Ke Aloha Aina, Volume V, Number 44, 4 November 1899 — Page 3

KE ALOHA AINA

 

KE ALOHA AINA, POAONO, NOVEMABA 4, 1899. 3

 

HE LETA MAI AMERIKA MAI

 

Boston, Oct. 15, 1899.

            Mrs. E.A. NAWAHI,

            Aloha oe:-

            Ua loaa mai nei kau leta ia'u a me na nupepa ALOHA AINA, a ua lilo i mea hoohauoli i ke kamahele auwana, ua hele mai a uluhua i ka aina malihini a e ake ana no e hoi aku e hanu hou i na ea oluolu o Hawaii aloha, a ke ake nei e ike hou aku i kona mau kaiaulu aloha.

            Ae! He nani no keia a ka maka e ike nei, he nui na mea kamahao a ke kamahele e ike nei, eia nae, me ia mau mea ano e no i ike ole ma ka aina hanau, eia no nae e maalo ae ana no imua o ka mama o ka "hoomanao," aa mauna kilakila, na puu kamahao, na awawa uliuli, na waonahele ulu wehiwehi, a me ke ala ke lawe ia mai nei no e ke aheahe lau makani ka leo hawanawana o kona mau kahawai owe malie, aohe no he wahi nani elike me ka Home Kulaiwi, a hoomanao ae la au i ka himeni a ke alii i haku ai:

E ka gentle breeze e pa mai nei,

Halialia mai ana ia'u.

            Ua hoonuunuu iho la nae au i na mea hou o ka aina hanau, a ua ano mama iki no la hoi ka manao uluku no ke ake e hoi aku, a e imi hou ae paha ke kamahele auwana i wahi puolo e hoi aku ai, o lo@a auanei au i kela olelo o ka aina kulaiwi o kaua.

He puolo nae paha ko ka lima?

Aole puolo, alaila pania aku ka puka o ka hale o kaua.

He wahi puolo ia e paa mai nei?

Alaila wehe ka puka o ka hale o kaua?

            Ma keia leta hope aku nei a'u ia oe, ua haule no paha kekahi mau mea hou, aka, o ka mea e hauleana no kahi manawa aku no hoi paha ia e kaao aku ai. Ke ole paha au e poina ua hiki mai la paha maua la i Bosetona ma ka leta hope, ka pahu hopu hoi o kahi o ka hana i hele mai ai, a ua hui iho la me ka anela eheu nui o Kaumakapili,a ua noho iho la ma ka hale a laua e noho ana me kona kokoolua o ka aina Hamauleo.

            Ia makou e hookokoke mai ana ia waho o ka hu'a o ke kulanakauhale kaulana o Bosetona, e ike ana makou i na hale nani e maalo ae ana malalo o ha lau o na kumulaau, aole nae e hiki ke hoomaopopo pono loa aku, oiai, ke holo mama loa nei ko makou lio ahi, me ka mama nui, a ua olelo mai la o Emekona ia maua, o ka home ia o na poe waiwai o ke kulanakauhale, aia ka lakou hana ma ke kulanakauhale, aka, o ka home noho nae me ko lakou mau ohana mawaho o na palena, a o kahi oluolu hoi ia, a i kaawale hoi mai na nakeke a me kaauahi o na hale hana ma ke kulanakauhale.

            Ia maua e kamailio ana, e lohe mau ana au i ka olelo a Kauhane, Kupanaha! Kupanaha! A ninau okoa aku la au iaia heaha keia mea kupanaha au e hookani nei. Kahaha, wahi ana, aole ka hoi ou ike aku i na hale nani, na pa nani, na alapii kikeekee, aole anei ia he kupanaha.

