Ke Aloha Aina, Volume V, Number 20, 20 May 1899 — Page 6

KE ALOHA AINA, POAONO, MEI 20, 1899.

 

HE MOOLELO WALOHIA

NO

ALANADELA

-----

Ka Wahine hoopahaohao o ka Aahu Keokeo.

A I OLE

Ka Loaa Hookani Pila Hapa o ke Kulu Aumoe.

-----

            I ka hoopau ana ae o ua Bonita nei i kona leo oia koke no ka wa i hooho like mai ai ua mau powa la me ka leo hopo ole, penei:

            E ko makou haku, aole loa he hookahi iwaena o makou he mau manao kanalua kekahi no ka hooko ana aku i kau mau kauoha ano nui, a ina no hoi no ka make he mea ia a makou i hopo ole.

            Ae, ua pono, wahi a ko lakou haku i hoomau mai ai, e hoolohe mai ko oukou mau pepeiao a eia ua hana ano nui la, ua haawi mai nei ko kakou haku wahine he kauoha ia'u, oia hoi, eia iwaena o kona mau hoahele he wahine iloko o ka aahu kane, a ua makemake loa oia e hookaawale mailoko aku nei o ko kakou home. E hoomaopopo pu iho hoi he uku makana kiekie kana e haawi mai ana ina e holopono ana ka kakou mau lawelawe ana.

            Ua lilo keia uku makana i mea e hoohauoli ia ai ka puuwai o ua poe powa la me ke kali ana no ke poha mai o ka leo kauoha o ko lakou alihikaua no ka nee ana aku.

            A no kekahi mau minute ka hoalii ana iho ana o ka meha malaila, oia koke no ka wa i unuhi ae ai ua Bonita la i kana pahikaua mailoko ae o kona wa-hi me ke poha pu mai o kona leo i ka hooho ana mai.

            E a'o mau kauwa e unuhi ae i ka oukou mau pahikaua ina ua makaukau oukou, a e ukali pu mai hoi mahope o'u, no ka mea, o ka wa keia o ka hana.

            I keia manawa no i o aku ai o Bonita i kana pahikaua no loko o ka halealii, a ia wa koke no i ukali aku ai na powa mahope ona.

            Komo aku la ua Bonita nei no loko o ka home o ko lakou haku powa i hala aku i ka make me ka ukali pu ia aku e kona mau kanaka a me na kapuai wawae e nihi malia ana, ua hoea aku lakou no loko o na rumi moe.

            Aole no hoi i lilo i mea hana nui na lakou ka huli ana aku i kahi o ka lakou mea e waiho ana, no ka mea, ua halawai aku la lakou me Magarita e kali mai ana no ko lakou hiki aku ma kekahi rumi, a nana i pailaka aku malalo o ka hoomalamalama ana a kekahi ipukukui helepo no kahi a ke koa opio Walata e hiemoe ana me kana ipo aloha ma kona aoao me ka mahui ole ae eia he poino ua kokoke mai i ka ipuka hale.

            No Alanadela hoi, aia pu oia iloko o ka hiamoe kulipolipo me ka noonoo ole ae, o ka hoaloha ana i paulele nui ai i na la i hala aku la e hoopoino mai ana oia iaia i ka wa e hiki mai ai i kona home.

            I keia wa i hoea aku ai ua Magarita nei me kona alihikaua no ka rumi o ka kaua mau aloha e walea ana me Niolopua, oia no ka wa i haawi ae ai o Bonita i kana kauoha me ka hawanawana, e nana aku i kela kanaka opio ui e waiho mai la me na oho nani e luhe la ma na kipoohiwi, e hopu aku iaia me ka palanehe nui, a mamua hoi o kona hoomaopopo ana i kona poino e hookaawale mai iaia mai kela kanaka opio e moe la ma kona aoao. E a'u mau kauwa hoolohe e hana i keia hana me ka eleu nui, ano e nee me ka hoohakalia ole.

            I ka hooki ana iho o ua Bonita la i kona leo hawanawana, oia koke no kona wa i komo aku ai, a ma ke poo o Walata hapai ae la oia i ka oi o kana pahikaua me ka hoopololei ana iho i kona maka ma ka puuwai o ke kanaka opio e waiho kahela ae ana me ka makaukau hoi e lumai aku i ua pahikaua la iloko o ka puuwai i kona wa e puiwa ae ai a hoao mai e kue.

            A no na kanaka hoi, ua komo mai la lakou me ka palanehe nui me ka lakou mau pahikaua hoi e hulali ana iloko o ko lakou poholima me ka makaukau ana e paio aku i ka mea e kue mai ana.

            A i ka hiki pono ana o ua mau powa la ma ka aoao o ka moe o ka mau aloha e hiolani nei, oia no ka wa i iho malia iho ai na lima o ua mau powa la maluna o ke kino o ka ui nohea a hapai ae la iaia me ka palanehe a me ka hookaulia ole iho hemo koke aku la lakou no waho me ka lawe pu ana aku i ke kino laahia o ka kaua Alanadela mai ka pali aoao aku o kana ipo aloha.

            I keia wa e hana ia nei o keia hana lokoino maluna o Alakadela, oia no Walata ke pauhia la i ka hiamoe, a no kekahi mau sekona pokole wale no ka haluku ana ae o ua rumi la, aia hoi, ua hoalii hou mai la ka meha maloko o kona mau paia.

