Ke Aloha Aina, Volume V, Number 21, 27 May 1899 — Page 5

KE ALOHA AINA

 

POAONO,   MEI  27,  1899.

________________________

 

 

HOOPII  IA  KA  LOIO  KUHINA

O  KE  AUPUNI.

____________

 

HIHI  KAUNOA,  HIHI  I  MANA

________

 

Hauhili Ka Ai A Kawele-a.

________

 

HE  MOOLELO  PIHA.

________

 

(Mai Ka Nupepe Kuakoa mai)

 

          [Eia makou ke hoopuka aku nei i na olelo a ka makamaka Kuokoa, e pili ana no na hana a kekahi mau luna aupuni o ke aupuni poolua Repubalika Hawaii ana e kakoo nei, a i hoea mai hoi kona hopena, ma o ka haaiele ana o ke kokua Loio Kuhina Atkinson i kona kuiiana i paa iho nei ma kela mau la ia aui hope aku la, penei;]

          Ma keia wahi o ko makou pepa o keia la, e ike ai ko makou poe heluhelu i ke nui o ka palapala hoopii i waihoia aku e Loio Humpherys o ka Papa Loio o ka Aha Kiekie o Hawaii nei, e kue ana i ka Loio Kuhina.

          Ma keia palapala hoopii e ike ia ai na mea ano nui i ku ai ka hoopii a ka mea hoopii i ka Loio Kuhina o ke Aupuni.  He mea maopopo hoi, ina e puka mai ana ka olelo hooholo a ka Aha no ka pono o ka palapala hoopii, alaila a kue ana ka Aha, he olelo hooholo i kulike me ke koi a ka mea hoopii.  No ka pono a me ka pomaikai o ko makou poe heluhelu ke hoolana aku nei makou i ka unuhina Hawaii o ka Palapala Hoopii (ma na ano nui nae) i ikea ai ke au nui a me ke au iki o keia mau hana hou.

________

 

          I ka Aha Kiekie o ka Repubalika o Hawaii, Iune, A. D. 1899.

          Ma ka Hihia o Henry E. Cooper, he Loio a he hoa no ka Papa Loio o keia Aha, hoopiiia no ka lawelawe oihana pono ole ana a ku ole hoi i ke kulana oihana loio maikai, ma kona ano he hoa oia no ua Papa Loio la, mamuli o ka hoike a me ka hoopii ana a A. S. Humphreys, he Loio a he Hoa hoi no ka Papa Loio o keia Aha.

          Eoluolu mai ko oukou Hanahano:

          O A. S. Humpherys, ka mea hoopii, ke hoakaka aku nei imua o ko oukou Hanohano, a hoomaopopo aku hoi i keia mau kumu mahope ae nei, penei:

          I -- O ko oukou mea hoopii, ke noho nei ia maloko o Honolulu nei, a no ua manawa a pau i hoi keia mahope ae nei, a no keia wa no hoi, he Loio oia ma ke Kauawai, a he hoa no ka Papa Loio o keia Aha, a ma ia ano Loio a Hoa hoi no ka Papa Loio o keia Aha, ua loaa iaia ka pono o ke lawelawe ana maloko o na Aha Hookolokolo a pau o keia Repubalika, a e ku hoi iloko oia mau Aha, ma ke ano Loio, he kokua ma ka aoao o kekahi poe e ae, e koho ana iaia, ma ka hoopaa ana i loio oia, ma ka aoao hoopii aku a hoopiiia mai paha, ma na hihia a pau, kivila, karaima, a hui paha.

          II -- Ma na manawa a pau i hoikeia ae mahope nei, o Henry E. Cooper, he mea e noho ana ma Honolulu, he Loio oia, a he Hoa no hoi no ka Papa Loio o keia Aha, a no na manawa no hoi apau i hoikeia mahope ae nei o Henry E. Cooper i oleloia ae nei, oia no ka Loio Kuhina i hookohu pono ia a e lawelawe nei hoi no ka Repalika o Hawaii.

          III -- A ma ia ano Loio Kuhina, ua ili iho la ke koikoi o ka lawelawe ana aku i ka hana malalo o ke Kanawai, maluna iho o Cooper i olelo ia ae nei, mawaena o na mea e ae, e ku ma ko ke Aupuni aoao, oia ponoi iho, a ma o ka Hope la paha, maloko o na Aha Hookolokolo Kakau a pau o keia Repubalika, ma na hihia a pau, karaima a kivila paha i komo ai ke Aupuni, a i kuleana ai paha ia, a e ku nohoi oia imua o na Aha Apana, ke koi ia mai oia a hana pela e ka Hamuku o ka Repubalika, a i iole ia, e kekahi Hope Makai Nui o kekahi o na mokupuni; a e makaala no hoi me ka eleu, no ka hopu ana, a paa ka poe i hahai i na kanawai o ka Repubalika, a e hoopii aku ia lakou me ka noiau.

