Ke Aloha Aina, Volume V, Number 50, 16 December 1899 — Page 8

KE ALOHA AINA

KE ALOHA AINA. POAONO. DEKEMABA 16, 1809

HE MOOLELO WALOHIA

NO KA

UI SOPAEA.

ILOKO O KA HANOHANO.

A ME

TOME BAKALA

Ka Ilihune.

 

Hoohenoia no KE ALOHA AINA."

 

            Ua hoomalielie ia na manao pioo o ka lehulehu, mamuli o ka haawi koke ia ana mai la o kela papaaina e hoike mai ana, aohe he mau mea manao enemi iloko o ka puuwai o ka mea nana ua papaaina la, a me kana aloha kakia i ka iwi. 

            Ua hoohala ia ia mau hora loloa o ka po me na lealea i kupono i ka hauoli ana, e lealea ana me ka hauoli. 

            I na hora poniponi o ka wanaao, i hoopau ia ae ai keia anaina hauoli a hoi aku la na mea a pau me ka piha hauoli, a e ka haawi ana i na leo mahalo no na opio. 

            Aka nae, no ke keikialii a me kona mau hoaloha, eia lakou ke hoi nei me na manao lili iloko o lakou pakahi, mamuli o ko lakou hoohaahaa ia ana e ke kanaka opio. 

            A ia lakou e hoi nei ma ke alahele e hoea aku ai i ko lakou mau home pakahi, ia wa no i huli ae ai ke keikialii a pane aku la i kona mau hoa penei:

            I keia po, ke hoolilo nei au i kela kanaka opio i enemi noʻu mai kona wa aku, ke kanaka pakaha puuwai lokoino, naua i hoolilo i ko kakou kulana kiekie i mea hoohaahaa ia.

            A nolaila, e hookuu wale aku anei kakou i keia mau hana hookano a kela kanaka kuleana ole maluna o kakou.  aʻu hoi e ninau aku nei ia oukou pakahi, e hookuu aku anei kakou i keia wahi iliohae liilii e moe pu iloko o ka poli o ka kakou mea i anoi ai. 

            O kona make iloko o ko kakou mau poholima, oia ko kakou lanakila, a pela hoi e maha ai na palapu i loaa ia kakou pakahi, aka, ina aole oukou e komo pu mai ana ma ka noonoo ana i wahi e loaa ai ka lanakila ma ko kakou aoao.

            I ka wa i hooki iho ai ke keikialii i kana kamailio ana, ia wa koke no i lohe ia aku ai na leo hooho o ua poe la e apono ana i keia mau manao hoolala o ko lakou haku opio, me ka pane like ana mai o kou makemake ke hana ia.

            Mamuli o keia manao ohumuhumu o ua poe nei, ua huli a kuka like iho la lakou i na hana e pono a e holomua ai ka lakou hana.

            Ia wa no i pane mai ai kekahi o lakou, ano, ua loaa iaʻu ka kakou mea pono e hana ai, i wahi e hooko ia ai ko kakau mau iini. apono like kakou.

            Na keia leo o kekahi o lakou i hoohuli like ae i ko lakou mau nanaina maluna o ko lakou hoa, a ninau aku la p@nei:

            He aha na manaolana o ka pomaikai i loaa ia oe, e hiki ai ia kakou a pau ke hooholo like ae, pela io kakou e hana ai, ina nae he pono kau e houpuupu nei. 

            Ae, e hoike aku wau ia oukou me ka maopopo lea, ina oukou e apono ana, oia hoi e waiho kakou i na manao lili o ka inaina i ko kakou wa e hui ai me ko kakou enemi, a e hoikeike aku kakou he mau hoaloha kakou nona in a wa a pau.

            A oiai kakou e hoowalea ana iaia a me ka ui nohea a kakou i upu ai na ko kakou haku opio, ma ke ano he mau hoaloha oiaio nona, a ma ia ano auanei e holopono ai ko kakou mau manao, a e moe pono ai hoi ko kakou po.

            I ka wa e komohia ai laua iloko o ka paulele ana no ko kakou ano hoaloha me laua, a i ka wa e palaka a nanea ai o ua enemi la o kakou, oia ko kakou wa e leie aku ai a lawe koke i ke ola o ko kakou enemi me ke kali hou ole aku no kekahi manawa hou aku

            Ina hooko kakou i keia mau hoolala ana me ka malie, aole no auanei e nele ka hahai ia o ka kakou mau hana e ka pomaikai.

            Mahope o na kukakuka loihi ana o ua poe nei no ka lakou mea e hana ai, ua hooholo like ae la lakou e hooko elike me keia mau hoolala ana a kekahi o lakou.

            Mahope iho o ka hala ana ae o kekahi mau la, ua kipa hou aku la ua keikialii ala ma ke Kakela o ka ui Sopaea, a ia wa no hoi oia i ike aku ai i kona enemi, e hoonanea ana me ka Ua Nahua i ke kaha o Iloli. 

