Ke Aloha Aina, Volume V, Number 12, 25 Malaki 1899 — Page 8

KE ALOHA AINA

 

HE KANIKAU NO KAIULANI.

 

E Kalani e Kapili Likelike,

Eia mai ko wehi ko lei mamo,

Ko Ahuula hulu oo,

Hii ia aku i ka poli ou e Kalani,

     Hui.

   E Kalani e ka Wekiulani,

   Ala mai oe moe loa nei,

   E ka pua nani o Ainahau,

   Milimili a Keohokalole,

Aloha ko home i ka iu,

Home la’ia ke ala i noho ai,

E o mai i kou inoa,

O niniu ka pua i ke Kaona,

   Hakuia e ka Hui Lei Mamo

 

 

HE MOOLELO WALOHIA

- : NO KA: -

UI SOPAEA.

Iloko o ka Hanohano

- : A ME: -

TOME BAKALA

Ka Ilihune.

 

[Hoohenoia no KE ALOHA AINA.]

 

  I ka hoi hou ana mai o ka ikaika iloko o ko Tome mau lala, oia no ka wa i haawi koke ia ae ai ke kauoha no ka haalele koke ana iho i ke kulanakauhale, no ko lakou hoi ana no ko lakou home noho kuahiwi.

  He oiaio, ua haalele koke iho la lakou ia wahi iloko o ka wa pokole, aole hoi lakou i hele hou aku ma kekahi wahi okoa, elike me ke ano mau o ka lakou huakai hao a kaili waiwai.

  A iloko wale no o ka wa pokole, aia lakou ke kuupau la i ka holo o ko lakou mau ho me ka puahi nui no ko lakou kaawale aku mawaho o ke kulanakaule.

  O ka ne-i o ka honua i ka halulu o keia mau kapuai lio, e kuupau nei i ka holo, oia ka ka moi o  Wale i hooho ae ai me ka leo nui, ua komo hou mai anei na poe omokoko o ke kuahiwi e hooneoneo i ko lakou aina.

  He olelo pololei kela a ua moi la i puana ae ai, oiai ua ahai aku la ka pupuhi i ka i’a o Ukoa i ua peoe keiki la o na ululaau, me ka lakou mea i makemake ai, me ka hoopilikia ole mai i kekahi mau mea e ae.

  I ko lakou wa i puka laelae aku ai mawaho o na palena o ke kulanakauhale, oia no hoi ko lakou wa i leie iho ai mailuna iho o ko lakou mau lio pakahi no ka haawi ana i manawa hoomaha no lakou.

  A iloko hoi o keia wa i huli ae ai o Tome me na manao aloha no kona makuahine, a ninau aku la Ikona iuaui makuakane, aia la ihea kona makuahine i keia wa, aia anei oia iloko o na lima kakauha o kela moi puuwai lokoino.

  E hoike mai me ka huna ole, oiai ke aloha makua e paila nei iloko o ka puuwai me ka ehaeha, a oiai hoi o oe wale no ka mea hiki ke hai mai mawaho ae o keia poe o kamaaina ole ko lakou mau ano, a me ko lakou mau helehelena, a malia nae paha he poe hoaloha wale no keia poe a pau. 

 

 

AIA O RUSIA KE HOOPIHA LA IA KINA INA KOA.

 

  Vanekoua, B.C., Mar. 7. Ua lawe mai nei ka mokuahi Emepera o Inia he lono, a a ke aupuni o Rusia ke hookomo nui la i kona mau pualikoa ma Pota Ata a me Talien Wau, malalo o ka olelo ana o na pualikoa e kiai nei ma na pa kaua ma keia mau wahi he uuku loa. Aole i emi iho malalo o 9,000 mau kanaka i hoolele ia aku ma Pota Ata maloko o ka mahina i hala aku la, a ua manaoia ka pakui ana mai i 25,000 mau koa hou, no ka hoomahuahua ana aku a hiki i ka 36,000 kanaka, no ka hoomahuahua ana ae i na pa kaua, e pakui hou ia mai ana he 15,000 kanaka no Pota Ata a me 8,000 no TalienWan.

 

 

NUI NA OLA I POINO.

 

  Vitoria, B. C. Mar. 8. Elike me na lono i loaa mai nei mai ke kapitala o Korea, maluna mai o ka mokuahi Emeperesa o Inia, he mau mile o na kapakai o Korea i uhi ia e ke kai mimiki, ma ka hoomaka ana o na la mua o ka mahina o Feberuari.

  Ua hikiwawe loa k@ hoomaka ana mai o ka ino, nolaila, ua loaa ole i ka lahui kanaka e noho ana maluna o na waapa he manawa no lakou e imi ai i kahi e pakele ai o ko lakou mau ola. O ka nui o na ola i poino, he nui hewahewa. O ka mea kakau nupepa Sanghai Mercury e noho ana ma Chemulpo, ua kakau mai nei oia no kana nupepa penei:

  I ka wa a na ao eleele e uhi ae ana, i na paia lewa kalae o ke kakahiaka Poalima aku nei, Feberuari 3, ua hoea koke mai la kekahi makani ikaika loa i awili ia e ka ua. Ma na kapakai komohana hema a me komohana, ua ikaika loa ka pahola ana a ka ino. Malaila, i hoomau ai ka ikaika o ka ino, a pulumi aku la ke kai i na hale laau o na kanaka no kekahi mau eka. He mau tausani o na ola i poino me ka hiki ole ke hoike ae i ka nui hewahewa o na poho. O kahi kauhale o Kungsan kai nui loa na poino. I keia wahi i lawe ia aku ai he mokuahi Iapana no kekahi mau ahua pohaku, a malaila i lawe loa ia aku ai oia he mau i-a no loko o ka aina. Ua kiekie loa ke kai ma keia wahi a ua pau aku he mau hale lehulehu i ke kai, a ua make he elua mai ola.

