Ke Aloha Aina, Volume V, Number 19, 13 Mei 1899 — Page 1
| This text was transcribed by: | Mahealani Jones |
| This work is dedicated to: | No 'Oiwi Parker Jones, he kanaka malama i ka 'olelo. |
KE ALOHA AINA
UA MAU KE EA O KA AINA I KA PONO
HOOKUMUIA I MEI 20, 1895
POAONO, MEI 13, 1899.
BUKE V. KA NUPEPA ALOHA AINA HELU 19
E hoopuka mau ia aku ana mai ka Poakahi a ka Polima o na pule a pau o kela a me keia mahina.
Ka Uku Pepa, he 20 keneta o ka pule. No ke kope hookahi he 2 keneta.
E loaa no ka pepa maike Keena aku o KE ALOHA AINA, a mai ka lima aku o na Luna Lawe
Pepa.
E pai ia no na Olelo Hoolaha, na Kanikau a me na Mele Inoa, me ke Dala kuike. Aole nupepa
ma ka owili pakahi e hoouna ia ke ole e hookaa mua ia ka uku pepa.
E hoouna pololei mai i na Nuhou, na Kumumanao, na Olelo Hoolaha, na Kanikau a me na Mele
Inoa i ka Lunahooponopono o keia Pepa.
Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi
inoa kapakapa ke ole e hooike mai i ka Lunahooponopono i kona inoa ponoi.
Ka Nupepa Puka Pule
Ke - Aloha - Aina
Hookahi makahiki...........................................................................$2.00
Eono mahina....................................................................................$1.00
Ekolu mahina................................................................................... .50
Hookahi mahina............................................................................... .20
EMMA NAWAHI.
Puuku o
Ke - Aloha - Aina
EDWARD L. LIKE.
Lunahooponopono a Hope Puuku
S. P. KANOA.
Hope Lunahooponopono.
O na kauoha Nupepa me na hookaa Dala, e hoona pololei mai o
ka Puuku ma Honolulu.
---------------------------
NUHOU KUWAHO.
HOPUIA NA MOKU AMERIKA E NA KIPI.
Vitoria, B. C., Apr. 24. O ka nupepa Manawa Manila o ka la 28 o Maraki, i loaa mai nei maluna o ka Emeperesa o Kina e olelo ana, ua loaa aku la i ka mokukaua lokatsona ka mokuahi San Joaquin ua huna ia iloko o kekahi wahi kuono e kokoke ana i Dugapan. Ua haalele aku oia ia Manila ma ka la 10 o Ianuari no Cagayan a me Aparri, a i kona wa iwaena o na awa o San Fernando a me Currimao, ua ulu ae la he kipi iwaena o na luina Pilipine . Ua pepehi ia iho e lakou ke kapena a me ka eneginia ekahi, a lawe ae la i ka mana o ka hookele ana i ka moku, a o kekahi mau aliimoku e ae, ua mahuka aku lakou maluna o na waapa. Ua lawe ia aku e lakou keia moku no loko o ke kuono, mahope hoi o ko lakou pakaha ana a me ka hoopoino ana i kona mau enegini a me na rumi ohua, ua haalele iho la lakou i ka moku.
O na moku i kali loihi ia Gloria a me Saturnus, ua hiki hoi mai nei laua i Manila. Ua haalele iho ke Gloria ia Manila ma ka la 10 o Ianuari, no Casayan a me Currimao, a o ka mokuahi Satunus no San Fernando a me Aparri, ma ka la 1 o Feberuari, i ko laua hoea ana aku i Currimao, ua kau mai la kekahi poe kipi i lako me na mea kaua maluna o ka moku me ke kauoha no ko laua noho ana maloko oia awa. Ua pau aku na ukana a me na lako ai o ka moku i ka hao ia e na poe kipi me ka mahuka pu aku hoi o na luina a pau o ka moku. I ka wa i ae mai ai na kipi ka hookuu ana i ka moku ma ka la 6 o Maraki, ua haalele aku la ka mokuahi Gloria me ke kapena, ka wiliki a me hookahi luina mawaho ae. O ka mokuahi Saturnus he 15 ona mau kanaka, a ma ka lakou huakai huli hoi he nui na manawa a ka wiliki nui i kau mai ai maluna o ke Gloria no ke kokua ana.
