Ke Aloha Aina, Volume V, Number 49, 9 December 1899 — Page 3

KE ALOHA AINA, POAONO, DEKEMABA 9, 1899.

 

HOOLE LOA IA KE KULEANA

------

O KE AUPUNI HAWAII I KA HOOLILO I NA AINA.

-----

Hoole o Amerika i ka Mana Oia Hana Mahope o ka Hoohui ia Ana o Hawaii Nei.

-----

            Ma ka mokuahi Alameda i loaa mai ai ka leta pane a ka Loio Kuhina o Amerika Huipuia, Jno. W. Griggs ia Peresidena Dole, mahope hoi o ka loaa ana aku iaia he mau kukai ana mai ia Peresidena Dole aku ma o Hon. A.S. Hakawela la ka Agena Kuikawa no ke aupuni Hawaii ma Wasinetona.

            E hoole loa mai ana o Loio Kuhina Griggs i ke kuleana o ko Hawaii nei hoolilo ana i na aina aupuni mahope iho o ka la 12 o Augate, 1898, ka wa i haawi lilo ia aku ai keia mau paemoku no Amerika Huipuia, a oia ke kuleana ma ka hooponopono ana i na mea e pili ana no na aina aupuni o ke aupuni Hawaii, aka, ua kue aku no nae ke aupuni Hawaii i na olelo o ka palapala haawi a lakou i waiho aku ai iloko o ko Amerika lima ma o ka hoolilo a me ka hoolimalima ana i mau aina aupuni nei.

            Aole o Loio Kuhina Griggs i ae mai la i ka A.S. Hakawela mau kumu kue i lawe aku la ma ka aoao o ka Repubalika Hawaii aka, aia no nae oia ke paa la maluna o kona kahua, o ka Ahaolelo wale no o Amerika Huipuia ke kuleana ma ka hooponopono ana i ua mau aina la.

            O na poe i kuai a i ole i hoolimalima i keia mau aina, e hoihoi hou ia aku no ka lakou mau dala, aole nae mai ka waihona aku o ke aupuni Hawaii, koe wale no ka ae ana a ke kanawai.

 

E HANA KOKE IA.

-----

            Boise, Idaho, Nov. 26. Ua haalele iho o Senatoa Shoup me ka ohana no Wasinetona i keia la, aka, e hoohala nae oia he la ma Loko Paakai. Ma kekahi kamakamailio i malama ia ae mamua o ka haalele ana iho, ua olelo ae ka Senatoa, ua oo ka manawa, ma kona noonoo ana, no ka lawelawe ana aku o ka Ahaolelo me na manao maikai no Hawaii a me Porto Rico. Ua olelo ae oia ua maopopo nui ia kakou i keia wa ka makemake oia mau mokupuni, elike hoi me ko kakou maopopo mahope o kekahi makahiki hou aku. He kokua nui loa oia i ka hana ana i na kanawai e ikeia ana he kupono. A he manaoio kona aole he mea pono ka hana ana i kanawai no Pilipine a me Cuba i keia wa.

 

E HOOMAU NO I KE KAUA

-----

UA HOIKE AE O AGUINALDO I KONA IINI.

-----

Aia no na Amerika e Uhai la Mahope o Kona mau Meheu.

-----

            Manila, Nov. 26. O ka halawai kuka kaua hope loa a na Pilipine, ua malamaia ae ia e na alakai ma Bavombong, ma ka 13 o Novemaba, maloko o ka hale e noho ia nei e Kenerala MacArthur, ma ia halawai ua hoea ae malaila o Aguinaldo, Pio dela Pilar, Garcia, Alejandiro a me kekahi mau hoa o ka Aha Kuhina. Ua hoike mai kekahi poe ua ike keia aha kuka i ka waiwai ole o ka hoomau ana aku i ke kue hou ana aku i na Amerika me na pualikoa i huiia, nolaila, ua hooholo ae lakou e hookau liilii aku i na pualikoa Pilipine, a ma keia hope aku e hooko hoi i na hakaka liilii ana. O ka mahelehele ana o na Kenerala me ko lakou mau puali penei no ia:

