Ke Aloha Aina, Volume V, Number 38, 23 September 1899 — Page 1
This text was transcribed by: | Kate Motoyama |
This work is dedicated to: | with respect to emma n nawahi, ke aloha aina |
KE ALOHA AINA
KE ALOHA AINA
HILO BAY, HAWAII
UA MAU KE EA O KA AINA I KA PONO
HOOKUMUIA 1 MEI 20, 1895
--
BUKE V. HONOLULU, POAONO, SEPATEMABA 23, 1899 HELU 38
--
KA NUPEPA KE ALOHA AINA
--
E hoopuka mau ia aku ana mai ka Poakahi a ka Poalima o na pule a pau o kela me keia mahina
Ka Uku Pepa, he 20 keneta o ka pule: No ke kope hookahi, he 5 keneta.
E loaa no ka pepa mai ke Keena aku o KE ALOHA AINA, a mai ka lima aku o na Luna Lawe Pepa.
E pai ia no na Olelo Hoolaha, na Kanikau me na Mele Inoa me ke Dala kuike. Aole nupepa ma ka owili pakahi e hoounaia ke ole e hookaa mua ia ka uku pepa.
E hoouna pololei mai i na Nuhou, na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.
Aole loa e hoopukaia a hoolahaia kekahi manao ma na kolamu o keia pepa, malalo o kekahi inoa kapakapa ke ole e hoike mai i ka Luahooponopono i kona inoa ponoi.
Ka Nupepa Puka Pule
Ke - Aloha - Aina
Hookahi makahiki . . . $ 2.00
Eono mahina . . . 1.00
Ekolu mahina . . . .50
Hookahi mahina . . . .40
EMMA N. NAWAHI.
Puuku o
Ke - Aloha -Aina
EDWARD L. LIKE.
Lunahooponopono a Hope Puuku.
S. P. KANOA.
Hope Lunahooponopono.
O na kauoha Nupepa me na hookaa Dala, e hoouna pololei mai i ka Puuku ma Honolulu.
--
Nuhou Kuwaho.
--
NA MOKU LAWEKOA NO MANILA.
Kapalakiko, Sept. 10. Mamuli o ka hoomaemae ia ana o ka Sherman, nolaila, aole e haalele iho ana ia mokukoa a hiki i ka la 21 o Sepatemaba, me ka regimana 30. O na bataliona elua i koe iho o ka regimana 34, e kau aku ana lakou maluna o ka Belgian King ma keia Poalima ae. O ka regimana 27 e hookau ia aku ana lakou maluna o ka Tacoma a me George W. Elder, e holo aku ana ma ka la 19 a me 20. O ka regimana 26 mai Plattsburg, N. Y. a me ka regimana 33, mai Houston, Tex., ua manaoia e hoea mai ana lakou ma ka la hope o keia pule.
NA AO OMAMALU KAUA MA ENELANI.
Ladana, Sept. 9. O na pualikoa e holo ana no Aferika Hema elike me ka hopena o ka olelo hooholo a ka Aha Kuhina ma ka la halawai inehinei e hoouna ia aku ana he 10,000 koa i Natal, a he hoomahuahua ana aku oi ia i ka heluna o na kanaka ma ia Panalaau a hiki i ka 15,000. He 5,000 o keia heluna e unuhi ia mai ana mai Inia mai.
O ka regimana Northumberland Fullisers e kau aku ana lakou ma keia Poaono aku. O ka regimana Royal Sussex Ekahi, ua haawai ia aku ke kauoha ia lakou no ka hoomakaukau e kau aku maloko o ekolu la. He pu alikoa helewawae a me kekahi mahele koa pukaa mai Aidershot me 18 pukuniahi, kai haawi ia aku la ke kauoha no ka haalele ana iho.
Malta, Sept. 9. O ka Bataliona Ekahi o ka Regimana Border, ua haawi ia aku la ke kauoha no ka hoomakaukau ana ia lakou iho no ka holo ana aku i Cape Colony.
