Ke Aloha Aina, Volume V, Number 27, 8 Iulai 1899 — Page 1

KE ALOHA AINA

UA MAU KE EA O KA AINA I KA PONO.

HOOKUMUIA I MEI 20, 1885.

BUKE V.       HONOLULU, POAONO, IULAI 8, 1899. HELU 27.

KA NUPEPA KE ALOHA AINA.

E hoopuka mau ia aku ana mai ka Poakahi a ka Poalima o na pule a pau o kela a me keia mahina.

Ka Uku Pepa, he 20 keneta o ka pule, No ke kope hookahi he 5 keneta.

E loaa no ka pepa mai ke Keena aku o KE ALOHA AINA, a mai ka lima aku o na Luna Lawe Pepa.

E pai ia no na Olelo Hoolaha, na Kanikau a me na Mele Inoa, me ke Dala kuike. Aole nupepa ma ka owili pakahi e hoouna ia ke ole e hookaa mua ia ka uku pepa.

E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.

Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.

Ka Nupepa Puka Pule.

Ke - Aloha - Aina.

Hookahi makahiki...$2.00

Eono mahina...$1.00

Ekolu mahina....50

Hookahi mahina....20

EMMA A. NAWAHI.

Puuku o Ke - Aloha - Aina.

EDWARD L. LIKE.

Lunahooponopono a Hope Puuku

S. P. KANOA.

Hope Lunahooponopono.

O na kauoha Nupepa me na hookaa Dala, e hoona pololei mai o ka Puuku ma Honolulu.

Nuhou Kuwaho.

Maluna o ka Sheridan i loaa hou mai ai he mau lono makamaka hou ia makou, penei:

UA ANEANE LOA E POHA KE KAUA.

Bloemfontein, Iune 23. O ka Volksraad o ka Orange Free State, ua hooholo ia ae he $49,350 no ka hoomahuahua ana i na pukuniahi, hala lole a me kekahi mau lako kaua e ae. He olelo hooholo kekahi i waiho ia mai e apono ia e ke aupuni ka pu raifela Mauseri i pu lahui. Ua hooholo hou ae ka Volksraad, e kohoia i $112,500 no ka poka me $199,750 no na lako kaua e ae. O ka lawelawe ia ana o ke oihana kalepa mawaena o @ @ Town a me Johannesburg, eia ia ke ku malie nei. O na Geremania e kokua nei i na Transvaal, eia lakou ke malama nei he mau halawai, no ke apono ana he olelo hooholo e noi aku ana ia Geremania e komo mai e uwao no ka pono o Pretoria.

Cape Town, Une 23. O ka mokaua Beritania holomama o ka papa elua me Rear-Adimarala Sir Robert Hasting-Harris. ke alakai nui o na aumokukaua o Cape of Good Hope a me Aferika Komohana, ua haalele iho la oia i keia la i ke kaikuono o Simons no ke kapakai hikina.

Landana, Iune 23. O ka Regimana Shropshire, ua kauoha ia aku lakou no ka noho makaukau ana no ka hookau ia aku maluna o ka moku no Cape Town.

E KAHEA HOU IA ANA HE UMI MAU REGIMANA.

Wasinetona, Iune 23. O ka oiaio o na hoike a ke Call Herald i keia kakahiaka e pili ana i ka hoala hou ia ana he umi mau regimana, ua hooia ia mai e ke Keena Kaua i keia la, aka, ua olelo ae nae o Kakauolelo Meiklejohn, aole ia e hana koke ia a hiki i ka huli hoi ana mai o ka Peresidena. He manaoio ko Meiklejohn o ke pakui ana aku i mau wahi ohi kanaka hou, he mea ia e loaa koke ai o na kanaka iloko o ka manawa pokole e hiki ai hoi na regimana ke kukuluia.

NA LILO O AMERIKA HUIPUIA NO KE MA MANILA.

Nu Ioka, Iune 21. He lono kuikawa kai loaa mai nei i ka nupepa Honua mai Wasinetona mai, e olelo ana: O ka nui o na lilo o ke aupuni no ke kaua ma Pilipine a hiki i keia la he $63,000,000 ma ke dala a me 664 kanaka. Mawaho ae oia heluna he 6500 koa i hoeha ia, a i loaa i ka ma'i. Aole no nae i hookokoke mai ka hopena o ke kaua elike me ia i ike ia he mau mahine ae nei i hala. O kahi a na Amerika e hoomalu nei ma ka panalaau, aole ia i piha ka 100 mile kuea, a aia hoi ia wahi a lakou e hoomalu nei ke lilo aku la. O kekahi o na aliikoa i hoi mai nei mai Manila, ua olelo ae oia he 80 pakeneta koa maloko o Pilipine e loaa ana ia lakou na uku hoomau no ka ma'i hikoko a me na ma'i e ae. O kekahi o na alii o ke kulana kiekie, ua hoakaka ae oia o ka lilo o ke aupuni i ka la hookahi no ke kaua, aia no ia ma kahi o $280,000. I ka wa nae e hiki aku ai ka huina o na kanaka i ke 35,000 e hoomahuahua hou ia aku ana na lilo a hiki i ke $300,000. O keia mau hoolilo aole ia i komo pu me na lilo o ka oihana kaua moana, nona ka huina o na hoolilo ma kahi o $1,370,000 no ka 137 la o ke kaua ana, he heluna oi loa aku hoi keia i na lilo o ka hoolulu ana o na mokukaua ma na wai o Asia. Ua hai mai ka mea kakau o ka nui o na lilo no na pualikoa, ke kukulu ana i ka oihana kaua moana a me ka uku ana aku he $20,000,000 ia Sepania a me na hoolilo e ae e hoea aku no ia i ka $200,000,000, a e pii mahuahua mau aku ana hoi i keia wa e hoomau ia nei ke kaua. O na apana aina he 27 o Luzon aole i oi aku mamua o eha i komo ia e na pualikoa o Amerika. Ua lele aku na Amerika ma kekahi mau mokupuu--Mindanao, Balabao, Mindoro, Paragua, Panay, Cebu a me Negros, aka, aia no nae lakou iloko o na kulanakauhale i pale ia e noho ia.