            Kenerala Concepcion me 340 kanaka, me ka apana Nu Egiji, Kenerala Macobolos, me 325 kanaka i ke taona o Binaca, ma ka apana o Tarlac, Kenerala Pio dela Pila, me 800 kanaka, ma ka hikina akau o Malolos; Kenerala Aquino, me 500 kanaka, ma Arayat; Kenerala Miguel, me 150 kanaka, ma ka apana o Zambalos; Kenerala Moscardo, me 1,100 kanaka ma na mauna, ma ke komohana o Angeles, a me ka huina nui o na puali, malalo o Kenerala Triss, ma ka apana o Cavite.

            I ka la nehinei he 4 koa o ka mahele D o ka regimana Eiwa e hele ana mawaho aku o Bayombong ua hopu ia lakou e iwakalua Pilipine i lele kaua mai, he hookahi i make. Ua lohe o Lutanela Fraser i ka leo o ka pu, a i ka wa i uhai aku ai ua nalowale aku la na Pilipine me ka lakou mau pio.

            Manila, Nov. 29. O Kenerala Young me ekolu mahele o ka puali kaua lio Ekolu a me ekolu puali Macabebe ua hoea aku la lakou i Namacpacan mai San Eernandino de Union, ma ka Poaha, Novemaba 23, ma ke alahele e uhai ana ia Aguinaldo, ua loaa mai la lakou na mea e pili ana no Aguinaldo, oia hoi, ma ka Poalua, Nov. 21, oiai, o Kenerala Young e kali ana ma San Fernandino nona, aia o Aguinaldo ma kahi he iwakalua wale no mile ma ka akau o Namacpacan.

            Ua manao ia aia o Aguinaldo ke pee la ma ka apana o Abra.

            I ko Aguinaldo wa i kaalo ae ai ma Namacpacan, o kana kamailio a pau no ka hoomau ana aku no ia i ke kaua.

            Manila, Nov. 25. Ua lele kaua mai na Pilipine i keia po ma Imus he ekolu koa Amerika i hoeha ia. O ko lakou poino he elua i make a me hookahi i hopu pio ia. Ua hoounaia aku la he pualikoa mai anei aku no ke kokua ana i na Amerika malaila.

            Manila, Nov. 25. O ka nee ana aku no ke kue ana i na kipi ma ka mokupuni Pansy, ua kipaku aku na Amerika i na kipi no iwakalua mile iloko o ka aina. O na poino o na Amerika he 5 i make, a me 38 i hoehaia. He 32 kipi i make a me 19 kaa i piha me ka poe i hoehaia.

 

UA HALA MA KELA AOAO.

-----

            Ma ka Poakolu, la 6 o Dekemaba, 1899, ua hala aku ma kela aoao mau o ka make, o Mrs. Kaluahinui Kauimakaole, ma kahi noho o ka na ohana keiki ma Kolulu, Honolulu, malalo o ka hoomailo loihi ana a ka mai i kona kino a hala wale aku la oia i ke ala polikua ai Kane, i ke 65 o kona mau makahiki o ke ola ana, a o ka makani Kailialoha o Kipahulu, kona one hanau.

            Ua nui no na hooikaika ia ana i ka huli i ke ola i na kauka a hala wale aku la. Ua mare ia o Mrs. Kaluahinui Kauimakaole me P. Kauimakaole i ka la 19 o Okatoba, 1872, ma ka luakini o Waianalua, Hana, e Rev. E. Helekunihi, oia laua he mau hoahanau no ia ekale aia.

            Eia he elua ana mau keiki e ola nei, oia o Iona Nakila a me Joesph Kauimakaole.

