Ke Aloha Aina, Volume V, Number 25, 24 Iune 1899 — Page 6
| This text was transcribed by: | Kaanana Akima |
| This work is dedicated to: | Katherine Kekahuna |
KE ALOHA AINA,
POAONO, IUNE 24, 1899.
-------
HUI KUAI LOLE HAWAII.
Ka Heiau o na Paikini.
-------
Ke kono ia aku nei na hoaloha a me ka lehulehu no ke kipa ana mai e makaikai i na WAIWAIHOULOA.
E kuai ia aku ana i keia mau Pule Ekolu e hoea mai ana.
-------
Ke hoikeia aku nei ka lohe he heluna o na mahele i kaupalenaia ke kuai ia nei e na Ahahui la ma ka $5.00 pakahi. E waiho ia aku no na noi i ke Kakauolelo, Mr. Hanapi, a i ole i na Lala o ka Papa hooko, ma ka Halekuai, Helu 224, Alanui Papu.
-------
A. V. GEAR...............................PERESIDENA.
DR. HUDDY..................HOPE PERESIDENA.
EDWARD HANAPI...............KAKAUOLELO.
N. ERNANDEZ....................................PUUKU.
CHAS. WILCOX......................LUNA HOOIA.
MOSES PALAU...............LUNA HOOHANA.
-------
HE MOOLELO WALOHIA
--:NO:--
ALANADELA
-------
Ka Wahine Hoopahaohao o ka Aahu Keokeo
-- A I OLE--
Ka Loea Hookani Pila Hapa o ke Kulu Aumoe.
-------
Me ka puahi nui nee mai ai ua mau powa la no kahi a ko lakou haku wahine e noho ana, a iloko o na minute pokole wale no ua akoakoa mai la kona mau kanaka i hiki aku ma kahi o na haneri, a me ka leo hauoli hoi lohe ia aku la kekahi o lakou i ka hooho ana mai.
E ko makou haku wahine e hai mai heaha ka makemake o kela leo kani o ka ulili i kani kapalili ae nei.
I keia mau minute i pahola ae ai ka ula ohelohelo ma na papalina o Magarita a haka pono mai la hoi kona mau maka maluna o kona mau kanaka, a me ka leo olu waipahe puana mai la oia.
E aʻu mau kauwa i hoouna ia aku la ke kaheaz ana ia oukou, no ka uhai ana aku mahope o kekahi mau mea mahuka i koho wale ia aole laua i mamao loa aku mai keia wahi aku, a e hoomanao e oʻu mau kanaka, i ko laua wa e loaa ai e hoihoi mai no ko kakou home nei me ke kiai makaala pu ana ia laua a mai haawi hoi i manawa no laua e mahuka hou aku mai ko oukou mau poholima aku.
O, e ko makou haku aloha, wahi a ka leo o na kanaka i olewalu like mai ai, mai hopohopo no ka pakele o ka kakou mau pio mai ka makou mau kiai ana, no ka mea alole loa i pili na lihilihi o na keiki o ka aahu ulaula a hiki i ko lakou hoea ana i ko lakou home, a he hookahi wale no wahi e palekana ai laua, oia hoi ko laua loa ole aku i na ilio hanu meheu o na pae mauna o Sekotia nei.
No keia mau olelo kaena a ua powa i hoopiha aku i ko Magarita puuwai me ka hauoli, aole wale oia kai hoopiha ia me ka hauoli, aka, o ke koa opio Walata kekahi i komo pu aku ma ia haawina hookahi, me ka manao kuhihwea ana he oiaio lakeia mau olelo a na powa, a ia wa no hoi i poha hou aku ai ka leo o ua wahine lokoino nei i ka i ana aku. Ano, e oʻu mau kanaka, e hoi aku no ko oukou kahua hoolulu, a kau aku maluna o ko oukou mau lio holo loa me ka hopu pio ana aku i na kino kanaka a pau e maalo ae ana ma ko oukou alahele, no ka mea, malia aia iwaena o lakou na mea mahuka.
A ia mau sekona no i haawi ae ai ua mau puulu powa la he ekolu mau huro ana a hoi koke aku la no ko lakou kahua hoolulu no ka hooko ana aku i ke kauoha i haawi ia mai ia lakou e ko lakou haku puuwai lokoino, oia hoi, o Magarita.
Maluna o ko lakou mau lio holo loa i kau ae ai ua poe powa la a kuupau koke aku la i ka holo o ko lakou mau lio no loko o ka hihipea o na laau ma ke alahele e loaa aku ai o Bonita.
A he mea oiaio, no kekahi mau hora loihi keia uhai ana o ua poe powa la me ka hoomaha ole mahope o ka meheu o ko lakou alihikaua e kuoe hele ana me ka lakou pio.
A i ka aneane ana ae o ka la e kupono i ka lolo, oia no ka wa i hoea aku ai ua poe powa la , maluna o kekahi pali kiekie.
Ma keia wahi hoi i unuhi ae ai kekahi o na powa i kana ulili a puhi ae la no ekolu manawa me kana ulili, aole he manao nui o keia ulili aka, he huli wale aku no, malie paha aia ko lakou mau hoa i hala mua mai ma kahi kokoke ia lakou.
