Ke Aloha Aina, Volume V, Number 11, 18 March 1899 — EO IA HAWAII MOKU O KEAWE. [ARTICLE]

EO IA HAWAII MOKU O KEAWE.

Ma ke ku ana mai nei o ke Kinau i ka hora 4 a oi o ke ahiahi Poaono nei, i hoea mai ai o Henry West, o ka Ua Kanilehua o Hilo, ma ke ano, he Elele a he Komite na ke aloha, ma ka aoao o na makaainana aloha alii oia apana, ka apana hoi nana e hoohiluhilu nei i ko kakou mau alii oiwi, me ka manao aloha alii oiaio e paa mau ana iloko o ko lakou mau puuwai. Ua hoouna ia mai oia aole ma ka manao o ka mea hookahi, aka, mamuli o ka makemake o ka lehulehu e lawe mai i ka lakou mohai hoohiwahiwa no ke kino a me ka olowaa o ua Lani Opio la i hoopale aku ia lakou ma keia ao. I kona hiki ana i ka uwapo o Ainahou, ua kau iho la maluna o ke kaa no ke kamoe ana aku i ka hale, ka pahuku hoi e hoomaha ana no ka wa hope loa, ma ka luakini o Kawaiahao, a iloko o na waimaka e hiolo ana mai kona mau lihilihi mai, i kukuli iho ai ilalo me ka ehaeha, me ke kahoahoa ana aku, he elele oia na ke aloha i hoouna ia mai. A ma ia wa no hoi oia i makana aku ai i na kihene pua lehua, na owili lei hala o Upeloa, a me ka maile kupaoa o Panaewa. Aloha ka au ana mai o ke kai loa, e noho aku ana kamaaina o ka hale. A malalo hoi o ke kauoha, ua komo aku la oia i hoa no ka puali ku kahili o ke Alii Opio. A ua komo pu hoi i ka hoolewa o ua Wohi la i hoopale mai la ia kakou ka lahui. Ua eo no i ko Hilo Elele aloha Alii. Nui ka mikiala. Ke papahi aku nei makou i na mahalo kiekie ana i na makaainana aloha alii o ka Apana o Hilo, ka lima akau hoi o na Ahahui Aloha Aina o ko Hawaii Paeaina,

ma na hana mikiala a pau, ina no ka hauoli, aia no lakou e komo pu ana, a ina hoi no ke kaumaha, aia no lakou e awaiaulu ana me ka nana ole aku na hai lakou e ao mai. Nui ke aloha, a nui pu no hoi me ke kaumaha. Aloha no!