          IV -- Ma na manawa apau i hoike ia mahope ae nei, he Loio o A. L. C. Atkinson, a he Hoa no ka Papa Loio o keia Aha, a ma na manawa no hoi a pau i hoike ia mahope ae nei, oia no ke Kokua a Hope Loio Kuhina i hookohu pono ia e ka Repubalika o Hawaii, a ma ia ano Kokua hoi, ua kaa oia malalo o ka mana pili oihana o ka Loio Kuhina i olelo ia ae nei, a ua paa nohoi oia malalo o na kauoha oihana ku i ke kanawai a pau a ua Loio Kuhina la.

          V -- Ma na manawa a pau i hoikeia mahope ae nei, he Loio o Harry P. Weber, a he Hoa hoi no ka Papa Loio o keia Aha, a ma na wahi hoi a pau i hoike ia mahope ae nei, ua hoohanaia oia i kakauolelo, a i ole, he kokua paha no ka Loio Kuhina o ka Repubalika o Hawaii, a ma ia ano kaukauolelo, a kokua paha no ua Loio Kuhina la, ua paa oia malalo o na kauoha oihana ku i ke kanawai a pau a ua Loio Kuhina la.

          VI -- Ma ka la 25 o Aperila, 1899, ua kakauinoa iho la kekahi o Ah Ngee kona inoa, ua hoohiki hoi, a ua waiho aku la i kekahi palapala hoopii iloko o ka Aha Apana o Honolulu nei, a maloko oia hoopii, e ahewa ana oia ia Abel Carrreira, no ka hana ana i ka hewa hoeha maluna ona, o Ah Ngee i olelo ia ae nei; a ua hoopuka ia hoi he palapala hopu, i hookahua ia maluna o ua olelo hoopii la, e ka Lunakanawai Apana o Honolulu nei, no ka hopu ana ia Carreira; a ua hopuia hoi o Carreira i oleloia, malalo o ka mana o ua palapala hopu la, a mahope iho o na hoopanee lehulehu ana, ua hoolohe ia iho la kona hihia no ka hookolokolo ia ana no ka la 11 o Mei, 1899, a ma ia manawa ua hookolokolo ia oia, a ua hoopai ia oia no ua hewa la e ka Lunakanawai Apana i oleloia ae nei.

          VII -- O ka olelo hoopii a Ah Ngee i oleloia ae la, ua koomakaukau ia no ia e Atkinson i olelo ae nei, kokua hoi o ka Loio Kuhina i olelo mua ia ae nei, a ua kakauinoaia hoi ia e Ah Ngee i oleloia, hoohikiia e ia, a waihoia aku e ia imua o ka Aha malalo hoi o ke ao ana a ua Hope Loio Kuhina nei i oleloia ae nei.

          VIII -- A o Atkinson hoi i oleloia ae nei, mamua ae o kona hoomakaukau ana i ka olelo hoopii i oleloia ae nei, a mamua hoi o ke ano a me ke kauoha ana aku ia Ah Ngee i oleloia, e kakauinoa iho, e hoohiki a e waiho aku i ua olelo hoopii la imua o ka Aha Apana, ua kuka pu oia a ua noonoo pu hoi me Cooper i oleloia, ae nei, no ka mea e pili ana i keia hana, a ua loaa mai hoi kana ae ana e hookumu aku i keia hoopii.

          IX -- O Atkinson i oleloia ae nei, kokua o ka Loio Kuhina i oleloia, ua noho kino oia imua, o ka Aha Apana o Honolulu nei, a nolaila, ua lawelawe aku la i na hana ma ka aoao Hoopii, ma ke wa i hoopiiia ai o Carreira i oleloia mamuli o ka olelo hoopii i

hoikeia aku e Atkinson i oleloia.

          X -- Mahope mai nae o ka heluheluia ana aku o ka olelo hoopii imua o Carreira i oleloia ae nei, a mamua ae hoi o ka hoonohoia ana o ka la e hookolokoloia ai ia, ua noi mai la o Cooper i oleloia ia Atkinson e hoopaa, oia i kekahi loio mawaho no ka lawelawe ana ma ka aoao hoopii ma ua hihia la; a nolaila, ua hoopaa mai la o Atkinson i oleloia ae la i ko oukou mea hoopii, no ka lawelawe ana ma ka aoao hoopii.

          XI -- Ma ka la 9 o Mei, 1899, ua Laiia mai la ko oukou mea hoopii, e ku loio mai ana ma ka aoao o Carreira i oleloia, o Harry P. Weber, ke kakauolelo, a kokua paha o ka Loio Kuhina i oleloia ae nei, no ke pale ana i ka mea hoopiiia, no ka hewa hoeha, elike me ia i hoikeia ae nei; nolaila, ua hoouna koke aku la ko oukou mea noi ia Weber i oleloia, a hoakaka aku la imua ona i ka hewa loa, a ku ole hoi i ke kulana maemae pili aupuni, a pili oihana no hoi, a me ke ano ku i ka pono io maoli, ko ka Loio Kuhina, a o kahi lima lawelawe ///