  Ma Chemulpo ua piholo he mokukuna Iapana, ua piha oia me ka nanahu. Ua hoopiha ia ke kaikuono me na apana o na waapa o kela a me keia ano, a he mau haneri o na kino make i pae aku i kula.

 

 

PACIEIC IMPORT CAMPANY.

 

Ina Mea a pau e Hoomaopopo i Keia.

 

Ua lawe mai makou i ka hauoli o ka hoike ana aku imua o ka lehulehu o Honolulu a me na mokupuni a pau, e weheia aku ana ka halekuai nui o ka Pacific Import Co., o na Lole Aahu helu ekahi a me na Waiwai Nani e ae ma ka la 29 o Maraki malalo o la hooponopono ana a Mr.S Ehrlich.

Ma ka Poalua, Mar. 28, e weheia ai na puka, ma ka hora 7:30 p.m., e haawiia ana he ahamele nui e ka hui himeni Quintette me ka malama pu ia he mau hoikeike kii hooleleaka mawaho o ka lanai ke loaa ole he kuia, a oia pu hoi ka wa e makaikai ia ai na waiwai hou i wae pono ia e Mr. S. Ehrlich a me elua mau kokua i huli aku ma na kulanakauhale nui o ka Hikina no 60 la ka ohi ana ina waiwai i kupono no keia wahi.

Ua hiki ia makou ke olelo ae, aohe halekuai nui ma Honolulu nei i loaa aku na waiwai nui hewahewa o ka Pacific Import Co. Oiai, he lala keia halekuai no kekahi halekuai nui ma Kaleponi. ua hiki loa ia makou ke kuai aku i na waiwai ma na waiwai e hoopuiwa ana ia oukou.

O ko makou luna hoohana Mr. S. Ehrlich, i ka Hikina aku oia kahi i wae pono ai i na waiwai i kupono no keia mau mokupuni, a ua maopopo hoi iaia na mea a pau a na kanaka maanei i makemeke ai.

Ua manao makou he mea kupono ole ka hoomau ana aku i keia leta loihi, no ka mea, e ike koke ana no na lede o Honolulu i ka “oiaio” o na mea e pili ana i ka Pacific Import Co. A na lakou e walaau leo nui aku i ka “oiaio” mamua o ka hiki ia makou ke hoolaha aku.

No ka mea e pili ana i ka halekuai, e loaa ana no i na Lede he wahi nani loa ia no lakou e kuai ai, a oiai, he hale hoi keia me ka nui o ke ea, ka malamalama, akea, a i haneia me na mea ano hou, ke hoao nei makou e hoohauoli aku i ka lehulehu o ke kulanakauhale nei me ke kumukuai haahaa

Me ka oiaio,

      PACIFIC IMPORT Co.

Alanui Papu.        Model.

 

 

BROKA,

$ 10.000   MA KA   $ 10.000

Waiwai paa

 

Ua makaukau e Hoaie aku ma ka Moraki i ka poe a pau, he mau Waiwaipaa hihia ole ko lakou.

Ua makaukau e huli maloko o na Buke Aupuni. i na Aina pohihihi ma na ano a pau a me ka hooponopono aua i na Aina e paaia nei me ke kuleana ole.

Ua makaukau e hana i na Palapala Kuai. na Palapala Hoolimalima. na Palapala Moraki a me na Palapala o kela a me keia ano i ku i ke kanawai.

E ohi ia no na Aie o kela a me keia ano ke waiho ia mai. E hookoia no na kauoha me ka el@u..

Ke kono ku nei i na makamaka a pau o kipa mai me ko maua Keena Hana. ma ka Hale ma Ewa e ka Hale. pule e Kaumakapili. Alanui Beritania JOHN PRENDERGAST. (Kaoamawaho.)

WILLIAM MOSSMAN. (Mokimana)

Honolulu , Mei 24, 1898.   3m dl WK

 

 

MAU WAIWAI HOU!!!

 

240 Pahu o na Lole Aahu Nani Loa.

 

 

Ua hoouna pololei loa ia mai na Hale Hana Lole Nui mai Europa mai.

 

 

E WEHEIA ANA I KA POAONO, MARAKI 18, 1899.

 

 

NA WAIWAI NANI LIKE OLE:

 

 

Na KALAKOA MAIKAI 30 i-a i ke 1.00, 10,000 APA O NA LOLE HOU ma ke 5 keneta o ka i-a,

LIHILIHI VALENCIA like ole 12 i-a i ka 25 keneta,

LOLE PILI ILI o na Lede ma ke kumu kuai emi loa,

Na KAKINI WAHINE ma ke kumukuai i hoemi loa ia,

 

 

NA PAPALE PAIKINI HOU LOA O NA WAIHOOLUU LIKE OLE O NA ANO A PAU.

500 PAPALE i kinohinohiia no ka 1.00 o ka mea hookahi.

 

 

Nolaila o ka manawa keia no oukou e loaa ai na waiwai Europa ma mua o ka hoea ana mai o ke kanawai Dute o Amerika Huipuia.

E Hele Koke Mai i Keia Wa.

                            L.B.KERR.

Honolulu Alanui Moiwahine