AIA NA TUREKE A ME SERVIA KE HAKAKA LA.

Belgrade, Iune 17. He mau hakaka hahana kai hoike ia mai, ua poha ae la ma na laina kaua o Tureke. Elike me na lono i loaa mai nei i anei, o ke awa kumoku o na Servia ma Propachtida, ua pakaha ia aku ia me ke puhi ia i ke ahi, a he nui na kulana i lawe ia ae e na koa Tureke a me na Albanians. He nui na pihoihoi e ikeia nei.

MAKAUKAU O ENELANI I KE KAUA MA TRANSVAAL.

Landana, Iune 19. Ua olelo ae ka nupepa St. James Gazette i keia auina la, ua loaa mai iaia he hoike oiaio mai kekahi mea i hilinai ia i Pretoria, kapitala o Transvaal. o Kenerala Joubert, ka alihikaua nui o na Boer, i ka wa e poha io ai ke kaua mawaena o Transvaal a me Enelani. Ua hoomaopopoia o ka ikaika kaua o na pualikoa o Joubert, e hiki aku ana ia i ka 20,000 kanaka i hoolakoia me na pu raifela Mauser, me ka pakui ia aku he 4 pu kani pinapinai a me 1000 koa pukaa, he lehulehu wale o lakou i ohi ia noloko mai o Geremania a me Holani. Me keia mau pualikoa a me na kokua i manaoia mai ka mokuaina Orange Free State, he manaolana ko Joubert, ua hiki iaia ke lele kaua mahope o ke kukalaia ana o ke kaua, me ke komo ana aku iloko o ka Orange Free State me ka lawe pio ana ae ia Kimberley me ka nui ole o na ola poino me ka hoopoino pu aku hoi i ka maina daimana De Be@rs. I ka wa e lilo pio ai o Kimberley, e nee aku ana lakou no Cape Town, ke kapitala o Cape Colony, a malaila e loaa hou ai he mau kokua nona. Ua hoopuka ae o Joubert, e lilo no oia i haku maluna o Cape Town, mahope o elua pule o ke poha ana o ke kaua, alaila, ua hiki ia ia ke hana i kuikahi maluhia.

Landana, Iune 22. Ua olelo ae ka Daily Mail i keia kakahiaka, ua hooholo ae ke aupuni imeperala no ke hoomahuahua ana i na puali koa o Beritania maloko o Aferika Hema a hiki i ke 40,000 kanaka.

E HAKAKA ANA O JEFFERIES ME SHARKEY.

Nu Ioka, Iune 19. He palapala aelike no ka hakaka kuikui puupuu mawaena o Jefferies a me Sharkey no 25 puni, kai kakauinoa ia aku o na luna nui o keua mau kanaka, ma ka halawai i malamaia maloko o ka Manhattan Theater i keia ahiahi. E hakaka ana keia mau kanaka mamua o ka hui e haawi ana he uku makana kiekie no ke kaei opu hoi o ka inoa moho o ka honua nei. Ma ka la 23 o Okatoba, malalo o ka rula kuikui puupuu a ka Marquis o Queensberry laua e hakaka ai.

KA MOKU LAWEKOA SHERIDAN.

Ua hoea mai la ma ke kakahiaka La Pule nei ka mokuahi lawekoa Sheridan mai Kapalakiko mai. E lawe ana oia he 1716 alii a me na koa no Manila. E noho ana oia maanei no ka hoopiha nanahu ana ma ka Poakolu ae nei e holo loa aku ai oia no na Paemoku o Pilipine. He mau hiohi na like loa ko ka Sheridan me ke Grant a me ka Sherman i kipa mai ai maanei, e lawe ana oia he 130 luina.

NA HAWAII NO KA HOIKEIKE O OMAHA.

E haalele iho ana ma ka mokuahi Aorangi e holo aku ana no Amerika Huipuia, na Hawaii no lakou na inoa malalo iho nei; J. Shaw, J. Edwards, W. B. Kones, E. Kahulu, Kealakai, T. Silva a me Mrs. Kapiiwi no ka hoikeike nui o Omaha. Ua hana ia e lakou he aelike me John Wilson ma ka Poakahi nei, a e holo ana lakou malalo o kana malama ana, a me he mau la, mahope iho o ka pau ana o ka hoikeike, e kaahele aku ai lakou ma kekahi mau kulanakauhale o Amerika Huipuia me ka holo loa aku no Europa. Ua olelo ia ae o Mrs. Kapiiwi hookahi ka ka mea e ole nei, o ka aha hula i kukuluia e Kamehameha III, he kanaono makahiki i hala ae nei. He himeni ka hana a  keia poe kane e laweia nei no Omaha.

E hoouna ia aku ana he 33,000 koa hou no Pilipine. Oiai, ke pii mau la ka ikaika o na koa kipi. He nui na makaainana @ alii o na mokupuni like ole i holo mai e ike hope i ke kino puanuanu o ka Moiwahine Kapiolani.