ua hanaia me ka akahele e pili pono ai i na mea a pau. O ka waiwaiio he $15, aka, no na La Nui e loaa no ma
Ka Hub, ua hoemiia 8.50.
E hoomanaoia o ka makou waiwai o na Lole Aahu, Kamalii a me Opio, a pela pu hoi me na Papale, Papale Kapu, me na Lako Aahu e ae he hou loa.
E kipa mai a e ike @ou iho mamua o kou kuai ana, a @ hookooia po a p@u a hiki i ke Kamaimaka.
J. S. SPITZER.
ALANUI HOTELE KOKOKE I KE ALANUI PAPU.
HE WEHE NUI OI KELAKELA.
MA KAHI O
L. B. KERR.
ALANUI MOIWAHINE.
KUAI HOEMI NUI!!!
MAU WAIWAI PAIKINI HOU.
Lole Aahu Hou Maikai Loa
HE EMI KE KUMUKUAI
Papale Paikini Hou o na Lede
HE EMI KE KUMUKUAI
Mikilima o ke anonano Loa
HE MAKEONO LOA.
He Nui na Paku Lihilihi Hou
HE EMI KE KUMUKUAI
Mamalu Nunui me Liilii
HE EMI KE KUMUKUAI
Na Lipine a me Lihilihi Hou
he emi ke kumukuai.
Pua a me na Hulu ano Hou
he emi ke kumukuai
Na Lole Pilili o na Wahine
he emi ke kumukuai
Na Uhi Pakaukau
me Tawele Lima
he emi ke kumukuai
L. B. KERR.
Honolulu, Alanui Moiwahine