            A ia makou no e holo mama nei e hookani ana kekahi, aia ke kia hoomanao o Bunker Hill, kahi hoi i ki mua ai ka pu o ke kuokoa o Amerika mai a Enelani mai. Ua hoea aku la makou i kahi hoolulu kaaahi, aia makou no a lele, e ku mai ana o Mrs. Emekona, e kali mai ana no ka mea aloha he kane, a nana ae la hoi au i na la hoi he wahi mea aloha ka'u e kali mai ana, eia ka aole no, (he apiki keia la.) Kau aku la ma ke kaa poi pu a iluna a ilalo e la hele ia ana, kai no hoi o ke kaaahi ke ino, ka lulu ia, eia ka hoi ka oi; me he ala, aia makou i na ale hulilua o Alenuihaha, a o ke kumu o keia, ua kipapa ia na alanui me ka uinihepa aole he laumania elike me ko Honolulu, a hoomanao ae la au i ke mele a ia makua o ka Malu Ulu o Lele i haku ai no Kilauea.

Holo lolelole. Holo lolelole.

Holo lolelole. Lolelole Kilauea.

            O ke ahiahi Poaono keia, a o ka la 6 hoi o Sept. a makou i hoea mai nei i Bosetona nei, hoea a komo na wahi aahu kupono a hele aku la me na kamaaina mua o Bosetona e paina. He oluolu maikai ke ea, a ua like me na ea hu'i o Olaa, Hooumoe iho la ia po ma keia kulanakauhale, a'u i lohe nui ai, eia nae o ko'u hoa i hele mai ai, (J.K.) haule no kela nonolo ka Maunaloa i ke lai o Kona me ke alahele no ka Ua Haao. A o makou iho he keaka ka hana no ke ano o ka makou huakai i hele mai ai, kipaku ole ia paha makou e ka poe nona ka hale no ka molowa. A ina hora liilii o ke aumoe, hiolani aku la me Niolopua, e hoeuhane ana no nae no Hawaii.

            Sabati 10. He Sabati keia a i ka halepule o ka poe Babetile ka makou pule o keia kakahiaka, he halepule i ano like me ke ano o ka halekeaka kona kukuluia ana, a ua hele no hoi a le-i Kohala i ka nuku na kanaka, eia nae ua laki makou ua loaa ko makou wahi e noho ai, a o ka papa himeni he aneane kanalima poe himeni.

            He ekolu wahi e noho ai na kanaka he papahele iluna loa, iwaena, a i lalo loa no hoi, a o ke kahunapule he wahi haole ano aoo, o Dr. Lorrimer kona inoa. Ua kuhi hoi au owau ke kahunapule leo nui o Hawaii eia ka hoi oia nei ka oi. He lele io a io, eia nae nui ka waiwai o kana haiolelo, a na pomaikai nui makou i ka lohe ana iaia. Ma keia luakini ni i malama ai makou i ka halawai nui a makou i hele mai nei, he aneane 2,600 kanaka e pau pono iloko o keia luakini, a o kona inoa "Tremont Temple."

            I ka auina la e like no hoi paha me ke ano mau o ka malihini, hele holoholo aku la makou ma ke kahua i kapaia o Commner, he wahi i hookaawaleia no ka lehulehu e hoomaha ai, a ma keia wahi e malama ia ai na haiolelo like ole o kela a me keia hoomana, e lohe ana au i na ohe a ka Puali o ke Ola, na ogana lima a ka Meditoka, a me na puali himeni o kela a me keia ano, e hai ana i na olelo a ke Akua i na kanaka, oiai, o ka hapanui o keia poe, he poe ike nui ole ia ma na luakini.

            Maanei no hoi au i lohe mua ai i ka haiolelo "hoole Akua, hoole Baibala, hoole uhane o ke kanaka, a hoole no aole ala hou ana o ka uhane." He haole opiopio ka mea e haiolelo ana. O ka mea ike ole ia ma Hawaii, ua ike iho nei au ma ka aina hoi a'u i lohe mau ai mailaila mai ko kakou malamalama. He oiaio no e hana ana no ka poe ma ka aoao o ka malamalama, a o ka poe no hoi ma ka aoao o ka pouli hana no lakou.

            I ka po iho ma ka halepule o ka poe waiwai o ko kakou aoao hoomana ko makou wahi i hoolohe ai i kekahi haiolelo naauao loa. Eia nae, ua olelo mai ko'u mau hoa he maloo haha no ka heluhelu ia mai o ka haiolelo, a no ka hohonu loa paha kani o ka manao.