            Ua haalele aku laua ia Hana ko laua wahi paa i ka manina o Feb. 19, 1897 no Honolulu nei, a mai ia wa mai a hiki i kona make ana aku la, aole oia i ike hou i ka aina, a i na keiki, ka ohana a hala aku la oia. Ua noho laua i Honolulu nei me ka malama maikai ia e na keiki mua a kana kane, He wahine oluolu oia, he heahea i na pee a pau e kipa aku ana ma kona home, a he Aloha Aina oiaio hoi, ua kupaa ma ia aoao a hala wala aku la.

            Ua waiho iho oia i ka ukana kaumaha mahope nei na makou e paiauma aku na keiki me ka ohana e noho mai la i ka aina.

G.P. WAILEHUA.

Kolulu, Honolulu, Dec. 6, 1899.

 

OLELO HOOLAHA.

-----

            Mai keia la 1 o Nov. 1899, ua hoonoho aku au ia Foots, Iapana a me kona mau hoahana e noho maluna o ke kai lawaia o "Kahala," a lawaia, e like meka hoapono ana mai o ka Agena o Ke'lii Liliuokalani, a ua mana o Foots (Iapana) no ka lawaia ana, a o ka lehulehu aole i ae ia e komo wale a lawaia maluna o ke kai i hai ia maluna, ke ole e lawe pu aku e hoikeike i ka palapala ae ia mai ka Agena o Ke'lii. O ka mea a mau mea e kue ana i keia hoolaha, he mana ia Foots (Iapana) a me kona mau hoahana ke hopu a hoopii ma ke kanawai no ke komo hewa.

W.C. AKANA.

Luna Malama Aina o Kahala.

Honolulu, Nov. 6, 1899.

 

Mai ka aoao elua mai.

manawa kula, e hookuu mai no na lakou e hana ka lakou hana, no ka mea, he poe lakou ua piha i ka maalea, a o ko kakou pakele wale no, oia ko kakou hookuu malie aku no na lakou e hana i ka hana a lakou i kuleana ai, ina nae hoi he kuleana io. O ka makou keia e ao nei, o ka lohe ke ola, a o ke kuli ka make. Malia paha o keia kakau ana aku o oukou, he mea ia na lakou nei e keha ai ia Amerika, he kokua no ka hapanui o ka lahui Hawaii i ka lakou mau hana, a o keia hoi ke alahele pololei ma ko lakou aoao, i ka wa hope loa o ko lakou mau la maluna o ka poho ana aupuni o Hawaii. E hoomanaoia oukou iho, a mai kakau aku.

 

Nuhou Kuloko

-----

            He poe keaka hou kai hoea mai la maluna o ka mokuahi Alameda no ka hale keaka Onuma.

            O ka Poakahi nei kekahi o na la paka aki ma ke kulanakauhale nei, ma ka halawai ana me na ulia poino, he moe ino paha ko ka po.

            Ua make hikiwawe he kanaka Hawaii nona ka inoa o Kawelo ma ke kakahiaka Poakolu nei i ke kanahiku kumamakahi o kona mau makahiki.

            Ma ke kakahiaka nui Poakolu nei Nov. 29, ua haalele mai la i keia ola ana o Mrs. M. Kailiwai ma kona home noho ma Kapalama. Ua haalele iho oia he kane, mau keiki a me na moopuna e u ana nona.

            Imua o Lunakanawai Apana Wilikoki ma ke kakahiaka Poakahi nei, i hoopai ia ai o Kauka A.A. Mahony o luna o ka moku lawekoa Indiana, he $100 me na koina pu o ka Aha. Pokeokeo no.

            Ma Colwyn Bay, North Wales, Novemaba 7, 1899, i haalele mai ai i keia ola ana o Eliza Prescott Luce ka wahine mare a George H. Luce, i ke 82 o kona mau makahiki. He kamaaina kana kane o Honolulu nei, a pela pu no hoi me ia, a ua aloha ia hoi. Ua hoopomaikai ke aupuni moi o Hawaii i kana kane i Luna Auhau nui no Honolulu nei, Hoakahi a laua keiki i Hawaii nei, oia o W.S. Luce.

