Ke Aloha Aina, Volume V, Number 24, 17 Iune 1899 — Page 6

KE ALOHA AINA

POAONO, IUNE 17, 1899.

-------

UA HIKI I NA MEA A PAU KE HOIKE MAI

-------

            I ka wa e lapaau pono ai kou kauka ia oe, e ike no oe he kanaka okoa oe.  He mea nui ka paulele ana ma ka manaoio ana malalo o kana lawelawe ana a me na kuhikuhi ana e loaa ai ia oe ka ikaika.

            O kaʻu lapaau ana i na plikia o na maka, aole loa ia e kuhihewa.  O ka hoohala ma ka hana i na Maka Aniani mai ka wa opio mai he hoike ana mai i ka makaukau.  Aole he uku o ka nana ana i ka maka.

            S. E. LUCAS.

            HALEPOHAKU LOVE, ALANUI PAPU.

            (Ma ka hale maluna.)

-------

HE MOOLELO WALOHIA

--:NO:--

ALANADELA

-------

Ka Wahine Hoopahaohao o ka Aahu Keokeo.

-- A I OLE--

Ka Loea Hookani Pila Hapa o ke Kulu Aumoe.

-------

            E oʻu mau hoaloha o ka makakila ano, ua hoea mai la au e nana i ko oukou kulena hoomanawanui, a ke ike nei au, eia oukou a pau ke hana nei i na mea e akaka ai o ko oukou hiipoi ana i ka maluhia, ma o ko oukou pale ana ae i ka iho maka walu ana iho a na pakaua maluna o oukou.

            A oia hoi kaʻu e haawi koke aku nei i ke kauoha i keia wa ano, e haalele koke ino i keia wahi, no ka hoi ana aku iloko o na pakaua, kahi e alo ae ai i keia mau pilikia i hoea mai la.

            He mea oiaio, o keia leo kauoha o ka alihikaua opio, ua p@nee koke ia mai ia e na leo hooho hauoli o na koa, a i hooi loa ia aku hoi, ma ko lakou ike ana mai o ka moi pu no ka kekahi me ko lakou haku opio.

            Ua haalele koke iho la na pualikoa ku kiai mawaho o ke kulanakauhale, a huli hoi aku la lakou no loko o na pakaua, me ke kani wa walo ana o na pahu, ka nakeke a na pahikaua a me ka halulu o ko lakou mau kapuai.

            A o keia hoi ka wa i huli hoi aku ai ka moi a me kana keiki noloko o kas halealii me ka nana hele ana mao a maanei o ke kulanakauhale, ina paha he poe kekahi ua loohia ia me na poino.

            A elike me ka laua i koho wale ai, pela io no i halawai ai laua me na poe ilihune e noho ana ma kae alanui, no ka hoopakele ana ae i ko lakou mau kino mai keia mau haawina i loaa like aku la i kela poe i hoihoi ia aku la noloko o na pakaua.

            Aohe paha a kakou mea e kamailio hou aku ai no ko ka moi ano, oiai, ua hoike maopopo mai kona ano, i ka noho ana lanakila maluna o na mea a pau, a aole hoi ona makemake e lawe mai i na kulana hoopilikia i ka lehulehu elike me ka kona mau mua i hana ai.

            Ma keia wahi, e huli ae ai kakou a nana aku i ka noho ana o ka ui Sopaea a me kona mau makua, oiai hoi ua ui la ua lilo mua kona puuwai i ke kuai ia e na manao hooniponipo a ke aloha, no ke koa opio, nana i kaili mai i ka noho ana hauoli, a iloko o ka hakanu.

            I kekahi ahiahi a ka mahina i oili ae ai maluna o na pae kuahiwi o na mauna, a e hookuu malie mai ana hoi oia i kona malamalama lahilahi maluna o ka ili laula o ka honua, me kona nani nui.

            Aia hoi, ua ike ia aku la kekahi poo e kiei malie iho ana maluna o ka lokowai, a e hookuu pau ana hoi i kana kilohi ana maluna o kekahi mea kino e kia pololei mai ana he wahi waapa malalo o ua puka aniani la e noho ia ana e ka ui.

            A iloko wale no hoi o na minute pokole o kana nana ana aku, aia hoi, ua hoohikilele ia ae la kona puuwai,i ka ike ana aku, o ua holowaa la o ke aumoe, aole ia he mea okoa aku mawaho o ka mea a kona puuwai i aloha ai.

            A me ka leo malie o ka mea i piha hakukoi oloko i ka iini, ua puana malie ae la oia me keia mau huaolelo o ka eehia, i ka i ana ae:

            Ae, o oe mai la ka ia e ka mea a kuu puuwai e kali mau aku nei o kou hoea mai, ka mea hoi nana e hoohiaa nei i keia mau lihilihi o e ka hiki ole ke upoiaho, ke ole au e ike lihi aku i kou aka e maalo ae ana malalo o na lau laau.

