Ke Aloha Aina, Volume VI, Number 1, 6 January 1900 — Page 4
| This text was transcribed by: | Frank Tansey |
| This work is dedicated to: | James Stamas |
KE ALOHA AINA
4 KE ALOHA AINA POAONO, IANUARI 6, 1900
Ke - Aloha - Aina
Hookumuia no ka Pomaikai o ka Lehulehu, a he Nu pepa na ka Lahui Hawaii.
EDWARD L. LIKE.
Lunahooponopono.
EMMA A. NAWAHI Puuku o KE ALOHA AINA.
HONOLULU IAN 6, 1900.
HE MAIKAI KE OLA O KALANI AIMOKU.
He maikai no ke ola o ka Moiwahine Liliuokalani e noho mai la ma Wasinetona, pela na hoike i loaa mai la ia makou, ma ka mokuahi Mariposa mai nei. He maikai pu me kona mau hoa o ke alo alii.
Aole no he mau mea ano nui i lawelaweia e Ahaolelo no ka ninau o Hawaii, aka ua manao ia no nae e loaa ana no ka mana koho i na Hawaii E hoomaha ana ka Ahaolelo no kekahi mau pule no ka hookuu ana i Senate a me Lunamakaainana e hauoli Karisimaka a me Hapenui, a mahope aku oia manawa e lawe ia mai ai na kumuhana ano nui e noonoo.
HE HOOMAIKAI AKEA.
Ua loaa mai ia makou ka papainoa o na Luna hou o ka makou nupepa no keia makahiki, a me na poe Luna mua, ua lawe pakahi ma ka owili me ka lakou mau mohai aloha, no keia makahiki 1900 e hele nei, he poe iuoa hou loa kekahi, akahi no a hookamaaina pu me makou i keia makahiki, ma ke ano he Luna a he mea lawe pakahi no keia makahiki, he hoike ana mai i ko ka lahui holookoa ohohia nui no ka nupepa KE ALOHA AINA, ka mea nana e paopao nei i na iwi o ka poe kolohe, a ke hone nei hoi i ke kumu o ka hana no ka pono o ko Hawaii noho aupuni ana, mai kinohi mai o kona kukulu ia ana he wahaolelo no ua mea a pau, a he nupepa hoi na Hawaii Ponoi e hialaai mau ai i ka po a me ke ao.
O ka loaa ana mai ia makou o keia mau hoike o ka hilinai ia, no keia makahiki e hele aku nei ma o ko lakou hoouna pu ana mai i ke ola o ka kakou wahaolelo, he hooi ana ae ia i ka ikaika hana iloko o ko makou mau puuwai, he mea ole ua kauoha wale mai no, ke ole e hoouna pu hoouna pu mai i ke oia o ka papa, ke kuleana hoi e hiki ai ia makou ke hoomau aku i ka nee ana imua, no ka pono a me ka pomaikai e ka lahui Hawaii, a oiai no hoi, na hoiko mau aku le ma ke ano hookamani, aka, ma ke ano oiaio oia mau, aole o makou kokua e ae mawaho, elike me kekahi mau nupepa e ae, aka, ua hilinai aku makou maluna o ko na Hawaii lokahi, a pela makou i ola loihi ai iloko o kela mau makahiki elima i hala ae nei.
I ka hoopau ana ae i keia mau kahoahoa ana, ke haawi aku nei makou i na hoomaikai ana he nui no ka poe i haawi mai i na kokua ana me ka paulehia nui, na poe hoi i ake maoli e ike i na mea e pili ana no ka Ninau o Hawaii, ka mea a makou i olelo akea ai, e hoike ana makou me ke hookauina ole, i ka wa e loaa mai ai ia makou na lono, he mea a he mea ko kakou kulana aupuni a Amerika e hana mai ai, a i kupono iho hoi i ko kakou iini, mailuna mai hoi ia.
Ke haawi aku nei makou i na hoomaikai Hapenuia no na poe pau i apo mai, a lawe aku i KE ALOHA AINA i hoa kuka pu nona, a no lakou a pau no keia Keneturia 19, ka wa hoi a kekahi poe i wanana ai, aia ilaila ka hopena o ke ao, a ina pela, a nolaila, mai keia mau ohohia ana, alaila he mea pono io ke lawe aku a hookipa aku iaia me ke aloha, a no ka wa hope, o ke aloha makahiki hou no ke kakou a pau.
HE KU MAOLI I KA WALOHIA.