            Poakahi, Sept. 11. Ma keia la ua hele makou i ka hale oihana o ka Papa Amerika, a ua loaa pu mai la hoi me na wahi nupepa i hoouna ia mai nei mai Hawaii mai, a ua hele pu aku la hoi makou ma ka halawai hui o na kahunapule like ole o na hoomana like ole. O ke kahunapule o kela luakini Babelite, oia ka Peresidena o keia ahahui, he halawai hui keia e hoolele ana i na manao like ole o ke ano hooomana, a e imi pu ana i na mea e pono like ai ke Aupuni o ka Akua ma keia kulanakauhale.

            Ua haiolelo mai he Elele mai Enelani mai, he aho lawaia kana no ke kai hohonu o ka hele no ia a pau na kaau eha, ku ka pohaku ilalo. A i ka nau ana o kana, ua kahea ia mai la makou a pau e ku iluna, na Elele o Hawaii, a ua ku ae la makou, a hele aku la e lulu lima me ka Peresidena, a ua paipai nui ia mai. O Timoteo o makou ka mea haiolelo i unuhi ia o Emesona, a ua nui ka paipai ia mai no ka pahee no hoi paha kekahi o ka olelo nani o Hawaii, a i ka pau ana o kela haiolelo, ua hele mai la kekahi poe e lulu lima me makou. O ka hapanui nae me Timoteo ma, a ua kuhi no kekahi poe o lakou ia'u he kahunapule Geremania, a mahope ua ninau okoa mai la kahi mea ia'u ina paha au he Hawaii. "Ae, he Hawaii au ma ka hanau aha, he Hawaii au ma ka olelo ana, he Hawaii au mai loko a waho, a he puuwai Hawaii no hoi."

            E kuhi no paha oe ia'u he kanaka e Owau okoa no keia mailuna a lalo e.

            Ua ninau pu mai la no hoi kahi wahine ia'u, ina paha, ua naauao na kanaka Hawaii elike me makou? A ua olelo aku au, he naauao, a ua oi aku imua o ko makou naauao kekahi poe o lakou, aole paha he kanaka ike ole o hawaii i ka heluhelu a me ke kakau. He keu no ka nui o ka naaupo o kekahi poe o keia aina no ko kakou aina. Ke hoomanao nei au i ka olelo a kekahi wahine haole ia'u, he makemake no hoi oia e hele i Hawaii, eia nae hilahila oia ke ike aku i na kanaka he hapa olohelohe lakou, ua pane aku au iaia, he hilahila nae oe ia'u, au e ike mai la, heaha hoi ko'u mea e hilahila ai ia oe?

            A ma aole oe e hilahila ana ia'u, alaila, aole oe e hilahila i kuu lahui oiai, elike no me a'u pela no kuu lahui, a o ke kanaka Hawaii e hele ana me ka lole ole, he pupule ia, a e hoopaa ia ana oia, a hai hou mai la oia ia'u no kona ike ana i ke kii olohelohe o ka Hawaii, ua olelo au iaia, he kii ia na na haole ano kolohe a wahine ano kulana lede ole hoi i pai hoi mamuli paha o ka uku dala ana i kahi poe Hawaii puni wale, a lilo iho la ia i mea e kuhihewa ia ai ko'u lahui he lahui naaupo.

            E! Auhea oukou e ka poe puni wale e pai ia ko oukou mau kii olohelohe me ka malo a pa'u paha, mai ae hou, na oukou hoi e hana, maewaewa pu kakou a pau.

            Ea, piha opala loa paha ka nupepa ia'u, o na mea hou paha hoi kai makemake ia, aka, e kala mai no keia mau mea.

            I ka auina la o keia Poakahi, ua hele makaikai iki makou ma na alanui, auwe, nui no hoi ka haole, aole alanui au e hele aku ai e halawai ole oe me ke kanaka, ua ku makou ma ke kihi o kekahi alanui, a e iho ana a pii mai ana na kane, na wahine a me na keiki, nawai ole no hoi ke kanaka, oiai, he 600,000 a oi iki aku ka nui o na kanaka o keia kulanakauhale ponoi iho, a koe aku na kulanakauhale e hoopuai mai ana.