A he oiaio, mahope koke iho o ka hookuu ana iho o ua powa la i ka leo kani kapalili e wawalo ana o ka na ulili, lohe ia aku la kekahi leo ulili i ke kani koliuliu ana mai, me he mea la, he hapahaz mile wale no ke kaawale mamua o ko lakou alahele.
Nolaila, me ka hoohakalia ole iho iho oia koke no ka wa o ua mau powa la i puliki mai ai i ke kaulawaha o ko lakou mau lio a kuupau aku la hoi ma ke alahele e loaa aku ai ko lakou mau hoa.
A iloko o na minute pokole wale no keia kuupau ana aku o ua poe powa la i ka holo o ko lakou mau lio, aia hoi, ua halawai ia aku la lakou me ko lakou alihikana e lawe ana i ka lakou pio malalo o ka hooko kauoha.
I ka ike ana mai o Bonita a me kona mau kanaka kakaikahi i ko lakou mau hoa o ka oihana hookahi, oia no ka wa i hoohikilele ia ae ai o kona mau noonoo, a me ka hoohakalia ole iho, ua poha koke mai la kona leo ninau, i ka i ana mai:
E oʻu mau kanaka o ka makakila, e hoike mai i keia manawa ano, heaha ka manao o ke aloalii i hoounaia mai ai oukou e uhai mai mahope oʻu? He poino anei ko hope o ko kakou home aloha? E hoike koke mai i ka oukou misiona i lawe mai nei me ka pupuahulu nui.
I ka hooki ana ae o Bonita i kona leo, oia no ka wa i pane mai ai kekahi o na powa me ka hooho ana ae me ka leo nui.
E ko makou alihikaua nui, aole he poino o hope o ko kakou home i kau ia e ka weli, aka, i hoounaia mai la makou nei malalo o ka hooko kauoha, oia hoi, e hunakele loa ia kau pio mai ka ikeia ana e na maka o kekahi kino kanaka, no ka mea, e huli la mai ana ia, mahope o ko makou huli hoi ana aku a hoike i ko kakou haku wanine, aole i loaa ke pio makemake ia. E wiki ano, oiai, ua makemaka ia kakou e hoea hou aku i ka haleali mamua o ka napoo ana o ka la.
Na keia mau olelo o kekahi o na powa i hoonalohia aku i na manao uluku o Bonita, a ia wa no hoi i poha mai ai kona leo me ke kuoo.
Ma ka inoa o ko kakou haku wahine e hooko no au i kona makemake me ke paewaewa ole. Nolaila e oʻu mau kanaka e hoolulu ma keia wahi, a e haawi aku hoi i manawa no ko oukou mau lio e hoomha ai, oiai, he loini keia alahele a kakou e huli hoi aku ai, a naʻu a me na hoa ihele pu mai me aʻu e hooko i ka makemake o ko kakou haku wahine.
A mahope o ka haawi ana aku o Bonita i kana kauoha i kona mau kanaka, oia no kona wa i haalele iho ai ia lakou a nee aku la no mua me ka puahi nui me kana pio e kiai makaala ia ana e kona mau kanaka kakaikahi.
Aole lakou i hele pololei aku ma kahi o na kahua palahalaha, aka, ua hoohuli ae la lakou i ko lakou alahele no kahi a na pali nihinihi e ku mai aname ka manao io ana mailuna aku o ua mau pali la e hooko aku ai lakou i ka makemake o ko lakou haku, ma ke kiola ana aku i ka kaua Alanadela no lalo o na awawa kuhoho, a malaila hoi oia e waiho ai a hiki i ke kikoo ana mai o ka anela o ka make i kona ola makamae.
-------
He elua mau mokukaua aʻo moana e upu ia nei e hoea mai ana i keia awa, he hookahi no ke aupuni Iapana, a he hookahi hoi no ke aupuni repubalika Argentine.
-------
NA WAWAI NANI ME NA PAIKINI HOU LOA.
-------
Ua loaa mai nei iaʻu ma kela pule aku nei he heluna nui o na Waiwai mai Europa pololei mai. I wae ponoi ia e koʻu mau Agena ma Ladana. A i loaa mai hoi ia lakou ma ke kumukuai emi loa o na makeke malaila.
-------
O KA HOPENA:
Ua hiki iaʻu ke kuai hoemi loa aku keia mau Waiwai ma ke kumukuai haahaa loa, nana e hoohikilele ina kanaka, a e waiho koke no lakou i ka hookomo i na dala ILOKO O NA MAHELE KOPAA.
-------
He nui loa e hiki ai ke loaa i na mea a pau, a e hoolako ai hoi i ko lakou mau hemahema, no ka waiho malie ana a hiki i ka wa i makemake ia, no ka mea, o na waiwai elike me keia aole e loaa hou ana no keia kumukuai, a i ko lakou wa e pau ai, aole e hiki ke hoopiha hou ia mai.
-------
PAPALE, HOOWEHEWEHEIA A I HOOWEHIWEHI OLE IA.
O na ano like ole, me na waihooluu like ole, a i ko lakou wa e hoohalike ai me he wai anuenue ahiehie.
-------
L. B. KERR.
Honolulu, Alanui Moiwahine.