Ia makou e huli hoi ana no ko makou home i ke ahiahi Poaina nei, mahope iho o ke kani ana o ka hora 5 o ke ahiahi, ua ike ia aku la ka haiamu o na kanaka ma ke kihi o na alanui Moi a me Nuuanu, no ke kilohi ana aku i kakahi auna huakai, e alakai ia mai ana e kekahi pualikoa me na elau pu e wanaoa ana, a i ke kilohi maopopo ana aku i ke kumu o keia haiamu ana, eia ka, he poe Hawaii e lawe pio ia ana no ke kahua ma'i o Kakaako, e komo pu ana na Iapana, na Pake, na Kilipati, na Inia, a pelu aku.
O kekahi poe o lakou maluna o na kaa lawe ukana, a i ka nana ana i ka heluhelena oia poe, aia na waimaka e kiheahea ana ma ko lakou mau papalina, me ka naau i hele a pilihua no ka hoomanao ana ae i ko mau wahi ponoi e anai ia mai ana e ke ahi, mahope o ko lakou haalele ana aku i ko lakou mau wehi ponoi, i puu lehu na ke ahi a ka mana o ke aupuni e anai mai ana.
Ua huli mai ko lakou mau maka me na helehelena kaumaha maluna o na nanaina o kekahi poe e nana hoomakue ana, a ke ike ia aku la hoi na haole kane a me wahine haole e aka hoohenehene ana i keia poe e alakai ia ana e na koa o ke aupuni, a oiai lakou me ia mau hiona i ku ole i ko makou hoihoi, a oia hoi ka makou i olelo ae la, he ku i ka w alohia kenana aku ia mau ano, a pela iho la i onou poo ia aku ai kela huakai no kai o Kakaako.
Aka, o ka makou wale no e hoohuoi nei, ua hoolako anei ke aupuni i mau hale kupono no keia poe a lakou i lawe pio ai mai kahi hoomalu mai, a i ole, ua makemake maoli ia anei keia mau uhane ola e hoolilo i puu opala no loko o ka hale aila mahu o ke aupuni, kahi hoi a kakou e manao nei, he wahi kupono ole ia no ka noho ana, oiai na ea hohouo o ka aila e hoolahea ana i na pukaihu o keia poe a pau i onou aku la he maopopo ole ia ma kela wahi i kupono ole no ka noho ana, a ke kaukai aku nei makou, o ka loaa mai o na hoike kupono no keia mau hana pahaohao e ike ia nei.
THE HUB
HALEKUAI NANI O KE TAONA.
Ua loaa mai la ia makou mai ka hikina na lole huluhulu eleele i hana noeauia o na paikini hou. O ka waiwai io he $18.00; aka, mamuli o na La Nui, e loaa no ma Ka Hub, ua hoemiia 10.50.
He 150 Paa Lole Hui hulu Bolu a me Eleele o ka loaa ana mai la no ia mai ka hikina, he nani ko lakou mau nanaina, a na hanaia me ke akahele e pili pono ai i na mea a pau. O ka waiwaiio he $15.00, aka, no na La Nui e loaa no ma Ka Hub, ua hoemiia 8.50.
E hoomanaoia o ka makou waiwai o na Lole Aahu, Kamalii a me Opio, a pela pu hoi me na Papale, Papale Kapu, me na Lako Aahu ana he hou loa.
E kipi mai a e ike ou iho mamua o kou kuhiana, a e hookoeia no kekahi o kaumau dala. E hamama aku ana ko makou halekuai i na po a pau a hiki i ka Karismaka.
J. S. SPITZER.
ALANUI HOTELE KOKOKE I KE ALANUI PAPU.
HE WEHE NUI OI KELAKELA.
MA KAHIO
L. B. KERR.
ALANUI MOIWAHINE.
KUAI HOEMI NUI!!!
MAU WAIWAI PAIKINI HOU.
Lole Aahu Hou Maikai loa
HE EMI KE KUMUKUAI
Papale Paikini Hou o na Lede
HE EMI KE KUMUKUAI
Mikilima o ke anonan Loa
HE MAKEONO LOA.
He nui na Paku Lihilihi Hou
HE EMI KE KUMUKUAI
Mamalu Nunui a me Liilii
HE EMI KE KUMUKUAI
Na Lipine a me Lihilihi Hou
he emi ke kumukuai.
Pua a me na Hulu ano Hou
he emi ke kumukuai
Na Lole Piliili o na Wahine
he emi ke kumukuai
Na Uhi Pakaukau
me Tawele Lima
he emi ke kumukuua i
L. B. KERR.
Honolulu, Alanui, Moiwahine