             Ke pahola mai nei na kukuna o ka mahina i kona malamalama alohilohi, a ke halihali mai nei hoi na owe wai nehe malie o ka lokowai nei, e hoike mai ana, o oe ia e ka mea a kuu puuwai i aloha ai.

            Eia ke kakela o ke aloha ua ma kaukau no ka hookipa ana mai ia oe, a nona hoi lakou e kali aku nei o kou hoea mai, i hoopumehana aku ai lakou ia oe iloko o na kilihune wai i kiheahea aku maluna ou.

            I ka pau ana ae o kana kamailio ana me keia mau olelo kaukau, aia ho, ua pili mai la ka waapa o ua kaeaea la o ke kulu aumoe, a malalo o ka malu o na laau e hihi ana ma kapa o ka lokowai, i hoop;aa iho ai oia i kona wahi halelana, no ka hele ana aku e kilohi i ka nani o ka home o kana aloha i noho ai.

            Ua hele pololei aku la oia mamua iho o ke alo o ke kekela me ka aui ole ae mao a maanei, e kia pololei ana no ka rumi hookipa oloko o ke kakela a ke aloha e kiei mai la mauna iho.

-------

UA HAALELE MAI LA I KEIA OLA ANA.

-------

            Ma ka hora 6:30 o ke ahiahi Poalima nei i haalele mai ai i keia ola ana o Mrs. Fritz Wilhelm ma kona home ma ke alanui Keeaumoku.  Ua haalele iho la oia mahope nei he kane a  me ke kaikamahine e paiauma aku ana nona.  He wahine oia i kamaaina i ka hapanui o na poe o kela kulanakauhale.  He oluolu a he heahea i na poe a pau e kipa aku ana imua ona.  O ke 44 keia o kona mau makahiki a hookuu mai la i keia ola ana.  Ma ka auina la Sabati nei i hoolewa ia aku ai kona kino make.  Aloha no.

-------

KA LUNA DUTE AWA NUI.

-------

            I ke kakahiaka Poalua nei, ma ka halawai ana a ka Aha Hooko a ke Aupuni, ua haawi ia aku la ka hookohu no ka lawe ana ae i ke kulana Dute Awa Nui ia Richard Ivers, no ke pani ana ma kahi o F. B. McStocker i waiho mai.  Ua onou mua ia aku keia kulana ia Stratemeyer, aka, ua hoole mai nae oia.  I keia Poakolu i lawe ae ai o Ivers i kona kulana.  He kaikunane oia no Mrs. W. G. Irwin.

-------

KE KANAKA OHANA NUI.

-------

            O Jason Webb, o Cumberland, Ky., eia ke poo o kekani hana nui, a ua hilinai no hoi oia, o kona ka ohana nui hookahi ma ka honua nei.  He 19 ka nui o kana mau keiki 1@5 moopuna a me 100 kualua.  O kona hoahanau, Miles Webb, i make i ke 78 o kona mauy makahiki (Jason eia i ke 80), aia ma kahi o 400 ana hanauna. ke he 225 oia huina he mau moopuna a me na kualua.  O kekahi mau hoa e ae o keia ohana, ua kokoke no elike ka lakou mau hanauna me laua nei a ke hoohui ia ka ohana Webbs e noho nei ma ka apana o Cumberland e hiki aku no ke lakou heleuna ma kahi o ka 12,000 poe.

-------

HE KUAI NUI LOA.

NO HOOKAHI PULE WALE NO.

-------

Ua hoemi ia he 25 pa keneta maluna o na Waiwai a pau loa.

-------

            Ua kuai aku au i na Waiwai o ekolu mau Hale Hana Nui Loa ma Enalani.  Ua makemake lakou i ke Dala, ua makemake au i ka lakou mau Waiwai.  Ua loaa mai iaʻu na Waiwai no ka hapalua o ko lakou mau kumukuai, eia lakou maanei.

-------

E KUAIIA AKU ANA MA KE KUMUKUAI EMI LOA I IKE MUA OLEIA.

-------

            E hele mai ma koʻu halekuai i keia Pule, eia an ke kuai nei i na SILIKA, a me LIHILIHI no ka 25 pa-keneta, malalo o ko lakou mau kumukuai iho.  O keia wale no kahi e loaa ai na kumukuai hoemi loa no Hookahi Pule Wale No.

-------

E hoomanao he mau Waiwai Hou keia.

-------

HE LEHULEHU WALE NA KALAKOA LIKE OLE 30 i-a 1.00

-------

L. B. KERR.

Honolulu, Alanui Moiwahine.