            Aia hoi, ua paila ia ae la oloko ona me ka inaina nui, a ke lohe ia aku la oia i ka namunamu liilii ana me ka hooouka ana i na huaolelo hailiili e puiwa ai ka manu mai ka punana aku. 

            Aka, mamuli o kona hoomanao ana ae na olelo ao a kona mau hoaloha, aole pono o ka hele kapalulu, aka e nihi ka hele i ka uka o Puna, a pela iho la i moe malie ai na manao lili iloko ona, mamua o kona hoea kino ana aku ma kahi ana i liʻa nui ai e hooko ia kona mau manao awahua o ka lokoino, ina nae hoi i hooko ia.

            Ua hookipa ia mai la oia e na kamaaina opio puuwai palupalu, a o na manao konakona iloko o laua, no ua keikialii ala, ua maalo ae ia mai ko laua mau maka aku, a aole loa he mau hoomanao ana iloko o ko laua mau puuwai; eia iho ka ino iloko kahi i lolii ai,

            Mahope iho o na hoolaulea ana elike me ke ano mau, ua haawi ia mai la he papaina nui i ku i ka hanohano o ua keikialii ala, a i ka nana aku, hewa i ka wai ka nui o na mea i hoolakoia mai.

            Aka, o keia mau mea a pau i hoolakoia no ua ino la, ua like ia me ka ole i ka manao o eia lapuwale nui.

            Ua ai a lawa, a ua inu iho hoi a kena ka puu moniai o ua ino ala, aka, o ka manao ino nae, aia no ia ke hapanapai malie ala, iloko o kona hupe, o ka loaa iaia o ka wa e hooko ia ai kona iini. 

            Iloko o eono mahina a oi o keia hoohalua ana a ua keikialii ala, aia hoi, ua loaa iho la iaia ka manawa kupono e hana ai no kana mea i makemake ai, e hookau aku maluna o ka mea hala ole. 

            I kekahi ahiahi, e hoopoluluhi ia ana ka lewa lani e na ao ua, a e ike ia aku ana ka hoholo ana o ka uila ma ka paia lani, a o ka leo nunulu o ka hekili, aia la ke kohakoha ala ma ka paia lani, e hoomanao mai ana i na opio, eia iho ka pilikia a hoea aku.

            I ke kulu o ke aumoe, i ka huli ana o ka ia, a i ka wa a na mapuna wai lani e hanini mai ana mai ke ao polohiwa mai, aia hoi he umi mea kino ola e kuoe ana no ka hooko ana i kekahi hana ano nui ku i ka weliweli. 

            Aia maloko o ko lakou mau kino pakahi, i huna ia ae e ko lakou mau aahu loloa e komo ana, a o ka pahu hopu a keia poe e hele nei, no ke Kakela no ia o ka wahine ui opio, no ka huli ana i ke kanaka opio a lakou i inaina ai. 

            Ae, aia ke maalo ae la. ke kiei la ma na hakahaka, ke nana la ma na olepelepe, a ke kokolo la me na maiuu, me he popoki la maluna o ka iole, e hookolo ana maluna o kona enemi. 

            Ke kokolo ae la me ka ike ole ia a ke nihi malie ae la me ka palanehe loa, aka, na ka owe o na pakana i hoike aku i na opio, ua hoea mai ka pilikia a e makaala no ko olua ola iho.

 

            O na moku lawekoa e hooa mai ana i keia pule, oia ke Centennial, Sherman, a me ka Flintshire.

            Aia maluna o ka moku lawe koa Warren he puali keaka Pilipine e huli hoi ana no Manila. 

            E HOOKOEIA NO KAU DALA.

Ke kipa ae ae ma ka halekuai o Rosenberg &Sohaumer.

104 Alanui Kalepa Ewa o ka Halewai.

            Ua loaa mai la ia makou he 20 pahu i piha me na Lole Aahu, a pu hoi me 25 pahu i piha me na Kii Paani.

Na Kii Paani 5 kenets a oii aku.

Na Paa Lole Huluhulu $5.50 a pii.

Na Pahu Lole, $4 iniha he $4.50.

Na Kamaa Rapa50 keneta.

Lihilih o na ano a pau 25 c. a pu

 

HE WEHE NUI OI KELEKELA.

MA KAHI O L.B. KKERR.

ALANUI MOIWAHINE.

 

KUAI HOEMI NUI!!!

MAU WAIWAI PAIKINI HOU!

Lole Aahu Hou Maikai Loa

HE EMI KE KUMUKUAI

Mikilima o ke ano nani Loa

HE MAKEONO LOA.

He Nui na Paku Lihilihi Hou

HE EMI KE KUMUKUAI

Mamalu Nunui a me Liilii

HE EMI KE KUMUKUAI

Na Lipine a me Lihilihi Hou

he emi ke kumukuai.

Pua a me na Hulu ano Hou

he emi ke kumukuai

Na Lole Piliili o na Wahine

he emi ke kumukuai

Na Uhi Pakaukau

me Tawele Lima

he emi ke kumukuai

L.B. KERR.

Honolulu, Alanui Moiwahine