            Ma ka auina la Poakahi nei, ua loaa iho la o Keiki me kekahi ulia poino, ma ka pii ia ana e na huila o kekahi kaa puiwa, oiai oia i lele mai ai mailuna mai o ke alapii o hope o ke kaa hapaumi, mamuli o ka hookuko ana mai o ke kalaiwa o ke kaa hapaumi no kona kau wale me ka uku ole. Ua moku pu kekahi aoao o kona poo, a ua nui hoi na palepu i loaa iaia. Ua hapai ia ae oia e na lima kokua, a hoihoi ia aku la iloko o na kulu koko e kiheahea ana ma kona kino. Aole i maopopo o kona ola.

            Ua hoololi ia ae la ka Papa Kuhikuhi o ka halekeaka Orpheum i keia po.

            Eia ka halekuai Pacific Impor Co., ke kuai hoemi nei i kona mau waiwai nui hewahewa.

            Maluna o ka Alameda i huli hoi mai ai he poe Hawaii no ka aina hanau, a mawaena oia helu J. na o Wise a me Maggie Nape.

            O ka mokuahi Alameda mai la ko ka Poakolu nei mai Kapalakiko mai, me na nuhou makamaka no na lono pili kaua. Ke hoonuanua mau nei na kolamu o KE ALOHA AINA me ia mau makana makamae.

            E hoomaka ana mai keia Poakahi aku, e malama au he kuai hoemi nui ma ka halekuai o L.B. Kerr, ma alanui Moiwahine. E alawa ae i kekahi mau waiwai e kuai hoemi ia aku ana oia kana hoolana.

            O na moku lawekoa e hoea mai ana ma keia mua koke iho, oia no ke Dalny Vostock ame ke Columbia me ka regimana 42, a me ka Warren me elua bataliona o ka regimana paele, 29, a maluna o ka moku lawekoa Sherman e lawe ia mai ai ke koena o na koa oia regimana.

 

UA LOAA.

            I ka Poalua nei, ma ke alanui Moi ma kahi kokoke i kahi hoolulu kaaahi he Koloka koa. O ka mea nona keia waiwai e kii koke mai me ka hoakaka pu mai i kona ano a me ka inoa maloko. A e uku no mai hoi i ka uku hoolaha a me ka luhi o ka mea nana e malama nei, ma ke Keena o KE ALOHA AINA.

 

PIANO KUAI.

-----

            He Piano hou loa, Piano maikai i hana ia ma Geremania. Kona kumukuai mamua $350, aka, e kuai ia aku ana no ka $200 wale no. Ina e inoino ke kani ana, e hana wale ia no me ka uku ole maloko o hookahi makahiki mai ka wa e lilo ai. E ninau ae ma keia Keena. nov2-tf

 

Kauka Ookawara.

(HE IAPANA)

-----

Kauka Lapaau i na Ma'i a pau me na Ma'i Pili Ili.

            MANAWA HANA: Hora 9 a.m. a hiki i 12 m. Hora 7 p.m. a hiki i ka 8 p.m. No na La Sabati, hora 9 a.m. a hiki i ka 12 m.

            E loaa no oia ma ka hale o Lilia Piikoi ma ke Alanui Kukui.

 

E HELE MAI.

-----

            Ina he makemake oe koe kekahi o kau mau dala e hele mai ma ka halekuai, 104, Alanui Kalepa, ma Ewa iho o Kahalewai. He 90 pahu o na Lole Aahu i loaa mai.

Paalole Huluhulu Bolu.....$8.00

Paalole Huluhulu.....7.50

Lolewawae Ahinahina......50

Kuka Aila Hele Ua.....2.50

Kuka Hele Ua Baba.....4.50

E hele mai e ike nou iho.

BOSENESEG & SCHAUMEE.

Helu 104.....Alanui Kalepa.