KA MOKUAHI O KA HUI O WAILA MA.
Kapalakiko, Sept. 8. He mokuahi e ae kekahi e hoolana ia ana mai ka pa kapili moku o Hav @ Wright, mamua o ka pau ana o keia mahina. Ua kapili @a keia mokuahi no ka Hui o Waila ma, a e kapa ia ana oia o Kaiulani. He 150 kapuai kona loihi, 30 kapuai laula a me 12 kapuai hohonu.
HULI HOI NO KA HOME.
Gibaralereta, Sept. 10. O ka mokuakaua Olympia, me Adimarala Diuwe maluna on a, e haalele iho ana oia i keia auina la no Nu Ioka.
--
Ua aa aku la ka moku kiakahi heihei Gladys o Hobron, i ka La Paloma, ka moku heihei o Mkapolena a hiki i bee o Lahaina. Ua ae aku o Makapolena, a me he mea la, ma ka Poakahi ae nei, e malamaia ai keia heihei.
KA LA HEIHEI NUI.
--
HE MAU TAUSANI O NA MA-
KAIKAI
--
Piha-u na Uwapo a me na Moku
me na Lahui Like Ole.
--
Ma ka oili ana mai o ka la ma ke kakahiaka Poaono nei, a mamua ae hoi o ke kaui ana o ka hora 9 o ia kakahiaka, aia hoi, na lahui like ole e kao ana no ka uwapo, a ma hoea ana mai hoi o ka wa e malama ia ai na kahea heihei, ua hele na uwapo a me na moku e ku ana maloko o ke awa a lehau me na kauaka, a ma ka uwapo Pakipika Maila i hoonanea mai ai ka bana i na poe makaikai me ka leo kani o ka lakou mau hokeo, a penei hoi na heihei i malama ia ai.
1. Heihei Waapa Huelo Boti--Makana mua $30; elua $10 o Moanalua a me Fishing Boat, o ke alahele a laua i holo aku ai mai ke kahua aku hoi a na lunakanawai e noho ana a hiki i ka boe apiki a hoi hou no ka pahu hopu. Ua lilo ka eo i ka inoa mua. O ka manawa i holo ia 18 minute me 10 sekona.
2. Heihei Waapa Eono Hoe--Kiaha $50. O ka Healani a me ka Matala na waapa i komo ma keia heihei. E like me ke alahele mua a na waapa maluna i holo aku ai pela no ke alahele a keia mau waapa i lawe ae ai. Ua lilo ka eo i ka Healani, manawa 12:27 25 minute.
3. Heihei waapa eono nee. Healani a me Matala, o na poe kahiko nae, mamuli o kekahi hoopaapaa aole i holo ia keia heihei.
4. Heihei moku kiakahi papa ekahi. Bonnie Dundee a me Gladys Ua hoohemo aku ka moku mua me ka ukali kokoke aku o Gladys mahope on a ma ka boe bele ua kaulike laua ma ka pahu o Waikiki, ua hala aku ia ke Gladys mamua, ua hoomau oia ma ia kulana a hiki i ka noea ana mai i ka paha eo, me ke kipa pu ana aku ma Puuloa. He 5 minute me 40 sekona ka like ole.
5. Heihei moku kiakahi papa elua Helene a me Hawaii. Ua lilo ka eo i ka Helene.
6. Heihei wau eono hoe. Kakaak@ Liloa a me Waikiki. Ua lilo ia Liloa ka eo o keia heihei.
7. Aholoa no ka manawa. Lilo ia Kuaiwa ke eo. Manawa i noho ai malalo o ka wa 1 minute 2 sekona.
8. Heihei kiakahi papa ekolu Edith L. Volante, Pokii, Abbie M a me Myrtle. N ka inoa hope loa ka lanakila o keia heihei me Pokii ka helu elua.