            I ka hoomaopopo ana o Bonita, ua holopono na hana i lawelawe ia e kana mau kauwa, me ka puuwai hauoli, haalele koke iho la i ke kiai ana ia Walata a hemo koke aku la iwaho no kahi a kona mau kanaka me ka lakou ukana makamae e kali mai ana nona no Alanadela hoi, ua hoopuiwa ia ae la oia, a puoho ino ae la mailoko mai o kona hiamoe kulipolipo, a a, aole nae oia i hoomaopopo koke eia oia iloko o kekahi poino kuhohonu.

            I kona wa nae i hemo aku ai no waho o ka hale a i ka wa hoi a na kulu kehau huihui i miki iho ai ma kona mau papalina ua kakaa loa ae la kona mau maka a ike ae la i keia mau kino kanaka no lakou na helehelena malihini ana i ike ole ai mamua.

            Me ka hoohakalia hou ole aku, ua hoomaka koke ae la oia e uwa me ka leo nui, aka, mamua ae nae o ka puka pono ana o kona leo, ua upiki kokeia ae la kona waha me ka hookomo pu ia iho i kekahi popo welu.

            Oni ae la oia me ka ikaika me ka manao ana e pakele ana oia, aka, ua kuhihewa loa nae, ia minute no ua hookuu ia iho la ilalo o ka lepo, me ka hauhoa ia ana o kona mau lima me na wawae me ke kaula. A o kona mau maka hoi, ua uhi ia iho la ia me kekahi hainaka ulaula.

            I ka hoea ana mai o Magarita a me Bonita no kahi a ke kanaka e kali ana, oia no ka wa i haawi mai ai o Magarita i kona hoomaikai i ka pane ana mai.

            E o'u mau kana hoolohe, ke haawi aku nei au i ko'u mau hoomaikai ana he nui ia oukou no ka holopono o ka oukou mau hana i lawelawe iho nei, a e hoomanao iho he uku makana kiekie ka'u e haawi aku ana i ka wa e pau ai o ka oukou hana.

 

HE KEAKA LEALEA LOA.

-----

            E haawi ia ana maloko o ka Hale Mele Hou, ma keia po Poaono, Mei 20, he keaka lealea loa, a he nui pu hoi me na hana hoomakeaka e paneeia mai. O ka paani mua a keia hui e hoikeike mai ana, oia "ka huakai no Chinatown."

            O keia ka hui keaka Hoyt a me McKee o Nu Ioka, ma ka lakou huakai kaapui honua a hiki loa i ka hoea ana aku i ka hoikeike nui o Parisa, aia lakou malalo o ka hooponopono ana a Mr. Cook, ka haole e ake nei e lawe aku i ka hana lahui. Eia ke kuai ia nei na tikiki ma kahi o Wall, Nichols Co. me ka holomoku nui.

 

AOLE HE MAOPOPO O KAHI E HOOMOE IA AKU AI.

-----

            Ua olelo ae ka nupepa Hawaii Herald o Hilo, o kekahi hana paakiki keia i ikeia e ka Hui Kaa o Hilo, oia no kahi e hoomoe ia aku ai o ka laina kaaahi maloko aku o ke taona a puka ma kahi aoao no Hamakua. Ina e hoolilo ia ana o Waiakea kahi hooulu kaaahi o ke alahele no Hamakua i manaoia ai me ka aekai, me ke kaalo ana ae maluna o ka muliwai o Wailuku ma kahi o ka hale makeke, aka, ua hoolilo ia nae na wahi makai o ke alanui Alo i paka e ke aupuni. A ina aole e ae ia ana keia alahele, alaila, e hoololi ia ana kahi e hoomoe ai i ke alanui kaaahi ma ke kua o ke kulanakauhale. Ua hooko pu ae o Eneginia Nui Kiuegel i na mea e pili ana no keia mea.

 

            Ma ka mokuahi Amerika Maru i huli hoi aku ai o Mesers S. a me F. Tojita no Iokohama, na Iapana i koho ia mai nei ma Amerika Huipuia, no ka nana ana ma ka aoao o ke aupuni o Iapana i kapili ia ana o kekahi mokukaua Iapana.

 

HE KUAI NUI I IKE MUA OLEIA

E hoomaka ana ma ke Kakahiaka La Apopo.

-----

NO HOOKAHI PULE WALE NO.

-----

E Hoemi ia ana he 25 pa keneta maluna o keia mau Waiwai malalo iho:

-----

NA LOLE MAKALENA PILI ILI,

PALE PAKAUKAU LILINA,

KAWELE HOLOI LIMA,

MAMALU NUI a LIILII

PALE ULUNA,

HALII MOE.

Pela pu me ka Makou Mau Waiwai SILIKA Nani loa.

-----

E hoemi pu ia ana 50 pa Keneta o ka makou mau PALULE WAHINE.

-----

            O keia mau WAIWAI a pau he HOU a ua WAE PONOIA, a eia ke kuai ia aku nei me ka Makepono loa. O ka mea e hikimua mai ana e lilo no iaia ka wae mua ana.

-----

E NAUE MAI I IKE KUMAKA, HE OLE KA LOHE PEPEIAO.

-----

L.B. KERR.

Honolulu Alanui Moiwahine