Ua laweia aku e na kipi na pu a pau mailuna aku o ka moku. I keia wa ua hoike mai na kapena, o na kanaka ma Currimao, ua hoolako ia lakou me na pu raifela Mauser, Remington a me na kakaka. Ua olelo ae lakou, aole loa lakou o haawi pio mai ana i na Amerika.
EMI HOPE NA PILIPINE NO SAN FERNANDO.
Nu Ioka, Apr. 27. He lono telegarapa kai loaa mai nei i ka nupepa La mai Manila mai, e olelo ana: O ke kaua kue ana aku i na kipi ua hoomau ia aku i keia kakahiaka me ka ikaika, me ka uuku o na poino ona Amerika. Ua kipaku ia aku na Pilipine no San Fernando, ma kahi he eiwa a i ole umi mile ma ka akau komohana aku o Calumpit, kahi hoi a lakou e noho nei i keia wa.
O keia hakaka ana ua ike ia he mau hana wiwo e na koa Amerika, nana hoi i hoauhee aku i na kipi. Ua hoomaka mai ai o ka malamalama e hiki ai ke ike ia aku ke kahua o na enemi mawaena o na koa o Kenerala Wheaton ma ka hema a me na kipi ma ka akau o ka muliwai Rio Grande. Ua ki mai na kipi me kekahi pukuniahi kahiko. He nuku loa hoi na poino i ike ia iwaena o na Pilipine, mamuli o ka hiki ole i na koa ke nee aku imua.
Ma ka hora 10 e paa ana na kipi i ko lakou kulana ma kahi he ekolu mile maloko o kekahi auwaha ma ke kae o ke miliwai. Ma keai wa, ua kauoha ae la o Konela Funston i elua o kona mau kanaka no ka au ana maloko o ka muliwai ma kekahi aoao me ke kaula no ka hoopaa ana i ke kumulaau ma kahi a na kipi e ki mai ana.
He elua mau koa i hooko aku i ka makemake o ke Konela, a au aku ia iloko o ka muliwai mawaena o na poka e hiolo makawalu ana, a ua hoea aku la laua ma keia aoao me ka loaa ole he poino, a hoopaa aku la i ke kumulaau. I ka wa e hanaia nei o keia hana wiwoole aia na koa Amerika ke ki hoomau la i na enemi.
Ua kapili koke ia ae he mau lana elua, a maluna oia mau mea i kau aku ai o Konela Funston me elua o kona pualikoa malalo o ke kokua ana a ke kaula mai ka lawe ia ana aku e ke au o ka muliwai. I ko lakou pae ana ma kela aoao, ua lele kaua koke aku la lakou maluna o ka enemi me ka hoauhee ana aku ia lakou.
O ka nui o ko makou poino i keia la, he hookahi i make a me eono i hoeha ia. Mawaena o lakou e ekolu aliikoa. O ka nui o na poino o na kipi, he kauaha i make a hoehaia. he kanakolukumamahiku o na enemi i hopu pio la me ka lakou mau lako kaua.
-------------------
Eia o T. Murata ke kuai hoemi nei i na ano Papale like ole.
ULIA POINO IWAENA MOANA.
Ma ka ku ana mai nei a ka moku lawekoa Senatoa mai Kapalakiko mai, ma ke kakahiaka Poaono nei, i lawe mai ai oia i ka lono no kona halawai ana me ka mokuahi Elihu Thompson ma kahi he 500 mai Kapalakiko mai, ma ka hora 4:21 o ke kakahiaka nui Poaono, Aperila 30, loko nei o ke kulana kupilikii. Mamuli o ka haki ana o ka iho e paa ana i ka huila mahope o ka moku, a he mau hora mahope, ua haule aku la kona huila.