9. Heihei waapa eono hoe. Matala a me Healani. Ua lilo i ka inoa mua ke eo.
10. Heihei au 100 i-a. Dan Renear wale no kai au ma keia heihei. O ka manawa i au ia ai 1 minute a me 1 sekona.
11. Heihei waa pea. Kakaako, Konohiololeaka Waialae, Mahimahi, a me Puaalani. Na Kakaako me Kaonohiololeaka ka helu elua i lawe i lilo i keia heihei.
12. Heihei waapa elua hoe. Step In,Erin, Hurry Up, Minnie, Wela ka Hao Honolulu, Mayflower, Bonnie Nippon Maru, Ready, Benicia a me Diuwe. Ua lilo ka eo mua ia Erin Mayflower, elua a me Benecia, ekolu
13. Heihei waapa mokuahi Waialua No. 14, Keauhou, Mauna Loa, Mikahala, Malulani, a me Waialua No. 2. O Ka Mauna Loa kai lawe ae i ka makana ekahi, Keauhou makaha olua.
14. Heihei waapa eha hoe. Iroquois, Myrtle, Red, White and blue a me Norna. Na ka inoa hope i kaili ae i ka hanohano o ia heihei.
15. Heihei au hapalua mile. O Kuaiwa wale no ka mea i komo m@ keia heihei.
O keia ae la ka nui o ua lealea i malania ia ana ma ia la.
O na dala i lulu ia e na poe kal@ no na hana he hei i malamaia ma ka Poaono, he $1,200 a oi ka nui o na mea i lulu ia. Aole no i kauamai ke dala. Nui no ka lealea.
--
Ua loaa mai nei na lono mai Lahalua mai, ua hoea mua aku ka Ma@ Loa he 15 minuta ilaila mamua o ka hiki ana aku o ke Kalaudina.
KO AMERIKA MAKEMAKE HUI
--
E LAWE A LILO I KEKAHI
MAU AINA AUPUNI.
--
No ka Hoolilo ana aku no Kona
Oihana Kaua Aina.
--
Ma ke halawai ana a kekahi mau Kuhina o ke aupuni ma ke kakahiaka Poaha nei, a oiai, aole ia he halawai maoli na ka Aha Kuhina mamuli o ke kaawale ana aku o Kuhina Kapa i ka Aha Hookolokolo, aha, ua nui no nae no kumuhaua ano nui i noonoo ia. O ka mea ano nui loa nae i hoomaopopo ia oia ka palapala a Konela Ruhlen, ke alii hooponopono i kahi noho o na koa o Amerika Huipuia maanei, no na mea e pili ana i kekahi mau ana i makemakeia e ke aupuni Amerika no ka hoolilo ana aku no kona oihana i kaa@. O na aina i hoakaka ia oia kela.
1. Ke kahua paikau ma Makiki, kahi hoi e malama ia nei o ka paani cricket, a i hookaawale ia hoi e kela Ahaolelo hope aku nei ma ke ano i paka lealea no ka lehulehu.
2. Kekahi mau aina maloko o ke awa, me ke komo pu mai o ka uwapo Eames.
3. Ka aina e kokoke la ma ka uwapo Okeanika me ke komo pu mai o kahi i hoolimalima ia e Hopper, kahi hoi a ka wili raiki a me ka hale olopapa o ku nei.
4 O ke kahua o ka halepaikaa, me ka komo pu o ka hale koo, ka hale paikau a me kekahi apana e holo la a hiki i ke alanui Bertania mahope iho o ka home o Mrs. Mary Adams ma ke alanui Miller, e hoopii ia nei i keia wa ma ke kanawai.
Maloko oia palapala a Konela Ruhlen, e noi mai ana ia e hoike piha ia aku na mea pohihihi, a i ole na mea e ae e pili ana no keia mau aina. E hoomau aku ana hoi o Konela Ruhlen i kana hoike i ke aupuni o Amerika Huipuia me keia mua koke iho.