Ke Aloha Aina, Volume V, Number 37, 16 September 1899 — Page 6

6                                  KE ALOHA AINA, POAONO, SEPATEMBA 16, 1899.

 

HE MOOLELO WALOHIA

:NO:

ALANADELA

 

Ka Wahine Hoopahaohao o ka Aahu Keokeo.

A I OLE

Ka Loea Hookani Pila Hapa o ke Kulu Aumoe. 

 

    Aole nae ka koa opio i hoolohe aku i na olelo Bonita, aka, ua poha aku la ka leo o ua Walata la i ka i ana aku penei:

  E Bonita, aole au e ae aku ana i kou manao, aka, e alakai ia’u no kahi a ka’u mea i aloka ai e waiho mai la iloko o ka poino. E hoolohe i keia e ka alihikaua o na powa a e hoomanao pu hoi, i kou wa e hooko ole ai ko’u makemake oia no auanei ko’u manawa e hoihoi aku ai ia oe no lalo o ka opu puanuanu o ke honua.  

  I ke kuu ana iho o ka leo o ke koa opio, ua ike iho la o Bonita, aole keia he mau olelo paani wale no na kona enemi, aka, e nookau io mai ana oia i ka hoopai weliweli o ka make maluna ona. Nolaila, me ka hoohakalia ole iho, ku ae la oia iluna a pane aku la me ka leo haalulu.

  Ua makaukau au u ke koa opio e alakai aku ia oe no kahi au e upu nei e hele aku, a nolaila, e hahai mai mahope o’u i keia wa ano, a he manaolana hoi ko’u e hiki aku no kakou ilaila i ka wa a kaiao e owehewehe mai ai.

  Ua lilo keia mau olelo a ka alihikaua o na powa i mea e hoohauoli loa ia ai o ko Walata punwai, a me ka houlolohi hou ole iho, poha hope aku la kona leo i ka i ana aku:

  E kuu pio, e lalau iho i kau pahikaua a paa ae ma kou lima, he hoopakele hoi nou no keia alahele pohihihi, no ka mea, ke hilinai nei au maluna ou, aole loa oe e kipi mai ana ia maua. 

  Me keia mau huaolelo i kunou haahaa mai ai o Bonita, me ka lalau ana iho i kana pahikaua me na manao lili no e lalawe ana iloko o kona puuwai, aka, aole nae oia i heikeamaka ae i ke akea, a alakai aku la hoi i kona mau enemi me ke koele wawae ana, no ka mea, ua hiki ole i kona lio punahele ke auamo hou aku iaia mahope o ka loaa ana i ka pahi mahauahana a ka kaua opio. A oia hoi ka ua alihikaua nei i kulu iho ai kona mau waimaka i kona wa i alawa hope aku ai i kona lio e waiho mai ana iluna o ka honua, aka, ua hiki ole nae iaia ke hookaulua iho malaila.

  Maloko o ka hihipea o na laau i pailata aku ai na Bonita nei i ka lakou huakai iloko hoi o ka aaki paa o ka pouli, a mamuli oia aole i haawi aku ke oa opio i wa no ua alihikaua nei e kaawale loa aku ai mai iaia aku me kona hoaloha. 

  A no kekahi manawa loihi keia alakai ana a ua Bonita nei, aia hoi, ua huli mai la oia a pane mai la: 

  E ke koa opio, he elima wale no mile i koe a hoea aku kakou i ka pahu hopu o ka kakou huakai, aka ma keia wahi nae ke noi aku nei au i kou lokomaikai, aole anei oe e ae mai ana e hoomaha kakou maanei, oiai, ua hele mai la kuu mau wawae a maluhiluhi, ke kumu hoi e hoohikiwawe ia aku ai o ka kakou hauakai. 

  No keia noi a ka alihikaua powa i hookomo mai i na manao aloha iloko o ka puuwai o ke koa opio no kana pio me ka mahui mua ole ae he hana maalea wale no keia na kana pio, a me ka manao maikai, pane akula oia:

  Ke ae aku nei au i kau noi, nolaila, e hoomaha i kou mauluulu a hiki i ko’u wa e hoeu aku ai.

  Elike me keia leo oluolu i poho aku la mai na lehelehe aku o Walata, pela ua Bonita la i noho iho ai malalo o kekahi kumu laau a hoomaha iho la i na luhi o keia huakai loihi o ke kulu aumoe, a i keia wa no hoi, aia kona poo ke kulou la ilalo mne ke kaumaha. 

  A o kona puuwai hoi, ka hoopiha ia la me na manao hoonaukiuki, no ka mea, he mau mile helu no koe a hiki aku lakou no kahi ana i hoomaewaewa ai i ka wahine opio a lakou e kamoe nei ka huakai no ka hoopakele ana iaia, aka, o kona mau kokua nae a ko lakou haku wakine i olelo mai ai e hoouna mai ana, aole he wahi hoailona no ko lakou hoea mai, ka manaolana h@i e lalawe la iloko o kona puuwai no kona palekana. 