            Eia ka hoi kekahi, i ke ahiahi Sabati, ua kau makou maluna o na kaa na ka uwila e hooholo, a o ka mea ano e, aia malalo ae o ke alanui maoli o ke kulanakauhale kahi i holo ai keia mau kaa, ma Kikako au i holo mua ai, o ko laila hoi ua eli malalo ae o ka muliwai, a o ko Bosetona nei hoi malalo ae o ke alanui a o ke kumu i hana ia ai pela, no ka haiki o na alanui ma kekahi mau wahi, nolaila, ua eli ia malalo o ke alanui, a he eha kaa e holo i ka manawa hookahi, oia hoi, he eha alanui hao i hana ia malalo o keia mau alanui poe, a ua hoopaa la ae oluna me na papaa hae e hoopaa ia ana e na pou hao, a o na aoao, ua hoopaa ia me na pohaku uinihapa, kupanaha no hoi ka maiau o ke kanaka, a o ia mea no ia a ka elemakule o Kau e olelo ai; Kupanaha o na kupanaha, pau loa na mea i ke kupanaha.         

            Poalua, Sept. 12. Aole no he mau mea ano nui i ikeia o keia la, koe wale no paha ka nalowale ana o Kauhane, a penei kahi moolelo no ia nalowale ana.

            Ua hele pu oia me Timoteo a me a'u no hoi e paina, a i ka pau ana o ka makou paina ana, ua puka mai ia makou, a hele mai la maua, a ua maa no o Kauhane i ka hele mau mahope, nolaila, ua kuhi no maua eia no la oia ke hele mai nei mahope o maua, a i ka hiki ana i kekahi halekuai a makou i manao aie kuai i kekahi mau mea kuai, i huli ae ka hana, aole kela, ua lilo i mea puiwa loa no @, ia holo hou maua e imi, a he ole ka loaa, a ua lilo i mea no maua e kaumaha ai, oiai, he malihini loa oia, aole i kamaaina loa iho i ke kulanakauhale, e like la me keia mau la ua hiki oia e hele nona iho, ua noonoo iho la maua e hoi koke a hahai aku ia Emesona i hahai aku i ke poo o ka Oihana Makai no kela nalowale, a ua hoi aku ia maua me ka ahewa o maua ia maua iho, a i ka hoea ana aku o maua i ka hale o makou e noho ana, e ku mai ana keia mawaho o ka hale me na lima iloko o ka pakeke. A i ka olelo ana aku ka hana no kona nalowale ana, a huli nui maua iaia, e olelo mai ana kela i ka hua o ka aka.

            "Kahaha, aole paha owau-kai nalowale o ka mea i hiki e i kauhale nei, oia ka ka olua e olelo mai, ua nalowale, o olua paha na mea i nalowale." A hu ae la ko makou aka.

            I ka Poakolu a me ka Poaha, aohe no he mau mea ano nui e hai aku ai, aka, ma ka Poalima, Sept. 16, ua holo makou e makaikai i ke kula nui o Havard College a me ke kauhale o Camabirigi, (oia paha ma ka olelo Hawaii),.

            O keia kekahi o na kula kaulana loa o Amerika nei a he kula kahiko loa hoi o keia aina. Ua komo makou ma ka hale kahi e ao ia ai na keiki i na oihana kamana, kaha kii hale, a akemai eneginia, a mailaila aku a ka hale hoikeike o na mea kahiko e like me kela hale o Kamehameha.

            He nui na mea kupanaha o kela a me keia ano ma malaila ka iwi o na holoholona i ike ole ia ko lakou ano i ka wa o keia mau keneturia, aole no paha he mea i ike ia lakou koe wale no paha na kanaka o ke au kahiko loa i hoomaopopo ole ia, o na iwi nae o keia mau moo nunui a me na holoholona nunui ua loaa aku, a ua hoola mailalo mai o ka honua. A ua manao au oia, pa-

E nana ma ka aoao Eono