Ua haawi mai ka Elihu Thompson he mau hoailona poino, a ua hoouna koke ia aku he aliimoku o ke Senetoa maluna ona. He 12 o kona mau kanaka i hookau ia mai iluna o ka Senatoa, a he hookahi tona me ka hapa lako ai i haawi’a aku i ka moku poino.
Ma ka hora 6 o ke kakahiaka o ka la 2 o Mei, ua halawai iho la ke Senatoa me ka Moana, a maluna ona i hookau ia aku ai na kanaka o ka moku poino no ka hoihoi ana aku i Kapalakiko.
O kahi i halawai ai o ka Elihu Thompson me keia ulia poino ma ka lonitu 132 degere 14 minute Komohana a me latitu 34 degere 22, minute Akau. Ua manao ia aole oia e poino, oiai, ala oia ma ke alahele o na mokuahi e holo mai nei i Hawaii nei mai Kapalakiko mai. Ua haalele iho ka Elihu Thompson ia Honolulu nei, ma ka la 18 o Aperila, malalo o ka hookele ana a Kapena B. B. Whitney me ka ukana o 18,809 eke kopaa nona ka waiwai no o $81,357.
------------------
He manao koi hoopukaia ae ma loko o kekahi nupepa namu o Hilo e @ mai ana i ka hui keaka a Janet Waldorf e keaka nei maloko o ka Hale Meie Hou, no ka holo ana aku ilaila e paani ai i na la a me na po ao ke Kinau e ku ai malaila, a huli hoi hou mai no hoi maluna ona. Ua lohe walei me he mea la, e holo io aku ana keia hui keaka no Hilo, i ka wa nae a ko laila mau @up@ e hoo@ mai i na ala paa. Hoopiipii mau no nei o Hilo i kona kulana e inaina ia aku ai e ko nei poe.
PIHOIHOI KE KULANA MA PONAPE.
Kapalakiko, Apr. 24. Ma ka la inehinei i hoea mai ai ka mokuahi Ruk mai na kai mai o ka hema. Ua lawe mai nei oia i ka lono no kekahi makani ino ma Kusaie me ka bakaka ma Ponape, ka make ana o E. D. O’Keef, ka moi keleawe o Yap, ka hookuu ia ana mai o J. V. Melander e na Sepania a me ka ili ana o ka moku Horatio. Ma Ruk ua ulu ae he kaua lahui mawaena o na aoao hoomana elua. Ma Ponape hoi, aia o Geremania ke hoao ia e lawe ae i na keehina paa, a aia na kanaka ke liuliu la no ke kaua ana i ka wa e ae ia aku ai ka haawi lilo ana i keia wahi.
Wahi a ke Kapena i hoike mai ai, aia o Ponape iloko o ke kulana pihoihoi me ka manaoia e poha ae ana he kaua, aia na koa kiai ke maka’u la. He elua lahui i ala kue aku la i na Sepania, aohe he hiki ia lakou ke hana aku, aka, o ka noho pu wale iho no iloko o ka pa kaua. Ua hopuia e lakou o Henry Nanapi, ka mea hoi a ka lahui i manao nui ai. Elike me ka loihi o ka malama maikai ana a ua Sepania ia Nanapi, pela e pakele ai o Ponape, aka, ina e make ana oia, a i ole, mahuka paha, e pulumi aku no na kanaka i na mea a pau mamua o kona alahele.
------------------
KA HALE KAAWAI HOU
------------------
Ua kokoke loa e paa ka hale kaawai hou e kukulu ia nei ma ke kihi o na alanui Piikoi a me Waila. Ua manao ia, e pau ana oia ma na la hope o keia mahina. O ka nui o keia hale he 33 kapuai laula a me 45 kapuai o ke alo. E kukulu ia aku ana he puna nona ke kiekie o 64 kapuai mai ka lepo no, he umi kapuai maluna o ke kaupoko o ka hale kaawai. He hookahi ona kinaiahi a me hookahi kaa ili e hoihoi ia aku ana iwaho o laila i kona @ i paa ai. O ka nui o na lilo o ke kukulu ana i keia hale ma kaho o ia e $4,000.