  I ke kaahope ana ae he hora a oi o keia hoomaha ana, oia koke no ka wa o ke kanaka aoo i liuliu hou ae ai no ka haalele ana iho i keia wahi no ka mot o ana aku ma ka lakou huakai alo ehuehu me ka puana ana ae: 

  Ua lawa, ua lawa ko kakou hoomaha ana ma keia wahi, a e hoomau aku hoi kakou i ka nee ana imua no ka mea, ke hoomaopopo nei au, ua kokoke kakou i ka pili o ke ao.

  A elike me ka makemake o ke kanaka aoo, pela o Walata i hooko aku ai me ke kauoha pu ana aku i ka laua pio e hoomau aku i ke alakai ana i ko lakou alahele, ua hoao ae oia e hoapaapa, aka, ua hiki ole nae, a hoomau aku la i ke pailata ana.

  A he mea oiaio, i ka wa a na kukuna malamalama e o ae ana maluna o na kuahiwi, aia hoi, ua hoea aku la lakou ma kahi kokoke i na pali kunihinihi e ku mai ana, a ma ia wahi i ku mahe iho ai a haliu mai la maluna o kona mau hoahele me ke pane ana mai me ke ano pihoihoi:

  Aia malalo o kela mau pali e ku mai la kau aloha e waiho nei. a he manaolana ko’u, aole paha oia i pauaho mai i keia ola ana. 

 

HE KEU NO KA MAKA’U OLE

 

  He mau la i hala ae nei, ua aihue ia iho la he eke dala nona ka waiwai io i kokoke e piha ka ewalu haneri dala.  O kahi i hanaia ai o keia aihue, makai ae nei no ia o ka makete hou, a o ka mea nana ke dala, oia o S. W. Kaleikini, a o ka poe nana i aihue he poe kamalii wale no. 

  Mamuli o ke akahele loa o ua lawelawe ia ana, ua hoi liilii mai la ka hapalua o na dala i nalowale, a eia no ke noii ia mai nei ke koena.  Ua hoea mai no paha keia aihue, mamuli no ia o ka malama kupono ole ia o na keiki a ka poe mea keiki, mamuli o ka hookuukuu wale ia e hele auwana ma na wahi like ole o ke kulanakauhale nei.

  Ua hoopai ia kekahi keiki he elua makahiki hoopaahao, a o ke koena o na keiki i hopu ia, eia no ke nieniele ia nei.  Ke lana nei ko makou manao, e loaa ana no ka hapanui o na dala i aihue ia. 

HOOKUUIA O DR HOWARD

 

  Ma ka halawai ana a ka Papa Ola, ma ka hora 3 o ka auina la Poakolu nei, ua lawe ia mai la ka hihia o Kauka Howard e noonoo, oia hoi, kona lawelawe pono ole ana i kana oihana i hoonoho ia aku ai e ke aupuni, a mamuli o kona hoohemahema ana i make ai o Ane, a i kauoha ia hoi e ka aha koronero e huli pono ia keia hihia, aka ma ka noonoo ana a ka Papa Ola, ua hoopuka ae lakou e hookuu laelae ia o Kauka Howard. 

 

UA LOAA MAI, HE HELUNA

....O NA....

 

Pena a me na Aila Pena,

Na Hulu Pena,

Na Kap@ahi Aila,

Na Kapaahi Fisher,

(ua hoemiia ke kumukuai)

Na Pala@ na ano a pau,

Na Lako Mahiai,

Ho, Oo, Kopala, Kipikua

Na Bakeke o na like ole,

Na Ipuhao, Ipu Ti,

Na Lako Aniani,

  E loaa mai aua he mau waiwai hou maluna o ka mokuahi Auseteralia. Nolaila, e kipa mai, a e wae no oukou iho, he emi loa ka makou mau kumukuai. 

 

Hawaiian Hardware Co., Ld

(HUI LAKO HAO HAWAII, I KAUPALENAIA)

Alanui Papu, ma ka Banako o Spreckels.                                          tf

 

KUAI HOEMI NUI O NA PAPALE!!!

 MA KAHIO

L. B. KERR.

ALANUI MOIWAHINE

 

NO HOOKAHI PULE WALE NO.

 

A I OLE PELA

 

E LIKE ME KA LOIHI O KE KOE ANA O KEIA MAU WAIWAI.

 

  Mamuli o ka hoomaka koke ana aku o ka hoomaemae ia, nolaila ua manaoia he mea pono ke kuai hoemi koke ia

KO MAKOU KEENA PAPALE.

I loaa ai na wahi kaawale 

 

2.00......Papale Sela......1.60

1.50......Papale Hoonaniia...... .75

 

  NOLAILA, EIA KA WA O KE KUAI MAKEPONO.  E HELE KOKE MAI, A E LILO NO KA WAE MUA IA OE. 

 

                                                                                                L. B. KERR.

Honolulu,  Alanui Moiwaine.